E arue anei outou ia Iehova?

“MAI TO oe atoa ra iˈoa‚ e te Atua, oia atoa te haamaitai ia oe, e tae i te hopea mai o te fenua ra.” E mau parau teie no roto mai i te parau tohu himenehia e te mau tamaiti a Kora. (Salamo 48:10) I teie mahana, te arue nei te mau himene puai mau o te mau mirioni Ite no Iehova i te Atua e te faaite nei i to ˈna iˈoa na roto i te pororaa i te parau apî maitai o to ˈna ra Basileia. Ma te rave i te reira i roto e 232 fenua e mau motu e i roto hau atu i te 300 reo, ua naea-mau-hia e ratou “i te mau hiti o te fenua.”

Na te aha e faahepo nei i te mau taata no te mau huru ihotumu totiale, e te reo taa ê o te fenua ia arue ia Iehova? Te tumu matamua, no to ratou mauruuru no te ite mau no nia i te Parau a te Atua, te Bibilia. Ua faatiamâ mai te mau parau mau i te pae varua ia ratou i te mau peu tahutahu e i te mau tiaturiraa i te pae faaroo o te faatîtî mai te haamauiuiraa mure ore. (Ioane 8:32) Ua tauturu atoa te parau mau ia ratou ia haafaufaa i te mau huru maitai faahiahia o te Atua‚ mai to ˈna here, te puai, te paari, e te parau-tia, tei faaaifaitohia e te aroha faito ore. Ua turai te roaaraa ia ratou i te maramarama no nia i te Tamaiti matahiapo otahi mau tei pûpûhia e te Atua, o Iesu Mesia ei tusia hoo no te huitaata i te mau taata parau-tia ia arue e ia tavini ia Iehova.

Ia au i te buka a te Bibilia ra o te Apokalupo, te pii nei te hoê himene amui no te raˈi e: “E au te hanahana ia oe, e te Fatu, e te tura, e te mana, na oe hoi i hamani i te mau mea atoa nei, e no to oe hinaaro i mau ai, e i hamanihia ˈi ratou.” (Apokalupo 4:11) E ere teie arueraa ei manaˈo hohonu tei faahepohia. Maoti râ, no roto mai i te faatura hohonu no Iehova.

Arue i te Atua ma te faaite i te parau apî maitai

Ma te arue ia Iehova‚ te pee nei te hoê taata i te hiˈoraa faahiahia mau o Iesu Mesia, te taata matamua i arue i te Atua. Te apeeraa i te taahiraa avae o Iesu, te vai ra ïa te apitiraa i roto i te ohipa o te pororaa i te parau apî maitai o te Basileia o te Atua. (Mataio 4:17, 23; 24:14) Ua riro taua ohipa pororaa ra ei tutavaraa rahi mau na te ao atoa nei no te arue ia Iehova.

No te faufaa rahi o teie ohipa i faatuati papu maitai ai te Bibilia i te reira i te ora. Te taio nei tatou i roto i te Roma 10:13-15 e: “O te tiaoro atoa hoi i te iˈoa o Iehova ra, e hope roa ïa i te ora. Eaha ra te taata nei i tia ˈi ia tiaoro atu ia ˈna, i tei ore i faaroohia e ratou ra? e eaha hoi ratou e tia ˈi ia faaroo ia ˈna, i tei ore ratou i ite ia ˈna? e eaha hoi ratou e ite ai i te faaite ore? Eaha hoi te taata nei e tia ˈi ia faaite ia ore ratou ia tonohia? oia hoi tei papaihia ra e, O te nehenehe o te avae o te feia i hopoi mai i te parau oaoa o te hau e, o tei hopoi mai i te evanelia o te maitai ra e!”

I te matahiti i mairi noa aˈenei‚ ua pûpû te mau Ite no Iehova hau atu i te hoê miria hora no te ohipa pororaa. E eaha te mau faahopearaa maitai i roaa mai na roto i taua arueraa i te Atua ra! Ua ô mai e 314 000 i te himene arueraa na roto i te faataiperaa i to ratou pûpûraa no Iehova na roto i te bapetizoraa i roto i te pape.

Oia mau, eaha te parauhia no nia i na 12 288 917 o tei putuputu mai i te oroa Haamanaˈoraa i te poheraa o te Mesia? I rotopu ia ratou te vai ra hau atu i te 7 000 000 aitâ e arue ra ia Iehova ei feia poro i te parau apî maitai. Tera râ, e faahopearaa to to ratou taeraa mai i taua ohipa faufaa mau ra o te amuiraa mai ïa o na mirioni taata i te himene arueraa. Eaha te rave no te tauturu i taua mau taata e anaanatae ra no te riro mai ei feia arue ia Iehova?

Te mau tauturu tano

Te hinaaro nei e rave rahi taata anaanatae e arue ia Iehova tera râ te manaˈo nei ratou e eita te mau titauraa e maraa ia ratou. Mea maitai e ia haamanaˈo ratou i te mau parau a te papai salamo e: “E hiˈo anei ta ˈu mata i te mau aivi? e noaa anei te tauturu ia ˈu i reira? No ǒ ia Iehova ra te tauturu ia ˈu, o tei hamani i te mau raˈi e te fenua.” (Salamo 121:1, 2) Ma te papu, te tiatonu nei te papai salamo i to ˈna mata i nia i te mau mouˈa no Ierusalema, i reira te paturaahia te hiero o Iehova e te vahi e vai ai te faatereraa a te Atua i nia i te fenua nei. No reira ˈtura e nehenehe tatou e faaoti ma te papu e no ǒ mai ia Iehova ra e ta ˈna faanahonahoraa ra te tauturu no te arue i te Atua e no te faaite i te poroi o te Basileia.—Salamo 3:4; Daniela 6:10.

I teie nei mahana, e nehenehe te feia e hinaaro nei e arue ia Iehova e titau i te aupururaa ma te here no ǒ mai i ta ˈna faanahonahoraa i nia i te fenua nei. Ei hiˈoraa, te pûpû nei te mau Ite no Iehova i te tauturu ma te faatere i te mau haapiiraa bibilia i te fare o te mau taata ma te tamoni ore e te mau taata e anaanatae ra. Te vai ra i roto i taua porotarama haapiiraa ra hau atu i te taa-noa-raa i te mau parau bibilia. E tauturu te reira i te feia haapii ia atuatu i te haamauruuru no te mea o ta ˈna e haapii ra e no te faanahonahoraa ta Iehova e faaohipa ra.

E ia au i te reira te tamata nei te mau Ite o te aratai ra i te haapiiraa bibilia i te ite papu e aita teie mau parau ite-apî-hia i ohipa i roto noa i te feruriraa i te mafatu atoa râ. E eita te taata haapii e faaea i te faaite i te taata e haapii ra e mea nafea Iehova ia faaohipa i ta ˈna faanahonahoraa no te faatupu i Ta ˈna opuaraa i nia i te fenua nei. Ua tauturu mau te vea iti ra Te mau Ite o Iehova—Tahoêhia no te faatupu i te hinaaro o te Atua i nia i te fenua taatoa nei e te ripene video Les Témoins de Jéhovah: un nom, une organisation no te faatupuraa i te reira.

E tuhaa faufaa atoa to te mau putuputuraa kerisetiano i roto i te arueraa ia Iehova. I te omuaraa iho â o te haapiiraa bibilia, e titau-manihini-hia te taata haapii ia haere mai i te mau putuputuraa kerisetiano. I te taime tano, e haapii oia i te faufaaraa ia tamau mai e ia apiti i te mau putuputuraa atoa o te amuiraa. (Hebera 10:24, 25) E horoa atoa te mau tiaau ratere i te tauturu no te mau hoa o te parau mau e te feia apî e arue ra ia Iehova na roto i te faaineine maitai i te mau putuputuraa o tei riro ei taime faaitoito e te ohie i te pae varua.

E tauturu i te mau tamarii ia arue ia Iehova

Tei roto te mau tamarii i te rahiraa taata o te riro mai ei feia poro i te parau apî maitai i te mau tau i mua. Tei te mau metua tane te hopoia bibilia taa ê i te faaamuraa i ta ratou tamarii “i roto i te paari ma te aˈo a Iehova.” (Ephesia 6:4) Ia horoahia te mau faaineineraa tano e te mau metua e mǎtaˈu nei i te Atua, e nehenehe atoa te mau tamarii nainai e atuatu i te hinaaro e arue ia Iehova.

Ua haere pinepine te hoê tamahine iti no Aretetina e farerei i te mau matahiapo o te amuiraa e rave rahi avaˈe, ma te ani i te tauturu a nehenehe atu ai oia e riro mai ei taata poro no te Basileia. I te taime mau, ua farii to ˈna nau metua e te mau matahiapo e faatia ia ˈna ia riro ei taata poro bapetizo-ore-hia. Ua faaite aˈena oia i te poroi o te Basileia i mua i te mau uputa. Noa ˈtu e pae noa matahiti to teie tamahine apî e aita oia i ite i te taio‚ ua tamau aau oia e teihea roa te tahi mau irava bibilia. Ia ite oia i te irava, e ani oia i te fatu fare ia taio i te reira, e i muri iho e tatara oia.

Mea papu e nehenehe te mau matahiapo e te mau metua e faatupu hau atu â i te ohipa maitai ma te faaitoito e te tauturu ia ratou ia haere i mua na mua ˈˈe ratou e riro mai ai ei feia arue ia Iehova.—Maseli 3:27.

Te hoê taairaa mure ore e o Iehova

Teie nei râ, eaha ˈtura mai te peu e te apiti nei outou e te mau Ite no Iehova i te tahi taime aitâ râ outou i apiti atura ia ratou i roto i ta ratou ohipa pororaa? E mea maitai e ia uiui outou iho i teie mau uiraa i muri nei, ‘Te tiaturi ra anei au e ua itehia e au i te parau mau e o Iehova anaˈe te Atua mau otahi roa? Ua papu anei ia ˈu e o te Basileia anaˈe o te Atua te ravea otahi roa no te mau fifi o te huitaata? Ua faarue anei au i te mau haapaoraa hape atoa e te mau peu o teie nei ao o te faariri nei ia Iehova? E here hohonu anei to ˈu no te Atua e no ta ˈna mau titauraa parau-tia?’ (Salamo 97:10) Ahiri e e nehenehe outou e pahono ma te haavare ore e e i teie nei mau uiraa, eaha te mea e tapea nei ia outou i te arue atu ia Iehova?—A faaau e te Ohipa 8:36.

Te titau nei te arueraa ia Iehova hau atu i te poro-noa-raa i te parau apî maitai. Mai te peu e ua noaa ia outou i te ite mau, i te faaroo mau, e ua faatuati outou i to outou oraraa i te mau titauraa a te Atua, te hinaaro nei outou e haapaari i ta outou iho mau taairaa e te Atua. Nafea? Na roto i te pûpûraa i to outou ora no ˈna na roto i te pure e te faataiperaa na roto i te bapetizoraa i roto i te pape. Te fatata roa maira te oraraa mure ore. No reira, ia ohipa tatou i teie nei ia au i te aˈoraa a Iesu: “E tomo na te uputa pirihao; te atea nei hoi te uputa e te aano nei te eˈa e tae atu ai i te pohe; e e rave rahi tei na reira i te tomo. Te apǐapǐ râ o te uputa e te piri hoi o te eˈa e tae atu ai i te ora, e te iti hoi o te feia i ite atu i te reira!”—Mataio 7:13, 14.

Na roto i te fatataraa mai o te haamouraa o te amuiraa o te mau mea i roto i te hoê ati rahi, e ere teie i te taime no te faataupupu. A rave oioi i te mau taahiraa avae no te faatupu i te mau taairaa mure ore e o Iehova. Oia mau, teie te taime no te pahono ma te tano i te uiraa ra, E arue anei outou ia Iehova?