Te maimiraa i te taoˈa faufaa huna

I TE matahiti 1848, ua itehia mai te auro i te vahi no Sutter’s Mill i Kalifonia, i te mau Hau amui no Marite. I te matahiti 1949, e mau tausani taata o tei haere atu i taua vahi ra ma te tiaturi e e moni-oioi-hia ratou, e i reira te haamataraa te tapaparaa auro rahi roa ˈˈe o te aamu a te mau Hau amui no Marite. I roto i te hoê matahiti, ua rahi roa te oire tapaeraa pahi fatata roa ˈˈe, o San Francisco, mai te hoê oire iti nainai i te hoê oire e 25 000 taata. Ua riro hoi te tiaturiraa e e noaa oioi noa mai te moni ei faahemaraa puai.

Ua ite te Arii no Iseraela tahito ra o Solomona i te itoito rahi ia ǒ anaˈe te taata ia noaa mai te hoê taoˈa faufaa huna, e ua faahiti oia i te reira ia ˈna i papai e: “Ia titau hua oe i te haapao maitai, e ia faateitei i to reo ia noaa te ite ra; ia imi hua oe ia ˈna mai te ario ra, e ia paheru hua oe ia ˈna, mai te taoˈa hunahia ra; e ite ïa oe i te mǎtaˈu ia Iehova, e noaa ïa ia oe te ite i te Atua.”—Maseli 2:3-5.

Mea rahi te mau ohipa e ravehia e te auro e te ario, teie râ, mea hau atu â te nehenehe e ravehia e te taaraa e te maramarama. E tauturu te reira ia outou ia rave i te mau faaotiraa maitatai, ia faatitiaifaro i te mau fifi, ia manuïa i roto i te faaipoiporaa, e ia ite i te oaoa. (Maseli 2:11, 12) Oia atoa, e tauturu te ite mau e te paari ia outou ia ite i to outou Poiete, ia taa i ta ˈna mau opuaraa, e ia auraro e ia faaoaoa ia ˈna. Eita te auro e nehenehe e horoa mai i teie mau mea.

E parau mau ta te Bibilia: “E paruru te paari mai te moni, e paruru atoa ïa, area te maitai o te ite ra, teie ïa: e faaherehere te paari i te ora o to ˈna fatu.” (Koheleta 7:12, New International Version) Noa ˈtu e e rave rahi o te moemoeâ nei ia noaa taue mai te mau faufaa, mea paari aˈe ia iriti i te Bibilia e ia heru i te maramarama, te taaraa, te ite, e te paari o tei riro ei mau taoˈa faufaa mau.