Eaha te tumu o te hepohepo rahi?

TE TIATURIRAA i te hoê oraraa maitai aˈe—ua tupu ïa! E rave rahi mau taata e ora ra i te fenua tei parauhia na mua ˈˈe o Helemani Hitia o te râ o tei tiaturi i teie parau i te taime a vavahihia ˈi te Patu no Berlin i te avaˈe novema 1989. Tera râ, i muri iti noa ˈˈe i te hoê matahiti i muri iho, ua amuamu aˈera ratou i te mea e “mea teimaha aˈe te oraraa i roto i te ao etaeta o te hau ona tiamâ, i te oraraa tei paruruhia na e te Patu no Berlin.” Eaha tei noaa mai? Te tiaturi ore e te hepohepo rahi.

E nehenehe te haavîraa i roto i te utuafare e i rotopu i te nunaa e turai i te taata ia faarue i to ratou vahi faaearaa no te imi i te hoê oraraa peapea ore, mea iti râ o te ite atu i teie huru oraraa. E tae roa vetahi i te ora e te feia aita to ratou e faaearaa o te puhapa nei na roto i te mau aroâ o te oire. I roto i te tahi mau fenua, e rave rahi o te haafifihia nei na roto i te mau titauraa fifi roa a te hau. Eita ta ratou e nehenehe e aufau i te hoê fare no te mea aita ta ratou e ohipa, e i te tahi aˈe pae, eita ta ratou ohipa e noaa no te mea aita ta ratou e vahi faaearaa papu. Te tamata nei te mau taatiraa turuutaa a te hau i te tauturu ia ratou, teie râ, e titauhia te taime no te faatitiaifaro i te mau fifi. No reira, e tupu mai ïa te mauruuru ore e te hepohepo.

E rave rahi mau vahine o te faahepohia nei ia rave i te mau ohipa peapea roa no te mea aita ˈtu ta ratou e ravea. I roto i te tabula Te mau vahine e te mau ohipa iino i te mau matahiti 1990 (beretane), te faataa ra te vahine haapao ture ra o Susan Edwards e: “Te tumu te mau vahine apî e riro ai [ei mau vahine taiata] no te mea ïa e te erehia ra ratou i te pae moni, eiaha râ no te mea e oraraa huehue to ratou aore ra no to ratou oraraa utuafare.” Oia atoa, mea pinepine te mau taurearea tane o te faarue nei i te fare no te haere e imi i te ohipa, tera râ, aita ta ratou ohipa e noaa mai. No te peapea o to ratou oraraa, aita ˈtu ta ratou e ravea maoti râ te riroraa ei mau ‘tamaroa tarahu,’ ma te hoo atu i to ratou tino i te mau mǎhu ia noaa mai ta ratou maa e te hoê fare, e ma te riro mai ei mau hauti i roto i te rima o te feia faufau.

Te faatupu nei te mau tupuraa teimaha i te pae politita, te haavîraa puai, te mau fifi i te pae no te moni, i te hepohepo. Aita atoa te feia toroa teitei e paruruhia ra inaha te tutava nei ratou i te atuatu i te hoê huru oraraa ona ma te faaruru i te mau fifi rahi i te pae no te moni. Eaha ïa te noaa mai? “E huru ê te taata paari ia hamani-ino-hia,” o ta te Arii ra o Solomona no te tau tahito ïa i parau!a (Koheleta 7:7) Oia mau, te turai nei te hepohepo i te mau taata e rave rahi ia maiti i te ravea hopea roa—oia hoi te haapoheraa ia ratou iho.

Te ravea hopea roa

Te faaite maira te rahiraa o te mau taurearea e haapohe nei ia ratou e te roo-atoa-hia nei ratou i te ati o te hepohepo. Ua ani te hoê vahine papai vea no Beretane e: “Eaha te tumu e turai ra i teie mau rahiraa taurearea ia hepohepo i teie nei tau?” I roto i te hoê maimiraa no nia i te mau tamarii i rotopu i te 8 e te 16 matahiti o tei tapeahia i te fare maˈi i muri aˈe i to ratou tamataraa i te haapohe ia ratou e te raau taero, te faataa ra te taote Eric Taylor no te Pu maimiraa i te pae no te maˈi o te feruriraa no Lonedona e: “Te mea i faahitimahuta ia matou, o te rahiraa tamarii ïa o tei roohia i te hepohepo e te tiaturi ore no nia i te mau ohipa.” Te tapao ra te fenua Beretane tau 100 000 feia i te mau matahiti atoa o te rave i te raau taero eita râ ratou e pohe, e mea na reira ratou e faaite ai e te titau ra ratou i te tauturu.

Ua rave te hoê taatiraa tauturu beretane i te hoê ohipa no te faaroo atu i te feia e hepohepo ra ma te aroha. Ua titau hoi to ˈna mau taata aˈo e na reira no te pûpû i te hoê “ravea ê atu i te pohe.” Teie râ, te farii nei ratou e aita ratou e manuïa ra i te faatitiaifaro i te mau fifi e faatupu ra i te hepohepo.

Te haapapu ra te rahiraa taata e haapohe nei ia ratou i “te faito o te paruparu e te ereraa i te au-maite-raa totiale i roto i te totaiete,” o ta te vea ra The Sunday Correspondent e faataa ra. Na te aha e turai ra i teie rahiraa taata ia haapohe ia ratou i teie mahana? Ua faahiti taua vea ra i “te ereraa i te fare, te inu-hua-raa i te ava, te haamǎtaˈuraa o te Sida e te opaniraa o te mau fare rapaauraa i te feia maˈi i te pae feruriraa” ei mau tumu o te aratai i te taata ia faatupu i te hepohepo ino roa o te turai ia ratou ia manaˈo e aita ˈtu ta ratou e ravea no te arai i to ratou mau fifi maoti râ te haapoheraa ia ratou.

Te vai ra anei te ravea no te arai i te hepohepo? Oia! “A nânâ i to outou mata i nia, e faateitei i to outou upoo,” o te tiaororaa ïa a Iesu! (Luka 21:28) Eaha ïa ta ˈna e hinaaro ra e parau? Eaha te tiaturiraa e vai nei?

[Nota i raro i te api]