Te Bibilia—Eaha to ˈna faufaaraa mau?

“TE BIBILIA e miterio ïa, e eita e tia ia taahia te auraa o teie buka,” ta te hoê fatu fare i faˈi mai. Teie te manaˈo o te tahi atu fatu fare: “Ua ite au e e buka faufaa roa te Bibilia, aita râ vau i ravai maitai i te ite. E mea fifi roa na ˈu ia taa i to ˈna auraa.”

“E mea iti roa te ite o te mau kerisetiano e rave rahi . . . no nia i te Bibilia,” ta te vea The Toronto Star e haapapu ra. Ua faataa mai te hoê vahine katolika e: “Ei Bibilia anaˈe ta ˈu e mea maitai roa vau. E hopoi mai ïa i te hau i roto ia ˈu.” “E au te Bibilia i te hoê aveia te huru o te aratai i te taata na te miti toareare, e vero rahi o te oraraa i te hoê vahi papu,” ta te hoê taata ravaai e parau ra. Ia au i te parau a te hoê taata e haapaoraa inidia na mua ˈˈe, “te Bibilia o te Parau ïa a te Atua e e ô na te huitaata e e raau no te rapaau i te mau mauiui i te pae varua.”

E rave rau mau manaˈo no nia i te faufaaraa mau o te Bibilia. Noa ˈtu â te reira, eaha mau na ïa to ˈna faufaaraa mau?

Te Bibilia o te buka faufaa roa ˈˈe e vai ra e o te buka tei opere-rahi-roa-hia. Te vai ra i roto i to ˈna mau api te mau pahonoraa i te mau fifi hepohepo roa o ta te taata e nehenehe e farerei aore ra o ta ˈna e faaruru atu. E ore roa e naeahia te faito o te faufaaraa o ta ˈna aˈo. Eita e hemo te teitei o te mau morare o ta ˈna e turu ra. E mea puai mau e te maitai ta ˈna poroi. E tia ia ravehia mai teie buka hau roa ˈˈe i te faufaa mai nia mai i te vairaa buka ma te haapao e te tuatapapa maite i te reira.

E nehenehe tatou e iriti i te Bibilia ma te tiaturi papu e e mea tano roa, e tia ia tiaturihia, e e parau mau teie. Te haapapu ra te tuatapaparaa a to te ao nei i te mau tupuraa o te aamu e faatiahia ra i roto. E pinepine, te mau maimiraa ihipǎpǎ i te haapapu e ua niuhia te Bibilia i nia i te mau tupuraa mau e te parau mau. No te huru hapa ore o te 40 e tiahapa taata papai Bibilia e faarirohia ratou ei mau taata haerea parau-tia e te maitai. Te faataa ra te au-maite-raa o te Bibilia iho e e ere te taata te tumu o te reira. E mea mau te mau tupuraa i faatiahia i roto. E mau taata mau te feia no ratou te parau. E mea mau te mau vahi e te mau nohoraa e faahitihia ra. Hau atu â, te vai ra i roto i te Bibilia te mau parau tohu faahiahia roa o te haapapu ra e o te Atua ra o Iehova te Tumu o te Bibilia.—Petero 2, 1:21.

Ua ohipa papu to tatou Orometua Rahi e e roaahia te ite no nia i to ˈna hinaaro e ta ˈna mau opuaraa i te feia e hinaaro e ite atu i te reira. Inaha, te faaite maramarama ra Iehova ia tatou e o ta ˈna opuaraa teie e ia haapii te mau huru taata atoa i ta ˈna Parau e “ia noaa te ite i te parau mau.” (Timoteo 1, 2:3, 4; Maseli 1:5, 20-33) O te hoê teie o te mau mea faufaa roa ˈˈe te tia ia tatou ia rave i te roaraa o to tatou oraraa. E titauraa teie o te tia ia tatou ia faaî. Ua taa maitai te reira i te mau kerisetiano matamua. Ua tae roa te hoê o ratou i te parau e: “E te pure nei au ia tupu maite â to outou hinaaro e ia rahi atu â ma te ite e te haroaroa o te aau ra; ia au atu hoi outou i te mau mea i hau i te maitai ra.”—Philipi 1:9, 10; Kolosa 1:9, 10.

O te Bibilia te ravea hoê roa a te Poiete no te faatae mai i to ˈna hinaaro e ta ˈna opuaraa i te utuafare taata nei, ma te faataa i to tatou tiaraa taitahi i roto i taua opuaraa ra. Ua papaihia i roto i te mau tupuraa i tahito ra e te horoa maira oia i te hoê hohoˈa maramarama maitai no nia i te tau no a muri aˈe. Te faaite ra te Bibilia i te haapiiraa tano ma te faaafaro ia tatou no nia i te mea tia aore ra i te mea tia ore ia tiaturihia. (Ohipa 17:11; Timoteo 2, 3:16, 17) E horoa mai oia i te mau ture no nia i te haerea e tia i te taata ia ora, e e aratai i te mau taata na nia i te eˈa o te manuïaraa e o te oaoaraa. (Mataio pene 5 e tae atu i te 7) E haafaufaa oia i te Basileia o te Atua ei tiaturiraa hoê roa no te huitaata taatoa ma te faaite mea nafea ta ˈna faatereraa e riro ai ei mauhaa no te faaraa i to ˈna iˈoa e no te faatia i to ˈna tiaraa mana hope. Te faataa ra te Bibilia i te eˈa o ta tatou e tia i te pee atu ia fanaˈo tatou i te hoê taairaa piri ma te here e te Tumu o to tatou ora, o Iehova.

Hau atu â, o te Bibilia anaˈe iho te buka te aratai ia outou i te utua maitai rahi roa ˈˈe na te huitaata—te ora mure ore i roto i te paradaiso i nia i te fenua nei ei taata tia roa. (Roma 6:23) Te parau ra te Tamaiti fanau tahi a Iehova e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) Ma te papu e tia i te hoê buka faufaa roa mai te reira te huru ia turai ia tatou ia haapii eaha ta tatou e tia ia rave ia noaa mai te utua o te ora mure ore. E tia ïa ia taahia te auraa o te Bibilia, mai te faaitehia ˈtu i roto i te tumu parau i mua nei.