Te hoê nahoa rahi o te pûpû ra i te hoê taviniraa moˈa
“I haamori ai ratou ia ˈna i te rui e te ao i roto i to ˈna ra hiero.”—APOKALUPO 7:15.
1. Eaha te tupuraa faufaa roa o te faito maramarama i te pae varua i naeahia i te matahiti 1935?
I TE 31 no me 1935, ua tupu te oaoa rahi i rotopu i te mau tia i te hoê tairururaa a te mau Ite no Iehova i te oire no Washington. I reira, no te taime matamua, ua haapapu-maitai-hia te feia rahi roa (aore ra nahoa rahi) o te Apokalupo 7:9 ia au i te toea o te Bibilia e ia au i te mau tupuraa o tei haamata aˈena i te tupu.
2. Eaha te mea e faaite ra e ua faataa te hoê numera o tei maraa e aita te Atua i pii ia ratou no te oraraa i nia i te raˈi?
2 Tau ono hebedoma na mua ˈtu, i te faatupuraa o te Oroa a te Fatu i roto i te mau amuiraa a te mau Ite no Iehova, aita 10 681 o te feia i tae mai (e au ra 1 i nia i te 6) i rave i te pane e te uaina taipe, e e feia poro itoito o te Basileia o te Atua 3 688 o ratou. No te aha aita ratou i rave i te mau taoˈa taipe? No te mea i nia i te niu o ta ratou i haapii i roto i te Bibilia, ua taa ia ratou e aita te Atua i pii ia ratou no te oraraa i nia i te raˈi, e nehenehe râ ratou e apiti atu i roto i te mau opuaraa here a Iehova ma te tahi atu huru. No reira i taua tairururaa ra, to te taata orero aniraa e: “Ia tia mai na i nia te feia atoa e tiaturiraa to ratou no te ora e a muri noa ˈtu i nia i te fenua,” eaha tei tupu? Ua tia mai tau tausani i nia, apeehia mai e te popouraa maoro a te feia i tae mai.
3. No te aha te haapapuraa i te nahoa rahi i horoa ˈi i te hoê itoito apî no te taviniraa, e eaha na te huru o te mau Ite no nia i te reira?
3 Ua horoa te mea ta te mau tia i haapii i taua tairururaa ra i te hoê itoito apî no ta ratou taviniraa. Ua taa ˈtura ia ratou e i teie nei, na mua ˈˈe te hopea o te faanahoraa tahito, e horoahia eiaha noa i te tahi tau tausani taata i te hoê râ nahoa rahi te ravea ia faaôhia oia i roto i te faanahoraa a Iehova no te faaherehereraa o te ora, ma te opuaraa e ora e a muri noa ˈtu i nia i te hoê fenua tei riro ei paradaiso. Auê ïa poroi tamahanahana mau o tei vauvauhia mai no te feia i here i te parau mau! Ua taa i te mau Ite no Iehova e te vai ra te hoê ohipa rahi te tia ia ravehia—te hoê ohipa oaoa. Tau matahiti i muri iho, ua faahaamanaˈo o John Booth, o tei riro ei melo no te Tino Aratai, e: “Ua horoa hau mai teie tairururaa i te oaoa rahi aˈe.”
4. (a) I roto i teihea faito mau te haaputuputuraahia te nahoa rahi mai te matahiti 1935 mai â? (b) Mea nafea te feia o te nahoa rahi i te haapapuraa e e faaroo ora to ratou?
4 I te roaraa o te mau matahiti i muri iho, ua maraa uˈana te numera o te mau Ite no Iehova. Noa ˈtu te hamani-ino-raa uˈana i faatae-pinepine-hia i nia ia ratou i te roaraa o te Piti o te Tamaˈi Rahi, ua tataitoru to ratou numera i roto i te tau ahuru matahiti. E ua maraa hau atu te 56 153 feia poro o tei horoahia te hoê faaiteraa i mua i te taata i te matahiti 1935, i te matahiti 1994, i nia i te faito hau atu i te 4 900 000 feia poro o te Basileia i roto hau atu i te 230 fenua. Te tiaturi ra te rahiraa o ratou ma te ru ia faaôhia ratou i rotopu i te feia ta Iehova e farii maitai ra ma te tia-roa-raa no te ora i nia i te fenua o te riro ei paradaiso. Ia faaauhia e te nǎnǎ iti, ua riro mau ratou ei nahoa rahi. E ere ratou i te mau taata o te parau ra e e faaroo to ratou e ma te ore e haapapu i te reira. (Iakobo 1:22; 2:14-17) Te tufa ra ratou paatoa e te tahi atu i te parau apî maitai no nia i te Basileia o te Atua. Tei roto atoa anei outou i teie nahoa oaoa? E tapao haapapuraa faufaa mau te riroraa ei Ite itoito, tera râ, te titau-hau-hia nei â.
‘Te tiaraa i mua i te terono’
5. Eaha te faaitehia ra na roto i te tupuraa e ‘te tia ra’ te nahoa rahi ‘i mua i te terono’?
5 I roto i te orama horoahia i te aposetolo Ioane, ua ite oia ia ratou “i te tia-noa-raa i mua i te terono, e i mua i te Arenio.” (Apokalupo 7:9) Te faaite ra to ratou tiaraa i mua i te terono o te Atua, mai tei faataahia i roto i te mau irava tapiri, e te faatae ra ratou i te mauruuru taatoa i te mana arii o Iehova. Te titau hau atu râ te reira. Ei hiˈoraa: (1) Te farii ra ratou i te mana a Iehova ia faaoti no ta ˈna mau tavini eaha te mea maitai e eaha te mea ino. (Genese 2:16, 17; Isaia 5:20, 21) (2) Te faaroo ra ratou ia Iehova ia paraparau mai oia ia ratou na roto i ta ˈna Parau. (Deuteronomi 6:1-3; Petero 2, 1:19-21) (3) Te taa ra ia ratou i te faufaaraa ia auraro i te feia ta Iehova i horoa ˈtu i te hopoia tiairaa. (Korinetia 1, 11:3; Ephesia 5:22, 23; 6:1-3; Hebera 13:17) (4) Noa ˈtu e mea hara ratou, te tutava ra ratou ma te haapao i te auraro i te aratairaa teotaratia, eiaha ma te faahepohia, ma te ineine râ, ma te mafatu tae. (Maseli 3:1; Iakobo 3:17, 18) Tei mua ratou i te terono no te pûpû i te hoê taviniraa moˈa ia Iehova, ta ratou e faatura hohonu ra e ta ratou e here hohonu ra. No te pae o teie nahoa rahi, te faaite ra to ratou ‘tiaraa’ i mua i te terono i te farii maitai o te Taata e parahi ra i nia i te terono. (A faaau e te Apokalupo 6:16, 17.) Ua niuhia te farii maitai i nia i te aha?
“Ma te ahu teatea i te ahuraa”
6. (a) Eaha te auraa e “ma te ahu teatea i te ahuraa” te nahoa rahi? (b) Nafea e noaa ˈi i te nahoa rahi te hoê tiaraa parau-tia i mua ia Iehova? (c) I roto i teihea faito e mana ˈi te faaroo i roto i te toto haamaniihia o te Mesia i nia i te oraraa o te nahoa rahi?
6 Te parau ra te faataaraa a te aposetolo Ioane no nia i te ohipa ta ˈna i ite e “ma te ahu teatea i te ahuraa” no te mau melo o teie nahoa rahi. Te faataipe ra te feia ma te mau ahu i to ratou tiaraa mâ, parau-tia i mua ia Iehova. Mea nafea te noaaraa ia ratou teie huru tiaraa? Ua hiˈopoa aˈena tatou e i roto i te orama a Ioane ua tia ratou “i mua i te Arenio.” Te farii ra ratou ia Iesu Mesia mai “te Arenio a te Atua, o tei hopoi ê atu i te hara o te ao.” (Ioane 1:29) Ua faaroo o Ioane i te hoê o te mau matahiapo, i roto i te orama, tei mua atoa oia i te terono o te Atua i te faataaraa e: “Ua horoi i to ratou ahu, e ua teatea, i te toto o te Arenio ra. I parahi ai ratou i mua i te terono o te Atua ra.” (Apokalupo 7:14, 15) Ma te taipe, ua horoi ratou i to ratou ahu na roto i te faatupuraa i te faaroo i roto i te toto faaora o te Mesia. Aita ratou e farii noa ra i te pae feruriraa i te haapiiraa bibilia no nia i te hoo. Te ohipa ra te mauruuru no te reira i nia i to ratou huru taata mau i roto mai; no reira, te faatupu ra ratou i te faaroo ‘ma te mafatu.’ (Roma 10:9, 10) E faahopearaa hau aˈe to te reira i nia i te raveraa i to ratou oraraa. I roto i te faaroo, te pûpû ra ratou ia ratou iho ia Iehova i nia i te niu o te tusia o te Mesia, te faataipe ra ratou i teie pûpûraa na roto i te taumiraa i roto i te pape, te ora mau ra ratou ia au i ta ratou pûpûraa, e no reira te fanaˈo nei ratou i te mau taairaa farii-maitai-hia e te Atua. Auê ïa haamaitairaa taa ê maitai mau—oia hoi ia faaora-maite-hia mai!—Korinetia 2, 5:14, 15.
7, 8. Mea nafea te faanahonahoraa a Iehova i te tautururaa i te nahoa rahi ia ore to ratou ahu ia tafetafetahia?
7 Ma te tapitapiraa î i te here no to ratou maitai ia vai maoro noa oia, ua huti pinepine noa te faanahonahoraa a Iehova i te ara-maite-raa i nia i te mau huru raveraa e te haerea o te nehenehe e faatafetafeta, aore ra e faarepo, i te mau ahu o te haapapu i te ihotaata, inaha ˈtura, noa ˈtu eaha te mau toroa, aita te taata e faaau mau ra i te faataaraa i tohuhia i roto i te Apokalupo 7:9, 10. (Petero 1, 1:15, 16) Ma te haapapu faahou i tei piahia na mua ˈtu, ua faaite Te Pare Tiairaa, i te matahiti 1941 e i muri iho mai, ma te pinepine e e ere roa ˈtu i te mea tano ia poro ia vetahi ê e i muri iho, aita anaˈe oia i roto i te taviniraa, ia rave i te tahi haerea mai te poreneia aore ra te faaturi. (Tesalonia 1, 4:3; Hebera 13:4) I te matahiti 1947 ua haapapuhia e no te mau fenua atoa te mau ture kerisetiano a Iehova no nia i te faaipoiporaa; noa ˈtu eaha te peu matauhia e fariihia ra i te hoê vahi, eita e tia i te feia e tamau noa ra i te faaipoipo e rave rahi mau vahine aore ra tane ia riro ei mau Ite no Iehova.—Mataio 19:4-6; Tito 1:5, 6.
8 I te matahiti 1973, ua haamatarahia i te mau Ite no Iehova na te ao atoa nei e e tia ia ratou paatoa ia faaore roa i te rave i te tahi noa ˈˈe mau peu viivii, mai te faaohipa-hape-raa i te avaava, noa ˈtu eaha te vahi i tiahia e ratou—eiaha noa i te Piha no te Basileia aore ra i te pororaa, i te vahi ohiparaa i rapae atoa râ aore ra i te tahi vahi moemoe aore e itehia e te taata. (Korinetia 2, 7:1) I te matahiti 1987 i te mau tairururaa a te mau Ite no Iehova, ua aˈo-puai-hia te mau taurearea kerisetiano e ia tapea i te hoê tiaraa mâ i mua i te Atua, e tia ia ratou ia ara i te peeraa e piti huru oraraa. (Salamo 26:1, 4) Ma te na nia iho faahou â, ua faaara Te Pare Tiairaa i mua i te mau tuhaa e rave rau o te huru feruriraa o te ao no te mea “o te paieti mau e te ino ore i mua i te aro o te Atua, o to tatou Metua ra, o teie ïa” o te tiai maitai ia ˈna iho “eiaha ia viivii i teie nei ao.”—Iakobo 1:27.
9. O vai mau o te tia ma te fariihia i mua i te terono o te Atua i muri aˈe i te ati rahi?
9 O te feia o te turaihia ra e te faaroo ia ora ma taua huru ra no te vai mâ noa i te pae varua e i te pae morare o te ‘tia i mua i te terono’ ei mau tavini fariihia a te Atua i muri aˈe i te ati rahi e tae mai ra. E ere ratou i te mau taata apî noa i roto i te oraraa kerisetiano ei feia râ o te tamau maite ma te haapao maitai.—Ephesia 4:24.
“Ma te amaa tamara i to ratou rima”
10. Eaha te auraa o te mau amaa tamara itehia e Ioane i roto i te rima o te nahoa rahi?
10 I rotopu i te mau tuhaa faahiahia mau o te nahoa rahi, mai tei hiˈopoahia e te aposetolo Ioane, oia hoi ‘e mau amaa tamara i roto i to ratou nei rima.’ Eaha ïa te auraa o te reira? Ma te feaa ore ua faahaamanaˈo teie mau amaa tamara ia Ioane i te oroa ati Iuda o te mau sekene, te oroa oaoa roa ˈˈe i roto i te kalena hebera, faatupuhia i muri aˈe i te auhuneraa i te tau veavea. Ia au i te Ture, ua faaohipahia te mau rauere tamara, tae noa ˈtu te mau amaa o te tahi atu mau tumu raau, no te hamani i te mau fare potee ei faaearaa i te roaraa o te oroa. (Levitiko 23:39-40; Nehemia 8:14-18) Ua tahirihiri-atoa-hia ratou na te feia haamori i te hiero i te roaraa o te himeneraa no te Arueraa. (Salamo 113-118) Eita e ore ua faahaamanaˈo atoa te tahirihiriraa o te mau amaa tamara e te nahoa rahi ia Ioane i te taime a haere mai ai Iesu i Ierusalema na nia i te asini a tahirihiri noa ˈi te hoê nahoa feia haamori ma te oaoa i te mau amaa tamara e a tuô ai ratou e: “Ia ora na te Arii o Iseraela o tei haere mai ma te iˈoa o [Iehova].” (Ioane 12:12, 13) Te faaite ra ïa te tahirihiriraa o te mau amaa tamara e te arue ra te nahoa rahi ma te oaoa i te Basileia o Iehova e ta ˈna Arii faatavaihia.
11. No te aha te mau tavini a te Atua e fanaˈo mau ai i te oaoa i roto i te taviniraa ia Iehova?
11 O teie huru feruriraa oaoa ta te nahoa rahi e faatupu ra i teie nei iho â a tavini ai ratou ia Iehova. E ere ïa te auraa e aita ratou e faaruru ra i te mau haafifiraa aore ra i te oto e te mauiui. Te tauturu nei râ te oaoa i roto i te taviniraa e te faaoaoaraa ia Iehova ia haamoe i teie mau mea. No reira, ua faatia te hoê mitionare vahine o tei tavini e ta ˈna tane 45 matahiti i Guatemala no nia i te mau huru tupuraa matamua o tei haaati ia raua, te rave-puai-raa i te ohipa e te ratereraa atâta e tuhaa ïa o to raua oraraa a tutava ˈi raua i te faatae atu i te mau oire iti Inidia i te poroi o te Basileia. Ua faaoti oia e: “O te taime te reira o to mâua oraraa i oaoa-rahi-roa-hia ˈi mâua.” Noa ˈtu e ua itea mai ia ˈna te mau faahopearaa o te ruhiruhiaraa o te maˈi, i rotopu i te mau tapaopaoraa hopea i roto i ta ˈna buka mahana, teie ïa ta ˈna mau parau: “E oraraa maitai, haamaitai-rahi-hia.” Na te fenua atoa nei, tera atoa te manaˈo hohonu o te mau Ite no Iehova no nia i ta ratou taviniraa.
‘Te taviniraa moˈa i te rui e te ao’
12. Noa ˈtu e e po aore ra e ao, eaha ta Iehova e ite ra i nia i te fenua nei?
12 Te pûpû ra teie feia haamori oaoa na Iehova i te hoê ‘taviniraa moˈa i te rui e te ao i roto i to ˈna hiero.’ (Apokalupo 7:15) Ati noa ˈˈe te palaneta, te apiti ra tau mirioni i roto i teie taviniraa moˈa. Ia pohia i roto i te tahi mau fenua e te taoto ra te mau taata no reira, i roto i te tahi atu mau fenua ua hiti te mahana e te rohi nei te mau Ite no Iehova i te faaite-haere-raa. A ohu ai te palaneta, ma te faaea ore, te rui e te ao, te himene nei ratou i te mau arueraa ia Iehova. (Salamo 86:9) Tera râ, no te taata tataitahi iho â râ te taviniraa i te rui e te ao faahitihia i roto i te Apokalupo 7:15.
13. Nafea te mau Papai i te faataaraa i te auraa ia tavini “i te rui e te ao”?
13 Te pûpû ra te mau taata o te nahoa rahi i te hoê taviniraa moˈa i te rui e te ao. O te auraa anei e te ohipa atoa ta ratou e rave ra e taviniraa moˈa ïa? Parau mau noa ˈtu e eaha ta ratou e rave ra, te haapii ra ratou i te rave i te reira ia faahanahanahia o Iehova. (Korinetia 1, 10:31; Kolosa 3:23) Teie râ, e ite-noa-hia te hoê ‘taviniraa moˈa’ i te mea e ohipa tia roa ˈtu te hoê i roto i te haamoriraa i te Atua. Te titau ra te faaôraa i roto i te hoê ohipa “i te rui e te ao” i te rave-tamau-raa aore ra te papuraa tae noa ˈtu te tutavaraa itoito.—A faaau e te Iosua 1:8; Luka 2:37; Ohipa 20:31; Tesalonia 2, 3:8.
14. Eaha te mea o te faaau ta tatou taviniraa iho i te faataaraa o te taviniraa “i te rui e te ao”?
14 A tavini ai ratou i roto i te aua i nia i te fenua o te hiero rahi i te pae varua o Iehova, te tutava nei te feia o te nahoa rahi i te apiti ma te tamau e te papu i roto i te taviniraa. Ua haamau e rave rahi i te reira ei tapao na ratou oia hoi ia apiti atu i roto i te taviniraa i te mau hebedoma atoa. Te rohi ra vetahi o ratou iho ei mau pionie tamau aore ra ei mau pionie tauturu. Ma te pinepine te faaite haere ra ratou na te mau aroâ e na te mau fare toa i te poipoi roa. No te faaau atu i te feia anaanatae, te faatere nei vetahi mau Ite i te mau haapiiraa bibilia i te maororaa o te po. Te poro nei ratou ia haere ratou e hoohoo, ia ratere ratou na te ara, i te mau tamaaraa, e na roto i te niuniu paraparau.
15. Taa ê atu i te taviniraa, eaha te titau-atoa-hia i roto i ta tatou taviniraa moˈa?
15 Te apitiraa i roto i te mau putuputuraa o te amuiraa e tuhaa atoa te reira no ta tatou taviniraa moˈa; oia atoa te ohipa paturaa e haapaoraa i te mau vahi tairururaa kerisetiano. Te vai atoa ra te mau tutavaraa no te faaitoito e no te tauturu i te mau taeae e te mau tuahine kerisetiano, i te pae varua e i te pae materia, ia vai oraora noa i roto i te taviniraa ia Iehova. Oia atoa ïa te ohipa a to tatou mau Tomite tuatiraa e te fare maˈi. E taviniraa moˈa atoa te taviniraa i te Betela i roto i ta ˈna mau tuhaa rave rau atoa, tae noa ˈtu te taviniraa ma te horoaraa ia ˈna iho i ta tatou mau tairururaa. Oia mau, ia haamauhia to tatou oraraa i nia i to tatou mau taairaa e o Iehova, e horoahia i te hoê taviniraa moˈa. Mai ta te papai i parau, te pûpû ra te nunaa a Iehova i te hoê ‘taviniraa moˈa i te rui e te ao,’ e te fanaˈo nei ratou i te oaoa rahi i te na reiraraa.—Ohipa 20:35; Timoteo 1, 1:11.
‘No te mau fenua, mau opu, mau nunaa, mau reo atoa’
16. Mea nafea i te haapapu-mau-raa e te haere mai ra te nahoa rahi ‘mai te mau fenua atoa’?
16 Te haere mai ra te feia o te nahoa rahi na roto mai i te mau fenua atoa. Aita te Atua e maiti ra i te huru o te taata, e ua navai roa te faanahoraa o te hoo ravehia na roto ia Iesu Mesia no te faahaafaufaa ia ratou paatoa. I te haapapuraahia te nahoa rahi i te taime matamua ia au i te mau Papai i te matahiti 1935, ua ohipa te mau Ite no Iehova i roto 115 fenua. I te mau matahiti 1990, ua parare te maimiraa i te feia e au i te mamoe i te hoê faito fenua hau atu i te tataipiti.—Mareko 13:10.
17. Eaha te ravehia no te tauturu i te mau taata no te ‘mau opu, mau nunaa, e mau reo’ atoa ia faaô-atoa-hia i roto i te nahoa rahi?
17 I roto i te haapapuraa i te feia e riro mai ei mau melo o te nahoa rahi, ua hiˈo taa ê te mau Ite no Iehova eiaha noa i te mau nunaa hoê â aiˈa i te mau opu e te mau nunaa e te mau pǔpǔ reo atoa râ i rotopu i teie mau fenua. Ia naeahia ia ratou teie mau taata, te nenei ra te mau Ite i te mau pueraa buka bibilia i roto hau atu i te 300 reo. Te titau ra te reira i te haamataroraa e te tapearaa i te mau pǔpǔ feia huri parau aravihi, ma te pûpû atu i te mau matini roro uira o te nehenehe e rave maine teie mau reo atoa, mai te ravehia ra e teie nei vea neneihia. I te roaraa noa o na matahiti e pae i mairi aˈenei, ua amuihia mai 36 reo, paraparauhia e tau 98 000 000 taata. Hau atu, te tutava ra te mau Ite i te farerei roa i teie mau taata no te tauturu ia ratou ia taa i te Parau a te Atua.—Mataio 28:19, 20.
“Mai roto mai i te ati rahi”
18. (a) Ia tupu te ati rahi, o vai ma te faaorahia? (b) Eaha ïa te mau parau oaoa o te faahitihia mai?
18 Ia tuu mai te mau melahi i te mau mataˈi o te haamouraa faahitihia i roto i te Apokalupo 7:1, e ere o te “mau tavini o to tatou Atua” anaˈe o te fanaˈo i te paruru here o Iehova o te nahoa rahi atoa râ o tei apiti mai ia ratou i roto i te haamoriraa mau. Mai ta te aposetolo Ioane i tohu, e “haere mai mai roto mai i te ati rahi” te feia o te nahoa rahi ei feia o te ora mai. Auê ïa te tuô mauruuru e te oaoa ta ratou e pii ma te parau e: “Tei to tatou Atua te ora. tei parahi i nia iho i te terono ra, e tei te Arenio.” E e apiti mai te mau tavini taiva ore atoa o te Atua i nia i te raˈi i to ratou mau reo ma te parau e: “Amene; O te arue, e te hanahana, e te paari, e te haamaitai, e te tura, e te mana, e te puai, ei to tatou Atua ïa e a muri noa ˈtu. Amene.”—Apokalupo 7:10-14.
19. I roto i teihea ohipa oaoa e ru ai te feia e ora mai, i te apiti atu?
19 Auê ïa taime oaoa e! E riro te feia atoa e ora mai ei mau tavini o te Atua mau hoê ra! Te oaoa rahi roa ˈˈe o teie nei feia tei roto ïa i te taviniraa ia Iehova. E hau atu â te ohipa te tia ia rave—te ohipa oaoa! E faarirohia te fenua ei Paradaiso. E faatia-faahou-hia mai tau tausani mirioni mai te pohe mai e i muri iho e haapiihia ratou i roto i te mau eˈa o Iehova. Auê ïa haamaitairaa oaoa mau ia apiti atu i te reira!
Eaha ta outou pahonoraa?
◻ Eaha te faahopearaa o te mau tupuraa i te matahiti 1935 i nia i te taviniraa a te mau Ite no Iehova?
◻ Eaha te faaitehia ra e te tupuraa e ‘te tia ra’ te nahoa rahi ‘i mua i te terono’?
◻ Nafea te mauruuru no te toto o te Arenio e ohipa ˈi i nia i to tatou huru oraraa?
◻ Eaha te auraa o to ratou tahirihiriraa i te mau amaa tamara?
◻ Nafea te nahoa rahi e pûpû ai i te hoê taviniraa moˈa i te rui e te ao?
[Hohoˈa i te api 16, 17]
Te titau ra ta ratou taviniraa moˈa i te rave-tamau-raa, te tuutuu ore, e te tutavaraa itoito