Te parareraa o te faatumuraa
FAATUMURAA—tau ahuru matahiti anaˈe na mua ˈtu, e ohipa iti haihai roa ïa teie, i roto i te haapaoraa Porotetani. Ua taui roa râ te huru tupuraa! Ua papai te taata tatara i te parau no nia i te haapaoraa ra o Bruce B. Lawrence e, tau 30 matahiti i teie nei, e mea iti roa te feia o tei manaˈo e, i te hopea o te senekele 20, e riro roa mai te parau no te faatumuraaa ei ohipa faufaa rahi e tei faahiti-rahi-roa-hia na roto i te mau ravea haapurororaa e i roto atoa i te mau maimiraa a te mau fare haapiiraa tuatoru.
O te reira mau râ te ohipa i tupu. Ua riro te mau faatiaraa a te mau vea no nia i te mau faahuehueraa haavî na roto i te mau aroâ, te mau taparahiraa taata, te mau ohipa patoi i te haamaruaraa tamarii, te mau raveraa politita a te mau pǔpǔ faaroo mana puai, e te taninaraa i mua i te aro o te taata i te mau buka i parauhia e buka faaino, ei mau faahaamanaˈoraa tamau i te mau haaraa a te feia faatumu. Ua faaite te vea hebedoma Italia no te pae faanavairaa faufaa, Mondo Economico e, fatata na te mau vahi atoa, “ua ineine noa [te faatumuraa] i te aro na nia i te iˈoa o te Atua.”
Mea pinepine te feia faatumu i te faahohoˈahia mai te tahi mau taata etaeta e te manaˈo fati ore, e faatupu nei i te mau opuaraa iino e te mau ohipa totova. Te peapea nei te taata i mua i te maraaraa o te mau pǔpǔ mai te Comunione e Liberazione i roto i te haapaoraa Katolika, te Gush Emunim (Te mau taiva ore) i roto i te haapaoraa ati Iuda, e te Amuitahiraa Kerisetiano i roto i te haapaoraa Porotetani i Marite Apatoerau. No te aha te faatumuraa e parare ai? Eaha te mea e turai ra i teie ohipa? O “te tahooraa a te Atua” anei, mai ta te taata tuatapapa totaiete Farani ra o Gilles Kepel i faahiti?
[Nota i raro i te api]
a Te taata faatumu, o te hoê ïa taata o te haapao etaeta i te mau faufaa tumu tahito i te pae faaroo. E faahohonu-roa-hia ˈtu â te auraa o te parau ra “faatumuraa” i roto i te tumu parau i muri nei.
[Faaiteraa i te fatu o te hohoˈa i te api 3]
Nina Berman/Sipa Press