Mea faufaa anei ia ite i te pahonoraa?
“E ite ïa outou i te parau mau, e na te parau mau outou e faatiamâ.”—IOANE 8:32.
E ITE tatou i roto i te Bibilia te parau mau e tiamâ ˈi tatou i te mau haapiiraa taa ore e te hape atoa no nia ia Iesu. Mea faufaa anei râ ta tatou e tiaturi ra? E, mea faufaa no Iehova, no Iesu e no tatou atoa.
● No te aha mea faufaa ˈi no Iehova? “E aroha hoi te Atua.” (Ioane 1, 4:8) Te hinaaro ra Iehova ia oaoa tatou e a muri noa ˈtu. Ua parau Iesu: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia [roaa te ora mure ore i te feia atoa e] faaroo ia ˈna.” (Ioane 3:16) Ua tono te Atua i ta ˈna Tamaiti no te hoo mai ia tatou ia nehenehe tatou e ora e a muri noa ˈtu i roto i te paradaiso i te fenua, mai ta ˈNa i opua i te omuaraa. (Genese 1:28) Te tiai ru nei te Atua i te horoa i te ô o te ora mure ore i te feia e haapii ra i te parau mau no nia i ta ˈna Tamaiti e e haa ra ia au i te reira.—Roma 6:23.
● No te aha mea faufaa ˈi no Iesu? Te here atoa ra Iesu i te taata. Ua faaite oia i to ˈna here pipiri ore ma te horoa i to ˈna ora no tatou. (Ioane 15:13) Ua taa ia ˈna e maoti noa te reira e ora ˈi te taata. (Ioane 14:6) E maere anei ïa tatou e te hinaaro nei Iesu e ite e rave rahi roa taata ia fanaˈo i te mau maitai o to ˈna tusia taraehara? No reira oia i faaue ai i ta ˈna mau pǐpǐ taiva ore ia haapii atu i te taata na te ao atoa nei no nia i te hinaaro o te Atua e i ta ˈNa opuaraa.—Mataio 24:14; 28:19, 20.
● No te aha mea faufaa ˈi no tatou? A feruri na maa taime i te mau mea faufaa roa paha no oe: to oe ea e to oe utuafare. Te hiaai ra anei oe i te hoê ea maitai e i te hoê oraraa maitai aˈe no oe e no te feia ta oe e here ra? Na roto ia Iesu, te pûpû mai nei Iehova no oe e no te feia ta oe e here ra i te ea maitai roa e te ora mure ore i roto i te hoê ao apî aita e oto e e mauiui faahou. (Salamo 37:11, 29; Apokalupo 21:3, 4) Te hinaaro ra anei oe e ora i roto i te hoê ao mai teie? Mai te peu e e, e mea tia ia rave oe i te tahi ohipa.
A hiˈo faahou na i te irava i pihaiiho i te upoo parau: “E ite ïa outou i te parau mau, e na te parau mau outou e faatiamâ.” Maoti te parau mau no nia ia Iesu e i ta ˈna tuhaa i roto i te faatupuraa i te opuaraa a te Atua e tiamâ ˈi tatou i te huru faatîtîraa ino roa ˈˈe, oia hoi o te hara e te pohe. Teie râ, no te tiamâ mai, e mea tia ia ‘ite i te parau mau.’ No te aha e ore ai e haapii hau atu â no nia i teie parau mau e i te ravea e faufaahia ˈi oe e te feia ta oe e here ra i te reira? E oaoa te mau Ite no Iehova i te tauturu ia oe.