Te mau mamoe ê atu e te faufaa apî

“Te taata ê, . . . te feia atoa i haapao i te sabati, e aore i haaviivii atu; e o tei haapao tamau maite i ta ˈu ra faufaa: o ratou ta ˈu e aratai i roto i tau mouˈa moˈa ra.”—ISAIA 56:6, 7.

1. (a) Ia au i te orama a Ioane, eaha te ohipa e ravehia ra a tapeahia ˈi te mau mataˈi o te haavaraa a Iehova? (b) O vai ma te feia rahi roa taa ê mau ta Ioane i ite?

I ROTO i te maha o te orama a te buka Apokalupo, ua ite te aposetolo Ioane i te tapearaahia te mau mataˈi haamou o te haavaraa a Iehova, a faaotihia ˈi te tapaoraa o te mau melo atoa o ‘te Iseraela o te Atua.’ O ratou te feia matamua e haamaitaihia na roto ia Iesu, oia te tuhaa matamua o te huaai o Aberahama. (Galatia 6:16; Genese 22:18; Apokalupo 7:1-4) I roto i taua noâ orama ra, ua ite o Ioane i te “feia rahi roa, e ore roa e pau ia taio, no te mau fenua atoa, e te mau opu atoa, e te mau nunaa atoa, e te mau reo atoa, . . . ma te pii hua hoi to ratou reo, i te na ôraa e, Tei to tatou Atua te ora, tei parahi i nia iho i te terono ra, e tei te Arenio.” (Apokalupo 7:9, 10) Ia parau ratou e, ‘Tei te Arenio te ora,’ te faaite ra ïa te feia rahi roa e te haamaitai-atoa-hia ra ratou na roto i te ravea o te Huaai o Aberahama.

2. Anafea te feia rahi roa i te faraa mai, e nafea e itehia ˈi e o vai râ ratou?

² Ua itehia e o vai taua feia rahi roa ra i te matahiti 1935, e i teie mahana, ua hau atu ratou i te pae mirioni taata. Tapaohia no te ora ˈtu i te ati rahi, e faataa-ê-hia to ratou mau melo no te ora mure ore ia vahi anaˈe o Iesu i “te mamoe” e “te puaaniho.” Tei roto te mau Kerisetiano o te feia rahi roa i te mau “mamoe ê atu” o te parabole a Iesu no nia i te mau aua mamoe. Te tiaturi nei ratou e ora e a muri noa ˈtu i roto i te paradaiso i nia i te fenua nei.—Mataio 25:31-46; Ioane 10:16; Apokalupo 21:3, 4.

3. Eaha te taa-ê-raa i rotopu i te mau Kerisetiano faatavaihia e te mau mamoe ê atu i te pae no te faufaa apî?

³ No te mau 144 000, ua tufahia te haamaitairaa o te faufaa a Aberahama na roto i te faufaa apî. Ei feia apiti i roto i teie nei faufaa, “tei raro aˈe [ratou] i te aroha [“faito ore,” MN]” e “tei raro aˈe [atoa] i te ture i te Mesia.” (Roma 6:15; Korinetia 1, 9:21) No reira, o te mau 144 000 melo anaˈe o te Iseraela o te Atua, tei tia ia rave i te mau taoˈa taipe i te oroa Haamanaˈoraa i te poheraa o Iesu, e tei ia ratou anaˈe ta Iesu i fafau atu i ta ˈna faufaa no te hoê Basileia. (Luka 22:19, 20, 29) E ere te mau melo o te feia rahi roa i te feia apiti i roto i te faufaa apî. Teie râ, te tahoê nei ratou i te Iseraela o te Atua e te ora nei i pihai iho ia ratou i roto i to ratou “fenua.” (Isaia 66:8) E tano ïa ia parau e tei raro aˈe atoa ratou i te aroha faito ore o Iehova e tei raro aˈe i te ture i te Mesia. Noa ˈtu e e ere ratou i te feia apiti i roto i te faufaa apî, e feia fanaˈo ratou i teie nei faufaa.

“Te taata ê” e ‘te Iseraela o te Atua’

4, 5. (a) Ia au i te parau a Isaia, o vai te pûpû o te tavini ia Iehova? (b) Mea nafea te Isaia 56:6, 7 i te tupuraa i nia i te feia rahi roa?

⁴ Ua papai te peropheta ra o Isaia e: “Te taata ê, o tei ati ia Iehova ra, ei [tavini] ia ˈna, e ia [here] hoi i te iˈoa o Iehova, e ia riro ei tavini no ˈna: te feia atoa i haapao i te sabati, e aore i haaviivii atu; e o tei haapao tamau maite i ta ˈu ra faufaa: o ratou ta ˈu e aratai i roto i tau mouˈa moˈa ra, e faaoaoa vau ia ratou i roto i tau fare pureraa: e fariihia ta ratou mau tusia taauahi e ta ratou mau tusia i nia i tau fata.” (Isaia 56:6, 7; MN) I Iseraela, te auraa ra, e haamori “te taata ê,” e ere i te Iseraela, ia Iehova—e here ratou i to ˈna iˈoa, e auraro i te tuhaa o te faufaa a te Ture, e haapao i te Sabati, e e pûpû i te tusia i te hiero, te “fare pureraa” a te Atua.—Mataio 21:13.

⁵ I to tatou nei tau, “te taata ê, o tei ati ia Iehova ra,” o te feia rahi roa ïa. Te tavini nei ratou ia Iehova ma te tahoê atu i te Iseraela o te Atua. (Zekaria 8:23) Te pûpû nei ratou i te hoê â mau tusia fariihia e ta te Iseraela o te Atua. (Hebera 13:15, 16) Te haamori nei ratou i roto i te hiero o te Atua i te pae varua, ta ˈna “fare pureraa.” (A faaau e te Apokalupo 7:15.) Te haapao ra anei ratou i te Sabati hebedoma? Aita te feia faatavaihia aore ra te mau mamoe ê atu i faauehia ia haapao i te reira. (Kolosa 2:16, 17) Teie râ, ua parau o Paulo i te mau Kerisetiano Hebera faatavaihia e: “Te vai râ maori te faaearaa [“sabati,” MN] no te taata no te Atua. O tei ô hoi i te faaearaa o te Atua ra, ua faaea ïa oia i ta ˈna atoa ohipa, mai te Atua hoi i faaea i ta ˈna ra.” (Hebera 4:9, 10) Ua ô taua mau Hebera ra i roto i teie “faaearaa sabati” i to ratou auraroraa i “te parau-tia a te Atua” e ua faaea ratou i te tamata i te faataata parau-tia ia ratou na roto i te mau ohipa a te Ture. (Roma 10:3, 4) Te fanaˈo nei te mau Kerisetiano Etene i faatavaihia i te hoê â faaearaa na roto i te auraroraa i te parau-tia a Iehova. Te tahoê atu nei te feia rahi roa ia ratou i roto i taua faaearaa ra.

6. Mea nafea te mau mamoe ê atu i teie mahana ia farii i te faufaa apî?

⁶ Hau atu, te farii nei te mau mamoe ê atu i te faufaa apî mai ta te feia ěê no tahito ra i farii na i te faufaa a te Ture. Mea nafea ïa? Eiaha na roto i te riroraa mai ei feia apiti i roto i teie faufaa, na roto râ i te auraroraa i te mau ture i taaihia e taua faufaa ra, e na roto i te fanaˈoraa i ta ˈna mau faanahoraa. (A faaau e te Ieremia 31:33, 34.) Mai to ratou mau hoa faatavaihia, ua papaihia te ture a Iehova ‘i roto i te mafatu’ o te mau mamoe ê atu. Te here hohonu nei ratou e te auraro nei ratou i te mau faaueraa e te mau faaueraa tumu a Iehova. (Salamo 37:31; 119:97) Mai te mau Kerisetiano faatavaihia, ua ite ratou ia Iehova. (Ioane 17:3) E te peritomeraa ïa? Tau 1 500 matahiti na mua ˈˈe i te fafauraahia te faufaa apî, ua faaue o Mose i te mau ati Iseraela e: “A peritome na i te iri i mua o to outou [“mafatu,” MN] ra.” (Deuteronomi 10:16; Ieremia 4:4) Noa ˈtu e ua ore te peritomeraa faahepohia i te pae tino i te oreraa te Ture, e tia noâ i te feia faatavaihia e te mau mamoe ê atu ia “peritome” i to ratou mafatu. (Kolosa 2:11) I te pae hopea, e faaore Iehova i te hapa a te mau mamoe ê atu na roto i te “toto no te faufaa apî” oia hoi te toto i haamaniihia o Iesu. (Mataio 26:28; Ioane 1, 1:9; 2:2) Eita te Atua e faatavai ia ratou ei mau tamarii pae varua na ˈna, mai ta ˈna e rave e te mau 144 000. Tera râ, te faariro nei oia i te mau mamoe ê atu ei feia parau-tia, mai ta ˈna i faariro na ia Aberahama ei taata parau-tia ei hoa no te Atua.—Mataio 25:46; Roma 4:2, 3; Iakobo 2:23.

7. Eaha te tiaturiraa e matara ra i teie mahana i mua i te mau mamoe ê atu, tei faarirohia ei feia parau-tia mai ia Aberahama ra?

⁷ No te mau 144 000, i to ratou faariroraahia ei feia parau-tia, ua matara ïa te eˈa e fanaˈo ai ratou i te tiaturiraa e faatere e o Iesu i roto i te Basileia no te raˈi. (Roma 8:16, 17; Galatia 2:16) No te mau mamoe ê atu, to ratou faariroraahia ei feia parau-tia ei mau hoa no te Atua, e faatia ïa te reira ia ratou ia farii i te tiaturiraa o te ora mure ore i roto i te paradaiso i nia i te fenua nei—ma te ora ˈtu anei i Aramagedo i roto i te feia rahi roa, aore ra na roto i te ‘tia-faahou-raa o te feia parau-tia.’ (Ohipa 24:15) Auê ïa haamaitairaa e ia fanaˈo i taua tiaturiraa ra e ia riro ei hoa no te Arii Mana hope o te ao atoa nei, ia riro ei “manihini i roto i [to ˈna] tiahapa”! (Salamo 15:1, 2, MN) Oia mau, te haamaitaihia nei te feia faatavaihia e te mau mamoe ê atu atoa ma te faahiahia roa, na roto ia Iesu, te Huaai o Aberahama.

Te hoê Mahana Taraehara rahi aˈe

8. Eaha tei faahohoˈahia e te mau tusia o te Mahana Taraehara i raro aˈe i te Ture?

⁸ I to ˈna vauvauraa i te parau no te faufaa apî, ua faahaamanaˈo o Paulo i to ˈna mau taata taio i te Mahana Taraehara i ravehia na i te mau matahiti atoa i raro aˈe i te faufaa a te Ture. I taua mahana ra, e pûpûhia na te mau tusia taa ê—hoê na te opu autahuˈa o Levi e te tahi na te mau opu 12 e ere i te autahuˈa. Ua faataa-maoro-hia na e, te faahohoˈa ra te reira i te tusia rahi o Iesu o te haamaitai i te mau 144 000 e tiaturi nei e haere i nia i te raˈi, e te mau mirioni taata atoa e tiaturi nei e ora i nia i te fenua.a Ua faaite o Paulo e, i roto i te tupuraa o te Mahana Taraehara, ua tufahia te mau haamaitairaa o te tusia o Iesu na roto i te hoê Mahana Taraehara rahi aˈe i raro aˈe i te faufaa apî. Ei Tahuˈa Rahi no taua mahana rahi aˈe ra, ua pûpû o Iesu i to ˈna ora tia roa ei tusia taraehara ia noaa mai “te tiamâraa mure ore” no te mau taata.—Hebera 9:11-24, MN.

9. I te mea e ua ô ratou i roto i te faufaa apî, eaha ta te mau Kerisetiano Hebera i faatavaihia i nehenehe e fanaˈo?

⁹ E rave rahi mau Kerisetiano Hebera o te senekele matamua “tei itoito rahi i te Ture” a Mose. (Ohipa 21:20, MN) Ma te tano roa, ua faahaamanaˈo atu o Paulo ia ratou e: “I riro ai hoi [o Iesu] ei arai i te faufaa apî nei, ia noaa te aiˈa mure ore i [“tǎpǔhia,” MN] maira i te feia i parauhia ra, i to ˈna ra pohe, ei faaore [“na roto i te hoo,” MN] i te hara i te faufaa matamua ra.” (Hebera 9:15) Ua faatiamâ te faufaa apî i te mau Kerisetiano Hebera i te faufaa tahito, o tei faaite tahaa na i to ratou tiaraa taata hara. Auaa te faufaa apî, ua nehenehe ratou e fanaˈo i “te aiˈa mure ore [i nia i te raˈi] i tǎpǔhia maira.”

10. No te aha te feia faatavaihia e te mau mamoe ê atu e haamauruuru ai i te Atua?

¹⁰ “O tei faaroo i te Tamaiti ra,” e fanaˈo ïa i te tusia no te hoo. (Ioane 3:16, 36) Ua parau o Paulo e: “Te Mesia, a hoê aˈenei o ˈna pûpûraahia ei tusia ia hopoi ê oia i te hara a te taata e rave rahi; e e fa mai â oia o te piti ïa o te faraa mai, eiaha ei taraehara, ia ora râ te feia e tiai ia ˈna ra.” (Hebera 9:28) I teie mahana, i rotopu i te feia e tiai ra ia Iesu, te vai nei te mau Kerisetiano faatavaihia o te Iseraela o te Atua e ora noa râ e te mau mirioni taata o te feia rahi roa, e tufaa mure ore atoa ta ratou. Te haamauruuru nei na pǔpǔ e piti i te Atua no te faufaa apî e no te mau haamaitairaa faaora i taaihia e teie nei faufaa, mai te Mahana Taraehara rahi aˈe e te taviniraa a te Tahuˈa Rahi ra o Iesu, i roto i te vahi Moˈa Roa i nia i te raˈi.

Te rohi nei i roto i te taviniraa moˈa

11. Ma te haava manaˈo tamâhia na roto i te tusia o Iesu, eaha ta te feia faatavaihia e te mau mamoe ê atu atoa e rave nei ma te oaoa?

¹¹ I roto i ta ˈna rata i to Hebera, ua haapapu o Paulo i te faufaaraa rahi aˈe o te tusia o Iesu i roto i te faufaa apî ia faaauhia i te tusia no te hara i pûpûhia na i raro aˈe i te faufaa tahito. (Hebera 9:13-15; MN) E nehenehe ta te tusia maitai aˈe o Iesu e “[tamâ i to tatou haava manaˈo i te mau ohipa pohe, ia pûpû atu tatou i te taviniraa moˈa] i te Atua ora ra.” No te mau Kerisetiano Hebera, “te mau ohipa pohe,” oia ïa te mau “hara i te faufaa matamua ra.” No te mau Kerisetiano i teie mahana, o te mau hara atoa ïa i ravehia na i mutaa iho o ta ratou i tatarahapa mau e ta te Atua i faaore mai. (Korinetia 1, 6:9-11) Ma te haava manaˈo mâ, te pûpû nei te mau Kerisetiano faatavaihia i “te taviniraa moˈa i te Atua ora ra.” E te na reira atoa nei te feia rahi roa. No te mea e ua tamâ ratou i to ratou haava manaˈo na roto i “te toto o te Arenio,” tei roto ïa ratou i te hiero rahi o te Atua i te pae varua, ma ‘[te pûpû atu ia ˈna i te taviniraa moˈa] i te rui e te ao.’—Apokalupo 7:14, 15; MN.

12. Nafea tatou ia faaite e e “faaroo papu mau” to tatou?

¹² Hau atu, ua parau o Paulo e: “E haafatata tatou ma te [mafatu] haavare ore, ma te faaroo papu mau, e ma te [mafatu] i pîpîhia ia ore te [haava] manaˈo ino, e ma te tino i horoihia i te pape mâ.” (Hebera 10:22; MN) Nafea tatou ia faaite e e “faaroo papu mau” to tatou? Ua faaue o Paulo i te mau Kerisetiano Hebera e: “Ia papu maite to tatou mauraa i ta tatou [“tiaturiraa,” MN] [no te raˈi], ma te aueue ore; e parau mau hoi ta ˈna ta tei parau maira. E haapao maite â tatou te tahi i te tahi, a faaaraara ˈtu ai ia rahi te aroha, o te rave i te mau ohipa maitatai ra: eiaha hoi e faarue i to tatou haaputuputuraa, mai ta te tahi pae ra peu, e faaitoito râ; e ia rahi atu â te faaitoito, no te mea te hiˈo na outou i taua mahana ra i te fatataraa mai.” (Hebera 10:23-25) Mai te peu e e faaroo ora to tatou, e ore atoa ïa tatou “e faarue i to tatou haaputuputuraa.” E oaoa tatou i te faaaraararaa ˈtu i to tatou mau taeae e ia faaaraara mai ratou ia tatou ia rahi te aroha e te mau ohipa maitatai e ia itoitohia no te ohipa faufaa roa o te faaiteraa i to tatou tiaturiraa i mua i te taata, e haere anei i nia i te raˈi aore ra e ora i nia i te fenua nei.—Ioane 13:35.

“Te faufaa matara ore”

13, 14. Mea nafea te faufaa apî e riro ai ei faufaa matara ore?

¹³ Eaha te ohipa e tupu ia haere anaˈe te melo hopea o te mau 144 000 i nia i te raˈi? E hope anei te ohipa a te faufaa apî? I tera taime, aita ïa e melo o te Iseraela o te Atua te toe mai i nia i te fenua nei. Tei pihai iho ïa te feia apiti atoa i roto i te faufaa ia Iesu i roto i “te basileia o [to ˈna] Metua.” (Mataio 26:29) Tera râ, te haamanaˈo ra tatou i te mau parau a Paulo i roto i ta ˈna rata i to Hebera: “Te Atua hau, o tei faahoˈi mai i . . . te tiai mamoe rahi mai te pohe maira, no te toto o te faufaa matara ore ra.” (Hebera 13:20; Isaia 55:3) I roto i teihea auraa te faufaa apî e riro ai ei faufaa matara ore, aore ra mure ore?

¹⁴ A tahi, taa ê atu i te faufaa a te Ture, eita roa ˈtu te faufaa apî e monohia. A piti, e tamau noa te mau faahopearaa o to ˈna ohiparaa, mai te tiaraa arii atoa o Iesu. (A faaau te Luka 1:33 e te Korinetia 1, 15:27, 28.) E parahiraa mure ore to te Basileia no te raˈi i roto i te mau opuaraa a Iehova. (Apokalupo 22:5) E a toru, e tamau noa te mau mamoe ê atu i te haamaitaihia na roto i te faufaa apî. I roto i te Faatereraa Tausani Matahiti a te Mesia, e tamau noa te mau taata haapao maitai i ‘te pûpû atu ia [Iehova] i te taviniraa moˈa i te rui e te ao i roto i to ˈna hiero,’ mai ta ratou e rave ra i teie nei. Eita o Iehova e faahiti faahou i ta ratou mau hara i rave i mutaa iho o tei faaorehia hoi na roto i “te toto o te faufaa” o Iesu. E tamau noa ratou i te fanaˈo i te hoê tiaraa parau-tia ei mau hoa no Iehova, e e vai noa ta ˈna ture i papaihia i roto i to ratou mafatu.

15. A faataa na i te mau taairaa i rotopu ia Iehova e to ˈna mau taata haamori i nia i te fenua nei i roto i te ao apî.

¹⁵ E nehenehe anei o Iehova e parau i tera taime no nia i taua mau tavini ra: “E riro vau ei Atua no ratou, e ei taata hoi ratou no ˈu”? Oia mau. “E parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou.” (Apokalupo 21:3) O ratou “te tiahapa o te feia moˈa,” te mau tia i nia i te fenua nei o “te oire i herehia ra,” te vahine faaipoipo a Iesu Mesia i nia i te raˈi. (Apokalupo 14:1; 20:9; 21:2) E tupu teie mau mea atoa no to ratou faaroo i roto i “te toto o te faufaa” oia te toto haamaniihia o Iesu, e to ratou auraroraa i te mau arii e te mau tahuˈa i nia i te raˈi, o tei riro na ei Iseraela o te Atua i te tau a vai ai ratou i nia i te fenua.—Apokalupo 5:10.

16. (a) Eaha te tiai maira i te feia e faatiahia mai i nia i te fenua nei? (b) Eaha te mau haamaitairaa e fanaˈohia i te hopea o te tausani matahiti?

¹⁶ E te feia pohe e faatiahia mai i nia i te fenua nei? (Ioane 5:28, 29) E titau-manihini-atoa-hia ratou ia “maitai” ratou na roto ia Iesu, te Huaai o Aberahama. (Genese 22:18) E tia atoa ia ratou ia here i te iˈoa o Iehova, ia tavini ia ˈna, ia pûpû i te mau tusia e fariihia mai, e ia pûpû i te taviniraa moˈa i roto i ta ˈna fare pureraa. Te feia e na reira, e tomo ïa ratou i roto i te faaearaa o te Atua. (Isaia 56:6, 7) Ia hope te tausani matahiti, e naeahia te feia haapao maitai atoa i te faito taata tia roa na roto i te ohiparaa a Iesu Mesia e ta ˈna 144 000 tahuˈa apiti. E riro mau ratou ei feia parau-tia, aita noa râ i faarirohia ei feia parau-tia mai te mau hoa no te Atua. E “ora faahou” mai ratou, ma te tiamâ roa i te hara e te pohe no ǒ mai ia Adamu ra. (Apokalupo 20:5; 22:2) Auê ïa haamaitairaa rahi e! Ia au i ta tatou i ite i teie nei, e au ra e e hope te ohipa autahuˈa a Iesu e a te mau 144 000 i taua taime ra. E hope atoa te mau haamaitairaa o te Mahana Taraehara rahi aˈe i te faaohipahia. Hau atu, “e pûpû atu [Iesu] i te basileia i te Atua, i te Metua ra.” (Korinetia 1, 15:24) E tupu te hoê tamataraa hopea no te huitaata nei, e i muri iho, e haamouhia o Satani e ta ˈna mau demoni e a muri noa ˈtu.—Apokalupo 20:7, 10.

17. Ia hiˈohia te oaoa e tiai maira ia tatou, eaha te tia ia tatou tataitahi ia opua papu i te rave?

¹⁷ Eaha te tuhaa, mai te peu e te vai ra, ta “te faufaa matara ore” e hauti i roto i te anotau anaanatae roa o te haamata i taua taime ra? Eita ta tatou e nehenehe e parau. Ta Iehova i faaite mai e tae roa mai i teie nei taime, ua navai ïa. Te haaputapû nei hoi te reira ia tatou. A feruri na—te ora mure ore ei melo no “te raˈi apî e te fenua apî”! (Petero 2, 3:13) Eiaha roa te hoê noa ˈˈe mea e haaparuparu i to tatou hinaaro e fanaˈo i taua parau tǎpǔ ra. E ere paha i te mea ohie ia mau papu. Ua parau o Paulo e: “Ia faaoromai tamau outou e tia ˈi, ua oti anaˈe ia outou te haapao i to te Atua ra hinaaro, ia noaa ia outou te [“tupuraa o te parau tǎpǔ,” MN].” (Hebera 10:36) A haamanaˈo râ e, ia faaauhia i te oaoa e tiai maira ia tatou, mea haihai ïa te mau fifi atoa te tia ia haamatara, te mau patoiraa atoa te tia ia faaruru. (Korinetia 2, 4:17) No reira, eiaha roa tatou ia riro ei “feia i orai tia i muri e pohe atu.” Ei “feia râ i noaa te faaroo, e ora ˈtu ai te [“nephe,” MN].” (Hebera 10:39) Ia tiaturi paatoa tatou ia Iehova e tia ˈi, oia te Atua o tei faaau i te mau faufaa, ei haamaitairaa mure ore no tatou tataitahi.

[Nota i raro i te api]

Ua papu anei ia outou?

◻Taa ê atu i te mau Kerisetiano faatavaihia, o vai te haamaitaihia ra na roto i te Huaai o Aberahama?

◻Ia haamaitaihia ratou na roto i te faufaa apî, mea nafea te mau mamoe ê atu ia riro mai te mau peroseluto i raro aˈe i te faufaa tahito?

◻Mea nafea te mau mamoe ê atu ia haamaitaihia na roto i te Mahana Taraehara rahi aˈe?

◻No te aha o Paulo i pii ai i te faufaa apî “te faufaa matara ore”?

[Tumu parau tarenihia i te api 21]

Te taviniraa moˈa i roto i te hiero

Te haamori nei te feia rahi roa e te mau Kerisetiano faatavaihia i roto i te aua i nia i te fenua nei o te hiero rahi o Iehova i te pae varua. (Apokalupo 7:14, 15; 11:2) Aita e tumu no te faaoti e tei roto ratou i te hoê Aua taa ê a te mau Etene. I te tau a vai mai ai o Iesu i nia i te fenua nei, te vai ra te hoê Aua a te mau Etene i roto i te hiero. Tera râ, i roto i te mau hohoˈa fare i faauruahia mai e te Atua o te mau hiero o Solomona e to Ezekiela, aita i faanahohia te hoê Aua a te mau Etene. I roto i te hiero o Solomona, te vai ra te hoê aua i rapaeau mai i reira te mau ati Iseraela e te mau peroseluto, te tane e te vahine, e haamori amui ai. O te faahohoˈaraa ïa o te aua i nia i te fenua nei o te hiero pae varua, i reira to Ioane iteraa i te feia rahi roa i te pûpûraa i te taviniraa moˈa.

Teie râ, o te mau tahuˈa e te mau ati Levi anaˈe te nehenehe e tomo i roto i te aua no roto mai, i reira te fata rahi i te vairaa; o te mau tahuˈa anaˈe te nehenehe e tomo i roto i te vahi Moˈa; e o te tahuˈa rahi anaˈe te nehenehe e tomo i roto i te vahi Moˈa Roa. Te papuhia ra e, te faahohoˈa ra te aua no roto mai e te vahi Moˈa, i te tiaraa pae varua otahi e fanaˈohia ra e te mau Kerisetiano faatavaihia i nia i te fenua nei. E te faahohoˈa ra te vahi Moˈa Roa i te raˈi iho, i reira te mau Kerisetiano faatavaihia e fanaˈo ai i te ora pohe ore i pihai iho i to ratou Tahuˈa Rahi i nia i te raˈi.—Hebera 10:19, 20.

[Hohoˈa i te api 23]

Ia hiˈohia te oaoa e tiai maira ia tatou, ia riro tatou ei feia “i noaa te faaroo, e ora ˈtu ai te nephe” e tia ˈi