A tutava maite i te taio
“E rohi â i te taio i te parau, e te aˈo, e te haapii, e tae noa ˈtu vau.”—TIMOTEO 1, 4:13.
1. Nafea tatou e faufaahia ˈi i te taioraa i te Bibilia?
UA TUU mai te Atua ra o Iehova i roto i te taata te aravihi faahiahia mau no te haapii i te taio e i te papai. Ua horoa atoa mai oia i ta ˈna Parau, te Bibilia, ia nehenehe tatou e haapii-maitai-hia. (Isaia 30:20, 21) I roto i to ˈna mau api, e nehenehe tatou e “haere” e te mau patereareha o tei mǎtaˈu i te Atua ra, mai ia Aberahama, ia Isaaka, e ia Iakoba. E nehenehe tatou e “ite” i te mau vahine paieti ra, mai ia Sara, ia Rebeka, e te vahine taiva ore ati Moabi ra o Ruta. Oia, e nehenehe atoa tatou e “faaroo” ia Iesu Mesia i to ˈna horoaraa i ta ˈna Aˈoraa i nia i te Mouˈa. E fanaˈo tatou i teie oaoaraa e teie ite rahi no roto mai i te mau Papai Moˈa, mai te peu e ua ite maitai tatou i te taio.
2. Na te aha e faaite ra e ua ite maitai Iesu e ta ˈna mau aposetolo i te taio?
2 Aita e feaaraa e mea ite roa te taata tia roa ra o Iesu Mesia i te taio, e ua mau aau atoa ia ˈna te mau Papai hebera. I te taime a faahema ˈi te Diabolo ia ˈna, ua faahiti pinepine Iesu i te mau Papai, i te na ôraa e, “Ua papaihia.” (Mataio 4:4, 7, 10) I te hoê taime, i te sunago i Nazareta, ua taio oia i mua i te taata e ua faaohipa oia no ˈna iho, te tahi tuhaa o te parau tohu a Isaia. (Luka 4:16-21) E te mau aposetolo ïa a Iesu? I roto i ta ratou mau papai, ua faahiti pinepine ratou i te mau Papai hebera. Noa ˈtu e ua faariro te mau faatere ati Iuda ia Petero raua Ioane ei feia haapii-ore-hia e te itea ore, no te mea aita raua i haere i te mau fare haapiiraa teitei hebera, te haapapu maitai ra ta raua mau rata i faauruahia e te Atua e, ua ite maitai raua i te taio e i te papai. (Ohipa 4:13) Tera râ, mea faufaa mau anei ia ite i te taio?
“E ao to ˈna to te taio”
3. No te aha e mea faufaa roa ia taio i te mau Papai e te mau buka kerisetiano?
3 E nehenehe te ora mure ore e noaa na roto i te haapiiraa e te faaohiparaa i te ite papu a te mau Papai. (Ioane 17:3) Ua papu i te mau Ite no Iehova e mea faufaa roa ia taio e ia tuatapapa i te mau Papai Moˈa e te mau buka kerisetiano ta te Atua e horoa maira na roto i te arai o te pǔpǔ kerisetiano faatavaihia o te tavini haapao maitai e te paari. (Mataio 24:45-47) Inaha, i to ratou faaohiparaa i te mau buka i faaineine-taa-ê-hia a te Taiete Watch Tower, e mau tausani taata o tei haapii i te taio e ua noaa mai ia ratou te ite faaora o te Parau a te Atua.
4. (a) No te aha tatou e oaoa ˈi i te taioraa, te tuatapaparaa, e te faaohiparaa i te Parau a te Atua? (b) Eaha ta Paulo i parau ia Timoteo no nia i te taioraa?
4 E oaoa tatou i te taioraa, te tuatapaparaa, e te faaohiparaa i te Parau a te Atua. Te tumu oia hoi, ia na reira tatou, e faaoaoa e e faahanahana tatou i te Atua, e fanaˈo tatou i ta ˈna haamaitairaa, e e ite tatou i te oaoa. Te hinaaro nei Iehova e ia oaoa ta ˈna mau tavini. No reira oia i faaue ai i te mau tahuˈa ia taio i ta ˈna Ture i mua i te nunaa o Iseraela i tahito ra. (Deuteronomi 31:9-12) I to te papai parau ra o Ezera e vetahi atu feia taioraa i te Ture i mua i te nunaa atoa i putuputu mai i Ierusalema, ua tatarahia to ˈna auraa e inaha, ua “oaoa hua” te nunaa. (Nehemia 8:6-8, 12) I muri aˈe, ua parau te aposetolo kerisetiano ra o Paulo i to ˈna hoa rave ohipa ra o Timoteo e: “E rohi â i te taio i te parau, e te aˈo, e te haapii, e tae noa ˈtu vau.” (Timoteo 1, 4:13) Te na ô ra te tahi atu tatararaa e: “A tutava maite i te taio i te Papai i mua i te taata.”—New International Version.
5. Nafea te Apokalupo 1:3 ia taai i te oaoaraa e te taioraa?
5 Te haapapu-maitai-hia ra i roto i te Apokalupo 1:3 e, ua taaihia to tatou oaoaraa i nia i te taioraa e te faaohiparaa i te Parau a te Atua. Te na ô ra tera irava e: “E ao to ˈna to te taio, e to te feia e faaroo i teie nei parau tohu, e te haapao i tei papaihia i roto ra: ua fatata te tau e tupu ai.” Oia mau, mea hinaarohia e ia taio tatou ma te reo puai e ia faaroo tatou i te mau parau i tohuhia mai e te Atua i roto i te Apokalupo e i roto i te taatoaraa o te mau Papai. Te taata oaoa mau, o te taata ïa ‘tei hinaaro i te ture a Iehova; e tei ta ˈna ture to ˈna manaˈoraa i te rui e te ao.’ Eaha te faahopearaa? “O ta ˈna atoa e rave ra, te maitai ra ïa.” (Salamo 1:1-3) Ma te tano roa, te faaitoito nei te faanahonahoraa a Iehova ia tatou tataitahi ia taio e ia tuatapapa i ta ˈna Parau, o tatou anaˈe iho, e to tatou utuafare, e oia atoa e te mau hoa.
A feruri maite e a feruri hohonu
6. Eaha tei faauehia ia Iosua ia taio, e eaha hoi te faufaaraa?
6 Nafea outou e faufaahia ˈi i ta outou taioraa i te Parau a te Atua e i te mau buka kerisetiano? Eita e ore outou i te faufaahia i te raveraa mai ia Iosua, te raatira o Iseraela i tahito ra, o tei mǎtaˈu i te Atua. Teie tei faauehia ia ˈna: “Eiaha te buka ture na ia taa ê atu i roto i to vaha, ia haamanaˈo maite [“taio ma te reo mǎrû,” MN] oe i te reira i te rui e te ao, ia haapao hua oe i tei papai-atoa-hia i roto ra, ei reira e maitai ai to oe haerea, ei reira oe e manuïa roa ˈi.” (Iosua 1:8) ‘Te taioraa ma te reo mǎrû,’ oia ïa te faahitiraa i te parau no outou iho ma te reo mǎrû. E tauturu te reira no te haamanaˈoraa, no te mea e haamau roa te reira i te parau e taiohia ra i roto i te feruriraa. Ua titauhia Iosua ia taio i te Ture a te Atua “i te rui e te ao,” oia hoi ma te tamau. Tera te ravea e manuïa ˈi e e ohipa ˈi oia ma te paari ia rave oia i te mau hopoia i horoahia mai e te Atua ra. E nehenehe te taio-tamau-raa i te Parau a te Atua e tauturu atoa ia outou.
7. No te aha eita e tia ia haavitiviti noa ia taio outou i te Parau a te Atua?
7 Ia taio outou i te Parau a te Atua, eiaha ïa e haavitiviti noa. Mai te peu e ua faanaho outou e taio i te Bibilia aore ra i te tahi buka kerisetiano i roto i te hoê area taime, eiaha e ru. Oia iho â râ ia haapii anaˈe outou ma te tapao e haamanaˈo i te mau manaˈo faufaa roa ˈˈe. E ia taio anaˈe outou, a feruri maite. A hiˈopoa hohonu i te mau parau a te taata papai bibilia. A aniani ia outou iho, ‘Eaha ta ˈna tapao? Nafea vau ia faaohipa i teie parau?’
8. No te aha e mea faufaa roa ia feruri hohonu ia taio anaˈe outou i te mau Papai?
8 A rave i te taime no te feruri hohonu ia taio anaˈe outou i te mau Papai Moˈa. E tauturu te reira ia outou ia haamanaˈo i te mau faatiaraa a te Bibilia e ia faaohipa i te mau faaueraa tumu a te mau Papai. E tauturu atoa te feruri-hohonu-raa i nia i te Parau a te Atua e te haamauraa i roto i to outou feruriraa, ia outou ia paraparau mai roto roa mai i te mafatu, ma te horoa na te feia aau haavare ore e uiui mai i te mau pahonoraa maitatai roa, eiaha râ ia parau atu i te tahi mea o ta outou e tatarahapa i muri iho. Te na ô ra te hoê maseli i faauruahia e te Atua e: “Te imi ra te aau o te feia parau-tia ra i te parau ia parau.”—Maseli 15:28.
A faatuati te manaˈo apî e te manaˈo tahito
9, 10. Nafea ta outou taioraa bibilia e maitai ai ia faatuati outou te mau manaˈo apî no roto mai i te mau Papai e te tahi o ta outou i ite aˈena?
9 E farii te rahiraa o te mau kerisetiano e, mea iti roa to ratou ite no nia i te Atua, ta ˈna Parau, e ta ˈna mau opuaraa, na mua ˈˈera. I teie râ mahana, e nehenehe ta teie mau tavini kerisetiano, ma te haamata mai te poieteraa e te hararaa te taata, e tatara i te tumu o te tusia o te Mesia, e faataa i te haamouraa o teie faanahoraa o te mau mea ino, e e faaite e nafea te mau taata faaroo ia fanaˈo i te ora mure ore i roto i te Paradaiso i nia i te fenua nei. E te reira, no te mea iho â râ e ua haapii teie mau tavini a Iehova i “te ite i te Atua” na roto i te tuatapaparaa i te Bibilia e te mau buka kerisetiano. (Maseli 2:1-5) Ua faatuati mǎrû noa ratou te mau manaˈo apî o ta ratou i haapii mai e te mau manaˈo tahito o ta ratou i maramarama aˈena.
10 E mea faufaa roa e te maitai roa atoa ia faatuati te mau manaˈo apî no roto mai i te mau Papai e te tahi o ta outou i ite aˈena. (Isaia 48:17) Ia vauvauhia mai te mau ture, te mau faaueraa tumu, aore ra te tahi atu mau haapiiraa manaˈo a te Bibilia, a faatuati atu e te mea o ta outou i ite aˈena. A faatuea teie mau haamaramaramaraa e te mau mea o ta outou i haapii na no nia i “te hiroa parau mau.” (Timoteo 2, 1:13) A imi i te mau haamaramaramaraa o te nehenehe e tauturu ia outou ia haapaari i to outou mau taairaa e te Atua, ia haamaitai i to outou ihotaata kerisetiano, aore ra ia tufa i te mau parau mau bibilia na vetahi ê.
11. Eaha ta outou e nehenehe e rave ia taio outou i te tahi mea ta te Bibilia e parau ra no nia i te haerea? A faataa mai na.
11 Ia taio anaˈe outou i te tahi parau e faataa ra eaha ta te Bibilia e parau ra no nia i te haerea, a tamata i te haamatara mai i te faaueraa tumu e faahitihia ra. A feruri hohonu i nia i te reira, e a faaoti eaha ta outou e rave mai te peu e e farerei outou i taua huru tupuraa ra. Aita roa ˈtu te tamaiti a Iakoba ra o Iosepha i farii i te taoto e te vahine a Potiphara, inaha ua ani oia e: “Eaha hoi au e tia ˈi ia rave i tena na ino rahi, a hara ˈi i te Atua?” (Genese 39:7-9) I roto i teie aamu putapû mau, teie ïa te faaueraa tumu e matara mai—te taatiraa tia ore i te pae tino, e hara ïa i mua i te aro o te Atua. E nehenehe outou e faatuati teie faaueraa tumu i roto i to outou feruriraa, e te tahi atu mau faaiteraa no roto i te Parau a te Atua, e e riro te haamanaˈoraa i te reira ei mea faufaa roa ia faahemahia outou ia rave i teie huru hara.—Korinetia 1, 6:9-11.
A faahohoˈa i te mau aamu a te mau Papai
12. No te aha e faahohoˈa ˈi i te mau aamu bibilia ia taio anaˈe outou?
12 Ia haamanaˈo noa outou i te mea o ta outou e taio ra, a faahohoˈa i te ohipa e tupu ra i roto i to outou feruriraa. Ia puta roa mai te hohoˈa o te fenua, te mau fare, te taata i roto i to outou feruriraa. A faaroo i to ratou reo. A hâuˈa i te faraoa e euhia ra i roto i te umu. A rave mai te mea e te ora ra outou i te huru tupuraa. I reira ïa outou e putapû ai i ta outou taioraa, inaha e ite roa ˈtu outou i te hoê oire tahito, e paiuma ˈtu outou i nia i te hoê mouˈa teitei, e faahiahia roa outou i te mau taoˈa haviti mau i poietehia, aore ra e faahoa ˈtu outou i te mau tane e te mau vahine faaroo rahi.
13. Nafea outou ia faataa mai i te aamu i roto i Te mau tavana 7:19-22?
13 A rave na i te hiˈoraa e te taio ra outou i Te mau tavana 7:19-22. A faahohoˈa i te ohipa e tupu ra. Te tiai ra te tavana ra o Gideona e e toru hanere faehau iseraela itoito i to ratou vahi faataahia i te hiti o te puhapa ati Midiana. Tei te hora ahuru i te po, i te haamataraa o “te araraa i ropu.” No tuu-noa-hia ˈtura te mau tiai ati Midiana, e tei roto te puhapa a te mau enemi a Iseraela tei varea i te taoto ra, i te pouri. A hiˈo na! E pu ta Gideona e ta to ˈna mau taata. E aˈua pape rahi ta ratou e tapoˈi ra i te mau lamepa i roto i to ratou rima aui. Ma te hitimaue, ua faaoto aˈera na pǔpǔ e toru, hanere taata i te pǔpǔ hoê, i te pu, ua tuparari i te aˈua, e ua faateitei aˈera i te mau lamepa, ma te tuô e: “O te ˈoˈe a Iehova, e ta Gideona.” A hiˈo na i te puhapa. Te horo haere noa ra te mau ati Midiana ma te tuôtuô haere! A faaoto noa ˈi na taata e toru hanere i te pu, ua haafariu aˈera te Atua i te ˈoˈe a te mau ati Midiana i nia ia ratou iho. Ua horo atura Midiana, e ua horoa Iehova i te re na Iseraela.
Te hutiraa mai i te mau haapiiraa faufaa roa
14. Nafea ia faaohipa i Te mau tavana pene 9 no te haapii i te hoê tamarii te faufaaraa ia faahaehaa?
14 E rave rahi mau haapiiraa ta tatou e huti mai na roto i te taioraa i te Parau a te Atua. Ei hiˈoraa, peneiaˈe te hinaaro ra outou e haamau i roto i te feruriraa o ta outou mau tamarii te faufaaraa ia faahaehaa. Mea ohie roa ia faahohoˈa e ia taa i te auraa o te parau i tohuhia mai e te tamaiti a Gideona ra o Iotama. A haamata te taioraa i Te mau tavana 9:8. Te na ô ra Iotama e: “Haere atura te mau raau e faatahinu i te tahi arii i nia iho ia ratou.” Aita te olive, te suke, e te vine i farii i te riro ei arii i nia ia ratou. Area te tataramoa iti haihai ra, ua oaoa roa oia i te riro mai ei arii. I muri aˈe i to outou taioraa i te aamu ma te reo puai i ta outou mau tamarii, e nehenehe outou e faataa ˈtu e, te faahohoˈa ra te mau raau maitatai ra i te mau taata tura mau o tei ore i imi i te tiaraa arii i nia i to ratou mau taeae Iseraela. Te tataramoa, tei tano noa ei vahie, te faahohoˈa ra ïa i te tiaraa arii o te taata teoteo ra o Abimeleka, e taparahi taata o tei hinaaro e faatere i nia ia vetahi ê, ua pohe râ oia ia au maite i te tohu a Iotama. (Te mau tavana, pene 9) O vai ïa tamarii o te hinaaro e paari mai e e riro mai te tataramoa ra?
15. Mea nafea te faufaaraa o te taiva-ore-raa i te haapapu-maitai-raahia i roto i te buka a Ruta?
15 Te haapapu-maitai-hia ra te faufaaraa o te taiva-ore-raa i roto i te buka bibilia a Ruta. A rave na i te hiˈoraa e, te taio ra te mau melo o to outou utuafare te tahi i muri aˈe i te tahi, i teie aamu ma te tamata i te feruri i te mea e faatiahia ra. Te ite ra outou i te ati Moabi ra o Ruta e haere ra i Betelehema e to ˈna metua hoovai vahine ivi ra o Naomi, e e faaroo outou ia Ruta i te parauraa e: “To oe ra nunaa, o to ˈu atoa ïa nunaa; e to oe ra Atua, o to ˈu atoa ïa Atua.” (Ruta 1:16) Te ite ra outou i te vahine itoito ra o Ruta e ohi ra i te kerite na muri i te feia ooti i roto i te aua a Boaza. E faaroo atu outou ia ˈna ia haapopou ia Ruta, i te na ôraa e: “Ua ite hoi to te oire atoa no ˈu nei e e vahine haapao maitai oe.” (Ruta 3:11) I muri aˈe, ua faaipoipo aˈera Boaza ia Ruta. Ia au i te faanahoraa o te faaipoiporaa i te taoete, fanau maira ta Boaza tamarii ia Ruta, “to Naomi.” Ua riro o Ruta ei tupuna vahine no Davida e no Iesu Mesia atoa. Ua noaa ïa ta ˈna “utua rahi.” Hau atu, e huti mai te feia e taio i teie aamu a te mau Papai, i teie haapiiraa faufaa roa: A tapea i to taiva-ore-raa ia Iehova, e rahi ïa te haamaitairaa e noaa mai.—Ruta 2:12; 4:17-22; Maseli 10:22; Mataio 1:1, 5, 6.
16. Eaha te tamataraa i faaruruhia e na ati Hebera e toru, e nafea teie aamu ia tauturu ia tatou?
16 E nehenehe te aamu o na Hebera ra o Sadaraka, o Meseka, e o Abede-nego, e tauturu ia tatou ia tapea i to tatou haapao maitai i te Atua i roto i te mau tamataraa. A faahohoˈa i te ohipa i tupu i roto i to outou feruriraa, a taio puai ai outou i te pene 3 a Daniela. Te tia ra te hoê tii auro rahi i te vahi papu ra i Dura, i reira te mau tavana no Babulonia i te putuputuraa mai. I te taˈiraa te upaupa, ua tipapa ihora ratou i raro e ua haamori i te tii i faatiahia e te arii ra o Nebukanesa. O Sadaraka, o Meseka, e o Abede-nego anaˈe tei ore i tipapa. Ma te faatura, e te papu atoa râ, ua parau atu ratou i te arii e e ore ratou e tavini i ta ˈna mau atua e e haamori i te tii auro. Ua hurihia ˈtura teie mau taurearea hebera i roto i te umu auahi ama puai. Eaha râ te ohipa i tupu? I to ˈna hiˈoraa ˈtu i roto, ite atura te arii e maha taata, e hoê o ratou ra, “mai te Tamaiti ïa a te Atua ra.” (Daniela 3:25) Ua faahaerehia mai na ati Hebera e toru i rapae i te umu auahi, e ua haamaitai ihora Nebukanesa i to ratou Atua. Auê te faahiahia ia faahohoˈa i teie aamu i roto i to tatou feruriraa. E auê haapiiraa maitai roa ta ˈna e horoa maira no nia i te haapao-maitai-raa ia Iehova i roto i te tamataraa!
Te faufaa o te taioraa i te Bibilia i roto i te utuafare fetii
17. A faahiti poto mai na te tahi mau vahi faufaa roa ta to outou utuafare e haapii mai ia taio amui outou i te Bibilia.
17 E rave rahi haamaitairaa e fanaˈohia e to outou utuafare mai te peu e e rave tamau outou i te taime no te taio amui i te Bibilia. Ia haamata mai outou na te Genese, e ite ïa outou i te poieteraa e e hiˈo atu outou i te Paradaiso, te vahi faaearaa matamua o te taata. E nehenehe outou e ite atoa i te mau ohipa i orahia e te mau patereareha haapao maitai e to ratou mau utuafare e e apee i te mau ati Iseraela a haere ai ratou na roto i te Miti Uteute na nia i te eˈa mǎrô. E ite atu outou i te taurearea tiai mamoe ra o Davida ia upootia i nia i te ati Philiseti rahi ra o Golia. E nehenehe to outou utuafare e hiˈo i te paturaa o te hiero o Iehova i Ierusalema, e ite i to ˈna haamouraahia e te mau nuu babulonia, e e mataitai i to ˈna patu-faahou-raahia i raro aˈe i te faatereraa a te tavana ra o Zerubabela. Na muri iho i te mau tiai mamoe riirii ra, i pihai noa ˈtu ia Betelehema, e faaroo atu outou i te poroi a te melahi ra e ua fanauhia mai o Iesu. E haapii outou i te mau parau no nia i to ˈna bapetizoraahia e ta ˈna taviniraa, e ite atu outou ia ˈna ia pûpû i to ˈna ora taata ei hoo, e e apiti atoa outou i roto i te oaoaraa o to ˈna tia-faahou-raa. I muri iho, e nehenehe outou e ratere e te aposetolo Paulo e e hiˈopoa i te haamauraahia te mau amuiraa a parare ai te kerisetianoraa. E i te pae hopea, i roto i te buka Apokalupo, e nehenehe to outou utuafare e fanaˈo i te orama rahi a te aposetolo Ioane ra no nia i te tau a muri aˈe, e tae roa ˈtu i te Faatereraa Tausani Matahiti a te Mesia.
18, 19. Eaha vetahi mau manaˈo e horoahia ra no nia i te taioraa bibilia i roto i te utuafare?
18 Ia taio haapuai outou i te Bibilia i roto i te utuafare, a taio ïa ma te maramarama e te manaˈo tae. Ia taiohia te tahi mau tuhaa o te mau Papai, e nehenehe te hoê melo o te utuafare—peneiaˈe te metua tane—e taio i te aamu iho. E vetahi ra, e taio mai ïa ratou i te mau tuhaa a te feia faatiahia ra i roto i te Bibilia, ma te tuuraa reo e tano.
19 Ia taiohia te Bibilia i roto i te utuafare, e maitai atu â to outou aravihi no te taioraa. E rahi atoa ˈtu to outou ite no nia i te Atua, e e haafatata te reira ia outou ia ˈna. Ua himene o Asapha e: “E mea maitai râ ia ˈu ia haafatata ˈtu i te Atua: ua tiaturi au i te Fatu ra ia Iehova, ia faaite â vau i ta oe atoa ra mau ohipa.” (Salamo 73:28) E tauturu te reira i to outou utuafare ia riro mai ia Mose, o tei ‘itoito maite i te hiˈoraa ˈtu i te Atua, i tei ore e itea ia hiˈo ra,’ o Iehova.—Hebera 11:27.
Te taioraa e te taviniraa kerisetiano
20, 21. Eaha te taairaa i rotopu i ta tatou ohipa pororaa e te iteraa i te taio?
20 E tia i to tatou hinaaro e haamori i “te Atua, tei ore e itea ia hiˈo ra,” ia turai ia tatou ia tutava i te riro mai ei feia ite maitai i te taio. E tauturu te ite-maitai-raa i te taio ia tatou ia faaite i te poroi a te Parau a te Atua. E tauturu mau â te reira ia tatou ia rave i te ohipa pororaa i te Basileia ta Iesu i faaue i ta ˈna mau pǐpǐ i to ˈna parauraa e: “E haere outou e faariro i te mau fenua atoa ei pǐpǐ, a bapetizo atu ai ia ratou i roto i te iˈoa o te Metua, e no te Tamaiti, e no te [varua moˈa]; ma te haapii atu ia ratou i te haapao i te mau mea atoa ta ˈu i parau atu ia outou na.” (Mataio 28:19, 20; Ohipa 1:8) Te pororaa, o te ohipa matamua ïa a te nunaa o Iehova, e e tauturu te iteraa i te taio ia tatou ia rave i teie ohipa.
21 E tia ia tutava no te riro mai ei taata ite maitai i te taio e ei taata aravihi no te haapii i te Parau a te Atua i te taata. (Ephesia 6:17) No reira, ‘a faaitoito ia vai maite â i mua i te aro o te Atua ma te itehia mai, e te tia hoi i te tufa i te parau mau.’ (Timoteo 2, 2:15) A faarahi i to outou ite o te parau mau a te mau Papai e to outou aravihi ei Ite no Iehova, na roto i te tutava-maite-raa i te taio.
Eaha ta outou e pahono mai?
◻ Nafea te oaoa e taaihia ˈi e te taioraa i te Parau a te Atua?
◻ No te aha e feruri hohonu ai i nia i te mea e taiohia i roto i te Bibilia?
◻ No te aha e faatuati ai e e faahohoˈa ˈi i te aamu ia taio anaˈe i te mau Papai?
◻ Eaha vetahi mau haapiiraa e hutihia mai i te taioraa bibilia?
◻ No te aha e taio haapuai ai i te Bibilia i roto i te utuafare, e nafea te taioraa e taai ai e te taviniraa kerisetiano?
[Hohoˈa i te api 13]
Ia taio te utuafare i te Bibilia, a faahohoˈa i te mau aamu e a feruri hohonu i nia i to ratou faufaaraa