Te hoê ohipa o “te faaturahia iho â”

UA FAAUE te aposetolo Petero i to ˈna mau hoa Kerisetiano e: “Ia maitai to outou [haerea] i rotopu i te mau [nunaa]: ta ratou hoi i faaino mai ia outou, mai te mea e feia rave parau ino, ia hiˈo râ ratou i ta outou [ohipa maitatai], ia haamaitai ratou i te Atua i te mahana e roohia mai ai ra.” (Petero 1, 2:12; MN) E rave rahi matahiti to te mau Ite no Iehova no Italia faaite-noa-raa i teie huru haerea maitai i mua i te taata. I roto i te faaueraa a Iesu ia “parau hua i nia iho i te mau fare,” te rave nei ratou i te taviniraa kerisetiano taatoa ma te tapuni ore, i mua i te huiraatira. (Mataio 10:27; Ioane 18:20) Ei faahopearaa, i to te hoê paruru Italia e te hoê perepitero neneiraa i te mau pariraa e e “pǔpǔ faahua faaroo” te mau Ite no Iehova e tei roto ratou i te “mau totaiete huna o te haavare i te taata,” ua opua te mau Ite e tuu te reira i mua i te haavaraa no teie mau parau faaino.

I te haavaraa matamua, ua faaoti te tiribuna e aita te paruru e te perepitero i ofati i te hoê noa ˈˈe ture. Teie râ, i te 17 no Tiurai 1997, aita te Tiribuna Hororaa no Venise i farii i te faaotiraa i ravehia e te tiribuna matamua, na roto i te iteraa i te hape o te paruru e te perepitero. Ua faataa te Tiribuna Hororaa e: “Te vai ra i roto i te mau tumu parau atoa i neneihia te mau faahitiraa parau e te mau pereota o te nehenehe iho â e faaino i te roo o te mau pǐpǐ a te haapaoraa ‘Ite no Iehova.’ Papu maitai e te tapao o teie mau tumu parau oia hoi ia haafaufaa-ore-hia teie mau pǐpǐ e te huiraatira.” Ua faataa te tiribuna e e ere teie mau tumu parau i te ravea otahi roa no te faaite i te faainoraa. Ua faautua te tiribuna i teie na taata faaino e piti e ua faaue atoa ia raua ia aufau i te mau ohipa haavaraa, ma te faaô atoa mai i te mau haamâuˈaraa a te ture a te mau Ite no Iehova no teie mau tupuraa.

I roto i ta ˈna haavaraa tarimahia, ua faahiti te Tiribuna Hororaa no Venise e: “Ma te aifaito-noa-raa e te parururaa i te mau tiaraa haapapuhia e te Pǎpǎ ture [Italia], e nehenehe e tapeahia te mau huru farii-ore-raa e te mau manaˈo etaeta i te pae faaroo.” Ua farii te faaotiraa e e ere te ohipa a te mau Ite no Iehova i te mea huna e e ere atoa i te hoê pǔpǔ faahua faaroo. Ua tapao te tiribuna e: “Aita roa ˈtu te anairaa i te mau Ite i rotopu i te mau totaiete huna e faatura noa ˈˈe i te tapao o te aamu parau mau, mai te taime a itehia ˈi teie haapaoraa i roto e rave rahi oire e a haapararehia ˈi te faaroo i ravehia e to ˈna mau melo, i te mau sabati iho â ra e te tahi atu mau mahana faafaaearaa, o te matau-maitai-hia e o te faaturahia iho â no te mau tutavaraa i ravehia, noa ˈtu eaha ta te hoê taata e manaˈo ra no nia i teie tiaturiraa e porohia ra.” No reira, ua tauturu te faito rahi roa ˈˈe o te pororaa itoito e te haerea maitai o te mau Ite no Iehova no Italia ia tatara ê i te mau faainoraa i nia ia ratou.—Mataio 5:14-16; Petero 1, 2:15.