‘Mea faufaa anei au no te Atua?’

“E MEA faufaa anei au? Te tâuˈa ra anei te Atua ia ˈu?” Teie te upoo parau o te hoê tumu parau e taiohia i roto i te vea ra Christianity Today. “Ua haaati noa te rahiraa o ta ˈu ohipa papai buka na pihai iho i te fifi o te mauiui,” o ta Philip Yancey ïa e faataa ra, te taata i papai i te tumu parau. “Te aniani noa ra vau i teie noâ mau uiraa, mai te huru ra e te tapeapea ra vau i te hoê pepe tahito o te ore roa ˈtu e ora. Te faaroo nei au i te feia taio i ta ˈu mau buka, e te haapapu ra ta ratou mau aamu peapea mau i to ˈu mau manaˈo feaa.”

Ua aniani atoa paha outou e te anaanatae ra anei te Atua i to outou oraraa. Ua matau maitai paha ia outou i te Ioane 3:16, o te faataa ra e “i aroha mai te Atua i to te ao, e ua tae roa i te horoa mai i ta ˈna Tamaiti fanau tahi.” Aore ra ua taio paha outou i te Mataio 20:28, o te na ô ra e ua tae o Iesu i te “horoa i to ˈna ora ei hoo no te taata e rave rahi.” Te aniani noâ ra paha outou e, ‘Te tâuˈa ra anei te Atua ia ˈu? Te haapao ra anei oia ia ˈu mai te hoê taata?’ E tumu papu ia tiaturi e te na reira ra oia, mai ta tatou e ite mai.