Te haapao maitai — Eaha te hoo?
“I te feia e aroha ra [e tapea i to ratou haapao maitai], ua aroha atoa oe.” — SALAMO 18:25.
1, 2. a) Eaha te haapao maitai, e mea nafea to ˈna mau huru taa ê ia ohipa mai i nia i to tatou oraraa? b) No te aha e mea maitai e ia hiˈopoa tatou i te hiˈoraa faahiahia mau o Iehova?
HAAPAO maitai, hopoia, here e vai maoro, faaturaraa i ta ˈna mau titauraa, auraroraa. E tuatiraa to taua mau parau atoa ra. Teihea? E tano te reira i te mau tuhaa taa ê o te haapao maitai. Te haapao maitai, o te hoê ïa huru maitai auhia e te Atua, no roto mai i te hoê taairaa rotahi. Teie râ, mea iti roa to ˈna auraa no te mau taata o to tatou nei tau. Ma te ore e haapao, e rave rahi teie e taiva nei i to ratou hoa faaipoipo, e ore e rave nei i ta ratou hopoia no nia i te mau melo ruhiruhia o to ratou utuafare, aore ra aita e faaî ra i ta ratou mau titauraa i nia i to ratou paoti ohipa. E eaha te ohipa e tupu mai ia u anaˈe na haapao maitai e piti? Aita i maoro aˈenei, i te fenua Beretane, ua tihatihia te hoê taata haapao i te pae faufaa no te mea ua faaite oia i te parau mau no nia i te tereraa faufaa a ta ˈna taiete i te feia haapao tute.
2 Mea ohie roa ia paraparau no nia i te haapao maitai, e tia râ ia apitihia te haapao maitai mau i te mau ohipa aita roa e parau faaau tia ore i roto. No te mea e e feia hara tatou, e pinepine tatou i te ore e faaite i te haapao maitai. No reira mea maitai ïa e ia hiˈopoa tatou i te hiˈoraa o te hoê taata, eita roa to ˈna haapao maitai e nehenehe e faahapahia, oia hoi o te Atua ra o Iehova iho.
Te hohoˈa o te haapao maitai
3. Mea nafea to Iehova faaiteraa i te haapao maitai i te opuaraa ta ˈna i haamau i roto i te Genese 3:15?
3 A hara ˈi o Adamu, ua faaite tahaa o Iehova i ta ˈna opuaraa no te hoo faahou mai i te huitaata aitâ i fa mai. No to ˈna here i ta ˈna poieteraa taata oia i na reira ˈi (Ioane 3:16). I te taime mau ra, ua itehia e o Iesu Mesia, te huaai i tǎpǔhia tei tohuhia i roto i te Genese 3:15, te tusia taraehara, e eita e nehenehe e manaˈo e e taui Iehova i te opuaraa ta ˈna i haamau. Mai te peu e e farii tatou i te tusia a Iesu, eita to tatou faaroo e faaino ia tatou. — Roma 9:33.
4. Mea nafea to Iehova haapapuraa i to ˈna haapao maitai i nia ia Iesu, e eaha te faahopearaa?
4 Ua faaitoito rahi te haapao maitai ta Iehova i faaite ia Iesu, i taua Tamaiti ra i te tau a vai ai oia i nia i te fenua nei. Ua ite o Iesu e e tia ia ˈna ia faaruru i te pohe, e ua hinaaro mau oia e tapea i to ˈna haapao maitai i to ˈna Atua tae noa ˈtu i te hopea. Ua horoahia na ˈna i te hoê ite rahi aˈe no nia i to ˈna oraraa na mua oia i riro mai ai ei taata, i to ˈna bapetizoraa e i to ˈna faatavairaahia e te varua moˈa. I te po a hoohia ˈi oia, ua pure oia no te hoˈi i pihai iho ia Iehova, to ˈna Metua i te raˈi, e no te rave i ‘te hanahana i vai ia ˈna ra i pihai iho ia Iehova hou te ao i fa mai ai’. (Ioane 17:5.) E nehenehe anei te reira e tupu mai? Ia ore noa Iehova e vaiiho i ta ˈna Tamaiti haapao maitai i roto i te apoo no te ite i te tahuti. Teie râ, ua faatia faahou mai o Iehova ia ˈna mai te pohe mai no te pohe-ore-raa, ma te faatupu ma te haapao maitai i te parau tǎpǔ i faaitehia i roto i te Salamo 16:10: “E ore hoi oe e vaiiho i tau varua [ia ˈu] i hade.” — Ohipa 2:24-31; 13:35; Apokalupo 1:18.
5. Eaha te tahi atu â mau ohipa haapao maitai e tuea i te mau parau tǎpǔ ta Iehova i faahiti ia Iesu?
5 Oia atoa, i muri aˈe i to ˈna tia-faahou-raa, ua ite o Iesu e e nehenehe o ˈna e tiaturi i te faahitiraa a Iehova, oia hoi To ˈna ‘faariroraa i ta ˈna mau enemi ei taahiraa avae no ˈna’. (Salamo 110:1.) Ua tupu taua ohipa ra i te matahiti 1914 ra, i te hopearaa o to te “etene anotau”, a haamauhia ˈi te Basileia i nia i te raˈi. Ua haamata ihora te faatereraa a Iesu i tǎpǔhia i nia i to ˈna mau enemi na roto i te huriraahia ˈtu o Satani e ta ˈna mau demoni mai te raˈi mai. E tapae te reira i to ˈna faito teitei roa, ia tuu-anaˈe-hia ratou i roto i te abuso no te hoê tausani matahiti e ia haamou-anaˈe-hia “te mau arii o te ao nei, e ta ratou mau nuu”. — Luka 21:24; Apokalupo 12:7-12; 19:19; 20:1-3.
6. Eaha te tiaturiraa papu ta te Atua e pûpû maira na tatou, e mea nafea tatou e nehenehe ai e faaite e te haamauruuru nei tatou ia ˈna?
6 Ua parau te papai salamo e: “E tiai atu ia Iehova, a haapao maite ai i to ˈna eˈa, e na ˈna oe e faateitei ia noaa ia oe te fenua.” (Salamo 37:34). E nehenehe tatou e tiaturi e e tamau â Iehova i te tapea i ta ˈna parau, e tae roa i te hopea o teie ao ino, e faaora mai oia i te mau tane, te mau vahine e te mau tamarii e “haapao maite [ra] i to ˈna eˈa”. Na roto i te reo hebera tumu, te horoa nei taua parau ra i te manaˈo no te tavini ia Iehova ma te itoito e te haapao maitai. I teie nei râ, e ere atura ïa i te taime no te toaruaru aore ra no te faarue i te mau haamaitairaa i te pae o te taviniraa i horoahia mai na tatou. O te taime teie no te faaitoito ia tatou ma te haapao maitai i roto i te taviniraa i to tatou Atua e to ˈna Basileia (Isaia 35:3, 4). E nehenehe te mau hiˈoraa maitai e faaitoito ia tatou. E hiˈopoa anaˈe na i te tahi o taua mau hiˈoraa ra.
Te haapao maitai o te mau patereareha
7, 8. a) Eaha te mau ohipa ta Iehova i horoa ia Noa e i to ˈna utuafare? b) Mea nafea to te utuafare o Noa faaiteraa e e nehenehe oia e fanaˈo i te parururaa a te Atua i te diluvi rahi?
7 A opua ˈi Iehova e haamou i te totaiete taata ino na roto i te hoê diluvi, ua faatupu oia i te hoê faufaa e te patereareha ra o Noa, no te faaora i to ˈna utuafare e te ora i nia i te fenua nei (Genese 6:18). Ua mauruuru roa o Noa no te mea e paruruhia ratou e te Atua, e tia râ ia ˈna e i to ˈna utuafare ia haapapu e e nehenehe ratou e fanaˈo i te reira. Nafea? Ma te haapao i te faaueraa a Iehova. Na mua, ua tia ia ratou ia rave i te hoê ohipa rahi mau, oia hoi te paturaa i te araka. A hope ai te reira, ua tia ia Noa ia faaî i taua araka ra i te mau animala e te hoê faito maa navai maitai no te faaamu ia ratou no te hoê tau roa. E ere râ te reira anaˈe. I te roaraa o te taime faaineineraa, ua rave o Noa i te mau mea atoa ta ˈna i nehenehe i roto i te ohipa pororaa aita faaauraa, ma te faaara i to ˈna mau taata-tupu i te haavaraa a te Atua. — Genese pene 6 e te 7; Petero 2, 2:5.
8 Te parau maira te Bibilia e “ua na reira hoi Noa i te mau mea atoa ta te Atua i faaue mai ia ˈna ra, o ta ˈna ïa i rave maite”. (Genese 6:22; 7:5.) Ua faaite o Noa e to ˈna utuafare i to ratou haapao maitai ma te faatupu i ta ratou mau hopoia. Maoti to ratou manaˈo haapae, ua faahoona maitai ratou i to ratou taime. Area te ohipa, mea teimaha mau, e mea fifi roa te pororaa. I te mea e aita ratou i fanau i te tamarii na mua ˈˈe i te diluvi, ua nehenehe te mau tamaiti a Noa e ta ratou mau vahine e rave maite i te ohipa i horoahia na ratou e e faatere maitai i te reira. Ua haamou taua diluvi rahi ra i te ao ino o taua tau ra, e ua tano hoi te reira i te parau-tia. O Noa anaˈe, ta ˈna vahine, ta ˈna mau tamaiti e toru e ta ˈna mau hunoa vahine e toru o tei ora mai. E nehenehe tatou e oaoa i te mea e ua faaite ratou i te haapao maitai i te Atua e i ta ˈna mau faaueraa, no te mea no roto mai tatou paatoa ia Noa, na roto ia Sema, ia Hama e ia Iapheta. — Genese 5:32; Petero 1, 3:20.
9. a) Mea nafea to Iehova tamataraa i te haapao maitai o Aberahama? b) Mea nafea to Isaaka faaiteraa i to ˈna haapao maitai i roto i taua huru tupuraa ra?
9 No te mea e ua hinaaro o Aberahama e auraro ma te haapao maitai i te faaueraa a Iehova i faaineine ai oia i te pûpû ia Isaaka ei tusia. Auê hoi hiˈoraa nehenehe mau e! Teie râ, ua tapea o Iehova i to ˈna rima, ma te parau e: “Ua ite atura hoi au i teie nei, e e mǎtaˈu to oe i te Atua, o oe aore i pipiri i to tamaiti, i to tamaiti hoê roa ra, ia ˈu.” Mea maitai e ia feruri maite tatou i te mau mea i tupu na mua ˈˈe i taua faahitiraa ra. I roto i na mahana e toru to Aberahama haereraa i nia i te mouˈa ra o Moria, papu maitai e ua navai maitai to ˈna taime no te feruri e no te taui i to ˈna manaˈo. E eaha te nehenehe e parau no Isaaka, o tei hopoi i te vahie no te tusia e o tei vaiiho e ia taamuhia to ˈna rima e to ˈna avae? Aita oia i faaea i te faaite i te haapao maitai i to ˈna metua tane, o Aberahama, aita atoa i patoi atu i te tiaraa tei tia ia ˈna ia hauti, noa ˈtu e, e au ra e e pohe oia no to ˈna haapao maitai. — Genese 22:1-18; Hebera 11:17.
Te haapao maitai kerisetiano
10, 11. Eaha te hiˈoraa i te pae o te haapao maitai ta te mau kerisetiano matamua i horoa mai?
10 I te mau taime atoa, ua faaite o Iehova i te hoê haapao maitai o te nehenehe e tiaturihia. Teie nei râ, te faahiti nei te aposetolo Paulo i teie aˈoraa i te mau kerisetiano e: “Ei pee outou i te Atua.” (Ephesia 5:1, 2). Mai tei ravehia e te mau patereareha, e na reira atoa te mau kerisetiano. Ua horoa mai te mau kerisetiano matamua i te hiˈoraa no nia i te faaohiparaa ma te haapao maitai i te haamoriraa mau. O ta te hiˈoraa ïa i mua nei e faaite ra:
11 Mai te huru ra e ua faatura hohonu te emepera roma ra o Constance I, metua tane o te emepera ra o Constantin, i te mau pǐpǐ a Iesu Mesia. No te tamata i te haapao maitai o te mau kerisetiano tei faaohipahia i roto i to ˈna fare, ua parau aˈera oia ia ratou i te hoê mahana e e nehenehe ratou e tamau â i te rave i te ohipa no ˈna, ia farii noa ratou i te pûpû atu i te mau tusia na te mau idolo. Ua faaara oia ia ratou e e faahoˈi o ˈna ia ratou e e faautua atoa o ˈna ia ratou, mai te peu e e patoi ratou. Na roto i taua raveraa ohie roa, ua hinaaro o Constance e ite e o vai te feia o te ore roa ˈtu e taiva. Te feia o tei faaite i to ratou haapao maitai i te Atua e i ta ˈna mau faaueraa tumu, ua tamau â ïa ratou i te rave i te ohipa na te emepera, e ua riro atoa mai vetahi ei feia toroa aˈo tiaturihia. Area te feia o tei taiva i te faaueraa a te Atua, ua faahoˈihia ïa ratou ma te haama mau.
12. Mea nafea te mau tiaau kerisetiano e faaite ai i to ratou haapao maitai, e no te aha e mea faufaa no te oraora-maitai-raa o te amuiraa?
12 Noa ˈtu e e tia i te mau kerisetiano atoa ia faaite i te haapao maitai, i roto i te Tito 1:8, ua faahiti-taa-ê-hia te reira i roto i te tabula o te mau huru maitai tei tia i te hoê tane ia faaohipa no te riro mai ei tiaau kerisetiano. Ia au i te parau a William Barclay, te auraa o te parau ra hosios, te parau heleni i hurihia i roto i teie irava na roto i te parau ra ‘haapao maitai’, oia hoi “te taata ïa e faatura ra i te mau ture mure ore o tei na nia e o te na nia noâ i te mau ture atoa a te taata”. Mea faufaa mau â e ia auraro te mau matahiapo ma te haapao maitai i te mau ture a te Atua. E tauturu to ratou hiˈoraa maitai i te amuiraa ia haere i mua e ia itoito maitai no te patoi atu i te mau tamataraa atoa e i te mau faahemaraa atoa o te nehenehe e faaino i to ˈna mau melo, ia rave-amui-hia ratou aore ra ia rave-tataitahi-hia ratou (Petero 1, 5:3). E hopoia teimaha atura ïa ta te mau matahiapo i nia i te nǎnǎ ia ore roa ˈtu ratou ia ofati i to ratou haapao maitai ia Iehova, no te mea te faaitoitohia ra te amuiraa ia “pee atu i to ratou faaroo”. — Hebera 13:7.
Te haapao maitai — Tae roa i teihea faito?
13. Eaha ta te mau parau tuiroo, oia hoi “E nehenehe te mau taata atoa e petahia”, e faaite ra, e eaha te mau hiˈoraa e nehenehe e manaˈohia e te haapapu ra i te reira?
13 “E nehenehe te mau taata atoa e petahia.” Te faaite maitai ra taua mau parau tuiroo ra, i faahitihia e Sir Robert Walpole, tia hau matamua beretane i te XVIIIraa o te senekele, e i roto i te roaraa o te Aamu, mea pinepine te mau taata i te faarue i to ratou haapao maitai, ia peta-anaˈe-hia ratou i te moni. Ei hiˈoraa, e hiˈopoa na tatou i te huru tupuraa no Henry Phillips ta William Tyndale, taata huri i te Bibilia, i farii ma te hape hoi mai te hoê hoa haapao maitai. I te matahiti 1535, ua hoo o Phillips ia Tyndale na to ˈna mau enemi, no reira ˈtura ua tuu-oioi-hia ˈtura oia i roto i te fare tapearaa, e i muri iho, ua haapohehia oia. Ia au i te hoê taata tuatapapa aamu, taua Phillips ra, tei petahia paha e te arii aore ra e te mau katolika beretane, “ua aufau-maitai-hia [oia] no ta ˈna ohipa mai ta Iuda ra”. Oia mau, te faahiti ra taua taata tuatapapa aamu ra i te parau no Iuda Isakariota, o tei farii ia hoo atu ia Iesu no te moni ra e 30 moni ario. Eiaha râ tatou e faaoti e te “hoo” i te haapao maitai o te hoê taata, mea na roto noa ïa i te moni.
14. Mea nafea to te haapao maitai o Iosepha ia Iehova i te tamataraahia, e eaha te faahopearaa?
14 Ua tamatahia te haapao maitai o Iosepha, a hinaaro ai te vahine a Potiphara e “taoto [ia ˈna]”. Eaha ïa ta ˈna i rave? Ma te taa papu hoi i te mau faaueraa tumu tei ô mai, ua horo ê atura o Iosepha i rapae i te fare, ma te hinaaro mau ia ore “ia rave i tena na ino rahi, a hara ˈi i te Atua”. Aita te hinaaro i te hoê taime faaanaanataeraa i upootia i nia i te haapao maitai o Iosepha i to ˈna Atua ra o Iehova. — Genese 39:7-9.
15. Mea nafea to Abasaloma taivaraa, e eaha te faahopearaa?
15 Tei mua ïa tatou e rave rahi mau ati: e nehenehe te nounou i te tiaraa e faaino i te haapao maitai. Na te reira i turai ia Abasaloma ia orure i to ˈna metua tane, te arii ra o Davida. Ma te faaohipa i te mau opuaraa iino e te raveraa huna, ua imi oia i te ravea e ia turu mai te nunaa ia ˈna. I te pae hopea, ua faaineine oia i te hoê nuu no te aro atu i te mau taata e turu ra ma te haapao maitai i to ˈna metua tane. Ua hope to ˈna taivaraa i to ˈna metua tane i te taime noa oia i haapohehia ˈi e Ioaba. Auê ïa hoo tei tia ia horoa no te tamataraa i te faatahuri i te faanahonahora teotaratia! — Samuela 2, 15:1-12; 18:6-17.
Te haapao maitai o te ore e nehenehe e aufauhia
16. Eaha ta te Korinetia 2, 11:3 e faaite ra no nia i te mau hinaaro o Satani?
16 Oia mau, te faahua parau nei o Satani e e nehenehe te taata atoa e petahia, e mea tano hoi taua parau ra no Abasaloma. Teie nei râ, aita te reira i tano no Iosepha, e aita roa ˈtu te reira i tano noa ˈˈe no te mau taata i haamori ia Iehova ma te haapao maitai. Noa ˈtu â râ, e tamata o Satani na roto i te mau ravea atoa ia rave e ia faarue tatou i to tatou haapao maitai i to tatou Poiete. No reira te aposetolo Paulo i faaite ai i to ˈna mǎtaˈu e, “mai ta te ophi i haavare atu ia Eva i to ˈna ra paari”, ia faainohia to tatou feruriraa, e e aratai hoi te reira ia tatou ia ore e tavini faahou ia Iehova ma te haapao maitai e ia faaea tatou i te haamori ia ˈna. — Korinetia 2, 11:3.
17. Ua taui vetahi i ta ratou mau haamaitairaa no te taviniraa aita e nehenehe e faaauhia, i te aha?
17 E tia ia tatou ia uiui i teie uiraa: ‘Te vai ra anei te hoê ohipa ta ˈu e farii no te faarue i ta ˈu haamaitairaa ia haamori i to ˈu Poiete ma te haapao maitai?’ Tera râ, e tia ia parau e, ma te ore e pee ia Iosepha, ua faarue te tahi mau tavini tei pûpû ia ratou no Iehova i ta ratou haamaitairaa, ma te farii i te mea iti roa. Ua taui atoa te tahi mau matahiapo i te mau haamaitairaa aita e faaauraa e vai ra ia ratou i roto i te taviniraa moˈa, no te fanaˈo no te hoê taime noa i te mau peu viivii i te pae tino. E mau matahiapo aore ra eita, ua ofati e rave rahi taata o tei na reira, i te autahoêraa o to ratou utuafare, ua erehia ia ratou i te here e te faatura o te amuiraa, e oia atoa i te haamaitairaa a Iehova — o O ˈna hoi o te nehenehe e horoa mai na tatou i te puai no te tapea i te haapao maitai e no te patoi i te mau tamataraa atoa no ǒ mai ia Satani ra. — Isaia 12:2; Philipi 4:13.
18. No te aha e mea faufaa ia faaroo i te faaararaa i horoahia i roto i te Timoteo 1, 6:9, 10?
18 Vetahi pae râ, no to ratou hinaaro rahi e upootia i roto i te ao nei, “ua patiatia pupu roa ia ratou iho i te oto e rave rahi” noa ˈtu te mau faaararaa a te bibilia o te ore e nehenehe e faaauhia (Timoteo 1, 6:9, 10). I to ˈna na reiraraa, ua roohia o Dema, te hoê kerisetiano tei faahitihia e Paulo, i te hoê ereraa no te hoê taime aore ra no a muri atu (Timoteo 2, 4:10). Eita roa ˈtu tatou e nehenehe e faarue i to tatou haapao maitai ia Iehova, ma te ore e amo i te tahi mau faahopearaa iino. “Eiaha e vare, e ore te Atua e noaa i te haavare, o ta te taata e ueue ra, o ta ˈna â ïa e ooti mai.” — Galatia 6:7.
19, 20. a) A faahiti na i te tahi mau ati e roohia i nia i te taata e mataitai rahi nei i te afata teata. b) Eaha te hiˈoraa ta te hoê utuafare o te mau Ite e horoa ra no nia i taua ohipa ra?
19 I te tahi taime, te ohipa e pûpûhia no te taui i te haapao maitai, mea na roto ïa i te hoê huru haavarevare. Ei hiˈoraa, ia au i te hoê tabula no te fenua Marite mai, te faaohipa nei e rave rahi utuafare fatata te afaraa o te taime ratou e faaea ˈi i te fare (ma te ore e taio i te taime ratou e taoto ai) i mua i te afata teata, teie e huti rahi nei i te feruriraa o te mau taurearea iho â râ. Mai te peu e e faaamu te hoê kerisetiano i to ˈna feruriraa na roto iho â râ i te mataitairaa i te afata teata, o te tuu nei i te tapao i nia i te melo taatiraa e i nia i te haavîraa uˈana, e nehenehe atura ïa oia e faarue oioi i te mau faaueraa tumu kerisetiano. E ohie roa te reira i te turai ia ˈna ia ore e tavini faahou ia Iehova ma te haapao maitai, e ia faaatea ˈtu ia ˈna. E faaino mau â taua amuimuiraa ino ra i ta tatou mau peu maitatai (Korinetia 1, 15:33). Eiaha ia moehia ia tatou e te faaitoito nei te mau Papai ia tatou ia faaherehere i te taime no te haapii i te Parau a Iehova e no te feruri maite i nia i te reira. E nehenehe anei e faaauhia i te hoê taime rahi e faaohipahia no te faaanaanatae i mua i te afata teata, i te taime e nehenehe e haafaufaahia ia noaa mai te hoê ite o te aratai i te hoê taata haamori ia Iehova ma te haapao maitai i te ora mure ore? E tia i te rahiraa o te feia e ite ra i te parau mau i teie mahana, ia faatupu i te mau tauiraa rahi i roto i ta ratou huru feruriraa no nia i te reira. — Timoteo 1, 4:15, 16; Timoteo 2, 2:15.
20 Tei roto o Takashi i te ohipa tapi hooraa tauihaa, e taata tapone oia o te ora ra i te fenua Beretane. I mutaa ihora, e faaea oia i te mau po atoa aore ra fatata roa, e toru aore ra e maha hora no te mataitai i te afata teata e to ˈna utuafare. I muri aˈe raua ta ˈna vahine i te bapetizoraahia, a toru matahiti i teie nei, ua opua aˈera oia e tuu i te haapiiraa o te Bibilia tataitahi e te utuafare i te parahiraa matamua. Ma te faaiti i nia i te 15 noa aore ra i te 30 minuti i te mahana, e faito au noa, i te taime o ˈna e mataitai ai i te afata teata, ua horoa aˈera oia i te hiˈoraa maitai i to ˈna utuafare. Noa ˈtu e e tia ia Takashi ia rave e piti Bibilia no te haapii, hoê na roto i te reo beretane e te tahi na roto i te reo tapone, ua haere oioi atura oia i mua i te pae varua e, i teie nei, ua riro oia ei tavini tauturu i roto i te hoê amuiraa reo beretane. Ua riro ta ˈna vahine ei pionie tauturu. “No te aupuru i te maitai i te pae varua o ta mâua na tamaroa e piti, ta ˈna ïa e parau ra, e haapao maitai vau i te mau mahana atoa i te mea o ta ta ˈu vahine e o ta ˈu iho e faatia ra ia raua ia mataitai i roto i te afata teata.” E horoa mai taua huru aˈoraa ia ˈna iho i te mau haamaitairaa.
21. Eaha ta tatou e ite ra no nia i te mau huru raveraa a Satani, e mea nafea tatou e nehenehe ai e paruru ia tatou?
21 E nehenehe tatou e papu maitai e: Ua ite o Satani i to tatou mau paruparu, peneiaˈe hau aˈe ia tatou iho. Ua ineine o ˈna i te rave i te mau mea atoa no te faaere ia tatou aore ra no te haaparuparu i to tatou haapao maitai ia Iehova (hiˈo Mataio 4:8, 9). Nafea ïa tatou e nehenehe ai e paruru ia tatou? Ma te ore roa ˈtu e haamoe e ua pûpû tatou ia tatou iho no te Atua e ia oaoa noa tatou i te faarahi i ta tatou mau ravea atoa no te tavini i te mau hinaaro i te pae varua o te tahi pae. Na roto i to tatou tiaraa tavini haapao maitai a Iehova, e tia ia tatou ia vai itoito noa i roto i ta ˈna taviniraa e ia vaiiho ia tatou ia arataihia e ta ˈna Parau moˈa i te mau taime atoa. E haapaari taua huru ra i ta tatou opuaraa ia ore roa ˈtu e faarue i to tatou haapao maitai i te Atua, noa ˈtu eaha ta Satani e pûpû maira i mua ia tatou. — Salamo 119:14-16.
Eaha ta outou e pahono atu?
◻ Mea nafea to Iehova e to Iesu faaiteraa i te haapao maitai?
◻ Eaha te tahi atu â mau hiˈoraa no nia i te haapao maitai ta te Bibilia e faahiti ra?
◻ Eaha ta Satani e nehenehe e pûpû mai na tatou aore ra e tamata i te rave?
◻ Mea nafea tatou e nehenehe ai e faaitoito ia tatou ia vai noa tatou ei feia haamori ia Iehova ma te haapao maitai?