No te aha e tiaturi ai i te parau tohu o te Bibilia
MEA maoro to te Arii Pyrrhus no Épire i Heleni apatoerau tooa o te râ aro-noa-raa e te Emepera Roma. No to ˈna hinaaro rahi e ite papu i te faahopearaa o te reira, ua haere o ˈna i te vahi tohuraa no Delphes. E nehenehe râ te pahonoraa tei horoahia ia ˈna ra e maramaramahia na roto i na auraa e piti i muri nei: (1) “Te parau atu nei au ia oe, te tamaiti a Éaque, e nehenehe ta oe e haavî i to Roma. E haere oe, e hoˈi mai oe, eita oe e pohe i roto i te aroraa.” (2) “Te parau atu nei au e e nehenehe to Roma e haavî ia oe te tamaiti a Éaque. E haere oe, eita oe e hoˈi mai, e pohe oe i roto i te aroraa.” Ua maiti o ˈna i te tohuraa matamua e ua faatupu oia i te tamaˈi ia Roma. Ua pau o Pyrrhus.
Mea matauhia te mau tohuraa a te mau taata hiˈohiˈo no te tau tahito no to ratou huru papu ore e te auraa piti. Eaha râ no te parau tohu o te Bibilia? Te parau noa râ te tahi feia faahapa e e ere te mau parau tohu i roto i te Bibilia i te mea maitai aˈe i te mau tohuraa a te mau taata hiˈohiˈo. Te manaˈo ra teie feia faahapa e ua riro te mau parau tohu o te Bibilia ei faaiteraa atea o te mau ohipa e tupu mai a te tahi mau taata aau maramarama, i te rahiraa o te taime no roto mai ratou i te pǔpǔ tahuˈa. I te parauraa, na to ratou noa ite aore ra na roto i te arai o ta ratou mau taairaa i te tahi mau taata, ua ite atea taua mau taata ra i te tupuraa natura o te tahi mau ohipa. Ma te faaau i te mau huru taa ê o te mau parau tohu o te Bibilia e to te mau tohuraa a te mau taata hiˈohiˈo, e nehenehe tatou e huti i te mau faaotiraa tano.
Te mau taa-ê-raa
Te mea e tapao i te mau tohuraa a te mau taata hiˈohiˈo, o to ratou ïa papu-ore-raa. Ei hiˈoraa i Delphes, ua faahitihia te mau pahonoraa i horoahia na roto i te tahi mau taˈiraa papu ore. Ua titauhia ïa i te mau tahuˈa ia tatara i te reira e ia hamani i te mau irava auraa ê roa. Te hoê hiˈoraa matauhia no te reira, o te pahonoraa ïa i horoahia ia Crésus, te arii no Ludia. I to ˈna haereraa i te vahi tohuraa, ua parauhia ia ˈna e: “Mai te peu e e haere Crésus na roto i te Halys, e haamou o ˈna i te hoê emepera puai mau.” Teie râ, o to ˈna iho “emepera puai” tei haamouhia! I to Crésus haereraa na roto i te anavai Halys no te haru ia Kapadokia, ua pau o ˈna i mua ia Kuro no Peresia.
Ma te taa ê roa e te mau tohuraa Etene, ua tapaohia te mau parau tohu o te Bibilia no to ratou tanoraa e to ratou papu-maitai-raa. Te tahi hiˈoraa, o te parau tohu ïa no nia i te toparaa o Babulonia, tei papaihia i roto i te buka Bibilia a Isaia. Fatata e 200 matahiti na mua ˈˈe te reira a tupu ai, ua faaite atea mai te peropheta ra o Isaia ma te papu maitai i te haamouraa o Babulonia na to Medai e to Peresia. Ua haamatara te parau tohu e o Kuro te iˈoa o te taata haru fenua, e ua faaite atoa mai i te aravihi mau ia haamǎrô i te anavai e paruru haaati ra e ia tomo atu i roto i te hoê oire paruruhia na roto i te mau uputa i matara noa. Ua tupu mau â pauroa te reira. (Isaia 44:27–45:2) Ua tohu-atoa-hia e i te pae hopea eita faahou o Babulonia e parahihia e te taata.—Isaia 13:17-22.
A hiˈo atoa na i te huru papu o teie faaararaa faahitihia e te peropheta ra o Iona: “E piti taau mahana toe e taihitumuhia ˈi Nineve.” (Iona 3:4) Aita e feaaraa i ǒ nei! No te peapea e te huru taue o te poroi ua tae roa to Nineve i te “faaroo . . . i te Atua, e ua poro atura i te haapaeraa maa, e ua ahu atura i te ahu oto.” Ei faahopearaa o to ratou tatarahapa, aita o Iehova i faautua i to Nineve i taua taime ra.—Iona 3:5-10.
Ua faaohipahia te mau tohuraa a te mau taata hiˈohiˈo ei ravea no te faaite i te mana i te pae politita. Mea pinepine to te feia faatere e te mau raatira faehau faahitiraa i te tohuraa au-roa ˈˈe-hia e ratou no to ratou iho maitai e mau ohipa, ma te faariro ei “ohipa no ǒ mai i te Atua ra.” Teie râ, ua horoahia te mau parau tohu a te Atua ma te ore e haapao i to ˈna iho maitai.
No te faahohoˈa i te reira: Ua aˈo iho â te peropheta a te Atua ra o Natana i te Arii haapao ore ra o Davida. (Samuela 2, 12:1-12) I te tau a faatere ai o Ieroboama II i te basileia opu hoê ahuru o Iseraela, ua faahapa rahi te mau peropheta ra o Hosea e o Amosa i te arii orure hau e te feia o te turu ra ia ˈna no to ratou haerea apotata e te faaino i te Atua. (Hosea 5:1-7; Amosa 2:6-8) Mea teiaha mau te faaararaa a Iehova i te arii na roto i te vaha o te peropheta ra Amosa: “E tia vau e rave i te utuafare o Ieroboama ma te ˈoˈe.” (Amosa 7:9) Ua haamouhia te utuafare o Ieroboama.—Te mau arii 1, 15:25-30; Paraleipomeno 2, 13:20.
I te rahiraa o te taime, e horoahia te mau tohuraa no te hoê tino moni. E horoahia i te taata o te aufau rahi roa ˈˈe te tohuraa o ta ˈna e au. Ua aufau rahi mau te feia i haere i te mau vahi tohuraa no Delphes no te tahi mau faaararaa faufaa ore, mea na reira hoi te faaîraahia te hiero a Apolo e te tahi atu mau paturaa e te mau taoˈa faufaa roa. I te tahi aˈe râ pae, ua horoahia te mau parau tohu e te mau faaararaa o te Bibilia ma te tamoni ore e te pae tahi ore. Eita atoa e tâuˈahia te tiaraa aore ra te faufaa materia o te taata i faataehia te reira, no te mea eita te hoê peropheta mau e nehenehe e petahia. Ua nehenehe te peropheta e haava ra o Samuela e ani ma te haavare ore e: “I rave au i te tarahu i te rima o vai ei haapo i tau mata?”—Samuela 1, 12:3.
I te mea e tei te hoê vahi taa ê anaˈe te mau tohuraa, e tia i te hoê taata ia faaitoito hua no te tere atu i ǒ no te fanaˈo atu i te reira. No te feia riirii, mea fifi roa ia haere na tera mau vahi no te mea tei te vahi ratou mai ia Dodone i nia i te Mouˈa Tomarus i Épire e ia Delphes i nia i te vahi mouˈa no Heleni no ropu. I te rahiraa o te taime o te feia ona e te mana anaˈe te nehenehe e haere e farerei i te mau atua i taua mau vahi ra. Hau atu râ, e faaitehia “te hinaaro o te mau atua” i te tahi noa mau mahana i roto i te matahiti. Taa ê roa i te reira, ua tono roa te Atua ra o Iehova i ta ˈna mau peropheta i mua roa i te nunaa no te faaite i te mau parau tohu te tia ia ratou ia faaroo. Ei hiˈoraa, i te tau a hopoi-tîtî-hia ˈi te mau ati Iuda i Babulonia, e toru peropheta ta Iehova e tavini ra i roto i to ˈna nunaa—Ieremia i Ierusalema, Ezekiela i pihai iho i te feia hopoi-tîtî-hia e Daniela i te oire pu no te Hau emepera Babulonia.—Ieremia 1:1, 2; Ezekiela 1:1; Daniela 2:48.
I te rahiraa o te taime e horoahia te mau tohuraa i te hoê noa taata ia nehenehe oia o te faaroo ra i te reira e faaohipa i to ratou auraa no to ˈna iho maitai. Area râ, e horoahia te mau parau tohu o te Bibilia i mua i te taatoaraa ia nehenehe te mau taata atoa e faaroo i te poroi e e maramarama i to ratou auraa. E rave rahi taime to te peropheta Ieremia paraparauraa i mua i te taatoaraa i Ierusalema, noa ˈtu e ua ite oia eita ta ˈna poroi e auhia e te mau raatira e te huiraatira o te oire.—Ieremia 7:1, 2.
I teie mahana, te hiˈohia ra te mau tohuraa mai te hoê tuhaa o te aamu no te tau tahito. Aita to ratou e faufaa no te mau taata o te ora ra i to tatou anotau fifi mau. Aita hoê aˈe o teie mau tohuraa e ohipa ra e to tatou nei mahana e to tatou ora no a muri aˈe. I te tahi aˈe râ pae taa ê mau, e tuhaa te mau parau tohu o te Bibilia no ‘te parau a te Atua o te ora e te puai rahi.’ (Hebera 4:12) Te horoa nei te mau parau tohu a Iehova tei tupu aˈena i te hoê hiˈoraa o te mau taairaa o Iehova e te taata e te faaite ra te reira i te tahi mau huru faufaa mau o ta ˈna mau opuaraa e o to ˈna iho huru. Hau atu râ, fatata roa te tahi mau parau tohu faufaa mau o te Bibilia i te tupu. A faataa ˈi eaha te tupu mai i muri iho, ua papai te aposetolo Petero e: “Te tatari nei râ tatou i te raˈi apî [te faatereraa a te Mesia i te raˈi ra] e te fenua apî [te totaiete taata parau-tia] ta [te Atua] i parau maira, i te vai-mau-raa o te parau-tia ra.”—Petero 2, 3:13.
E aratai atoa paha teie faaauraa poto noa o te parau tohu o te Bibilia e te mau tohuraa a te haapaoraa hape i te hoê â parau faaotiraa e tei papaihia i roto i te buka ra Te mau manaˈo rarahi (Beretane) e: “No nia i te ite o te taata pohe noa i te mau ohipa e tupu mai, mea otahi roa te mau peropheta Hebera. E ere roa ˈtu mai te mau tahutahu Etene, . . . eita ratou e faaohipa i te tahi mau ravea taa ê no te hiˈo i te mau parau moe a te Atua. . . . E ere ta ratou mau parau tohu i te mea papu ore mai ta te mau taata hiˈohiˈo. To ratou hinaaro oia hoi te faaiteraa ïa, eiaha râ te hunaraa, i te opuaraa a te Atua no nia i te mau tumu parau mai Ta ˈna e hinaaro ra i te taata ia ite i te tupuraa ta ˈna e horoa mai.”
E tiaturi anei outou i te parau tohu o te Bibilia?
E nehenehe outou e tiaturi i te parau tohu o te Bibilia. E nehenehe outou e faariro ia Iehova e te tupuraa o ta ˈna parau tohu ei ohipa matamua i roto i to outou oraraa. E ere te parau tohu o te Bibilia i te hoê faatiaraa auraa ore o te mau tohuraa tei tupu aˈena. E rave rahi mau parau tohu e vai ra i roto i te mau Papai o te tupu ra i teie nei aore ra o te fatata roa i te tupu i te tau i muri nei. I hiˈo tatou i te tau i mairi, e nehenehe tatou e tiaturi e e tupu atoa te reira. I te mea e te haamatara ra taua mau parau tohu ra i to tatou nei tau e tae noa ˈtu to tatou oraraa no a muri aˈe, mea maitai e ia haapao maitai tatou i te reira.
E nehenehe outou e tiaturi i te parau tohu o te Bibilia i roto i te Isaia 2:2, 3: “E riro ia tae i te mau mahana hopea ra, e faatiahia te mouˈa ra o te fare o Iehova i nia i te tupuai mouˈa, e faateiteihia ïa i nia ˈˈe i te mau aivi . . . E rave rahi te taata e haere ma te parau e, E haere mai, e haere tatou i nia i te mouˈa o Iehova, . . . e na ˈna e haapii mai i ta ˈna haapaoraa, e haere tatou na te eˈa ta ˈna e faaite maira.” I teie mahana, e mau mirioni taata teie e farii ra i te haamoriraa teitei a Iehova e e haapii ra ia haere na to ˈna mau eˈa. E imi anei outou i te ravea no te haapii hau atu â no nia i te mau eˈa o te Atua e no te farii mai i te ite papu mau no nia ia ˈna e ta ˈna mau opuaraa no te haere na to ˈna mau eˈa?—Ioane 17:3.
Te titau atoa ra te tupuraa o te tahi atu parau tohu o te Bibilia e ia ohipa ru tatou. Ia au i te tau i muri nei, ua himene te papai salamo ma te tohu e: “E riro hoi te feia hamani ino ra i te tâpû-ê-hia . . . No parahirahi aˈe te paieti ore, e aita ra.” (Salamo 37:9, 10) Ia manaˈo anaˈe outou eaha te titauhia no te ape i te haamouraa e fatata maira o te feia ino e tae noa ˈtu te feia e tâhitohito ra i te mau parau tohu o te Bibilia? Te pahono ra taua noâ salamo ra e: “O te feia râ i tiaturi ia Iehova ra, no ratou ïa te fenua.” (Salamo 37:9) Te auraa e tiaturi ia Iehova oia hoi ïa te tiaturiraa i ta ˈna mau parau tohu e te faaauraa i to tatou oraraa i nia i ta ˈna mau ture.—Maseli 2:21, 22.
Eaha te huru o te oraraa ia parahi anaˈe te feia e tiaturi ra ia Iehova i nia i te fenua nei? Te faaite faahou ra te parau tohu o te Bibilia e te fatata mai ra te hoê tau hanahana i mua nei no te huitaata auraro. Ua papai te peropheta Isaia e: “Ei reira e faaaraarahia ˈi te mata o te matapo ra, e amaha hoi te tariˈa o te feia tariˈa turi ra: ei reira te pirioi e ouˈauˈa noa ˈi mai te aili, e himene mai hoi te vaha o te taata vava ra: e pǔpǔ mai hoi te pape na te medebara, e te pape tahe i te fenua mǎrô ra.” (Isaia 35:5, 6) Ua papai te aposetolo Ioane i teie mau parau tamǎrû e: “E na te Atua [Iehova] e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra. E ua parau maira tei parahi i nia iho i te terono ra, . . . A papai, e parau mau hoi teie nei mau parau, e te haavare ore.”—Apokalupo 21:4, 5.
Ua ite te mau Ite no Iehova e ua riro te Bibilia ei buka parau tohu o te nehenehe e tiaturihia. E ua tuea roa to ratou manaˈo e te faaitoitoraa a te aposetolo Petero o te na ǒ ra e: “Tei ia tatou atoa te parau a te mau peropheta tia rahi roa ˈtura i teie nei; o te mea maitai ïa ia outou ia haapao i te reira, mai te lamepa e anaana i te vahi pouri ra, e ia tai ao, e ia hiti e fetia poipoi i roto i to outou na aau.” (Petero 2, 1:19) To matou tiaturiraa mau oia hoi ia putapûhia outou e te mau haamaitairaa faahiahia roa ta te parau tohu o te Bibilia e faaite no a muri aˈe!
[Tumu parau tarenihia/Hohoˈa i te api 6]
TE VAHI TOHURAA NO DELPHES tei faahanahana-rahi-roa ˈˈe-hia i Heleni i tahito ra.
Ua horuhoru roa te tahuˈa vahine i te auauahi taero
[Hohoˈa]
Te parahi ra te tahuˈa vahine i nia i te hoê afata e te faahiti ra oia i ta ˈna mau tohuraa
Ua tiaturihia e te vai ra te tahi mau faaiteraa no ǒ mai i te atua ra o Apolo i roto i te mau taˈi ta ˈna i faahiti
[Faaiteraa i te tumu]
Te afata: No roto mai i te buka ra Dictionary of Greek and Roman Antiquities; Apolo: The Complete Encyclopedia of Illustration/J. G. Heck
[Hohoˈa i te api 7]
Eita roa ˈtu e nehenehe e tiaturihia i te mau tohuraa i horoahia i te vahi tohuraa no Delphes
[Faaiteraa i te tumu]
Delphes, Heleni
[Hohoˈa i te api 8]
E nehenehe mau outou e tiaturi roa i te mau parau tohu o te Bibilia no nia i te ao apî