Mau uiraa a te feia taio

E tia anei ia pii ia Ioane o tei bapetizo ia Iesu e “Ioane Bapetizo” aore ra “Ioane te taata bapetizo”?

E tano na faahitiraa e piti nei e te turuhia ra e te Bibilia.

Ua haapaohia o Ioane “ei faaineine i te hoê pae taata ia au no [Iehova],” o ta ˈna hoi i rave na roto “i te poro haerea i te bapetizo tatarahapa ia faaorehia te hara.” (Luka 1:17; 3:3) Ua papai te aposetolo Mataio e: “Ua haere maira Ioane Bapetizo, i te poro haerea i te medebara i Iudea ra, i te na ôraa e, E tatarahapa outou; te fatata mai nei hoi te basileia o te ao. . . . Haere atura to Ierusalema ia ˈna ra, e to Iudea atoa, . . . E bapetizohia ihora e ana i Ioridana ma te faˈi i ta ratou hara.”—Mataio 3:1-6.

A tapao na e te parau ra o Mataio e “Ioane Bapetizo.” Ua manaˈo paha o Mataio, o te faatia ra i ta ˈna aamu na te mau ati Iuda e e ite ratou e o vai râ o “Ioane Bapetizo.” Ua faaohipa oia i te parau “Bapetizo” mai te hoê iˈoa pii ra te huru.a Ua faaohipa o Iesu e ta ˈna mau pǐpǐ i te parau “Ioane Bapetizo,” mai ta te mau tavini a Heroda i rave atoa.—Mataio 11:11, 12; 14:2; 16:14.

Ua tapao te pǐpǐ ra o Mareko i te hoê â faaohiparaa o te parau “Bapetizo.” (Mareko 6:25; 8:28) Teie râ, ia ˈna i faahiti ia Ioane, ua pii o Mareko ia ˈna “Ioane te taata bapetizo.” (Mareko 1:4, T.a.a.) Te parau Heleni i faaohipahia i roto i te Mareko 1:4 mea taa ê rii ïa oia i te tahi atu mau irava. E nehenehe atoa te Mareko 1:4 e hurihia na roto i te parau “o te bapetizo ra.” Te haamatara ra ïa o Mareko i te ohipa o ta Ioane e rave ra; na ˈna e rave ra i te bapetizoraa, oia hoi te taata bapetizo.

E ere râ te auraa e e tia ia tatou ia faataa ê i teie na huru faahitiraa e piti no nia ia Ioane. I roto i te Mareko 6:24, 25 (ia au i te T.a.a. [farani]), te taio nei tatou no nia ia Salome e: “E haere atura oia e ua parau atura i to ˈna metua vahine e: “Eaha ta ˈu e ani atu?” Ua na ô maira oia: “Te upoo o Ioane te taata bapetizo.” Ua hoˈi oioi atura oia i te arii ra, e ua faatae atura i ta ˈna aniraa, i te na ôraa e: “Te hinaaro nei au e i teie nei iho e horoa mai oe i te upoo o Ioane Bapetizo i nia i te hoê farii.” Ua faaohipahia teie na e piti huru parau ma te tauiui haere.

E taa paha vetahi i te auraa o te parau “Bapetizo” ia au i te piti o te tatararaa i horoahia e te hoê titionare: “E melo aore ra e taata apee i te hoê pǔpǔ evanelia Porotetani i tapaohia e te faanahoraa amuiraa e te bapetizoraa na roto i te faahopuraa i raro i te pape o te feia faaroo anaˈe.” E ere râ o Ioane mai teie te huru.

No reira, mea tano na parau e piti nei “Ioane Bapetizo” e “Ioane te taata bapetizo.”

[Nota i raro i te api]