Te feruri ra anei outou no nia i te faaipoiporaa?
Ia faaau tatou i te faataaraa na te ao atoa nei i te hoê aueueraa fenua, o te mau Hau Amui no Marite ïa te pu. I te hoê matahiti aita i maoro aˈenei, hau atu i te hoê mirioni faaipoiporaa tei taa i reira—te hoê ïa faito au noa e piti i te mau minuti atoa. Ua ite maitai râ hoi outou e e ere te mau Hau Amui no Marite anaˈe teie e farerei nei i teie fifi i te pae o te faaipoiporaa.
IA AU i te hoê tuatapaparaa, ua hau atu te faataaraa i Kanada, Beretane e te Fenua no Galles, i Farani, Heleni e te Pays-Bas, i te tataipiti mai te matahiti 1970 mai.
E nehenehe mau â tatou e tiaturi e e faaau te rahiraa o te mau hoa apiti i te faaipoiporaa no te mea te here nei te tahi i te tahi e te hinaaro nei ratou ia faaea noa ratou no te toea o to ratou oraraa. Te mea peapea râ, oia hoi mea pinepine te moemoeâ i te hoê faaipoiporaa oaoa, o te reira noa iho â—te hoê moemoeâ. Ia farerei ratou i te tupuraa mau, e rave rahi tei parau e mea apî roa ratou i to ratou faaipoiporaa aore ra ua hape te taata ta ratou i faaipoipo, aore ra e piti atoa ra.
No te aha e rahi ai te mau faaipoiporaa o te ore e manuïa? “Te tumu matamua, o te faaineine-ore-raa ïa,” o ta te taata i papai i te hoê buka no nia i te haamatauraa ïa i parau. Te parau faahou ra oia e: “Ia ohipa vau e te mau hoa faaipoipo no to ratou mau fifi i te pae o te faaipoiporaa, e piti manaˈo hohonu ta ˈu e ite—te aroha e te riri. E arohahia vau no te mea aita i noaa ia ratou ta ratou mau titauraa i te mau auraa maitai roa. E ririhia vau no to ratou ite ore i te huru fifi o taua titauraa ra.”
Oia mau, e rave rahi teie e faaau nei i te faaipoiporaa ma te ite ore nafea ia haamanuïa i te reira. E ere râ hoi i te mea maere. Ua parau te hoê taata haapii e: “Ehia rahiraa o ta tatou feia apî e haere nei i te haapiiraa e haapii no nia i te huru o te iore e o te moo, e aita râ e haapii ra no nia i te haerea o na taata e piti parauhia tane e vahine?”
Te feruri ra anei outou no nia i te faaipoiporaa—ta outou anei e opua ra aore ra ta outou e ora nei? Mai te peu e e, ia ite maite ïa outou e mea taa ê roa te auhoaraa o te oraraa mau i tei faaitehia i roto i te mau hohoˈa teata, te mau faanahoraa afata teata e te mau aamu no nia i te here i roto i te mau buka. E nehenehe atoa râ hoi e hiˈo i te faaipoiporaa o na taata feruriraa paari e here mau ra te tahi i te tahi mai te hoê haamaitairaa no ǒ mai i te Atua ra. (Maseli 18:22; 19:14) Nafea ïa outou e papu ai e ua ineine outou ia anihia mai outou e faaipoipo? Eaha te mau mea ta outou e hiˈo ia maiti outou i te hoê hoa? Aore ra mai te peu e ua faaipoipo-aˈena-hia outou, nafea outou e haapapu roa ˈtu ai i te oaoa maoro i roto i te faaipoiporaa?