Te haamanaˈo ra anei outou?
Ua faufaahia anei outou i te mau vea hopea nei o Te Pare Tiairaa? A tamata ïa e e nehenehe anei ta outou e pahono i te mau uiraa i muri nei:
◻ No te aha e ere i te mea tano te tiaturiraa o te oraraa faataahia?
Ahiri te Atua i ite atea e i faataa i te hara a Adamu, ua riro ïa o Iehova ei tumu no te hara i to ˈna poieteraa i te taata, e ua opua ïa oia i te riro ei tumu no te mau ohipa ino atoa a te taata e no to ratou mauiui. Eita ïa e nehenehe e faatuati te reira i teie manaˈo e e Atua aroha o Iehova o te riri i te ino. (Salamo 33:5; Maseli 15:9; Ioane 1, 4:8)—15/4, api 7, 8.
◻ Ia au i te Isaia 2:2-4, eaha ta te feia no te mau nunaa e rave rahi e rave ra?
I te mea hoi e te putuputu mai nei ratou i te fare haamoriraa a Iehova, te haapae nei ratou i te ‘haapii i te tamaˈi’ no te mea ua tuu ratou i to ratou tiaturi i roto i te parururaa a te mau nuu a te Atua i nia i te raˈi, o tei ineine no te haamou i te mau enemi atoa o te hau.—15/4, api 30.
◻ O vai te feia puai o te Atua e faahitihia ra i roto i te Ioela 3:10, 11?
I roto i te Bibilia, tau 280 taime to te Atua mau piiraahia e ‘Iehova sabaota.’ (Te mau arii 2, 3:14) E mau puai melahi o te raˈi teie mau nuu, o te vai ineine nei i te rave i te mau faaueraa a Iehova.—1/5, api 23.
◻ Eaha te haapiiraa ta tatou e huti mai no to Iehova titauraa ia Ioba ia pure no te feia i hara ia ˈna? (Ioba 42:8)
Hou Ioba a faaorahia ˈi, ua titau Iehova ia pure oia no te feia i hara ia ˈna. E faaite maira te reira e e titau Iehova e ia faaore tatou i ta tei hara mai ia tatou hou a faaorehia ˈi ta tatou iho mau hara. (Mataio 6:12; Ephesia 4:32)—1/5, api 31.
◻ Eaha te auraa ia parau o Iakobo e: “E tuu atu hoi i ta te faaoromai tamau ra ohipa ia tia roa”? (Iakobo 1:4)
E “ohipa” ta te faaoromai tamau e rave. Ta ˈna hopoia, o te haamaitai-roa-raa ïa ia tatou i roto i te mau tuhaa atoa. No reira, na roto i te vaiihoraa i te mau tamataraa ia tupu noa na, ma te ore e tamata i te faaohipa i te mau ravea aita e tu ra e te mau Papai no te faaore i te reira, te tamatahia ra ïa e te haamaitaihia ra to tatou faaroo.—15/5, api 16.
◻ No te aha te Atua i tiai maoro roa ˈi no te faatitiaifaro i te mau fifi o te huitaata nei?
Mea taa ê to Iehova manaˈo no nia i te tau i to tatou nei. I to te Atua mure ore hiˈoraa, te tau mai te poieteraa o Adamu e tae mai i teie nei, aita ïa i naeahia hoê hebedoma. (Petero 2, 3:8) Tera râ, noa ˈtu eaha to tatou manaˈo no nia i te tau, a mairi noa ˈi te mahana tataitahi, te piri noa ˈtura tatou i te mahana o Iehova no te faatitiaifaroraa.—1/6, api 5, 6.
◻ Eaha te turai ra i te mau Ite no Iehova?
Ua horoa mai te haapiiraa a Iehova i te hoê nunaa taa ê, i haapiihia ia here te tahi i te tahi e i to ratou taata-tupu mai ia ratou ihora. (Isaia 54:13) Na te here e turai ra i te mau Ite no Iehova ia tamau noa i te poro noa ˈtu te anaanatae ore o te taata e te hamani-ino-raa. (Mataio 22:36-40; Korinetia 1, 13:1-8)—15/6, api 20.
◻ Eaha te manaˈo e matara maira i roto i te parau a Iesu e: “E faaitoito hua i te tomo na te uputa pirihao”? (Luka 13:24)
Te matara maira na roto i te mau parau a Iesu te rohiraa, te horoaraa ia tatou iho. Te faaite atoa ra ta ˈna parau e e imi paha vetahi “i te tomo na te uputa pirihao” na nia noa i to ratou manaˈo, ma te haere mǎrû e te haapeapea ore, mai ta ratou e hinaaro. E nehenehe tatou tataitahi e uiui e, ‘Te tutava ra anei au ma te itoito e te tuutuu ore?’—15/6, api 31.
◻ Nafea te feia i faatia-faahou-hia mai ia ‘haavahia i te mau parau i papaihia i roto i te mau buka’? (Apokalupo 20:12)
E ere teie mau buka i te mau faatiaraa o ta ratou mau ohipa tahito; i to ratou poheraa, ua matara ratou i te mau hara ta ratou i rave na i roto i to ratou oraraa. (Roma 6:7, 23) Tera râ, e vai noa te feia e faatiahia mai i raro aˈe i te hara a Adamu. E haamau râ teie mau buka i te mau faaueraa no ǒ mai i te Atua ra, o te tia hoi i te taatoaraa ia faaohipa no te fanaˈo taatoa i te tusia o Iesu Mesia.—1/7, api 22.
◻ Eaha te haapiiraa no tatou e vai ra i roto i te parabole a Iesu no nia i te hoê ati Samaria? (Luka 10:30-37)
Te faaite ra te parabole a Iesu e, te hoê taata tia mau e ere ïa i te hoê taata o te auraro noa i te mau ture a te Atua, o te pee atoa râ i to ˈna mau huru maitatai. (Ephesia 5:1) Te faaite atoa ra te reira e e tia i to tatou taairaa maitatai ia na nia ˈˈe i te mau taa-ê-raa i te pae nunaa, hiroa tumu, e i te pae faaroo. (Galatia 6:10)—1/7, api 31.
◻ Eaha na tuhaa e toru e tia ia outou ia rave no te matau-maitai-raa i ta outou mau tamarii e no te aratairaa ia ratou ei metua?
(1) A tauturu i ta outou mau tamarii ia maiti i te hoê ohipa tano maitai; (2) a faaineine ia ratou ia faaruru i te ahoaho i te fare haapiiraa e te vahi raveraa ohipa; (3) a faaite ia ratou nafea ia haamâha i to ratou mau hinaaro pae varua.—15/7, api 4.
◻ No te aha te Atua i faaea ˈi i “te mahana hitu”? (Genese 2:1-3)
Aita oia i faaea no te mea e ua rohirohi oia. Tera râ, ua faaea oia i ta ˈna mau ohipa poieteraa i nia i te fenua nei ia hotu mai ta ˈna mau ohipa ia hanahana roa, no te arue e no te faahanahana ia ˈna.—15/7, api 18.
◻ Eaha na ravea e toru e nehenehe ai tatou e faatupu i te parau tia?
Na mua roa, e tia ia tatou ia faaohipa i te mau aveia morare a te Atua. (Isaia 1:17) A piti, te faatupu ra tatou i te parau-tia na roto i to tatou huru i nia ia vetahi ê, mai ta tatou atoa e hinaaro e ia na reira o Iehova i nia ia tatou. (Salamo 130:3, 4) A toru, te faaite ra tatou i te parau-tia a te Atua ia apiti anaˈe tatou ma te itoito i roto i te ohipa pororaa. (Maseli 3:27)—1/8, api 14, 15.