E nehenehe mau anei outou e here i te Atua?

TE NA ô ra te Atua e: “E ore roa hoi te hoê taata e ora ia . . . hiˈo mai ia ˈu.” (Exodo 33:20) Hau atu, mai te tau Bibilia mai â, aita e haapapuraa e ua paraparau roa ˈtu te taata i te Atua. E mea fifi anei—e peneiaˈe eita roa e nehenehe—ia faatupu i te here hohonu no te tahi taata o ta outou i ore i ite aore ra i faaroo aˈenei? E nehenehe mau anei e faatupu i te hoê taairaa î i te here e te Poiete o te ao atoa nei?

Aita e feaaraa e e nehenehe e faatupu i te hoê taairaa auhoa piri roa e te Atua. I roto i te Deuteronomi 6:5, teie te faaueraa i horoahia i te nunaa Iseraela: “E [here] atu oe i to Atua ia Iehova ma to aau atoa, e ma to [“nephe,” MN] atoa, e ma to puai atoa.” Ua haapapu faahou â Iesu Mesia i teie ture i ta ˈna mau pǐpǐ, e ua parau oia i muri iho e: “O te ture matamua teie e te hau i te rahi.” (Mataio 22:37, 38) E faaue mai anei te Bibilia ia here i te Atua mai te peu e eita e nehenehe?

Tera râ, te hinaaro ra anei Iehova ia here tatou ia ˈna no te mea e faaueraa teie na ˈna? Aita. Ua poiete te Atua i na taata matamua ma te neheneheraa raua e here ia ˈna. Aita Adamu raua Eva i faahepohia ia here atu i to raua Poiete. Teie râ, ua tuu atu te Atua ia raua i roto i te mau tupuraa tano roa ˈˈe ia nehenehe raua e faatupu i te here hohonu no ˈna. Tei ia raua te maitiraa—e haafatata ˈtu i te Atua aore ra e faataa ê mai ia ˈna.

Ua maiti Adamu raua Eva e faaroo ore. (Genese 2:16, 17; 3:6, 7) Teie râ, e vai noa mai i roto i ta raua mau tamarii, te ravea no te faatupu i te hoê taairaa î i te here e te Poiete.

Ia au to tatou haerea i te Atua mau

Ei hiˈoraa, i roto i te Bibilia, te parauhia ra e ua riro Aberahama ei “taua” no te Atua. (Iakobo 2:23) E ere râ o Aberahama anaˈe te taata i fanaˈo i te taairaa piri roa e te Atua. Te faahiti ra te Bibilia i te tahi atu mau taata tia ore e rave rahi, tei faaite i te here mau no Iehova e ‘ua au to ratou haerea i te Atua’ mau.—Genese 5:24; 6:9; Ioba 29:4; Salamo 25:14; Maseli 3:32.

Aita te mau tavini a te Atua no tahito ra i fanauhia mai e te here e te aroha no te Atua i roto ia ratou. Ua tia ia ratou ia faatupu i taua mau huru ra. Nafea? Na roto ïa i te haamatauraa ˈtu i te Atua na nia i to ˈna iˈoa ra o Iehova. (Exodo 3:13-15; 6:2, 3) Na roto i te fariiraa e te vai mau nei oia e i to ˈna atoa tiaraa Atua. (Hebera 11:6) Na roto i te feruri-pinepine-raa i nia i ta ˈna mau ohipa î i te here. (Salamo 63:6) Na roto i te pureraa i te Atua no te faaite i to ratou mau manaˈo hohonu roa ˈˈe. (Salamo 39:12) Na roto i te haapiiraa i te parau no to ˈna maitai. (Zekaria 9:17) Na roto i te faatupuraa i te mǎtaˈu e tano, i te haapeapea ˈtu ia ˈna.—Maseli 16:6.

E nehenehe anei outou e riro ei hoa no te Atua e e faaau i to outou haerea i to ˈna? Parau mau, eita outou e ite i te Atua aore ra e faaroo i to ˈna reo. Tera râ, te ani maira Iehova ia outou ia ‘tiahapa i roto i to ˈna ra sekene,’ oia hoi ia riro ei hoa no ˈna. (Salamo 15:1-5) No reira, e nehenehe ta outou e here i te Atua. Tera râ, nafea outou ia faatupu i te taairaa piri roa e te aroha i rotopu ia outou e te Atua?