A tuu noa i ta outou hopoia i nia ia Iehova
TE TEIMAHA roa ra e rave rahi i teie mahana e te mau hopoia. Te tautau ra te mau fifi i te pae faanavairaa faufaa, te mau fifi utuafare peapea mau, te mau fifi i te pae no te oraora-maitai-raa, te oto e te mauiui no te haavîraa e te etaeta, e e rave rahi atu â mau ati i nia i to ratou arapoa mai te mau ofai mule ra te huru. Taa ê atu i teie mau faateimaharaa no rapaeau, te faateimaha-atoa-hia ra vetahi pae e te manaˈo haafaufaa ore ia ratou iho e te manuïa ore no to ratou iho mau huru tia ore. Te hinaaro nei e rave rahi e faaea i te aro amui. Nafea outou ia faaruru ia teimaha roa te mau hopoia?
I te hoê taime ua manaˈo te arii ra o Davida no Iseraela e eita te faateimaharaa e maraa faahou ia ˈna. Ia au i te Salamo 55, ua fariu-ê-hia to ˈna manaˈo e te ahoaho no te mau faateimaharaa e te ino o to ˈna mau enemi. Ua mauiui roa to ˈna mafatu e ua mǎtaˈu oia. Ua auê noa oia i roto i to ˈna mauiui. (Salamo 55:2, 5, 17) Noa ˈtu râ to ˈna ahoaho atoa, ua itea ia ˈna i te hoê ravea no te faaruru atu. Mea nafea ïa? Ua tiatonu oia i nia i to ˈna Atua no te ani i te tauturu. Teie ta ˈna aˈoraa ia vetahi ê o tei manaˈo atoa paha mai ia ˈna: “E tuu oe i ta oe hopoia ia Iehova ra.”—Salamo 55:22.
Eaha ta ˈna e hinaaro ra e parau i te na ôraa e “e tuu oe i ta oe hopoia ia Iehova ra”? O te pure-noa-raa anei ia Iehova e te faaiteraa ˈtu i to tatou ahoaho? Aore ra e nehenehe anei tatou e rave i te tahi mea no te tauturu ia tatou ia haapaiuma i te huru tupuraa? Eaha ïa ia haafaufaa ore roa tatou ia tatou iho no te haafatata ˈtu ia Iehova ra? E nehenehe e itea ia tatou e eaha ta Davida e hinaaro ra e parau na roto i te hiˈoraa i te tahi mau tupuraa o ta ˈna i faahaamanaˈo uˈana i to ˈna papairaa i teie mau parau.
A haa e te puai o Iehova
Te haamanaˈo ra anei outou e mea nafea o Golia i te haamǎtaˈuraa i te feia aro no Iseraela? Ua faariaria teie taata rahi mau, ua hau atu i te 2,7 metera te roa, ia ratou. (Samuela 1, 17:4-11, 24) Aita râ o Davida i mǎtaˈu. No te aha? No te mea aita oia i tamata i te aro atu ia Golia e to ˈna iho puai. Mai te taime a faatahinuhia ˈi oia ei arii no Iseraela no te tau a muri aˈe, ua vaiiho oia i te varua o te Atua ia aratai ia ˈna e ia haapuai ia ˈna i roto i ta ˈna mau ohipa atoa. (Samuela 1, 16:13) No reira ua parau oia ia Golia e: “Te haere atu nei râ vau ia oe, ma te iˈoa o te Atua sabaota ra o Iehova, te Atua no te nuu a Iseraela ra, tei vahavahahia e oe ra. Na Iehova oe e tuu mai i tau rima auanei.” (Samuela 1, 17:45, 46) E taata taora ofai aravihi na o Davida, e nehenehe râ tatou e tiaturi e na te varua moˈa o Iehova i aratai e i faaoi hau atu â i te ofai o ta ˈna i taora i nia ia Golia.—Samuela 1, 17:48-51.
Ua faaruru o Davida i teie tautooraa rahi e ua upootia mai oia na roto i te tiaturiraa e e tauturu e e haapuai te Atua ia ˈna. Ua atuatu oia i te hoê taairaa maitai e te papu e te Atua. Papu maitai e ua haapuaihia oia e te ravea o ta Iehova i faaohipa no te faaora ia ˈna i te taime na mua ˈtu. (Samuela 1, 17:34-37) Mai ia Davida, e nehenehe outou e atuatu i te hoê taairaa puai e o Iehova e e tiaturi ma te taatoa i to ˈna aravihi e to ˈna hinaaro e haapuai e e tauturu ia outou i roto i te mau huru tupuraa atoa.—Salamo 34:7, 8.
A rave i te maraa ia outou no te faatitiaifaro i te fifi
E ere râ te auraa e eita e ite-noa ˈˈe-hia te mau taime mauiui rahi, ahoaho, e te mǎtaˈu atoa, mai ta te Salamo 55 e faaite maitai ra. Ei hiˈoraa, tau matahiti i muri aˈe i te tiaturiraa ia Iehova ma te mǎtaˈu ore, ua mǎtaˈu rahi o Davida i to ˈna mau enemi. Ua au-ore-hia oia e te arii ra o Saula e ua tia ia ˈna ia horo no te faaora ia ˈna. A tamata na i te feruri i te ahoaho i te pae o te mau manaˈo hohonu o ta Davida i ite, ua fa mai paha te mau uiraa no nia i te tupuraa o te opuaraa a Iehova i roto i to ˈna feruriraa. Inaha, ua faatahinuhia oia ei arii i Iseraela no te tau a muri aˈe, ua tia ia ˈna ia ora ei taata tapuni i roto i te medebara, tei auauhia mai te hoê animala oviri ra te huru. I to ˈna imiraa i te haapuraa i te oire no Gata, te oire tumu o Golia, ua itehia o ˈna. Eaha te faahopearaa? Te parau ra te faatiaraa e “mǎtaˈu roa aˈera oia.”—Samuela 1, 21:10-12.
Aita râ oia i vaiiho i to ˈna mǎtaˈu e to ˈna ahoaho rahi ia tapea ia ˈna ia tiatonu atu i nia ia Iehova no te ani i te tauturu. Ia au i te Salamo 34 (papaihia i muri aˈe i taua tupuraa ra), ua parau o Davida e: “Ua imi au ia Iehova, e ua parau maira oia ia ˈu; e ua faaora ia ˈu i te mau mea ta ˈu i mǎtaˈu ra. Ua pii atura taua taata i pohe nei, e ua faaroo maira Iehova; e ua faaora ˈtura ia ˈna i to ˈna atoa ra mau ati.”—Salamo 34:4, 6.
Papu maitai, ua tauturu o Iehova ia ˈna. A tapao râ e aita o Davida i parahi noa a tiai noa ˈi e ia faaora Iehova ia ˈna. Ua taa ia ˈna i te faufaaraa no ˈna ia rave i te mau mea atoa o ta ˈna e nehenehe e rave i raro aˈe i te mau huru tupuraa no te matara mai i te huru tupuraa ino. Ua ite oia i te rima o Iehova i te faaoraraa ia ˈna, ua haa râ oia iho, ma te haavarevare e e taata maamaa oia e aita ˈtura te arii no Gata i haapohe ia ˈna. (Samuela 1, 21:14–22:1) E tia atoa ia tatou ia rave i te mau mea atoa e maraa ia tatou no te amo i te mau hopoia, maoti i te tiai-noa-raa e ia faaora mai Iehova ia tatou.—Iakobo 1:5, 6; 2:26.
Eiaha e faateimaha faahou i ta outou mau hopoia
Ua huti o Davida i te tahi atu haapiiraa, mea mauiui roa hoi, i muri aˈe i roto i to ˈna oraraa. Eaha ïa? I te tahi taime e faateimaha faahou tatou i ta tatou iho mau hopoia. I muri aˈe i te upootiaraa mai i nia i to Philiseti, ua tupu te fifi i nia ia Davida i to ˈna faaotiraa e hopoi i te araka o te faufaa i Ierusalema. Te na ô maira te aamu e: “Ua tia aˈera Davida, e te mau taata atoa ia ˈna ra, mai Baale i Iuda maira, haere atura e rave mai i te afata o te Atua . . . Ua tuu ihora ratou i te afata o te Atua i nia i te hoê pereoo apî, . . . e na Uza raua o Ahio, na tamarii a Abinadaba ra i tiahi mai i taua pereoo apî ra.”—Samuela 2, 6:2, 3.
Ua ofati te faaohiparaahia te hoê pereoo no te amo i te Araka i te mau faaueraa atoa o ta Iehova i horoa no nia i te reira. Ua faataa-maitai-hia e e tia i te feia amo farii-noa-hia, te mau ati Levi Kohata, ia amo i te Araka i nia i to ratou tapono, ma te faaohipa i te mau maurima tuuhia na roto i te mau potaa hamani-taa-ê-hia i roto i te Araka. (Exodo 25:13, 14; Numera 4:15, 19; 7:7-9) E faatupu na te tâuˈa-ore-raa i teie mau faaueraa i te ati. I to te mau animala e huti ra i te pereoo fatata-roa-raa i te faataahuri i te reira, ua faatoro o Uza, e ati Levi hoi, e ere râ i te hoê tahuˈa, i to ˈna rima no te faatia i te Araka e ua tairihia oia e Iehova no to ˈna faatura ore.—Samuela 2, 6:6, 7.
Ua amo o Davida na nia i to ˈna tiaraa arii i te tahi hopoia no nia i te reira. Te faaite ra to ˈna haerea e e nehenehe atoa te feia o te atuatu nei i te hoê taairaa maitai e o Iehova e rave i te tahi taime i te tahi haerea hape i mua i te mau tamataraa. Na mua roa ua riri o Davida. I muri iho ua mǎtaˈu oia. (Samuela 2, 6:8, 9) Ua tamata-uˈana-hia to ˈna taairaa papu e o Iehova. E au ra e teie te taime e aita oia i tuu i ta ˈna hopoia i nia ia Iehova, i to ˈna oreraa e haapao i ta ˈna mau faaueraa. Aita anei tatou e faaruru ra i teie huru tupuraa i te tahi taime? Ua faahapa aˈena anei tatou ia Iehova no to tatou mau fifi no te mea aita tatou i haapao i ta ˈna mau faaueraa?—Maseli 19:3.
Te faarururaa i te hopoia teimaha o te hara
I muri aˈe, ua tuu o Davida i te hoê hopoia teimaha o te hara i nia ia ˈna iho i to ˈna ofati-ino-raa i te mau ture a Iehova i te pae morare. I taua taime ra ua haapae o Davida i ta ˈna hopoia e aratai i to ˈna mau taata i te tamaˈi. Ua faaea oia i Ierusalema a haere ai ratou i rapaeau e aro. Ua faatupu te reira i te arepurepu rahi.—Samuela 2, 11:1.
Ua ite te arii ra o Davida i te vahine haviti ra o Bate-Seba o te hopu ra i te pape. Ua taiata oia ia ˈna, e ua hapû aˈera oia. (Samuela 2, 11:2-5) No te tamata i te huna i to ˈna haerea ino, ua faanaho oia e ia hoˈi mai ta ˈna tane, o Uria, i Ierusalema mai te vahi aroraa. Ua patoi o Uria i te taati atu i ta ˈna vahine a vai noa ˈi o Iseraela i roto i te aroraa. (Samuela 2, 11:6-11) Ua rave aˈera o Davida i te mau ravea iino e te haavarevare no te tapoˈi i ta ˈna hara. Ua faanaho oia e ia tuu te mau hoa faehau ia Uria i nia i te hoê tiaraa atâta i roto i te aroraa e ia taparahihia oia. Auê hara riaria e te ino mau e!—Samuela 2, 11:12-17.
Papu maitai, i te pae hopea, ua itehia te hara a Davida, e ua faaite-tahaa-hia oia. (Samuela 2, 12:7-12) A tamata na i te feruri i te teimaha o te oto e te utua o ta Davida i faatupu i to ˈna taaraa i te ino mau o te ohipa o ta ˈna i rave no to ˈna hinaaro vî ore. Ua faateimaha-roa-hia paha oia e to ˈna iho manuïa-ore-raa, no te mea iho â râ e taata horuhoru oia e te puta ohie. Eita e ore e ua haafaufaa ore roa oia ia ˈna iho!
Ua faˈi oioi râ o Davida i ta ˈna hara, ma te faaite atu i te peropheta Natana e: “Ua hara vau ia Iehova.” (Samuela 2, 12:13) Te parau maira te Salamo 51 e eaha na to ˈna huru e mea nafea oia i te tiaororaa ˈtu i te Atua ra o Iehova no te tamâ ia ˈna e no te faaore i ta ˈna hara. Ua pure oia e: “E horoi hua mai oe ia ˈu i to ˈu nei ino, tamâ hua mai ia ˈu i ta ˈu nei hara. Te faˈi nei hoi au i ta ˈu nei hara, e te vai noa nei â to ˈu ino i pihaiiho ia ˈu.” (Salamo 51:2, 3) No te mea ua tatarahapa mau oia, ua nehenehe oia e atuatu faahou i to ˈna taairaa puai e te piri e o Iehova. Aita o Davida i onoono noa i te inoino e i te haafaufaa ore ia ˈna iho. Ua tuu oia i ta ˈna hopoia i nia ia Iehova na roto i te faˈiraa ma te haehaa e ua hara mau oia, te faaiteraa i te tatarahapa mau, e te pure-uˈana-raa e ia faaore mai Iehova i ta ˈna hara. Ua noaa faahou ia ˈna i te farii maitai o te Atua.—Salamo 51:7-12, 15-19.
Te faarururaa i te haavareraa
E aratai te reira ia tatou i te faatiaraa tei turai ia Davida ia papai i te Salamo 55. Tei roto oia i te ahoaho rahi i te pae o te mau manaˈo hohonu. “Ua horuhoru tau aau i roto ia ˈu nei; e ua roohia vau i te riaria pohe ra,” o ta ˈna ïa i papai. (Salamo 55:4) Na te aha i faatupu i taua mauiui ra? Ua faanaho o Abasaloma, te tamaiti a Davida, e haru i te tiaraa arii o Davida. (Samuela 2, 15:1-6) Mea teimaha mau ia amo i teie opuaraa ino a ta ˈna iho tamaiti, te ohipa ino roa ˈˈe râ, ua turu te taata aˈo tiaturi-rahi-hia e Davida, o Ahitophela, i te opuaraa ino no nia ia Davida. O Ahitophela o ta Davida e faataa ra i roto i te Salamo 55:12-14. I muri aˈe i te opuaraa ino e te haavareraa, ua tia ia Davida ia faarue ia Ierusalema. (Samuela 2, 15:13, 14) Auê ahoaho ta te reira i faatupu i nia ia ˈna!
Aita râ oia i vaiiho i to ˈna manaˈo hohonu mau e to ˈna mauiui ia faaiti i to ˈna turuiraa e to ˈna tiaturiraa i nia ia Iehova. Ua pure oia ia Iehova no te haafifi i te mau opuaraa iino a taua feia ra. (Samuela 2, 15:30, 31) Te ite faahou ra tatou e aita o Davida i tiai noa e na Iehova e rave i te mau ohipa atoa. I taua iho taime ra, ua rave oia i tei maraa ia ˈna no te aro atu i te opuaraa ino i ravehia i nia ia ˈna. Ua tono oia i te tahi atu taata o to ˈna feia aˈo, o Husai, ia hoˈi atu i Ierusalema no te haavarevare noa i te apiti atu i roto i te opuaraa ino, inaha râ, ua haere oia no te haafifi i te reira. (Samuela 2, 15:32-34) Ma te tauturu a Iehova, ua manuïa taua ohipa ra. Ua faataere o Husai ia Abasaloma ia navai te taime no Davida ia haaputuputu e ia faanaho no te paruru ia ˈna iho.—Samuela 2, 17:14.
Auê Davida i te mauruuru-mau-raa i te paruru a Iehova e tae noa ˈtu i to ˈna faaoromai e to ˈna ineine e faaore i te hara i roto i to ˈna oraraa atoa e! (Salamo 34:18, 19; 51:17) Mea na roto i teie tupuraa o Davida i te faaitoitoraa ia tatou ma te tiaturi e ia ahoaho anaˈe tatou ia fariu atu i nia ia Iehova no te ani i te tauturu, no te ‘tuu i ta tatou hopoia i nia ia Iehova.’—A faaau e te Petero 1, 5:6, 7.
A haamau e a atuatu i te hoê taairaa puai e te papu e o Iehova
Nafea e noaa ˈi ia tatou i te hoê â huru taairaa e o Iehova o ta Davida i fanaˈo, te hoê taairaa o tei tauturu ia ˈna i roto i te tamataraa e te ati rahi? E haamau tatou i taua huru taairaa ra na roto i te riroraa mai ei feia haapii haapao maitai i te Parau a te Atua, te Bibilia. E vaiiho tatou ia ˈna ia haapii ia tatou no nia i ta ˈna mau ture, mau faaueraa tumu, e to ˈna huru. (Salamo 19:7-11) A feruri hohonu ai tatou i nia i te Parau a te Atua, e hau roa ˈtu â tatou i te piri ia ˈna e i te haapii ia tiaturi taatoa ia ˈna. (Salamo 143:1-5) E faahohonu e e haapuai tatou i taua taairaa ra ia amui tatou i te mau hoa haamori ia rahi atu â tatou i te haapiihia e Iehova. (Salamo 122:1-4) E faarahi tatou i to tatou taairaa e o Iehova na roto i te pureraa ma te mafatu tae mau.—Salamo 55:1.
Oia mau, ua hepohepo o Davida, mai ia tatou, i te oreraa to ˈna taairaa e o Iehova e riro ei taairaa puai i to ˈna tiaraa mau. E nehenehe te haavîraa e turai ia tatou ia “ohipa ma te maamaa.” (Koheleta 7:7, MN) Te ite nei râ Iehova i te ohipa e tupu ra, e ua ite oia eaha to roto i to tatou mafatu. (Koheleta 4:1; 5:8) E tia ia tatou ia haa puai ia vai puai noa to tatou taairaa e o Iehova. I muri iho, noa ˈtu eaha te mau hopoia te tia ia tatou ia amo, e nehenehe tatou e tiaturi ia Iehova no te haapaiuma i te faateimaharaa aore ra no te horoa i roto ia tatou i te puai no te faaruru i to tatou huru tupuraa. (Philipi 4:6, 7, 13) Mea faufaa ia ati maite noa tatou ia Iehova. I to Davida na reiraraa, ua vai hau noa oia.
No reira, noa ˈtu eaha ta outou mau huru tupuraa, o ta Davida ïa e parau ra, a tuu noa i ta outou hopoia i nia ia Iehova. E fanaˈo ïa tatou i te parau mau o te parau tǎpǔ: “Na ˈna oe e tauturu mai; e ore roa oia e vaiiho noa ˈtu i te taata parau-tia ia faaaueuehia.”—Salamo 55:22.