E faaora Iehova i te fenua

UA OPANIHIA te hoê tauraa manureva i nia i te hoê motu o te mau Maldives no e rave rahi hora i te mau mahana atoa. No te aha? No te mea e haamoe te pape pue o te maraa i te purumu, ma te haafifi i te tauraa o te mau manureva. Te mǎtaˈu ra vetahi mau aivanaa e e nehenehe te faito miti o te mau motu no Maldives e naeahia hoê metera te maraaraa i te senekele i mua nei. E au ra paha e e ere i te hoê faito rahi, e nehenehe râ teie huru maraaraa e haamoe roa e hitu motu e to ˈna atoa mau taata. Oia mau, ia au i te vea UN Chronicle, e nehenehe te faito miti o te naea e piti metera e haamoe roa i te pueraa motu taatoa, oia hoi tau 1 200 motu!

No te aha te faito miti e maraa ˈi? Ia au i te Porotarama no nia i te mau mea e haaati ra ia tatou a te mau Nunaa Amui, e haaparare te haaviiviiraa i te reva o te fenua na roto i te “mahanahanaraa o te fenua” i te mau miti i roto i te mau vahi mahanahana, e faatahe te reira i te mau poro toetoe o te fenua e te mau mouˈa pape toetoe paari, e no reira, e haamaraa oia i te faito miti. Te parau ra te Pu Panos i Lonedona e te haaviiviiraa “e nehenehe oia e faatupu ma te taere i te hoê ati taatoa o te faataui i te mau otia o te fenua e o te miti.”

Te aimârô-noâ-hia ra no nia i te vai-mau-raa o te mahanahanaraa taatoa o te fenua e te mau aivanaa. Teie râ, e nehenehe e papu ia tatou e eita te mau fifi i te pae o te mau mea e haaati ra ia tatou e haafifi i te opuaraa a te Atua. “Na ˈna hoi i haamau i teie nei ao,” ta te Bibilia e faataa ra. “E ore ïa e aueue.” (Paraleipomeno 1, 16:30) E mana to Iehova i nia i te mau mea atoa e haaati ra ia tatou i nia i te fenua, e e nehenehe tatou e oaoa e fatata roa oia i te faaora i te fenua e te huitaata nei mai te vavahiraa.—Salamo 24:1, 2; 135:6; Petero 2, 3:13.

[Faaiteraa i te fatu o te hohoˈa i te api 31]

Hohoˈa niuhia i nia i te hohoˈa a te NASA