Ua turai te faaroo ia ˈna ia haa

I TO Iehova horoaraa i te hopoia ia Mose e aratai i te nunaa o Iseraela i rapaeau i te faatîtîraa i Aiphiti ra, ua ani o Mose i te omuaraa e ia haapaehia o ˈna i taua hopoia ra, i te na ôraa e: “E tau Fatu [Iehova, MN], e ere au i te taata parau, mai ia oe â i parau mai i to tavini nei, e mai mutaaiho mai â; e reo maromaroâ e te maumau to ˈu.” (Exodo 4:10) Oia mau, ua manaˈo o Mose e aita to ˈna e aravihi no taua hopoia faufaa ra.

Oia atoa i teie mahana, te manaˈo nei e rave rahi mau tavini a Iehova i te tahi taime e eita ta ratou e nehenehe e amo i te mau hopoia o tei horoahia na ratou. Ei hiˈoraa, te faatia ra te hoê tiaau kerisetiano o Theodore to ˈna iˈoa e: “I roto i te mau ohipa atoa o ta Iehova e ani ra ia ˈu ia rave, o te taviniraa te mea fifi roa ˈˈe. I to ˈu apîraa, e haere oioi na vau i te opani, e haavarevare noa na vau i te pate i te ǒe e e hoˈi rii mǎrû noa vau i muri, ma te tiaturi e aita vau i faaroohia aore ra i itehia. I to ˈu paariraa mai, ua faaea vau i te na reira, te manaˈo noa râ e haere na te mau uputa, e maˈi-roa-hia vau. E tae mai i teie nei mahana, e maˈihia vau hou a haere ai i roto i te taviniraa, e haere noa râ vau.”

Na te aha i tauturu ia Mose e i te mau Ite o teie tau mai ia Theodore ia haapaiuma i teie mau huru mǎtaˈu? Te pahono ra te Bibilia e: “No te faaroo i faarue ai oia [Mose] i Aiphiti, . . . itoito maite atura oia i te hiˈoraa ˈtu i te Atua, i tei ore e itea ia hiˈo ra.”—Hebera 11:27.

Oia mau, na roto i te faatupuraa i te faaroo i roto ia Iehova, ua nehenehe o Mose e haapaiuma i to ˈna mau manaˈo e eita e maraa ia ˈna e e amo i te mau hopoia tei horoahia ia ˈna ra ei haava, ei peropheta, ei aratai i te nunaa, ei arai o te faufaa o te Ture, ei raatira, ei taata tuatapapa aamu, e ei papai bibilia.

Oia atoa, ia faatupu tatou i te hoê â faaroo e to Mose, e haere tatou mai te huru ra e ‘te ite ra tatou i Tei ore e itea ia hiˈo ra.’ Te faatupu ra taua huru faaroo ra i te itoito, o te tauturu ia tatou ia amo i ta tatou mau hopoia kerisetiano—ia manaˈo atoa anaˈe tatou e eita e maraa ia tatou.