Hohoˈa no te Fenua i tǎpǔhia mai

Te haereraa i Silo—Tamarii maitatai e iino

IA FERURI outou i te mau oire, te mau oire iti, aore ra te mau vahi o te Fenua i tǎpǔhia mai, e haamanaˈo anei outou i te tahi mau tane aore ra mau vahine tuiroo? Oia mau, inaha, te faahiti ra te rahiraa o te mau faatiaraa bibilia i te parau no te mau taata paari. E te mau tamarii ïa no taua tau ra? Te ite ra anei outou ia ratou i roto i teie mau huru tupuraa?

E nehenehe te hohoˈa i nia nei e tauturu ia tatou ia haamanaˈo i te mau faatiaraa no nia i te mau taurearea, vetahi o tei riro ei mau hiˈoraa maitatai no te mau kerisetiano e vetahi ra, e mau hiˈoraa ïa tei riro ei faaararaa. Te mouˈa menemene i ropu, o te vahi ïa i reira te tiaraa te oire tahito no Silo.a

Te haamanaˈo ra paha outou e, i to Iseraela tomoraa ˈtu i roto i te Fenua i tǎpǔhia mai, ua haamau na mua ratou i te sekene a te Atua i Gilagala i pihai iho ia Ieriko. (Iosua 4:19) Teie râ, i te taime a vahihia ˈi te fenua, ua afaihia ˈtura te sekene moˈa—te pu o te haamoriraa a Iseraela—i ǒ nei i Silo. (Iosua 18:1) Fatata ïa e 30 kilometera i te pae apatoerau no Ierusalema i te fenua mouˈa ra no Epheraima. Ua tere mai te mau tane e te mau vahine no Iseraela taatoa i Silo; e haaputuputu na te mau pǔpǔ taata rahi i te peho i te pae apatoa o te vahi i faatiahia ˈi te sekene. (Iosua 22:12) Te ite ra anei outou i te mau tamarii e haere maira i ǒ nei?

Ua haere mai vetahi. Te hiˈoraa tuiroo roa ˈˈe o ta tatou i ite, o te tamaiti ra ïa o Samuela. Te ora ra to ˈna nau metua, o Elikana raua o Hana, i roto i te hoê oire iti i nia i te mau tupuai mouˈa i te pae tooa o te râ. I te mau matahiti atoa e haere mai ratou i ǒ nei, peneiaˈe ma te afai mai i te mau tamarii a te tahi atu vahine a Elikana. I muri iho, ua haamaitai ihora o Iehova ia Hana e te hoê tamaiti, o Samuela te iˈoa. I muri aˈe, ua afai maira to ˈna mau metua ia ˈna e ora i Silo ia nehenehe oia e tavini i te sekene i pihai iho i te tahuˈa rahi ra o Eli.—Samuela 1, 1:1–2:11.

E ohipa ta teie tamaiti i roto i te fare o te Atua, e mea pinepine paha oia i te paiuma haere na nia i te mau tupuai mouˈa tapiri mai. (Samuela 1, 3:1, 15) Ua tâpûhia vetahi e ua tanuhia i te mau tumu olive, mai te itehia ra i nia i te hohoˈa i te api 9. A tapao na i te pare tiairaa iti ofai. E nehenehe te feia faaapu aore ra te mau tiai mamoe moemoe e tamau noa i te tiai na nia mai i teie huru pare, teie râ e nehenehe atoa outou e feruri i te tamaroa ra o Samuela i te paiumaraa ˈtu i reira no te mataitai haere. (A faaau e te Paraleipomeno 2, 20:24.) E vahi teitei maitai roa hoi teie no te hiˈopoa i te mau animala oviri.

I taua tau ra, mea rahi aˈe te mau tumu raau i teie nei, e te vai atoa ra te mau ururaau i reira te mau animala oviri e hahaere ai. (Iosua 17:15, 18) E papu ia tatou te reira na roto i te hoê ohipa i tupu i to Elisaia riroraa mai ei peropheta matamua na te Atua. Te haere ra o Elisaia mai Ieriko atu i Betela, no reira tei ǒ nei ïa oia, tau 16 kilometera i te pae apatoa o Silo. Eaha te fariiraa o ta ˈna e fanaˈo no ǒ mai i te feia no Betela ra, o tei riro mai hoi ei pu no te haamoriraa i te kafa auro? (Te mau arii 1, 12:27-33; Te mau arii 2, 10:29) E au ra e ua patoi te feia paari i te peropheta a Iehova, e ua rave atoa mai ta ratou mau tamarii i teie haerea to ratou ra.

Te faaite maira Te mau arii 2, 2:23, 24 e ua faaooo te hoê pǔpǔ tamarii i te peropheta o te Atua: “A haere atoa i nia, e tena na upoo pahure; a haere atoa i nia, e tena na upoo pahure e.” Ei pahonoraa, “ua katara ˈtura [o Elisaia ia ratou] i te iˈoa o Iehova. Ua haere maira na daba e piti mai roto mai i te vahi ururaau, haehaea-noa-hia ihora taua mau tamarii e maha ahuru ma piti ra.” Mea taehae teie mau daba mauteute no Suria ia faahitimahutahia ratou aore ra ia haamǎtaˈuhia ta ratou fanauˈa. (Samuela 2, 17:8; Maseli 17:12; 28:15) Ua faaohipa te Atua ia ratou no te faatupu i ta ˈna parau-tia i nia i te feia o te haavahavaha ino roa i to ˈna tia e oia atoa ïa ia Iehova iho.

I te mea e e nehenehe te hoê tamarii e farerei i teie mau animala oviri i roto i te mau tupuai mouˈa na te hiti ia Silo, te taa ra ïa ia tatou i te faaroo ta te mau metua o Samuela i faaite i to raua afairaa ˈtu ia ˈna no te tavini i te sekene.

Te tahi atu taata haamori mau o tei faaite i te faaroo e te paieti—o te Tavana ïa o Iepheta. E faaea na oia i te vahi mouˈa no Gileada i te pae hitia o te râ o Ioridana. No to ˈna itoito no Iehova i nia i te mau enemi no Amona, ua euhe aˈera o Iepheta e pûpû tusia oia na Iehova i te taata matamua o to ˈna fare o te haere mai i rapae e farerei ia ˈna. O ta ˈna ïa tamahine paretenia tei haere mai i rapae. No reira, ua afai atu oia i ta ˈna tamarii otahi roa i te vahi moˈa a te Atua i Silo, i reira to ˈna oraraa e to ˈna taviniraa ma te haapao maitai e rave rahi matahiti.—Te mau tavana 11:30-40.

Mea taa ê mau â te paieti haapao maitai ta Samuela e te tamahine a Iepheta i faaite i Silo e te hiˈoraa ino mau o na tamarii faaroo ore e 42 o tei faaooo i te peropheta a Iehova i taua vahi atoa ra.—A faaau e te Korinetia 1, 10:6, 11.

[Nota i raro i te api]

[Faaiteraa i te fatu o te hohoˈa i te api 8]

Pictorial Archive (Near Eastern History) Est.

[Faaiteraa i te fatu o te hohoˈa i te api 9]

Pictorial Archive (Near Eastern History) Est.

[Faaiteraa i te fatu o te hohoˈa i te api 9]

Safari Zoo, Ramat-Gan, Tel Aviv