Te faahoturaa “i te mau mea maitatai atoa ra”
“Ta te [maramarama] i faatupu ra, oia te mau mea maitatai atoa ra.”—EPHESIA 5:9.
1, 2. Eaha na pǔpǔ e piti i vai na i mutaa ihora, e eaha te taa-ê-raa e vai ra i rotopu ia raua i teie mahana?
I MURI aˈe i te orureraa hau i Edene, tau ono tausani matahiti i teie nei, e i muri aˈe atoa i te diluvi i te tau o Noa ra, ua vahi te huitaata nei i roto e piti pǔpǔ, aore ra faanahonahoraa, i te hoê pae, te feia o tei tutava i te tavini ia Iehova, e i te tahi atu pae, te feia o tei pee ia Satani. Te vai noa ra anei teie na faanahonahoraa e piti nei? E! Ua faahiti te peropheta ra o Isaia i teie na pǔpǔ e piti e ua tohu mai oia i to raua huru i to tatou nei tau: “Inaha, e ati hoi te fenua nei i te pouri; e te mau etene i te pouri taotao: e hiti mai râ Iehova i nia ia oe, e itea noa mai hoi to ˈna hanahana i nia iho ia oe ra.”—Isaia 60:1, 2.
2 Hoê â te taa-ê-raa i rotopu i teie na faanahonahoraa e piti nei e te taa-ê-raa e vai ra i rotopu i te pouri e te maramarama. E mai te maramarama o te hoê mori e ume mai i te hoê taata i moe i roto i te pouri ra, mai te reira atoa te maramarama no ǒ mai ia Iehova e anaana ra i roto i teie ao pouri i te umeraa mai i te mau mirioni taata aau mehara i roto i te faanahonahoraa a te Atua. Mai ta Isaia e parau faahou ra: “E haere noa mai hoi te mau fenua [te mau mamoe ê atu] i to oe ra maramarama; e te mau arii [te feia aiˈa faatavaihia o te Basileia] i te anaana o to oe ra mahana e hiti ra.”—Isaia 60:3.
3. Na roto i teihea mau ravea te mau kerisetiano e faaite ai i te hanahana o Iehova?
3 Mea nafea te nunaa a Iehova ia faaanaana i te hanahana o Iehova? A tahi, te poro nei ratou i te parau apî maitai o te Basileia o te Atua i haamauhia i nia i te raˈi. (Mareko 13:10) Hau atu râ, te pee nei ratou i te hiˈoraa o Iehova, te hiˈoraa matamua o te maitai, e mea na roto ïa i to ratou haerea e ume mai ai ratou i te feia haehaa i roto i te maramarama. (Ephesia 5:1) Te na ô ra o Paulo e: “I pouri na hoi outou i mutaa ihora, i teie nei râ ua maramarama outou i te Fatu, ia au to outou haerea i te tamarii maramarama.” Te parau faahou ra oia e: “Ta te [maramarama] i faatupu ra, oia te mau mea maitatai atoa ra, e te parau-tia e te parau mau. Ia itea ia outou te mea au i te Fatu ra. E eiaha roa ei amuiraa i te feia parau faufaa ore o te pouri ra.” (Ephesia 5:8-11) Eaha ta Paulo e hinaaro ra e parau ia ˈna i faahiti i “te mau mea maitatai atoa ra”?
4. Eaha te maitai, e mea nafea e itehia ˈi i roto i te hoê kerisetiano?
4 Mai ta te tumu parau na mua ˈtu i faaite mai, ua riro te maitai ei huru aore ra ei tiaraa morare teitei roa, ei peu tura. Ua parau o Iesu e o Iehova anaˈe tei maitai i roto i te auraa tia roa. (Mareko 10:18) Teie râ, e nehenehe te hoê kerisetiano e pee i te hiˈoraa o Iehova na roto i te faahoturaa i te maitai mai te hoê hotu o te varua. (Galatia 5:22) Ma te tatara i te parau heleni ra a·ga·thosʹ, tei hurihia na roto i te parau ra “maitai,” te na ô ra te hoê titionare no nia i te mau parau a te Faufaa Apî e te Faufaa Tahito (Vine’s Expository Dictionary of Old and New Testament Words) e, “Te faataa ra [oia] i te mea, no te maitai o to ˈna huru aore ra o to ˈna huru hamaniraa, o te haamaitai na roto i ta ˈna mau faahopearaa.” No reira, e titauhia te kerisetiano e faahotu ra i te maitai, ia riro ei taata maitai e oia atoa ia rave i te ohipa maitai. (A faaau e te Deuteronomi 12:28.) E ape atoa oia i te mau ohipa o te patoi ra i te maitai, “[te mau ohipa] faufaa ore o te pouri ra.” Te mau ravea taa ê e nehenehe ai te hoê kerisetiano e faaite i te maitai i roto i to ˈna haerea, o te mau ‘mea maitatai’ atoa ïa ta Paulo i faahiti. Eaha ïa vetahi o teie mau mea maitatai?
“A rave na i te parau maitai”
5. Eaha te hoê huru o te maitai, e no te aha e titauhia ˈi te hoê kerisetiano ia faahotu i te reira?
5 Ua faahiti o Paulo i te hoê o teie mau mea maitatai i roto i ta ˈna rata i to Roma. Ma te faataa i te parau no te auraroraa ˈtu i te “feia mana toroa,” te na ô ra oia e: “Eita anei hoi oe e mǎtaˈu i taua toroa ra? a rave na i te parau maitai, e e haamaitaihia oe i reira.” Te “parau maitai” o ta ˈna e faahiti ra i ǒ nei, o te auraroraa ïa i te mau ture e te mau faanahoraa a te mau mana toroa no teie nei ao. No te aha te hoê kerisetiano e auraro ai i teie mau mana toroa? No te ape ïa i te mau aroraa faufaa ore e te feia mana toroa, e oia atoa hoi te utua e—te mea faufaa roa ˈtu â—no te tapea i te hoê haava manaˈo mâ i mua i te aro o te Atua. (Roma 13:1-7) Ma te auraro na mua roa ˈˈe ia Iehova, e ‘faahanahana te hoê kerisetiano i te mau arii,’ ma te ore e patoi atu i te feia mana toroa o ta te Atua ra o Iehova e vaiiho noa ra. (Petero 1, 2:13-17) No reira, e riro te mau kerisetiano ei feia tapiri maitatai, ei mau melo huiraatira maitatai, e ei mau hiˈoraa maitatai.
A faatura ˈtu ia vetahi ê
6. (a) Eaha te tahi atu tuhaa o te maitai? (b) O vai tei faahitihia i roto i te Bibilia o te tia ia tatou ia faatura ˈtu?
6 Ua itehia te maitai o Iehova na roto i to ˈna horoaraa mai na te feia atoa i nia i te fenua nei “i te ûa no nia i te raˈi ra, e te anotau auhune.” E faatupu te reira i ‘te faaîraa mai i te aau i te maa e te oaoa’ ma te haapapu mai e ua riro mau â oia ei Atua o te haapao i te huru o te taata. (Ohipa 14:17) E nehenehe tatou e pee i to ˈna hiˈoraa i roto i teie nei tuhaa na roto i te faaturaraa ˈtu ia vetahi ê i roto i te mau ohipa haihai e te mau ohipa rahi. E faatura iho â râ tatou ia vai? Te faahiti taa ê ra o Paulo i te mau matahiapo, “te feia i rave i te ohipa i roto ia outou na, o te mau faaite i nia iho ia outou i te Fatu nei, o tei aˈo atu hoi ia outou.” Ua faaue oia i te mau kerisetiano “ia rahi roa te faatura ia ratou ma te aroha, no ta ratou ra ohipa.” (Tesalonia 1, 5:12, 13) Nafea tatou ia na reira? Na roto ïa i te tururaa ˈtu ia ratou—ei hiˈoraa, na roto i te raveraa i te ohipa e titauhia i roto i te Piha o te Basileia. Noa ˈtu e eita tatou e mǎtaˈu i te haere atu e ani i te tauturu o ta tatou e titau ra i te mau matahiapo, eiaha atoa râ tatou e onoono noa ˈtu ia ratou ma te faufaa ore. Teie râ, e imi tatou i te mau ravea atoa no te haamama mai i te hopoia o teie mau tiai mamoe rave ohipa, e rave rahi hoi i rotopu ia ratou teie e amo nei i te mau hopoia utuafare taa ê atu i ta ratou mau hopoia i roto i te amuiraa.
7. Na roto i teihea mau ravea e nehenehe ai tatou e faatura ˈtu i te feia ruhiruhia?
7 E tia atoa ia tatou ia faatura i te feia ruhiruhia. Te na ô ra te hoê faaueraa papu maitai i roto i te Ture a Mose e: “E tia oe i nia i mua i te aro o te upoo teatea, e faatura oe i te taata tahito; e e mǎtaˈu hoi oe i to Atua: o vau o Iehova.” (Levitiko 19:32) Nafea ia faaite i teie huru faatura? E tia i te mau taurearea ia tauturu atu ia ratou na roto i te haereraa i te fare toa aore ra te raveraa i te tahi atu mau ohipa. E ara te mau matahiapo ahiri e te titau ra te tahi feia ruhiruhia i te tauturu no te haere mai i te mau putuputuraa. I te mau tairururaa, e haapao te feia apî e te itoito maitai ia ore ratou ia turairai atu i te feia ruhiruhia e haere mǎrû noa ra no te tamata i te faaô oioi noa ia ratou, e faaoromai râ ratou mai te peu e mea taere rii te hoê taata paari no te haere atu e parahi aore ra e tamaa.
8. Nafea tatou ia faatura ˈtu i te tahi atu pǔpǔ te tia ia tatou ia haapao i faahitihia i roto i te Bibilia?
8 Te faahiti ra te papai salamo i te tahi atu pǔpǔ taata te tia ia faaturahia: “E ao to tei haapao mai i te taata rii aroha ra.” (Salamo 41:1) Mea ohie roa paha ia faatura ˈtu i te feia teitei aore ra te feia moni, eaha râ no te feia haehaa aore ra te feia veve? Te faaite ra te taata papai bibilia ra o Iakobo e ua riro te faaiteraa i te hoê â faatura i nia i teie mau taata ei tamataraa i to tatou parau-tia e to tatou here kerisetiano. Maitai e e manuïa tatou i teie tamataraa na roto i te haapao-maite-raa ˈtu i te mau taata atoa noa ˈtu eaha to ratou huru.—Philipi 2:3, 4; Iakobo 2:2-4, 8, 9.
‘A tamau noa i te faaite i te aroha’
9, 10. No te aha te mau kerisetiano e titauhia ˈi ia faaite i te aroha, e nafea ia faaite i teie huru o te maitai?
9 Te itehia ra te tahi atu huru maitai i roto i te tahi mau parabole a Iesu. I roto i te hoê parabole, ua faatia o Iesu i te aamu o te hoê taata Samaria o tei ite i te hoê taata tei eiâhia, tei tupaihia, e tei vaiiho-noa-hia i nia i te purumu. Ua haere mai te hoê ati Levi e te hoê tahuˈa na pihai iho i te taata i pepe ra, aita râ raua i tauturu atu ia ˈna. Area te taata Samaria ra, ua tapea o ˈna e ua tauturu atura oia ia ˈna, ma te rave hau atu â i tei titauhia. Mea pinepine teie aamu i te parauhia te parabole o te taata Samaria maitai ra. Eaha te huru maitai ta teie taata Samaria i faaite? O te aroha ïa. I to Iesu aniraa ˈtu i te taata e faaroo maira ia ˈna ia faaite mai e o vai tei riro ei taata-tupu no te taata i pepe ra, ua horoahia mai te pahonoraa tano oia hoi: “O tei aroha ia ˈna ra.”—Luka 10:37.
10 Te pee nei te mau kerisetiano aroha i te hiˈoraa o Iehova, ta Mose i faataa ˈtu i mua i te mau ati Iseraela e: “E ore hoi oia e haamoe i te faufaa ta ˈna i tatumu maite ma te tǎpǔ i to oe ra hui metua; e Atua aroha noa hoi to oe ra Atua o Iehova.” (Deuteronomi 4:31) Ua faaite o Iesu e nafea te aroha o te Atua ia ohipa mai i nia ia tatou: “E aroha atoa hoi outou mai to outou Metua e aroha maira.” (Luka 6:36) Nafea tatou ia faaite i te aroha? Mai ta te parabole a Iesu e faaite maira, hoê ravea, o te vai-ineine-raa ïa i te tauturu i to tatou taata-tupu, noa ˈtu e e roohia tatou i te tahi fifi aore ra i te tahi ohipa au ore. Eita te hoê taata maitai e tapo i to ˈna mata i mua i te mauiui o to ˈna taeae ahiri e e nehenehe ta ˈna e rave i te tahi ohipa no te tauturu ia ˈna.—Iakobo 2:15, 16.
11, 12. Ia au i te parabole a Iesu no nia i te mau tavini, eaha ta te aroha e titau ra, e mea nafea tatou e faaite ai i te reira i teie mahana?
11 Te faaite ra te tahi atu parabole a Iesu e e titau atoa te maitai î i te aroha e ia ineine noa tatou i te faaore i te hapa a vetahi ê. Ua faatia oia i te aamu o te hoê tavini o tei tarahu i to ˈna fatu hoê ahuru tausani taleni. I te mea e eita ta ˈna e nehenehe e aufau i ta ˈna tarahu, ua taparu atura te tavini ia arohahia mai o ˈna, e ua faaore to ˈna fatu ma te hamani maitai i teie tarahu rahi e 60 000 000 denari. Teie râ, ua haere atura teie tavini e farerei i te tahi atu tavini o tei tarahu mai ia ˈna hoê noa hanere denari. Ua haru atura te tavini aroha ore tei faaorehia hoi ta ˈna tarahu, i te tavini amutarahu e ua tuu atura ia ˈna i roto i te fare tapearaa e ia pee roa ta ˈna tarahu. Oia mau, e ere roa ˈtu te tavini aroha ore i te taata maitai, e i to te fatu faarooraa i te ohipa i tupu, ua faautua ˈtura oia ia ˈna.—Mataio 18:23-35.
12 Hoê â to tatou huru e to te tavini i faaorehia ra ta ˈna tarahu. I nia i te niu o te tusia o Iesu, ua faaore mai Iehova i ta tatou tarahu rahi o te hara. No reira, mea titauhia e ia ineine atoa tatou i te faaore i te hapa a vetahi ê. Ua parau o Iesu e e tia ia tatou ia faaore i te hapa “ia hitu râ ahuru i te hituraa,” oia hoi ma te otia ore. (Mataio 5:7; 6:12, 14, 15; 18:21, 22) Inaha, eita te hoê kerisetiano aroha e inoino noa. Eita o ˈna e hiˈo ino aore ra e patoi i te paraparau atu i te hoê hoa kerisetiano no te mea te riri noa ra o ˈna. E ere teie huru aroha ore i te tapao no te maitai kerisetiano.
Te horoa maitai e te farii maitai
13. Eaha ˈtu â ta te maitai e titau ra?
13 E ite-atoa-hia te maitai na roto i te horoa maitai e te farii maitai. I te hoê taime, ua haere maira te hoê taata apî e ani i te tahi aˈoraa ia Iesu. Ua parau atura o ˈna: “E te Orometua maitai ra, eaha ta ˈu ohipa maitai e rave e noaa ˈi te ora mure ore ia ˈu?” Ua pahono atura Iesu e e tia ia ˈna ia tamau noa i te haapao i te mau faaueraa a te Atua. Oia mau, ua riro te auraroraa i te mau faaueraa a Iehova ei tuhaa no te maitai. Ua manaˈo taua taata ra e ua tutava ê na oia i te rave i teie ohipa. Inaha, i mua i te aro o to ˈna mau taata tapiri, ua riro ê na oia ei taata maitai, teie râ, i to ˈna hiˈoraa, mai te huru ra e te erehia ra o ˈna i te tahi mea. Ua na ô atura o Iesu: “Ia hinaaro oe e ia maitai roa, a tii a hoo i ta oe atoa ra, a hopoi atu ai na te taata rii, e e taoˈa ta oe i te ao i reira a haere mai ai a pee mai ia ˈu.” (Mataio 19:16-22) Ua haere ê atura taua taata apî ra ma te oto. E taoˈa rahi hoi ta ˈna. Ahiri e ua pee oia i te aˈoraa a Iesu, e faaite ïa oia e e ere o ˈna i te taata nounou taoˈa. E rave ïa oia i te hoê ohipa maitai i te pae no te horoa maitai haavare ore.
14. Eaha te aˈoraa faahiahia ta Iehova e ta Iesu i horoa mai no nia i te horoa maitai?
14 Ua faaue Iehova i te mau ati Iseraela ia riro ei feia horoa maitai. Ei hiˈoraa, te taio nei tatou e: “E horoa mau atura oe i te taoˈa na [to oe taata-tupu veve ra], e eiaha to aau e nounou ia horoa oe i te taoˈa no ˈna: no reira hoi e haamaitai mai ai to Atua ra o Iehova ia oe i ta oe mau ohipa atoa ra, e te mau mea atoa ta to oe rima e rave ra.” (Deuteronomi 15:10; Maseli 11:25) Ua faaitoito o Iesu Mesia iho i te manaˈo horoa maitai: “E horoa, e e noaa hoi ta outou; e î te faito, e neneihia, e ueuehia, e manii noa ˈtu, na te taata e ninii i roto i to outou ahu.” (Luka 6:38) Hau atu, ua riro o Iesu iho ei taata horoa maitai rahi. I te hoê taime, ua faafaaea rii o ˈna maa taime iti. Ua ite atura te nahoa taata e teihea roa o ˈna e ua haere maira ia ˈna ra. Ma te manaˈo horoa maitai, aita ˈtura o Iesu i tâuˈa faahou i to ˈna rohirohi e ua haapao atura o ˈna i te nahoa taata. I muri iho, ua faaite oia i te farii maitai rahi na roto i te faaamuraa i teie tiaa rahi taata.—Mareko 6:30-44.
15. Mea nafea to te mau pǐpǐ a Iesu vaiihoraa mai i te hoê hiˈoraa nehenehe mau i te pae no te faaiteraa i te horoa maitai?
15 Ma te auraro i te aˈoraa a Iehova e a Iesu, e rave rahi mau pǐpǐ a Iesu o tei faaite i te horoa maitai e te farii maitai. I te omuaraa o te amuiraa kerisetiano, e rave rahi mau taata tei haere mai e faatupu i te oroa Penetekose i te matahiti 33 ra, o tei faaroo i te pororaa a te mau aposetolo e o tei riro mai ei feia faaroo. Ua faaea mai ratou i muri aˈe i te oroa no te haapii hau atu â, tera râ, ua pau ta ratou maa. I reira, ua hoo atura te feia faaroo no taua vahi ra i ta ratou mau fenua e ua horoa ˈtura i te moni no te tauturu i to ratou mau taeae apî ia nehenehe ratou e haamau-papu-hia i roto i te faaroo. Auê ïa manaˈo horoa maitai faahiahia e!—Ohipa 4:32-35; a hiˈo atoa Ohipa 16:15; Roma 15:26.
16. A faahiti na i te tahi o te mau ravea e nehenehe ai tatou e faaite i te farii maitai e te horoa maitai i teie mahana.
16 I teie mahana, te ite-atoa-hia ra teie manaˈo horoa maitai e au i to te Mesia ra ia horoa te mau kerisetiano i te taime e te moni no ta ratou mau amuiraa e no te ohipa pororaa e ravehia ra na te ao nei. Mea papu maitai te reira ia tauturu anaˈe ratou i te mau taeae o tei roohia i te fifi na roto i te ati natura aore ra na roto i te tamaˈi. E ite-maitai-hia te reira ia aupuruhia te tiaau haaati i roto i to ˈna mau tere. Aore ra ia titau-manihini-hia te mau “otare,” te tamaroa aore ra te tamahine, ia apiti mai i roto i te mau taime faaanaanataeraa manaˈo aore ra te mau haapiiraa utuafare no nia i te Bibilia e te tahi atu mau utuafare kerisetiano, e tapao atoa te reira no te farii maitai, ei faaiteraa no te maitai kerisetiano.—Salamo 68:5.
Te faaiteraa i te parau mau
17. No te aha te faaiteraa i te parau mau e riro ai ei tamataraa i teie mahana?
17 I to Paulo faataaraa mai i te hotu o te maramarama, ua faatuati oia i te maitai e te parau-tia e te parau mau, e mea tano ia parau e ua riro atoa te faaiteraa i te parau mau ei huru no te maitai. Eita te feia maitatai e haavare. Teie râ, ua riro te faaiteraa i te parau mau ei tamataraa taa ê i teie mahana i reira ua uˈana roa te haavare. E rave rahi mau taata teie e haavare nei ia faaî ratou i te mau parau aufauraa tute. Te haavare nei te feia rave ohipa no nia i te ohipa o ta ratou e rave ra. Te haavare nei te mau taurearea haere haapiiraa i roto i ta ratou mau haapiiraa e ta ratou mau hiˈopoaraa. Te haavare nei te feia tapihoo tauihaa ia rave ratou i te mau faaauraa ohipa. Te haavare nei te mau tamarii no te ape i te faautuaraa. Na roto i ta ratou mau haavare, te vavahi nei te feia faaino i te roo o vetahi ê.
18. Eaha te huru o Iehova no nia i te feia haavare?
18 Mea faufau roa te haavare i mua i te aro o Iehova. I rotopu i ‘na mea e hitu’ mea riri roa na ˈna, te vai ra “te arero haavare” e “te ite haavare, e parau i te parau haavare ra.” (Maseli 6:16-19) Ua tapaohia “te feia haavare e hope roa ˈˈe” i rotopu i te feia mǎtaˈu noa, te taparahi taata, e te faaturi, aore roa to ratou e parahiraa i roto i te ao apî a te Atua. (Apokalupo 21:8) Hau atu, te parau maira te maseli e: “O tei haere ma te tia ra, te mǎtaˈu ra ïa ia Iehova; o tei haapiˈo râ i ta ˈna parau, ua vahavaha ïa ia ˈna.” (Maseli 14:2) E haerea piˈo to te taata haavare. E te haavahavaha ra te taata haavare ia Iehova. Auê ïa manaˈo riaria e! No reira, ia faaite noa na tatou i te parau mau e tia ˈi, noa ˈtu e e aˈohia mai tatou aore ra e erehia tatou i te pae no te moni. (Maseli 16:6; Ephesia 4:25) Te pee nei te feia e faaite ra i te parau mau ia Iehova, “te Atua parau mau.”—Salamo 31:5.
A faahotu i te maitai
19. I te tahi mau taime, eaha te itehia ra i roto i teie nei ao, o te Poiete hoi te tumu?
19 Tera noa hoi vetahi o te ‘mau huru’ o te maitai te tia i te hoê kerisetiano ia faahotu. Parau mau, te faaite nei te tahi mau taata no teie nei ao i te maitai i roto i te tahi faito. Ei hiˈoraa, e feia farii maitai vetahi, e te faaite nei te tahi pae i te aroha. Oia mau, te mea faahiahia roa i roto i te parabole o te taata Samaria maitai ra, oia hoi ua faahiti o Iesu i te parau no te hoê taata e ere i te ati Iuda o tei faaite i te aroha, area te mau matahiapo no te amuiraa ati Iuda ra, aita ïa ratou i na reira. No reira, o te Poiete o te taata ïa te tia ia haamauruuruhia ahiri e te itehia ra teie mau huru i roto i te natura o te tahi mau taata, i muri aˈe e ono tausani matahiti haerea tia ore.
20, 21. (a) No te aha te maitai kerisetiano e taa ê ai i te tahi atu huru maitai o ta tatou e ite i roto i te feia o teie nei ao? (b) Nafea te hoê kerisetiano ia faahotu i te maitai, e no te aha tatou e faaitoito ai i te na reira?
20 Inaha, no te mau kerisetiano, e ere noa te maitai i te tahi huru e vai ra i roto ia ratou aore ra aita. O te hoê râ maitai te tia ia ratou ia faahotu i roto i to ˈna mau tuhaa atoa, no te mea e tia ia ratou ia riro ei feia e pee ra i te hiˈoraa o te Atua. Nafea ïa ratou e manuïa ˈi? Te faaite ra te Bibilia e e nehenehe ta tatou e haapii i te maitai. Ua pure te papai salamo i te Atua i te na ôraa e: ‘E haapii mai oe i te maitai.’ Nafea? Te na ô faahou ra o ˈna e: “Te tiaturi nei hoi au i ta oe parau.” E ua parau faahou oia e: “E maitai to oe, e Iehova, e te hamani maitai: e haapii mai i ta oe ra mau ture.”—Salamo 119:66, 68.
21 Oia, ia haapii tatou e ia auraro tatou i te mau faaueraa a Iehova, e faahotu ïa tatou i te maitai. A haamanaˈo noa na e e hotu te maitai no te varua. Ia imi tatou i te varua o Iehova na roto i te pure, te amuiraa ˈtu i roto i to tatou mau taeae kerisetiano, e te haapiiraa i te Bibilia, e tauturuhia ïa tatou ia faahotu i teie huru. Hau atu, e mana puai mau to te maitai. E nehenehe atoa o ˈna e upootia i nia i te ino. (Roma 12:21) No reira, mea faufaa roa ia haamaitai tatou i te mau taata atoa, i to tatou mau taeae kerisetiano iho â râ. (Galatia 6:10) Ia na reira tatou, e taiohia ïa tatou i roto i te feia o te fanaˈo i ‘te hinuhinu, e te tura, e te hau’ o tei tǎpǔhia mai i ‘te taata e tamau maite i te parau maitai.’—Roma 2:6-11.
A pahono mai na
◻ Nafea tatou ia rave noa i te ohipa maitai ma te faatura i te feia mana toroa?
◻ O vai, i rotopu i te tahi atu mau taata, te tia ia tatou ia faatura ˈtu?
◻ Na roto i teihea mau ravea e itehia ˈi te aroha?
◻ Eaha te mau ohipa horoa maitai e te farii maitai o tei riro ei tapao no te mau kerisetiano i teie mahana?
◻ Nafea ia faahotu i te maitai?
[Hohoˈa i te api 28]
Ua riro te faaturaraa ˈtu ia vetahi ê ei tuhaa no te maitai
[Hohoˈa i te api 31]
Na nia i to ˈna tiaraa Orometua Rahi, aita o Iesu i faaherehere ia ˈna iho