E taata tumu aore ra e taata ěê, te farii popou nei te Atua ia outou!

“E na ˈna i hamani i te taata i te mau fenua atoa nei i te toto o te taata hoê ra, ei parahi i te mau fenua atoa nei.”—OHIPA 17:26.

1. Eaha te tupuraa peapea e itehia ra i roto e rave rahi mau fenua i teie mahana no nia i te fariiraa i te taata no te mau nunaa ěê?

TE FAAITE ra te mau parau apî e i roto e rave rahi mau fenua, te tupu nei te peapea no nia i te feia ěê, te feia no ǒ mai i te tahi atu fenua, e te feia o tei horo i to ratou fenua. E mau mirioni taata o te imi nei i te ravea no te faarue i te mau fenua no Asia, no Afirika, no Europa, e no te mau pae no Marite. Peneiaˈe, te imi nei ratou i te ravea no te tiamâ mai i te veve rahi, te tamaˈi tivila, aore ra te hamani-ino-raa. Tera râ, te farii-maitai-hia ra anei ratou i te tahi atu mau vahi? Te faaite ra te vea Time e: “A taui ai te anoiraa nunaa no Europa, te ite nei vetahi mau fenua e aita ratou e farii maitai ra i te mau nunaa ěê mai ta ratou i manaˈo na i te omuaraa ra.” Te na ô ra te vea Time no nia i te mau 18 000 000 feia “hinaaro-ore-hia” tei horo i to ratou fenua e: “Eita te fifi o ta ratou e faatupu ra no te mau nunaa papu e ore.”

2, 3. (a) Eaha te tiaturiraa tamahanahana mau ta te Bibilia e horoa maira no nia i te fariiraa ia vetahi ê? (b) No te aha tatou e faufaahia ˈi ia tuatapapa tatou i ta te mau Papai e faataa ra no nia i te mau huru raveraa a te Atua e te mau nunaa?

² Noa ˈtu eaha te huru tupuraa i roto i teie nei tuhaa, te faaite ra te Bibilia e te farii popou nei te Atua i te mau taata no te mau nunaa atoa—noa ˈtu e e melo huiraatira tumu oia, e taata no te fenua ěê, aore ra ua horo oia i to ˈna fenua. (Ohipa 10:34, 35) E ani mai paha vetahi e, ‘Nafea hoi outou e na reira ˈi i te parau? Aita anei te Atua i maiti i te nunaa Iseraela anaˈe i tahito ra ei nunaa no ˈna, ma te haapae i te tahi atu mau nunaa?’

³ E hiˈo anaˈe na e mea nafea to te Atua faataaraa i te ohipa e te mau nunaa no tahito ra. E tuatapapa atoa tatou i te tahi mau parau tohu e faataa ra i te mau hopoia taa ê e vai nei no te feia haamori mau i teie mahana. Ia hiˈopoa faahou outou i teie mau parau tohu, e noaa mai te maramarama papu aˈe o te riro ei faaitoitoraa rahi. Te faaite maira hoi te reira e mea nafea te Atua e faaau ai i te ohipa e te mau taata “no te mau fenua atoa, e te mau opu atoa, e te mau nunaa atoa, e te mau reo atoa” i muri aˈe i te ati rahi.—Apokalupo 7:9, 14-17.

‘E haamaitaihia te mau fenua atoa o te ao nei’

4. Mea nafea te fifi o te mau nunaa ěê i te tupuraa mai, eaha râ ta te Atua i rave?

⁴ I muri aˈe i te Diluvi, o te utuafare o Noa te huitaata atoa nei, e ua riro ratou paatoa ei feia haamori mau. I muri aˈe râ, ua taui teie autahoêraa. Aita i maoro, ua haamata ihora vetahi mau taata, ma te faaroo ore i te hinaaro o te Atua, i te patu i te hoê pare. Mea na reira te amaharaa te huitaata nei i roto i te mau pǔpǔ reo o tei riro maira ei mau opu taata e ei mau nunaa taa ê. (Genese 11:1-9) Ua tamau noa râ te haamoriraa mau e tae roa ˈtu ia Aberahama ra. Ua haamaitai te Atua i te taata haapao maitai ra o Aberahama e ua tǎpǔ oia e e riro mai to ˈna huaai ei nunaa rahi. (Genese 12:1-3) Taua nunaa ra, o Iseraela tahito ïa.

5. No te aha tatou paatoa e itoitohia ˈi na roto i te ohipa ta te Atua i faaau e o Aberahama?

⁵ Aita râ Iehova i haapae roa i te mau nunaa taa ê atu ia Iseraela, no te mea e fanaˈo te huitaata taatoa i ta ˈna opuaraa. Mea papu maitai te reira i roto i te parau ta te Atua i tǎpǔ atu ia Aberahama: “E maitai te mau fenua atoa o te ao nei i to oe na huaai; o oe i faaroo mai i tau reo nei.” (Genese 22:18) I roto i te roaraa o te mau senekele, ua faaau te Atua i te ohipa e o Iseraela na roto i te hoê ravea taa ê, ma te horoa ˈtu i te hoê haapueraa Ture na te nunaa, ma te faanaho i te mau tahuˈa o te pûpû i te tusia i to ˈna ra hiero, e ma te horoa ˈtu i te Fenua i tǎpǔhia ei vahi parahiraa no ratou.

6. Mea nafea te mau faanahoraa ta te Atua i rave e o Iseraela e riro ai ei maitai no te taatoaraa?

⁶ Mea maitai te Ture a te Atua ia Iseraela no te mau nunaa atoa, i te mea e ua haapapu oia i te tiaraa hara o te taata, ma te faaite i te faufaaraa o te hoê tusia tia roa no te tapoˈi i te hara a te taata e a muri noa ˈtu. (Galatia 3:19; Hebera 7:26-28; 9:9; 10:1-12) Teie râ, eaha te haapapuraa e e tae mai iho â te Huaai a Aberahama—mea na roto ia ˈna e maitai ai te mau nunaa atoa—e e faaî oia i te mau titauraa? Ua tauturu atoa mai te Ture a Iseraela i ǒ nei. Ua opani oia i te mau faaipoiporaa e te mau ati Kanaana, te hoê nunaa matauhia no ta ˈna mau peu e ta ˈna mau oroa faufau, mai te peu ra e tutui oraora noa i ta ratou mau tamarii i te auahi. (Levitiko 18:6-24; 20:2, 3; Deuteronomi 12:29-31; 18:9-12) Ua faaoti aˈera te Atua e haamou roa ia ratou e ta ratou mau peu. Ua riro te reira i muri iho ei maitairaa no te taatoaraa, e tae noa ˈtu te feia ěê e parahi ra i reira, no te mea e paruru te reira ia ore te hui tupuna o te Huaai ia haaviiviihia.—Levitiko 18:24-28; Deuteronomi 7:1-5; 9:5; 20:15-18.

7. Eaha te haapapuraa no tahito ra e faaite ra e ua farii te Atua i te feia ěê?

⁷ I te tau atoa a mana ˈi te Ture e a faariro ai te Atua ia Iseraela ei nunaa taa ê, ua faaite atu oia i to ˈna hamani maitai i nia i te feia e ere i te Iseraela. Ua haapapuhia to ˈna hinaaro e na reira i to Iseraela tiamâraa mai i te faatîtîraa a to Aiphiti no te haere i to ˈna iho fenua. “E te taata ěê atoa e rave rahi i te anoi-atoa-raa i to ratou haerea.” (Exodo 12:38) Te faaite ra te orometua haapii o C. F. Keil i teie feia mai “te tahi nahoa o te mau taata ěê . . . te hoê anoiraa, aore ra te hoê tiaa taata no te mau nunaa ěê.” (Levitiko 24:10; Numera 11:4) Eita e ore e rave rahi feia no Aiphiti o tei farii i te Atua mau.

Te fariiraa i te feia ěê

8. Mea nafea to te feia no Gibeona fariiraahia i rotopu i te nunaa o te Atua?

⁸ I to Iseraela faatupuraa i te faaueraa a te Atua e faaore roa i te mau nunaa faufau i roto i te Fenua i tǎpǔhia mai, ua paruru oia i te hoê pǔpǔ feia ěê, oia hoi te feia no Gibeona, e ora na i te pae apatoerau no Ierusalema. Ua tono atu ratou i te mau tia tei huna e o vai ra ratou, ia Iosua ra, no te taparu e ua noaa mai hoi i te hau. I te taime a itehia ˈi e ua haavare ratou, ua faaue atura o Iosua ia tavini te feia no Gibeona ei “papai vahie . . . e ei tii pape na te amuiraa atoa ra, e no te fata a Iehova.” (Iosua 9:3-27) I teie mahana, e rave rahi feia no te fenua ěê o te farii atoa nei i te rave i te mau tiaraa tavini haehaa no te riro ei melo no te hoê nunaa apî.

9. Mea nafea te hiˈoraa o Rahaba e to ˈna utuafare ei feia ěê faaturahia i Iseraela, e riro ai e faaitoitoraa?

⁹ E itoitohia paha outou i te iteraa e aita noa te Atua i farii i te tahi noa pǔpǔ feia ěê i taua tau ra; ua farii-atoa-hia te feia tataitahi. I teie mahana, te farii nei te tahi mau nunaa i te feia ěê anaˈe e tiaraa teitei to ratou, e moni ta ratou, aore ra e ite teitei to ratou. E ere o Iehova mai te reira te huru, mai ta tatou e ite ra na roto i te hoê ohipa o tei tupu na mua noa ˈˈe i te farereiraa e te feia no Gibeona. Ua tupu te reira i nia i te hoê vahine Kanaana, e ere hoi oia i te vahine tiaraa teitei. Te pii ra te Bibilia ia ˈna “te faaturi ra o Rahaba.” No to ˈna faaroo i roto i te Atua mau, ua faaorahia o ˈna e to ˈna utuafare fetii i te taime a mairi ai o Ieriko. Noa ˈtu e e vahine ěê o Rahaba, ua farii te mau ati Iseraela ia ˈna. Ua riro oia ei hiˈoraa no te faaroo te tia mau â ia tatou ia pee maite. (Hebera 11:30, 31, 39, 40; Iosua 2:1-21; 6:1-25) Ua riro atoa mai oia ei metua tupuna no te Mesia.—Mataio 1:5, 16.

10. Ua taaihia te fariiraa i te feia ěê i Iseraela i nia i te aha?

¹⁰ Ua fariihia te feia e ere i te ati Iseraela i roto i te Fenua i tǎpǔhia ia au i ta ratou tutavaraa no te auraro i te Atua mau. Ua titauhia te mau ati Iseraela ia ore e faahoa ˈtu, i te pae faaroo iho â râ, e te feia aore e haamori ra ia Iehova. (Iosua 23:6, 7, 12, 13; Te mau arii 1, 11:1-8; Maseli 6:23-28) E rave rahi râ feia i parahi i taua fenua ra e ere i te ati Iseraela o tei auraro i te mau ture. Ua riro atoa mai vetahi ei feia faaroo peritomehia, e ua farii popou Iehova ia ratou ei melo no ta ˈna amuiraa.—Levitiko 20:2; 24:22; Numera 15:14-16; Ohipa 8:27.a

11, 12. (a) Eaha te huru o te mau Iseraela i nia i te feia haamori ěê? (b) No te aha e tia ˈi ia tutava tatou i te pee i te hiˈoraa o Iehova?

¹¹ Ua faaue te Atua i te mau ati Iseraela ia pee i to ˈna hiˈoraa no nia i te feia haamori ěê: “Ia riro râ te taata ê e parahi i ǒ outou na mai te taata tupu atoa ia outou, e aroha hoi oe ia ˈna mai te aroha ia oe ihora; e taata ěê atoa hoi outou i te fenua ra i Aiphiti.” (Levitiko 19:33, 34; Deuteronomi 1:16; 10:12-19) Te horoa maira te reira i te hoê haapiiraa na tatou, noa ˈtu e aita faahou tatou i raro aˈe i te Ture. Mea ohie roa ia topa i roto i te mau manaˈo faaau ore e te hiˈo-ino-raa ˈtu i te feia no te tahi atu iri, te tahi atu nunaa, aore ra te tahi atu ihotumu. No reira, mea maitai ia aniani tatou e: ‘Te tutava ra anei au i te haapae roa i teie mau manaˈo faaau ore, ma te pee i te hiˈoraa o Iehova?’

¹² Ua ite mata roa te mau ati Iseraela i te haapapuraa o te farii maitai o te Atua. Ua pure te Arii ra o Solomona e: “I te taata ê ra, e ere i to Iseraela i to oe nei mau taata, mai te fenua roa maira no to oe nei iˈoa i tae mai ai; . . . ia haere maira oia e ia pure tia mai i teie nei fare; e faaroo mai oe i reira i nia i te raˈi . . . ia faaroo to te [mau nunaa o te fenua] atoa nei i to oe ra iˈoa, e ia mǎtaˈu ia oe.”—Te mau arii 1, 8:41-43; Paraleipomeno 2, 6:32, 33.

13. No te aha te Atua i rave ai i te tahi faanahoraa no te taui i ta ˈna huru raveraa e o Iseraela?

¹³ I te tau a faaohipa noa ˈi Iehova i te mau tamarii Iseraela ei nunaa no ˈna e ia ˈna i paruru i te hui tupuna o te Mesia, ua tohu te Atua i te mau tauiraa rahi. Na mua ˈtu, i to Iseraela fariiraa i te faaô ia ˈna i roto i te faufaa a te Ture, ua haapapu te Atua e e riro ratou ei pu no te hoê “basileia tahuˈa . . . ei nunaa moˈa.” (Exodo 19:5, 6) Ua taiva râ o Iseraela i roto i te roaraa o te mau senekele. No reira, ua tohu maira Iehova e e fafau oia i te hoê faufaa apî i reira e faaorehia ˈi te hapa e te hara a te feia atoa no roto i “te utuafare o Iseraela.” (Ieremia 31:33, 34) Ua tiai taua faufaa apî ra i te Mesia, na to ˈna hoi tusia e tamâ roa ˈi i te hara a te feia e rave rahi.—Isaia 53:5-7, 10-12.

Te mau ati Iseraela i nia i te raˈi

14. O vai taua “Iseraela” apî ra ta Iehova i farii, e mea nafea?

¹⁴ Te tauturu ra te mau Papai heleni kerisetiano ia tatou ia taa e mea nafea te reira i te tupuraa. O Iesu te Mesia, na to ˈna hoi pohe i faaoti i te Ture e i haamau i te niu no te faaoreraa taatoa i te hara. No te fanaˈo i teie haamaitairaa, eita e titauhia ia riro ei ati Iuda peritomehia i te pae tino. Aita. Ua papai te aposetolo Paulo e, i roto i te faufaa apî, “o te ati Iuda roto ra, te ati Iuda; e te peritome aau ra, te peritome; eiaha to rapae au [to te ture papaihia], o to te varua râ.” (Roma 2:28, 29; 7:6) E noaa te faaoreraa hapa i te feia o te tuu i te faaroo i roto i te tusia o Iesu, e e farii te Atua ia ratou ei ‘mau ati Iuda i te pae varua,’ o te riro ei nunaa pae varua tei parauhia ‘te Iseraela o te Atua.’—Galatia 6:16.

15. No te aha e ere te tiaraa nunaa i te pae tino i te mea titauhia no te riro ei melo no te Iseraela i te pae varua?

¹⁵ Oia mau, ia fariihia te hoê taata i roto i te Iseraela i te pae varua, eita e titauhia ia fanauhia oia i roto i te tahi nunaa aore ra te tahi pǔpǔ taata taa maitai. Ua riro vetahi, mai te mau aposetolo a Iesu, ei mau ati Iuda mau i te pae tino. Area vetahi ra, mai te raatira faehau roma ra o Korenelio, e feia no te mau nunaa ěê peritome-ore-hia ïa ratou. (Ohipa 10:34, 35, 44-48) Ua tano roa o Paulo i te parauraa no nia i te Iseraela i te pae varua e: “Aita e Heleni e te ati Iuda; aore e peritome e te peritome ore; aore e Barebaro e te Sekute; aore e tavini e te tiama.” (Kolosa 3:11) Ua riro maira te feia faatavaihia e te varua o te Atua ei “ui maitihia . . . e autahuˈa arii, e nunaa moˈa, e feia hoohia.”—Petero 1, 2:9; a faaau e te Exodo 19:5, 6.

16, 17. (a) Eaha te tuhaa a te mau Iseraela i te pae varua i roto i te opuaraa a te Atua? (b) No te aha e mea tano ia haapao i te feia e ere no te Iseraela o te Atua?

¹⁶ Eaha te tiaturiraa no a muri aˈe a te mau Iseraela i te pae varua ia au i te opuaraa a te Atua? Ua pahono o Iesu e: “Eiaha e mǎtaˈu, e tau nǎnǎ iti e; e mea hinaaro na to outou Metua i te horoa mai i te basileia no outou.” (Luka 12:32) E riro te feia faatavaihia, ‘tei nia to ratou tiaraa i te raˈi,’ ei feia aiˈa apiti i te Arenio i roto i ta ˈna faatereraa i te Basileia. (Philipi 3:20; Ioane 14:2, 3; Apokalupo 5:9, 10) Te faaite ra te Bibilia e ‘ua tapaohia ratou no te mau opu atoa o te tamarii a Iseraela ra’ e ua “tauihia teie nei feia no roto i te taata nei, ei oho matamua na te Atua e na te Arenio ra.” E 144 000 ratou. Teie râ, i muri aˈe i to ˈna faatiaraa e ua tapaohia teie numera, te faahiti ra o Ioane i te hoê pǔpǔ ê atu—“e feia rahi roa, e ore roa e pau ia taio, no te mau fenua atoa, e te mau opu atoa, e te mau nunaa atoa, e te mau reo atoa.”—Apokalupo 7:4, 9; 14:1-4.

¹⁷ E aniani paha vetahi e: ‘Eaha ˈtura no te mau mirioni taata e ere no roto i te Iseraela i te pae varua, mai te feia e ora ˈtu i te ati rahi ei feia rahi roa? Eaha te tuhaa o ta ratou e rave ra i teie mahana ma te tuatihia e te toea iti o te Iseraela i te pae varua?’b

Te feia ěê o te parau tohu

18. Eaha tei aratai i te hoˈiraa ˈtu o Iseraela mai te faatîtîraa i Babulonia?

¹⁸ Ia hoˈi tatou i te tau i reira to Iseraela vairaa i raro aˈe i te faufaa o te Ture, aita râ oia i haapao i te reira, te ite ra tatou e ua faaoti te Atua e vaiiho i te nunaa Babulonia ia haamou ia Iseraela. I te matahiti 607 hou to tatou nei tau, ua hopoi-tîtî-hia o Iseraela e 70 matahiti te maoro. I muri aˈe, ua hoo faahou maira te Atua i teie nunaa. I raro aˈe i te aratairaa a te tavana o Zerubabela, ua hoˈi atura te mau tamarii Iseraela i te pae tino i to ratou fenua. Ua tauturu atoa ˈtu te mau arii no Medai e no Peresia, o tei faataahuri ia Babulonia, i te feia hopoi-ê-hia o tei hoˈi atu i to ratou ra fenua na roto i te horoaraa ˈtu i te taoˈa. Ua faaite atea te buka a Isaia i teie mau huru tupuraa. (Isaia 1:1-9; 3:1-26; 14:1-5; 44:21-28; 47:1-4) E te horoa maira o Ezera i te mau haamaramaramaraa i te pae no te aamu no nia i taua hoˈiraa no ratou ra.—Ezera 1:1-11; 2:1, 2.

19. No nia i te hoˈiraa ˈtu o Iseraela, eaha te tohu tei faaite e e faaohipa-atoa-hia te feia ěê?

¹⁹ I to ˈna faaite-atea-raa i te hoo-faahou-raa mai e te hoˈiraa ˈtu o te nunaa o te Atua, ua faahiti o Isaia i teie parau tohu maere mau: “E haere noa mai hoi te mau fenua i to oe ra maramarama; e te mau arii i te anaana o to oe ra mahana e hiti ra.” (Isaia 59:20; 60:3) E ere noa te auraa e e fariihia te feia ěê, ia au maite i te pure a Solomona. Te faahiti ra o Isaia i te hoê tauiraa manaˈo-ore-hia o to ratou tiaraa. E tavini “te mau fenua” i pihai iho i te mau tamarii no Iseraela: “E na te mau tamarii o te taata ê ra e patu i to mau aua, e itehia mai oe e to ratou ra hui arii: i tairi hoi au ia oe i tau riri nei, e aroha râ vau ia oe i taua aroha no ˈu nei.”—Isaia 60:10.

20, 21. (a) Eaha te tuearaa e itehia ra i teie nei tau no nia i te hoˈiraa ˈtu o Iseraela mai te faatîtîraa mai? (b) Mea nafea te mau ‘tamarii tamaroa e te mau tamahine’ apitiraahia i muri iho i te Iseraela i te pae varua?

²⁰ I roto e rave rahi mau tuhaa, te itehia ra te hoê tuearaa i rotopu i te hopoiraahia e te hoˈiraa ˈtu o Iseraela i te faatîtîraa e teie nei tau na roto i te Iseraela i te pae varua. Na mua ˈtu i te Tamaˈi Rahi Matamua, aita te toea o te mau kerisetiano faatavaihia i pee maite i te hinaaro o te Atua; ua tapea noa hoi ratou i te tahi mau manaˈo e te tahi mau peu a te mau ekalesia a te amuiraa faaroo kerisetiano. I muri iho, i roto i te tau maamaa o te tamaˈi e na nia i te raveraa a te mau raatira haapaoraa, ua tapeahia te feia aratai o te toea a te Iseraela i te pae varua ma te tia ore. I muri aˈe i te tamaˈi, i te matahiti 1919, ua faatiamâhia e ua faaorehia te pariraa a te feia faatavaihia tei tapeahia i te fare auri. Ua haapapu te reira e ua tiamâ mai te nunaa o te Atua i te faatîtîraa a Babulonia Rahi, te hau emepera a te haapaoraa hape na te ao nei. Ua tia maira to ˈna nunaa no te patu e no te parahi i roto i te hoê paradaiso i te pae varua.—Isaia 35:1-7; 65:13, 14.

²¹ Ua faaitehia te reira i roto i te faataaraa a Isaia: “Ua putuputu atoa mai ratou, i haere mai ratou ia oe ra; e tae mai to mau tamarii tamaroa mai te fenua roa mai; e to mau tamahine, e afai tutahia mai ïa. Ei reira oe e ite ai, e rahi roa te oaoa; e horuhoru hoi to aau, e horahorahia; ia hopoihia mai te mau taoˈa no te moana ia oe ra; e ia tae mai te mau taoˈa no te mau fenua ia oe ra.” (Isaia 60:4, 5) I roto i te mau matahiti i muri iho, ua tamau noa ‘te mau tamarii tamaroa e te mau tamahine’ i te haere mai, ma te faatavaihia e te varua no te parahi i nia i te mau parahiraa hopea i roto i te Iseraela i te pae varua.

22. Mea nafea te mau “taata ěê” i te haereraa mai e rave i te ohipa i pihai iho i te mau Iseraela i te pae varua?

²² Eaha ˈtura no ‘te mau taata ê ra e patu i to mau aua’? Ua tupu atoa te reira i to tatou nei tau. A hope ai te putuputuraa o na 144 000, ua haamata ihora te tahi feia rahi roa no roto mai i te mau nunaa atoa i te apiti mai no te haamori e te Iseraela i te pae varua. Ua noaa i teie feia apî i te tiaturiraa niuhia i nia i te Bibilia oia hoi e ora e a muri noa ˈtu i roto i te paradaiso i nia i te fenua nei. Noa ˈtu e mea taa ê te vahi o ta ratou e parahi a muri aˈe no te tavini ma te haapao maitai, ua oaoa roa ratou i te tautururaa ˈtu i te toea faatavaihia i roto i te pororaa i te parau apî maitai o te Basileia.—Mataio 24:14.

23. I roto i teihea faito to te mau “taata ěê” tautururaa i te feia faataivahia?

²³ I teie mahana, hau atu i te 4 000 000 tei riro ei “taata ěê,” i pihai iho i te toea o te feia ‘tei nia i te raˈi to ratou tiaraa,’ o te faaite nei i to ratou auraro ia Iehova. E rave rahi i rotopu ia ratou, te tane e te vahine, te feia apî e te feia paari, o te tavini nei ma te taime taatoa ei pionie. I roto i te rahiraa o na hau atu i te 66 000 amuiraa, te amo nei teie mau taata ěê i te mau hopoia ei matahiapo e ei tavini tauturu. Te oaoa nei te toea i te reira, inaha te ite ra ratou i te tupuraa o teie mau parau a Isaia: “E na te taata ěê e tia mai e faaamu i ta outou mau nǎnǎ; e te mau tamarii o te taata ê ra te riro ei faaapu, e ei tope vine na outou.”—Isaia 61:5.

24. No te aha tatou e faaitoitohia ˈi na roto i te mau huru raveraa a te Atua e o Iseraela e te tahi atu i tahito ra?

²⁴ No reira, noa ˈtu e ua riro outou ei taata tumu, ei taata ěê, ei taata o tei horo i to ˈna fenua, i roto i te tahi nunaa o te fenua nei, e nehenehe outou e fanaˈo i te ravea faahiahia roa e riro mai ei taata ěê i te pae varua ta te Mana hope e farii popou nei. I roto i ta ˈna fariiraa, e nehenehe e noaa mai i te mau hopoia taa ê i roto i ta ˈna taviniraa i teie nei iho e a muri noa ˈtu.

[Nota i raro i te api]

Ua tapao anei outou i teie mau manaˈo?

◻ Mea nafea te Atua i te horoaraa i te tiaturiraa na te feia o te mau nunaa atoa e fariihia e Ana?

◻ Na te aha e faaite ra e e nehenehe te feia taa ê atu i te nunaa a te Atua iho, o Iseraela, e haafatata ˈtu Ia ˈna?

◻ Na roto i te tohu, mea nafea to te Atua faaiteraa e e apiti atoa mai te feia ěê ia Iseraela?

◻ Eaha ta te hoˈiraa ˈtu o Iseraela i te faatîtîraa i faahohoˈa, e mea nafea te mau “taata ěê” i te faaohiparaahia?

[Hohoˈa i te api 9]

Ua pure te Arii ra o Solomona no te feia ěê o te haere mai e haamori ia Iehova