Eaha te faufaa o te Oroa a te Fatu no outou

UA HAAMAU o Iesu Mesia i te Oroa a te Fatu i te po hopea o to ˈna oraraa taata. O te po mahana maha ïa, 31 no mati, e ua pohe o Iesu i te mahana pae 1 no eperera i te avatea. I te mea e e haamata te mau mahana o te kalena ati Iuda i te ahiahi o te hoê mahana e hope ai i to te mahana i muri iho, ua tupu ïa te Oroa a te Fatu e te poheraa o Iesu i te 14 no Nisana 33 o to tatou nei tau.

No te aha o Iesu i haamau ai i teie oroa? Eaha te auraa o te pane e te uaina o ta ˈna i faaohipa? O vai te amu i te pane e e inu i te uaina? Eaha te pinepineraa e faatupuhia ˈi teie oroa? E eaha to ˈna faufaa no outou?

No te aha teie oroa i haamauhia ˈi?

No nia i te Oroa a te Fatu, ua parau atu o Iesu i ta ˈna mau aposetolo e: “E na reira outou ei manaˈoraa ia ˈu.” Ia au i te tahi atu huriraa, ua parau oia e: “A rave i te reira ei oroa haamanaˈoraa ia ˈu.” (Korinetia 1, 11:24; The New English Bible) Inaha, mea pinepine te Oroa a te Fatu i te parauhia te oroa Haamanaˈoraa i te poheraa o te Mesia.

Ua pohe o Iesu ei taata taiva ore o tei turu i te mana arii o Iehova e ua haapapu ïa oia e e faahema haavare o Satani i to ˈna pariraa e te tavini noa nei te mau taata parau-tia i te Atua ma te hinaaro miimii anaˈe. (Ioba 2:1-5) Ua faaoaoa to ˈna poheraa i te mafatu o te Atua.—Maseli 27:11.

Na roto i te arai o to ˈna pohe ei taata tia, ua ‘horoa’ atoa o Iesu ‘i to ˈna nephe ei hoo no te feia e rave rahi.’ (Mataio 20:28) I to ˈna hararaa i te Atua, ua erehia te taata matamua i te ora taata tia roa e ta ˈna mau tiaturiraa no a muri aˈe. Teie râ, “i [here] mai te Atua i to te ao [o te huitaata nei], e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioane 3:16) Oia mau, “e utua te pohe no te hara, area te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.”—Roma 6:23.

“I noaa hoi ia ˈu i te Fatu ra”

Te haamaramarama ra te mau parau a te aposetolo Paulo i te haamanaˈoraa i te poheraa o te Mesia: “I noaa hoi ia ˈu i te Fatu ra ta ˈu i tuu atoa ˈtu ia outou na, e ua rave te Fatu ra o Iesu i te pane i te rui i haavarehia mai ai oia ra: e oti aˈera ia ˈna te haamaitai i te Atua, vavahi ihora, na ô atura, A rave mai, a amu; o tau tino teie e ofatihia no outou nei; e na reira outou ei manaˈoraa ia ˈu. E ua na reira atoa hoi i te aˈua, ia oti aˈe tana amuraa, na ô atura, Teie nei aˈua, o te faufaa apî ïa i to ˈu nei toto, e na reira outou ia inu ei manaˈoraa ia ˈu. Ua amu anaˈe outou i teie nei pane, e ua inu anaˈe i teie nei aˈua, ua faaite â ïa outou i te pohe o te Fatu, e tae noa mai oia ra.”—Korinetia 1, 11:23-26.

I te mea e aita o Paulo i reira e o Iesu e na aposetolo e 11 i te 14 no Nisana 33 o to tatou nei tau, mea papu e ua noaa mai teie haamaramaramaraa ‘no ǒ mai i te Fatu ra’ na roto i te parau i faauruahia mai. Ua haamau Iesu i te oroa Haamanaˈoraa “i te rui i haavarehia mai ai oia ra” e Iuda i te mau enemi faaroo ati Iuda, o tei turai i to Roma ia rî i te Mesia i nia i te pou. E amu e e inu te feia tei faatiahia ia na reira i te pane e te uaina taipe ei haamanaˈoraa ia ˈna.

Eaha te pinepineraa o teie oroa?

Eaha te auraa o te mau parau a Paulo: “Ua amu anaˈe outou i teie nei pane, e ua inu anaˈe i teie nei aˈua, ua faaite â ïa outou i te pohe o te Fatu, e tae noa mai oia ra”? E rave te mau kerisetiano faatavaihia haapao maitai i te mau taoˈa taipe o te oroa Haamanaˈoraa ‘e rave rahi taime’ e tae roa ˈtu i to ratou poheraa, e e faatiahia ratou i muri iho no te ora i nia i te raˈi. I mua i te Atua e te ao nei, e faaite pinepine ïa ratou i to ratou faaroo i roto i te ravea o te tusia a Iesu ta Iehova i horoa mai. Eaha te maororaa? “E tae noa mai oia ra,” o ta Paulo ïa i parau, oia hoi e e tamau noa teie mau oroa e tae roa ˈtu i te taeraa mai o Iesu no te farii i ta ˈna mau pǐpǐ faatavaihia i nia i te raˈi na roto i te tia-faahou-raa i te tau o to ˈna ‘vairaa mai.’ (Tesalonia 1, 4:14-17) Ua tuea maitai te reira e te mau parau a te Mesia i ta ˈna mau aposetolo taiva ore e 11: “E ua oti anaˈe i te faaauhia e au te hoê vahi no outou ra, e hoˈi mai au e aratai ia outou i o ˈu ra; ei reira atoa outou i te vahi e parahihia e au ra.”—Ioane 14:3.

E tia anei ia faatupu i te oroa haamanaˈoraa o te poheraa o te Mesia i te mau mahana atoa aore ra i te mau hebedoma atoa? Ua haamau Iesu i te Oroa a te Fatu e ua taparahihia oia i te oroa Pasa, o tei faahaamanaˈo i te faaoraraahia mai o Iseraela i te faatîtîraa a Aiphiti. Inaha, te parauhia ra oia e “te Mesia hoi ta tatou pasa” no te mea o ˈna te Arenio i faatusiahia no te mau kerisetiano. (Korinetia 1, 5:7) Ua faatupuhia te oroa Pasa hoê noa taime i te matahiti, i te 14 no Nisana. (Exodo 12:6, 14; Levitiko 23:5) Te faaite ra te reira e e tia ia faatupu i te oroa haamanaˈoraa o te poheraa o Iesu i te hoê â pinepineraa e te oroa Pasa—oia hoi hoê taime i te matahiti, eiaha râ i te mau mahana atoa aore ra i te mau hebedoma atoa.

I roto i te mau senekele, e rave rahi feia kerisetiano o tei faatupu i te oroa o te poheraa o Iesu hoê taime i te matahiti. No te mea e ua na reira ratou i te 14 no Nisana, ua piihia ˈtura ratou te mau Quartodecimans, oia hoi te auraa “te feia o te ahuru ma maha.” No nia ia ratou, ua papai te taata tuatapapa aamu ra o J. L. von Mosheim e: “Ua matau te mau kerisetiano no Asia Iti i te faatupu i teie oroa moˈa, ei haamanaˈoraa i te haamauraahia te oroa a te Fatu, e te poheraa o Iesu Mesia, i te hoê â taime a amu ai te mau ati Iuda i ta ratou arenio o te Pasa, oia hoi i te ahiahi o te ahuru ma maharaa o te mahana o te avaˈe matamua [Nisana]. . . . Ua manaˈo hoi ratou e o te hiˈoraa o te Mesia te tia ia ratou ia pee ei ture na ratou.”

Te auraa o te mau taoˈa taipe

Ua parau o Paulo e “ua rave te Fatu ra o Iesu i te pane . . . e oti aˈera ia ˈna te haamaitai i te Atua, vavahi ihora.” E tia ia ofatihia taua faraoa paari ra tei hamanihia i te faraoa ota e te pape aore i anoihia i te hopue, no te amu. I roto i te faataiperaa a te Bibilia, e tano te hopue no te hara aore ra te ino. Ma te faaitoito i te mau kerisetiano no Korinetia ia tiavaru i te hoê taata taiata i rapae i te amuiraa, ua parau atura o Paulo e: “Aita outou i ite e, e hopue te puea atoa i te faahopue iti haihai ra? E teie nei, a tamâ na i te faahopue tahito ra, ia riro outou ei puea apî, ia ore te faahopue ia outou na: o te Mesia hoi ta tatou pasa, i taparahihia ïa na tatou. E teie nei, e haapao tatou i taua oroa ra, eiaha ma te faahopue tahito ra, eiaha atoa ma te faahopue tairoiro e te ino, ma te maa faahopue-ore-hia râ, o te haavare ore e te parau mau.” (Korinetia 1, 5:6-8) Mai ta te hoê maa hopue iti e faahopue i te puea pane taatoa, e viivii-atoa-hia te amuiraa i mua i te aro o te Atua mai te peu e eita te mana faaino a te taata hara ra e iritihia. E tia ia ratou ia tatara i te “hopue” mai roto ia ratou ra, mai ta te mau ati Iseraela i titauhia ia haapae i te hopue i roto i to ratou fare i te oroa o te mau pane hopue ore i muri noa ˈˈe i te oroa Pasa.

No nia i te pane faahopue ore o te oroa Haamanaˈoraa, ua parau o Iesu e: “O tau tino teie e ofatihia no outou nei.” (Korinetia 1, 11:24) Te faahohoˈa ra te pane i te tino tia roa o Iesu, ta Paulo hoi i papai e: “No reira [Iesu] i na ô ai ia ˈna i haere mai i te ao nei ra, Aita aˈenei i tia ia oe te tusia e te perosephora; ua faaau râ oe i te hoê tino no ˈu: i tei taauahihia ra, e te taraehara ra, aita aˈenei oe i mauruuru i te reira. Ua na ô ihora vau, Teie au, e tau Atua, te haere nei au e faatia i to oe hinaaro (ua papaihia te parau no ˈu i roto i te otaro o te buka ra.) . . . No taua hinaaro ra e moˈa ˈi tatou nei, i te pûpûraa hoê i te tino o Iesu Mesia ra.” (Hebera 10:5-10) Aita e hara i roto i te tino taata tia roa o Iesu e ua riro oia ei tusia no te hoo i te huitaata nei.—Hebera 7:26.

I muri aˈe i to ˈna faahitiraa i te hoê pure i nia i te aˈua uaina anoi-ore-hia, ua na ô atura o Iesu e: “Teie nei aˈua, o te faufaa apî ïa i to ˈu nei toto.” (Korinetia 1, 11:25) Te na ô ra te tahi tatararaa e: “Te auraa o teie aˈua, o te faufaa apî ïa o tei haamanahia e to ˈu nei toto.” (Moffatt) Mai ta te toto o te mau puaatoro e te mau puaaniho faatusiahia i haamana i te faufaa o te Ture i rotopu i te Atua e te nunaa o Iseraela, oia atoa ua haamana te toto o Iesu i haamaniihia i roto i te pohe i te faufaa apî. Te tauturu ra te faahitiraahia teie faufaa ia tatou ia ite e o vai mâ te feia e faatiahia ia rave i te mau taoˈa taipe o te oroa Haamanaˈoraa.

O vai te rave i te mau taoˈa taipe?

E tiaraa to te mau pǐpǐ faatavaihia a Iesu, tei roto i te faufaa apî, no te rave i te mau taoˈa taipe o te oroa Haamanaˈoraa. Ua fafauhia teie faufaa i rotopu i te Atua e te Iseraela i te pae varua. (Ieremia 31:31-34; Galatia 6:16) E hopoi mai râ te faufaa apî i te mau haamaitairaa no te huitaata auraro atoa, e e nehenehe atoa outou e amuihia i roto i te feia o te fanaˈo i teie mau haamaitairaa.

E tia i te feia rave i te mau taoˈa taipe o te oroa Haamanaˈoraa ia ô i roto i te faufaa taa ê no te Basileia ta Iesu i fafau. I to ˈna haamauraa i teie oroa, ua parau o Iesu i ta ˈna mau aposetolo taiva ore e: ‘Te fafau nei au i te hoê faufaa e o outou, mai ta to ˈu Metua i fafau i te hoê faufaa e o vau nei, no te hoê basileia.’ (Luka 22:29) Ua faaite atea te faufaa o te Basileia ta te Atua i fafau e te Arii ra o Davida i te haerea mai o Iesu, te taata e faatere e a muri noa ˈtu i roto i te Basileia i nia i te raˈi. Te faahohoˈahia ra te mau 144 000 ati Iseraela i te pae varua, o te tufa i te faatereraa e o ˈna, i to ratou tiaraa i nia i te Mouˈa Ziona i te raˈi ra i pihai iho i te Arenio, o Iesu Mesia. Ia faatiahia mai ratou, e faatere ratou e te Mesia ei mau arii e ei mau tahuˈa apiti. (Samuela 2, 7:11-16; Apokalupo 7:4; 14:1-4; 20:6) O te feia anaˈe o tei ô i roto i te faufaa apî e i roto i te faufaa taa ê e o Iesu o tei faatiahia ia rave i te mau taoˈa taipe o te Oroa a te Fatu.

Na te varua o te Atua e haapapu atu i te feruriraa o te feia faatavaihia e e tamarii ratou Na ˈna e e feia aiˈa apiti ratou e te Mesia. Ua papai o Paulo e: “O te [v]arua iho hoi, e to tatou atoa nei [feruriraa], o tei faaite ïa e, e tamarii tatou na te Atua. E tamarii ra, e feia tufaa ïa; e feia tufaa i te Atua ra, e feia tufaa tatou e te Mesia; te pohe apipiti nei hoi tatou e oia atoa, ia haamaitai-apipiti-hia tatou e oia atoa hoi.” (Roma 8:16, 17) E faatupu te varua moˈa o te Atua, oia hoi to ˈna puai ohipa, i roto i te feia faatavaihia i te haapapuraa e ua faataahia ratou no te ora i nia i te raˈi. E faariro ratou ei parau na ratou te mau mea atoa i roto i te mau Papai e faahiti ra i te parau no te oraraa i nia i te raˈi e ua ineine ratou i te faaere ia ratou i te mau mea atoa no te fenua nei, e tae noa ˈtu te oraraa taata. Noa ˈtu e mea faahiahia roa te oraraa i roto i te Paradaiso i nia i te fenua nei, aita ratou e atuatu ra i teie tiaturiraa. (Luka 23:43) Maoti te hoê tiaturiraa papu e te aueue ore e haere i nia i te raˈi o tei ore i niuhia i nia i te mau manaˈo hape i te pae faaroo, e tiaraa to ratou no te rave i te mau taoˈa taipe o te oroa Haamanaˈoraa.

Eita hoi Iehova e mauruuru mai te peu e e tia mai hoê mai te hoê taata e titau ra e riro ei arii e ei tahuˈa i nia i te raˈi, e inaha, aita hoi oia e fanaˈo ra i teie piiraa. (Roma 9:16; Apokalupo 22:5) Ua haapohe te Atua ia Kora no to ˈna titauraa ma te teoteo i te tiaraa tahuˈa. (Exodo 28:1; Numera 16:4-11, 31-35) Eaha ïa mai te peu e e turai te tahi horuhoruraa o te aau aore ra te mau manaˈo o ta ˈna i atuatu na i mutaa ihora i te pae faaroo i te hoê taata ia rave hape i te mau taoˈa taipe o te oroa Haamanaˈoraa? E tia ïa ia ˈna ia faaea i te rave i te mau taoˈa taipe e ia pure ma te haehaa ia faaore mai te Atua i ta ˈna hapa.—Salamo 19:13.

Eaha te faufaa no outou

Eita te hoê taata e titauhia ia rave i te mau taoˈa taipe o te oroa Haamanaˈoraa no te fanaˈo i te tusia o te hoo a Iesu e te ora mure ore i nia i te fenua. Ei hiˈoraa, aita te Bibilia e faaite ra e e rave atu te feia mǎtaˈu i te Atua mai ia Aberahama, Sara, Isaaka, Rebeka, Boaza, Ruta, e o Davida, i teie mau taoˈa taipe. Teie râ, e tia ia ratou e te feia atoa e hinaaro ra i te ora mure ore i nia i teie palaneta ia faatupu i te faaroo i roto i te Atua e te Mesia e i roto i te ravea o te tusia o te hoo a Iesu no ǒ mai ia Iehova ra. (Ioane 3:36; 14:1) Ua riro te haapaoraa i te poheraa o te Mesia i te mau matahiti atoa ei faahaamanaˈoraa i taua tusia rahi ra.

Ua faaitehia te faufaaraa o te tusia a Iesu i to te aposetolo Ioane parauraa e: “Te papai nei au i teie nei mau parau ia outou, ia ore outou ia rave i te hara. Ia roohia ˈtu râ te hoê taata i te hara, e tia to tatou tei ô i te Metua ra, o Iesu Mesia, o te taata parau-tia ra; e oia hoi te taraehara i ta tatou nei hara; e ere hoi i ta tatou anaˈe ra, i ta to te ao atoa nei râ.” (Ioane 1, 2:1, 2) E nehenehe te mau kerisetiano faatavaihia e parau e ua riro o Iesu ei tusia “taraehara i ta [ratou] nei hara.” Ua riro atoa râ oia ei tusia no te mau hara o te ao atoa nei, ia nehenehe te feia auraro e fanaˈo i te ora mure ore i roto i te Paradaiso i nia i te fenua o tei fatata roa mai!

Ia tae atu outou i te oroa haamanaˈoraa i te poheraa o te Mesia, e fanaˈo ïa outou i te hoê oreroraa parau o te haaferuri ia outou. E faahaamanaˈohia mai te mau mea atoa ta te Atua ra o Iehova e ta Iesu Mesia i rave no tatou nei. Mea oaoa roa no tatou i te pae varua ia tahoê atu e te feia o te haafaufaa rahi nei i te Atua e te Mesia e te tusia o te hoo a Iesu. E riro paha teie oroa i te haapuai i to outou hinaaro e fanaˈo i te aroha faito ore o te Atua, e aratai hoi i te ora mure ore. Te titau manihini atu nei matou ia outou ia putuputu e te mau Ite no Iehova i muri aˈe i te toparaa mahana i te 6 no eperera 1993, no te haamanaˈo i te poheraa o Iesu Mesia no te mea e faufaa rahi to te Oroa a te Fatu no outou.