Te mau Ite no Iehova na te ao nei—Bahamas

TE HAU o Bahamas—e pueraa 3 000 motu e mau motu rii—e vai ra mai te poepoe toa te huru na roto e 900 kilometera miti ninamu i rotopu ia Floride e ia Cuba. I rotopu i te 267 000 feia e parahi ra i reira te vai ra te hoê pûpû himene o te feia poro i te Basileia o te maraa noa ra. E faahaamanaˈo ta ratou mau himene arueraa i te Isaia 42:10-12: “E himene i te himene apî ia Iehova; e te arue ia ˈna mai te hopea mai o te fenua ra; outou o tei tae i te moana, e to reira atoa ra, e te feia atoa i parahi i reira. . . . Ia pii mai hoi ratou i nia i te upoo i te mau mouˈa ra. Ia haamaitai ratou ia Iehova: e ia arue ratou ia ˈna i te mau [motu] roa ra.”

Te tamataraahia te hoê faaroo apî

I te avaˈe tiurai 1992, ua pûpû atu te hoê pionie tamau (e taata poro taime taatoa i te Basileia) i te hoê hoa e rave ra i te ohipa i te buka aratai Bibilia E nehenehe oe e ora e a muri noa ˈtu i roto i te paradaiso i nia i te fenua nei. I muri aˈe i to te taata taioraa i te buka, ua parau oia ia ˈna iho, ‘E tia ia ˈu ia hiˈopoa i teie haapaoraa.’ I na sabati e piti i muri iho, ua tae oia i te mau putuputuraa e piti na Piha taa ê o te Basileia a te mau Ite no Iehova. I muri iho, ua haamatahia ta ˈna haapiiraa Bibilia. E ono noa râ hebedoma i muri iho i ta ˈna mau haapiiraa Bibilia, ua tupu mai te hoê tamataraa i to ˈna faaroo apî—te mau oroa o te mahana fanauraa.

E mea haapao roa te utuafare o teie taata toroa i teie mau huru oroa, ua turai râ to ˈna here no te Parau a te Atua ia tamau â oia i ta ˈna mau haapiiraa Bibilia. I te tupuraa i te rahi to ˈna ite no nia i te parau mau o te mau Papai, ua taa maitai atoa ia ˈna te parau no te mau oroa mahana fanauraa e te mau oroa a to te ao e to Iehova manaˈo no nia i te reira.

I to te vahine o teie taata faanahoraa i te hoê amuimuiraa no te oroa o te mau metua tane, ma te faaite i te peu maitai aita oia i farii. Ua manaˈo râ oia e aita o ˈna e here faahou ra ia ˈna ma te tuu i ta ˈna haapaoraa i nia aˈe ia ˈna e to ˈna utuafare. Ua faataa mǎrû oia e ia faaohipa o ˈna i ta ˈna e haapii ra i roto i te Bibilia na te reira e tauturu ra ia ˈna ia riro mai ei tane e ei metua tane maitai aˈe. Auaa, ua rahi te hinaaro no to ˈna here i te parau mau o te mau Papai ma te farii i te haapii i te Bibilia. I teie nei te aratai ra oia i te hoê haapiiraa Bibilia e to ˈna utuafare. E auê te oaoa rahi tei noaa ia ˈna i te tairururaa mataeinaa “Te haapiiraa no ô mai i te Atua ra” i teie matahiti i mairi iho nei! Tei reira ta ˈna vahine e ta ˈna atoa tamahine e ua ite raua ia ˈna i te bapetizoraahia.

Ua faaroo te taata no te fenua ěê i te himene apî

E amuimui te mau tausani feia tei faarue ia Haiti i te totaiete taata no Bahamas. E titau-atoa-hia ratou ia faaroo i te himene apî o te parau mau no nia i te Basileia. Ua oaoa roa te mau Ite e ora ra i Bahamas i te taeraa mai e piti nau hoa faaipoipo afa Haiti afa Marite. Ua tauturu teie mau taata i te haapaariraa i te mau pûpû taata no Haiti tei haamau-apî-hia i nia i te mau motu no Grand Bahama e no Abaco.

No te tauturu hau atu â i te feia no Haiti e anaanatae ra i te poroi o te Basileia, ua faatupuhia te tairururaa mataeinaa matamua na roto i te reo Créole i Bahamas i te 31 no tiurai e tae atu i te 1 no atete 1993. Ua naeahia e 214 taata o tei tae mai, e e toru feia o tei pûpû ia ratou no Iehova tei bapetizohia. E rave rahi feia no Haiti o tei ite i te parau mau i Bahamas tei hoˈi ïa i teie nei i to ratou iho motu aore ra ua haere i te vahi ê no te amui atu i to ratou reo i te mau Ite no tera vahi no te arueraa ia Iehova.

[Tumu parau tarenihia i te api 8]

TABURA O TE FENUA

Te taviniraa o te matahiti 1993a

NUMERA RAHI ROA ˈˈE O TE FEIA PORO: 1 294

FAITO: 1 Ite no 197

FEIA I TAE MAI I TE OROA HAAMANAˈORAA: 3 794

NUMERA AU NOA O TE MAU PIONIE: 186

NUMERA AU NOA O TE MAU HAAPIIRAA BIBILIA: 1 715

RAHIRAA FEIA BAPETIZOHIA: 79

RAHIRAA AMUIRAA: 22

AMAA: NASSAU

[Nota i raro i te api]

[Hohoˈa i te api 9]

Te Piha matamua o te Basileia, e te piha ohiparaa a te amaa e te fare mitionare

[Hohoˈa i te api 9]

Te poro ra te mau Ite ma te itoito i te parau apî maitai

[Hohoˈa i te api 9]

Milton G. Henschel e o Nathan H. Knorr e te mau mitionare i Nassau e 45 matahiti i teie nei

[Hohoˈa i te api 9]

Te piha ohiparaa apî a te amaa, tei avarihia i te 8 no febuare 1992