E melahi tiai anei to outou?

TE TIATURI ra anei outou e te vai ra to outou melahi tiai? E rave rahi taata e tiaturi nei i te reira. No reira te hoê vahine i Kanada tooa o te râ i parauhia ˈi e e taoˈa taa ê ta ˈna e pûpû o tei taaihia i te mau melahi. Mai te peu e e horoa outou i to outou iˈoa e oia atoa e 200 dala Kanada (fatata 15 000 F CFP), te parau nei oia e e haafarerei oia ia outou i to outou melahi tiai. Na mua, e feruri hohonu oia ma te hiˈo tamau atu i te hoê mori hinu ama. I muri iho, e ite oia i te hoê orama i reira to outou melahi e horoa ˈi i te hoê poroi na outou na roto i to ˈna arai. Ei tahinuraa, e horoa te vahine i te hoê hohoˈa o te melahi.

No vetahi, e au teie i te hoê aai no nia i te Arii Farani ra o Louis IX. Te parauhia ra e ua hoo mai oia i te mau huruhuru manu moni rahi roa i marua mai nia mai i te mau pererau o te Melahi rahi ra o Mikaela. Noa ˈtu e e feaa ratou no nia i taua aai ra, eita roa ˈtu te taata e rave rahi e feaa no nia i te mau parau a te vahine no Kanada.

Te umereraa i te mau melahi

I te mau matahiti i mairi aˈenei, ua anaanatae rahi roa te taata i te mau melahi. Te faaite maira te afata teata e te mau hohoˈa teata, te mau buka, te mau vea e te mau api parau, no nia i te mau melahi e tamahanahana ra i te feia maˈi ino mau, e te feia i erehia i te hoê fetii, e horoa ra i te paari e e faaora ra i te taata i te pohe. I te mau Hau amui no Marite, fatata e 20 mirioni feia mataitai i te hoê hohoˈa tatuhaahia i te mau hebedoma atoa i roto i te afata teata o te faaite i te ohiparaa a te mau melahi i roto i te oraraa o te taata. Te tabula nei te hoê hooraa buka hau atu i te 400 buka niuhia i nia i te mau melahi.

Te faatia nei te hoê buka apî i te mau aamu no nia i to te mau melahi tiai faaoraraa i te mau faehau i roto i te tamaˈi. Te vai ra te tahi mau taoˈa tapirihia i nia i te mau pereoo e parau ra e te paruruhia ra te feia faahoro e te mau melahi tiai. Te faaitoito nei te mau faanahoraa, te mau oreroraa parau, e te mau apooraa i te tuatapaparaa no nia i te mau melahi e te hinaaro nei ratou e tauturu i te taata ia paraparau ia ratou.

Na Eileen Freeman i papai e toru buka no nia i te mau melahi e na ˈna e nenei nei i te hoê vea no nia anaˈe ia ratou. Te parau nei oia e: “Te tiaturi nei au e no te mau melahi atoa i nia i te raˈi, te vai ra te hoê melahi tiai i nia i te Fenua, te hoê mea ora e ere noa ta ˈna hopoia te arueraa i te Atua i nia i te raˈi, te haapao-atoa-raa râ i te mau taata e te tahi atu mau mea ora i nia i te Fenua. Ua faataahia te hoê melahi tiai no tatou taitahi i te taime i opuahia ˈi tatou e e tiai oia ia tatou a tupu noa ˈi tatou i roto i te opu, a fanauhia ˈi tatou, a ora ˈi tatou i roto i teie nei ao, e tae roa i te taime e aratai ai te melahi ia tatou mai i teie nei ao i roto atu i te hanahana o te raˈi.” Te faataa maitai ra teie mau parau i te hiˈoraa o te taata i te mau melahi tiai.

I roto i teie tau hepohepo e te fifi, mea huru tamahanahana te tiaturiraa e e melahi tiai to tatou iho o te faataahia no te paruru ia tatou. Eaha ta te Parau a te Atua, te Bibilia, e parau ra no nia i te reira? E tia anei ia tamata tatou i te farerei i te mau melahi? Te tapitapi ra anei ratou i ta tatou mau ture morare e ta tatou mau tiaturiraa i te pae faaroo? Eaha te tauturu ta tatou e nehenehe e tiai no ǒ mai ia ratou ra? E pahonohia teie mau uiraa i roto i te tumu parau i muri nei.