O te parau a Iehova te mea puai aˈe!
“I te rahi hoi i te tupu te parau a te Fatu [Iehova] ra.” — OHIPA 19:20.
1. Eaha ta teie haapiiraa o te buka a te mau Ohipa a te mau Aposetolo e tuatapapa mai?
UA TATARA o Iehova i te hoê uputa e aratai i te taviniraa. Na Paulo iho â râ, te “aposetolo a te Etene”, e rave i te ohipa pionie i roto i taua taviniraa ra (Roma 11:13). Oia mau, ma te tamau maite i roto i te haapiiraa i te mau Ohipa a te mau Aposetolo, e apee tatou ia ˈna i roto i te mau tere mitionare anaanatae mau. — Ohipa 16:6 e tae atu i te 19:41.
2. a) I roto i te area matahiti 50 e 56, eaha te mau rata ta te aposetolo Paulo i papai i raro aˈe i te faauruaraa a te Atua? b) No te mea e te haamaitai ra te Atua i te taviniraa a Paulo e a te tahi atu mau kerisetiano, eaha te ohipa i tupu?
2 Ua papai atoa o Paulo i te mau papairaa i raro aˈe i te faauruaraa a te Atua. I roto te mau area matahiti 50 e 56, ua papai aˈera oia mai Korinetia mai, e piti rata i to Tesalonia, mai Korinetia atoa aore ra mai Anetiohia no Suria, te hoê rata i to Galatia, mai Ephesia, te hoê rata matamua i to Korinetia, e mai Makedonia, te piti o te rata i to Korinetia, e mai Korinetia, te hoê rata i to Roma. E no te mea hoi e te haamaitai ra o Iehova i te taviniraa a Paulo e ta te tahi atu mau kerisetiano, ‘ma te puai mau, tupu atura te parau a Iehova i te rahi e o te reira te mea puai aˈe’. — Ohipa 19:20.
Mai Asia mai e tae atu i Europa
3. Eaha te hiˈoraa maitai roa ta Paulo e ta to ˈna mau hoa i horoa no nia i te vaiihoraa e ia arataihia ratou e te varua moˈa?
3 Ua horoa ihora o Paulo e to ˈna mau hoa i te hoê hiˈoraa maitai roa no nia i te fariiraa i te aratairaa a te varua moˈa (16:6-10). Peneiaˈe na roto i te ravea a te mau faaiteraa faaroohia, te mau moemoeâ aore ra te mau orama, ua opani aˈera te varua ia ratou ia poro i roto i te mataeinaa no Asia e i roto i te tuhaa oire no Bitunia, mau tuhaa fenua i reira te parau apî maitai e ô atu ai i muri aˈe (Ohipa 18:18-21; Petero 1, 1:1, 2). No te aha te varua i opani ai i te mau mitionare ia haere oioi atu i reira? Mea iti roa hoi te mau rave ohipa, e ua aratai aˈera te varua ia ratou i roto i te mau tuhaa fenua hotu roa ˈˈe, i Europa. Mai te peu e, i to tatou mau mahana, ua opanihia te hoê tuhaa fenua, e poro ïa te mau Ite no Iehova i te tahi atu vahi, ma te papu maitai e e aratai te varua o te Atua ia ratou i te mau “mamoe” ra.
4. I muri aˈe i to Paulo iteraa na roto i te hoê orama i te hoê taata Makedonia i te piiraa i te tauturu, eaha ta ˈna i rave, o ˈna e to ˈna mau hoa?
4 Ua ‘tae atura’ o Paulo e to ˈna mau hoa i pihai iho ia Misia, mataeinaa no Asie Mineure i reira to ratou opuaraa i te rave i ta ratou taviniraa mitionare. I teie nei râ, na roto i te hoê orama, ua ite aˈera o Paulo i te hoê taata no Makedonia o tei pii ra i te tauturu. Ma te oioi, haere ihora ïa te mau mitionare i Makedonia, i roto i te fenua tuati i te miti o te mau Balkans. Hoê atoa huru, i to tatou nei tau, te aratai nei te varua e rave rahi mau Ite ia tavini ratou ia Iehova i te mau vahi e hinaaro-rahi-hia ˈi te feia poro o te Basileia.
5. a) No te aha e nehenehe ai e parau e ua riro te parau a Iehova i te mea puai aˈe i Philipi? b) I to tatou nei tau, i roto i teihea tuhaa e rave rahi mau Ite e pee nei ia Ludia?
5 Ua riro te parau a Iehova i te mea puai aˈe i Makedonia (16:11-15). I Philipi, tuhaa fenua tei orahia iho â râ e te feia no Roma, mai te huru ra ïa e mea iti roa te mau ati Iuda e aita e sunago. Ua haere ihora ïa te mau mitionare i “te hoê vahi haapaohia ei pureraa” i te pae pape, i rapaeau mai i te oire. I reira, ua farerei ihora ratou ia Ludia, peneiaˈe e vahine peroseluto ati iuda no Tuatira mai, oire no Asie Mineure tuiroo no ta ˈna hamaniraa ahu peni. E hoo na o Ludia i te ahu ute aore ra te mau ahu tametera e te mau aahu penihia e te peni uraura. I to ˈna bapetizoraahia, e to ˈna utuafare atoa, ua farii maitai ihora oia i te mau mitionare ma te ieie e no reira o Luka i papai e: “Riro atura matou ia ˈna.” Mea au roa na tatou taua mau huru tuahine ra i to tatou mau mahana.
Ua riro te tiai o te fare tapearaa ei taata faaroo
6. I Philipi, eaha te ohipa i faaterehia e te mau demoni i aratai mai i te haruraahia o Paulo raua o Sila?
6 Mea papu e ua riri o Satani i te hiˈoraa i te tupuraa i te rahi i te pae varua i ravehia i Philipi, no te mea ua aratai te tahi mau ohipa i faaterehia e te mau demoni ia tuu ia Paulo raua o Sila i roto i te fare tapearaa (16:16-24). I te roaraa e rave rahi mahana, ua apeehia ratou e te hoê potii e “varua tairoiro” to ˈna (i te auraa mau, “te hoê varua o te ophi”). Ua rave paha taua demoni ra i te tiaraa o Apollon pythien, te manaˈohia ra e e atua tei haapohe i te ophi Puthôn. E taoˈa rahi tei noaa i to ˈna ra mau fatu i to teie potii faaohiparaa i te mana no te faaite i te mea e tupu mai i mua. Peneiaˈe ua faaite o ˈna i te feia faaapu afea râ e ueue ai i te huero, i te mau potii apî, afea râ e faaipoipo ai, e i te feia paheru auro, i hea râ e heru ai. Ua apee oia i te mau mitionare ma te tuutuu ore e tiaoro noa ˈi e: “E tavini anaˈe teie nei mau taata no te Atua teitei, o tei faaite mai ïa ia tatou i te eˈa ora.” Na te demoni i haaparaparau ia ˈna i teie mau parau ia manaˈohia e e mea faauruahia ta ˈna mau parau tohu e te Atua. Tera râ, aita to te mau demoni e tiaraa no te rave i te mau faaiteraa no nia ia Iehova e no nia i te mau faanahonahoraa ta ˈna i rave no te ora. I to Paulo rohirohiraa i taua onoonoraa ra, ua tiavaru aˈera oia i te demoni ma te iˈoa o Iesu. I to ratou iteraa e aita faahou ta ratou pu no te imiraa taoˈa, aratai atura te mau fatu o te tamahine ra ia Paulo raua o Sila i nia i te mahora hooraa, i reira raua i te tairiraahia e te raau (Korinetia 2, 11:25). I muri iho, hurihia ˈtura raua i roto i te fare tapearaa e haamauhia ihora to raua avae i roto i te raau.16:24 E tamauhia na taua mau taoˈa ra, i te tahi taime, ia faahamaa roa i te avae o te taata mau auri, e mea mauiui roa hoi te reira.
7. Ua roaa te mau haamaitairaa ia vai, a tuuhia ˈi o Paulo raua o Sila i roto i te fare tapearaa i Philipi? Mea nafea?
7 Na roto i taua tapearaa ra, ua roaa ihora te mau haamaitairaa i te taata tiai fare tapearaa e i to ˈna utuafare fetii (16:25-40). I te area hora ahuru ma piti i te po, ua pure aˈera e ua haamaitai ihora o Paulo raua o Sila, i te Atua na roto i te mau himene, ma te papu e tei pihai iho oia ia raua (Salamo 2:8). E, aore aˈera i mahia, faahamǎmǎ ihora te hoê aueueraa fenua i te mau uputa e matara aˈera te mau fifi auri e mahiti ihora to ratou mau haamauraa mai nia mai i te mau rao fare aore ra mai te mau papai. Ma te mǎtaˈu e e haapohehia o ˈna no te mea ua horo ta ˈna feia mau auri, ua haamata ihora te taata tiai e haapohe ia ˈna a tuô mai ai o Paulo e: “Eiaha e totova ia oe iho; teie anaˈe hoi matou.” Ma te aratai ia Paulo raua o Sila i rapaeau, ua ani ihora te taata tiai ia raua eaha tei tia ia ˈna ia rave ia faaorahia oia. “E faaroo i te Fatu ia Iesu Mesia”, ta raua ïa i pahono atu ia ˈna. I muri aˈe i to ratou faarooraa i te parau a Iehova, “e bapetizohia ihora oia e to ˈna atoa ra i reira ra”. Auê ïa tumu no te oaoa e!
8. Eaha ta te feia haava no Philipi i rave, e eaha te nehenehe e tiai ia faaite ratou i mua i te huiraatira e ua hape ratou?
8 I te mahana i muri aˈe, tono atura te feia haava i te taata no te parau e ia tuuhia ˈtu o Paulo raua o Sila. Ua parau atura râ o Paulo e: ‘Ua papai faaite noa ratou ia mâua, aore hoi i faahapahia, mâua te taata no Roma, e ua huri ia mâua i roto i te tapearaa. E i teie nei, te hopara huna noa nei ratou ia mâua i rapae au? Eiaha roa ïa, o ratou ihora te tii hua mai e aratai ia mâua i rapae au!’ Ahiri te feia haava i faahepohia ia faaite i mua i te huiraatira e ua hape ratou, peneiaˈe i muri iho e feruri ratou hou a taparahi ai e a tuu ai i te tahi atu mau kerisetino i roto i te fare tapearaa. No te mea eita ta ratou e nehenehe e tiavaru i te feia no Roma, ua haere maira te feia haava e ani i te mau mitionare ia haere ê atu. Ua na reira râ raua i muri aˈe noa i to ratou faaitoitoraa i to ratou mau hoa i roto i te faaroo. I to tatou mau mahana, na te hoê anaanataeraa mai teie te huru e turai ra i te mau melo o te tino aratai e i te tahi atu mau tia e haere ra i roto i te mau amuiraa, ia haere e farerei i te mau tavini a te Atua i nia i te fenua atoa no te faaitoito ia ratou.
Ua riro te parau a Iehova i te mea puai aˈe i Tesalonia e i Berea
9. Na roto i teihea ravea, o tei faaohipa-noa-hia râ e te mau Ite no Iehova, to Paulo ‘faataaraa ˈtu e horoaraa ˈtu i te haapapuraa’ e e tia mau e ia mauiui te Mesia e ia tia faahou mai mai te pohe mai?
9 I muri iho, ua riro te parau a te Atua i te mea puai aˈe i Tesalonia, oire pu e tapearaa pahi rarahi i te pae miti no Makedonia (17:1-9). I reira ua tauaparau o Paulo e te mau ati Iuda, ‘ma te haamahorahora e ma te faaite papu’ e e tia mau e ia mauiui te Mesia e ia tia faahou mai mai te pohe mai. (No reira, ua faaau aˈera o Paulo i te mau parau tohu i te mau ohipa i faatupu i te reira, mai ta te mau Ite no Iehova e rave ra i to tatou mau mahana.) No reira, ua riro ihora ïa te tahi mau ati Iuda, e rave rahi peroseluto e vetahi atu, ei feia faaroo. No to ratou pohehae, ua putuputu aˈera te mau ati Iuda no te mea aita ratou i ite e teihea roa o Paulo raua o Sila, ua aratai maira ratou ia Iasona e i te tahi atu mau kerisetiano i mua i te feia haava o te oire e ua pari atura ia ratou i te orure hau, o te hoê ïa parau faaino haavare e faaohipa-noâ-hia ra i nia i te mau tavini a Iehova i to tatou nei tau. Ua tuuhia mai râ taua mau kerisetiano ra i muri aˈe i te aufauraahia i ‘te hoê tuhaa moni rahi’.
10. Eaha te tumu te mau ati Iuda no Berea i ‘imi ai’ i roto i te mau Papai?
10 Ua haere atura o Paulo raua o Sila i Berea (17:10-15). I roto i taua oire ra, ua ‘imi’ te mau ati Iuda i te parau i roto i te mau Papai, o ta te mau Ite no Iehova ïa e faaitoito ra i te mau taata ia rave i to tatou nei tau. Aita taua mau taata no Berea ra i feaa i te parau, ua rave râ ratou i te mau maimiraa ia noaa mai te haapapuraa e o Iesu iho â te Mesia. Eaha ïa te faahopearaa o te reira? E rave rahi mau ati Iuda e te tahi mau Heleni (peneiaˈe te tahi mau peroseluto) tei riro mai ei feia faaroo. A haere mai ai te mau ati Iuda no Tesalonia e tiarepu i te mau taata,17:13 ua aratai ihora te mau kerisetiano ia Paulo na tai, i reira vetahi mau melo o to ˈna pǔpǔ i te tomoraa ˈtu i nia i te pahi peneiaˈe no Pirée (tei piihia i teie nei Piraiévs), te tapaeraa pahi o Ateno.
Ua riro te parau a Iehova i te mea puai aˈe i Ateno
11. a) Eaha te faaiteraa ta Paulo i horoa ma te mǎtaˈu ore i Ateno, o vai râ tei mârô mai ia ˈna? b) Eaha ta vetahi ê i hinaaro e parau i to ratou faahitiraa e e “taata iti raveauru” o Paulo?
11 Ua horoa aˈera o Paulo i te faaiteraa i Ateno ma te mǎtaˈu ore (17:16-21). A parau ai oia no nia ia Iesu e no nia i te tia-faahou-raa, ua mârô maira te mau philosopho ia ˈna. Ua haapapu te tahi pae, te mau epikuro, i te manaˈo i nia i te mau mea e navenave ai ra; vetahi ê, te mau setoiko, i nia i te aˈoraa ia ˈna iho. “E nahea maira teie nei taata iti raveauru ia parau mai?” ta te tahi pae ïa i uiui. Ma te parauraa e e “taata iti raveauru” (i te auraa mau, “otioti”) o Paulo, ua horoa aˈera ratou i te manaˈo e e au o Paulo i te hoê manu e otioti ra, e e opere oia ma te tarani i te tahi mau tuhaa iti o te ite, e te erehia nei hoi oia i te paari. Ua parau ihora te tahi pae e: “E mea huru demoni ěê ta ˈna e parau haere nei.” E pariraa ino roa teie, te tumu ïa o Socrate i haapohehia ˈi. I muri noa ˈˈe, ua arataihia ˈtura o Paulo i te Areopago (aivi no Mars), i reira paha te Tiribuna teitei e haava ˈi i te hoê vahi mahora, i pihai iho i te Acropole.
12. a) Eaha te mau huru o te aravihi i te pae o te paraparauraa i faahohoˈa-maitai-hia i roto i te oreroraa parau ta Paulo i horoa i te Areopago? b) Eaha te mau manaˈo ta Paulo i faaite no nia i te Atua, e eaha te faahopearaa o te reira?
12 Te horoa ra te oreroraa parau ta Paulo i faahiti i te Areopago i te hoê hiˈoraa faahiahia roa o te hoê omuaraa parau faufaa roa, o te tatararaa tano e o te haaferuriraa papu maitai — mau huru o te aravihi i te pae o te paraparauraa i haapiihia i te Haapiiraa o te taviniraa teotaratia, haapiiraa e horoahia ra e te mau Ite no Iehova (17:22-34). Ua parau ihora o Paulo i to Ateno e e feia paieti aˈe ratou i te tahi pae. Ei hiˈoraa, ua pûpû atoa ratou i te hoê fata “Na te atua itea ore”, peneiaˈe no to ratou mǎtaˈu i te ore e haapao atu i te hoê atua! Ua faahiti aˈera o Paulo i te parau no nia i te Poiete, o tei “hamani i te taata i te mau fenua atoa nei i te toto o te taata hoê ra” e o tei “haapao i te tau i haapaohia i mutaa ihora, e te otia o to ratou ra parahiraa”, mai te tau a tiavaru ai oia i te feia no Kanaana, ei hiˈoraa (Genese 15:13-21; Daniela 2:21; 7:12). E nehenehe tatou e itea i taua Atua ra, no te mea “e tamarii atoa tatou na ˈna”, ta Paulo ïa i faaite, ma te faahiti i te parau no te poieteraahia te taata e Iehova e ma te faahiti i te mau rohipehe heleni ra o Aratos e o Cléanthe. No te mea e tamarii tatou na te Atua, ta Paulo i parau, eita e tia ia tatou ia manaˈo e e au te Poiete tia i te hoê idolo hamanihia e te hoê taata tia ore. Aita ˈtura te Atua i haapao i taua anotau ite ore ra, i teie nei râ, te aˈo mai nei oia i te taata atoa ia tatarahapa, no te mea ua haapao oia i te mahana e haavahia ˈi ratou e Tei haapaohia e ana. No te mea ua ‘faaite’ o Paulo ‘i te parau apî no nia ia Iesu’, ua ite ïa te feia e faaroo ra ia ˈna e te parau ra oia e o te Mesia taua Haava ra (Ohipa 17:18; Ioane 5:22, 30). Aita te mau epikuro e au i te faaroo i te parau no te tatarahapa; area te mau philosopho heleni ra, e nehenehe ïa ta ratou e farii i te mau parau no nia i te pohe-ore-raa, eiaha râ no nia i te pohe e te tia-faahou-raa. Ia au i te mea i itehia, mea na roto i te hoê â huru feruriraa i to te feia e rave rahi o te patoi ra i te parau apî maitai i to tatou mau mahana, to vetahi na ôraa e: “E faaroo faahou atu matou ia oe i tena na parau.” Teie râ, ua riro ihora te haava o Dionusio e te tahi mau taata no Ateno ei feia faaroo.
Ua riro te parau a Iehova i te mea puai aˈe i Korinetia
13. Mea nafea to Paulo imiraa i te ravea ia noaa te mau mea i hinaarohia na e ana i roto i te taviniraa, e o vai teie e rave mai ia ˈna ra te huru i to tatou mau mahana?
13 I muri iho, haere atura o Paulo i Korinetia, oire pu o te tuhaa fenua no Ahaia (18:1-11). Ite atura oia ia Akuila raua o Perisila, o tei haere mai e noho i roto i taua oire ra a faaue ai te emepera Kalaudio i te mau ati Iuda e ere ratou e feia no Roma, ia faarue ia Roma. No te imi i te ravea ia noaa mai i te mea e hinaarohia ra e ana ma te rave tamau noa i ta ˈna taviniraa, ua hamani ihora o Paulo i te mau fare ahu e taua nau kerisetiano ra (Korinetia 1, 16:19; Korinetia 2, 11:9). E ohipa rohirohi roa i te tâpûraa e i te niraraa i te ahu etaeta hamanihia e te huruhuru puaaniho. Oia atoa, te imi nei te mau Ite no Iehova i te ravea ia roaa mai te mau mea e hinaarohia e ratou ma te rave i te hoê ohipa i rapae, to ratou râ toroa mau, ta ratou taviniraa ïa.
14. a) Eaha ta Paulo i rave no te patoiraa tamau a te mau ati Iuda no Korinetia? b) Na te aha i horoa ˈtu i te haapapuraa ia Paulo e e tia ia ˈna ia faaea i Korinetia, nafea râ te mau tavini a Iehova e arataihia ˈi i to tatou mau mahana?
14 Aita te mau ati Iuda no Korinetia i faaea i te faaino ia Paulo no te mea te poro ra oia e o Iesu te Mesia. Ua ueue atura ïa oia i to ˈna ahu no te faaite e e ere atura e hopoia na ˈna o ratou e ua faatupu atura i te mau putuputuraa i ǒ Iuseto, mea papu roa e e taata no Roma oia. E rave rahi (oia atoa o Kerusipo, tavana tahito o te sunago, e to ˈna utuafare) tei riro mai ei feia faaroo e tei bapetizohia. Mai te peu e ua aratai te patoiraa a te mau ati Iuda ia Paulo ia uiui e e faaea anei o ˈna i Korinetia, ua tiahihia te feaaraa atoa mai roto mai i to ˈna feruriraa a parau ai te Fatu ia ˈna na roto i te hoê orama e: ‘Eiaha e mǎtaˈu. E parau â, tei pihai atoa iho hoi au ia oe, aore roa e taata e rave ino mai ia oe. E rave rahi hoi to ˈu taata i teie nei oire.’ Ua tamau maite atura ïa o Paulo i te haapii i te parau a te Atua i Korinetia hoê matahiti e e ono avae i te taatoaraa. Noa ˈtu e aita te mau tavini a te Atua e ite faahou ra i te mau orama, e tauturu te pure e te aratairaa a te varua moˈa ia ratou ia rave atoa i te mau faaotiraa paari no nia i te mau faufaa o te Basileia.
15. Eaha te ohipa i tupu a arataihia ˈi o Paulo i mua i te tiaau ra o Galio?
15 Ua aratai atura te mau ati Iuda ia Paulo i mua i te tiaau ra o Galio (18:12-17). Ua parau ihora ratou e ua rave o Paulo, ma te ore e haapao i te ture, i te ohipa no te faataui i te haapaoraa a te taata, pariraa hape ta te upoo faatere haapaoraa heleni e horoa nei i teie â mahana na te mau Ite no Iehova. Ua ite o Galio e aita o Paulo i hapa i te hoê ohipa taiata e aita te mau ati Iuda e tâuˈa maitai ra i te mau faufaa e te mau ture a Roma; ua tiahi ê atura ïa oia ia ratou. A taparahi ai te feia o tei mataitai i taua mau ohipa atoa ra ia Sositene, te tavana apî o te sunago, aita roa o Galio i faaô atu ia ˈna i roto. Ua manaˈo aˈera paha oia e te ooti nei te taata o tei manaˈohia e na ˈna i aratai i te orureraa i faatupuhia i nia ia Paulo, i te mea tano.
16. No te aha aita o Paulo i hapa ma te hahuraa i to ˈna upoo no te mea ua faahiti oia i te hoê euhe?
16 Ua haere ihora o Paulo i nia i te pahi no te tere atu i Keneherea, tapaeraa pahi o te miti Egée, e fano atura oia i Ephesia, i Asie Mineure (18:18-22). Hou oia a rave ai i taua tere ra, ‘ua paoti na oia i tana upoo, no te mea ua rave oia i te hoê euhe’. Aita te aamu e haapapu ra e ua rave anei oia i taua euhe ra hou oia a riro mai ai ei pǐpǐ na Iesu, aore ra i te omuaraa aore ra i te hopearaa anei o te tau e tia ia ˈna ia faatupu i ta ˈna euhe. Aita te mau kerisetiano e vai ra i raro aˈe i te Ture, ua horoahia râ te reira e te Atua e parau moˈa hoi, e aita ïa e hara ia parau i te hoê euhe mai te reira (Roma 6:14; 7:6, 12; Galatia 5:18). I Ephesia, ua tauaparau aˈera o Paulo i te mau ati Iuda e ua tǎpǔ ihora ia ratou e e hoˈi mai â oia, mai te peu e tia te reira ia Iehova. (Ua tapea aˈera oia i ta ˈna parau tǎpǔ.) Ua tapao aˈera to ˈna hoˈiraa mai i Anetiohia no Suria i te hopea o te pitiraa o to ˈna tere mitionare.
Ua riro te parau a Iehova i te mea puai aˈe i Ephesia
17. Eaha tei tia ia Apolo e ia vetahi ê ia haapii no nia i te bapetizoraa?
17 I muri noa ˈˈe, ua haamata ihora o Paulo i te toru o to ˈna tere mitionare (i te area matahiti 52-56) (18:23 e tae atu i te 19:7). I roto i taua area taime ra, i Ephesia, ua haapii aˈera o Apolo i te parau no nia ia Iesu. Tera râ, ua ite noa oia i te bapetizoraa a Ioane ei taipe o te tatarahapa no te mau hara i ravehia i nia i te faufaa o te Ture. “Ua faaite maite atura [o Perisila raua o Akuila] ia ˈna i te parau a te Atua”. E au ra e ua faataa aˈera raua ia ˈna e, ia bapetizohia mai ia Iesu, oia hoi te auraa ia taumi-roa-hia ïa i roto i te pape e ia roaa mai te varua moˈa. I muri aˈe i te bapetizoraa e te varua moˈa o tei tupu i te Penetekose o te matahiti 33 ra, e tia i te taata atoa tei bapetizohia i te bapetizoraa a Ioane, ia bapetizo-faahou-hia i roto i te iˈoa o Iesu (Mataio 3:11, 16; Ohipa 2:38). I muri iho, i Ephesia, ua “bapetizohia ihora [ahuru ma piti ati Iuda o tei bapetizohia i te bapetizoraa a Ioane] i roto i te iˈoa o te Fatu ra o Iesu”. O te reira anaˈe te tupuraa i faaitehia i roto i te mau Papai no nia i te mau taata o tei bapetizo-faahou-hia. A tuu ai o Paulo i to ˈna rima i nia iho ia ratou, roaa atura ia ratou te varua moˈa e e piti haapapuraa semeio no te haamaitairaa no te raˈi mai: ua parau ihora ratou i te parau ěê e ua tohu ihora i te parau.
18. I hea roa to Paulo horoaraa i te faaiteraa a faaea ˈi oia i Ephesia, e eaha te faahopearaa?
18 Mea papu maitai e mea rahi te ohipa a Paulo i Ephesia, fatata e 300 000 feia i roto i taua oire ra (19:8-10). Ua riro te hiero o te ruahine ra o Artémis aore ra Diana i vai na i reira, mai te hoê o na ohipa faahiahia e hitu o te ao i mutaa ihora, e ua nehenehe te vahi teataraa o te oire e farii e 25 000 taata mataitai. I roto i te sunago, ua ‘faaite hua ˈtura’ o Paulo ma te hohoraraa ˈtu i te mau parau haapapuraa, ua haere ê ihora râ oia i to te tahi pae faainoraa i Te Eˈa, aore ra huru oraraa i niuhia i nia i te faaroo i te Mesia. I te roaraa e piti matahiti, ua faahiti aˈera o Paulo i te mau oreroraa parau i roto i te fare haapiiraa a Turano i te mau mahana atoa, e ua parare aˈera “te parau” i roto i te mataeinaa no Asia.
19. Eaha te ohipa i tupu o te rave e ‘ia haere te parau a Iehova i te rahi e mea puai aˈe’ i Ephesia?
19 Ua faaite te Atua e te farii ra oia i te taviniraa a Paulo ma te horoa ˈtu na ˈna i te mana no te rave i te mau faaoraraa maˈi e no te tiavaru i te mau demoni (19:11-20). Tera râ, aita na tamaiti toohitu a te tahuˈa rahi ra o Sekeva i nehenehe e tiavaru i te hoê demoni ma te faaohipa i te iˈoa o Iesu, no te mea aita ratou i tia no te Atua aore ra no te Mesia. Ua pepe atoa hoi ratou i te taata i uruhia e taua demoni ra. Ua roohia ihora ïa te mau taata i te mǎtaˈu, e “haamaitaihia ihora te iˈoa o te Fatu ra o Iesu”. Ua faˈi aˈera te mau taata o tei riro ei feia faaroo i ta ratou mau peu tahutahu e ua tanina ihora i ta ratou mau buka i mua i te huiraatira, e mea papu roa e te vai ra te mau parau tahutahu i roto. “I te rahi hoi i te tupu te parau a te Fatu [Iehova] ra”, ta Luka i papai. I to tatou mau mahana atoa, te tauturu nei te mau tavini a te Atua i te mau taata ia tiamâ mai i te peu demoni. — Deuteronomi 18:10-12.
Aita te farii-ore-raa i te pae faaroo i manuïa
20. No te aha te mau tahuˈa ario no Ephesia i faatupu ai i te orure hau, e nafea te reira i te hoperaa?
20 Mea pinepine te mau Ite no Iehova i te faaruru i te mau taata o tei riri, e te reira atoa te ohipa i tupu no te mau kerisetiano no Ephesia (19:21-41). Ua maraa aˈera te numera o te feia faaroo, e ua riro te reira ei pau no Demeterio e te tahi mau tahuˈa ario, no te mea ua iti mai te feia e hoo i ta ratou mau hiero rii ario no Diana, ruahine o te hotu e rave rahi hoi to ˈna mau titi. I raro aˈe i te mana o Demeterio, ua aratai ihora te hoê feia rahi ia Gaio raua o Arisetareho, mau hoa no te tereraa a Paulo, i roto i te fare apooraa, aita râ te mau pǐpǐ i vaiiho ia Paulo ia tomo atu i roto. Ua aˈo aˈera te tahi mau taata mana no te oroa e no te mau hauti o tei au ia ˈna, e eiaha e tamata i te tomo atu. Fatata e piti hora i te maoro, ua pii atura taua feia ra e: “E mana rahi to Diana i Ephesia.” I te pae hopea, ua parau ihora te haava matamua no Ephesia (o tei faatere i te apooraa o te oire) e e nehenehe te feia hamani taoˈa e tuu i ta ratou mau pariraa i mua i te hoê tiaau, haava tei faataahia no te rave i te mau faaotiraa i te pae o te ture, aore ra e nehenehe ta ratou hororaa e faaotihia i roto i “te apooraa (...) e au i te ture” o te feia huiraatira. Mai te peu e eita e na reirahia, e nehenehe ïa o Roma e faahapa i te feia tei tae mai i taua apooraa tia ore ra, i te faaarepurepuraa i te nahonaho-maitai-raa o te huiraatira. I muri aˈe i to ˈna parauraa i te reira, ua tuu atura oia i taua feia rahi ra.
21. Mea nafea to te Atua haamaitairaa i te taviniraa a Paulo, e mea nafea to ˈna haamaitairaa i ta te mau Ite no Iehova i to tatou nei tau?
21 Ua tauturu aˈera te Atua ia Paulo ia faaoromai e rave rahi tamataraa e ua haamaitai ihora i te mau tutavaraa ta taua mitionare ra i rave no te tauturu i te feia ia faarue i te hape i te pae faaroo e ia farii i te parau mau (hiˈo Ieremia 1:9, 10). Te oaoa rahi nei tatou no te mea e te haamaitai maira to tatou Metua i nia i te raˈi i ta tatou taviniraa mai teie te huru. No reira, i to tatou mau mahana mai te senekele I ra, ‘te haere ra te parau a Iehova i te rahi e mea puai aˈe hoi oia’.
Eaha ta outou e pahono atu?
◻ Eaha te hiˈoraa i horoahia e Paulo no nia i te vaiihoraa e ia arataihia oia e te varua moˈa?
◻ Eaha te ravea, o te faaohipa-noa-hia ra e te mau tavini a Iehova, i ravehia e Paulo no te ‘faataa e no te haapapu’ i ta ˈna mau parau?
◻ Mai te pororaa a te mau Ite no Iehova i to tatou nei tau atoa, eaha te mau ohipa i faatupuhia e te oreroraa parau a Paulo i te Areopago?
◻ Mea nafea to Paulo imiraa i te ravea ia noaa mai te mau mea e hinaarohia ra e ana i roto i te taviniraa, e o vai teie e rave nei mai ia ˈna i to tatou mau mahana?
◻ Mai ta ˈna i rave no te taviniraa a Paulo, mea nafea to te Atua haamaitairaa i te taviniraa a te mau Ite no Iehova i to tatou mau mahana?
[Hohoˈa i te api 22, 23]
Ua riro te parau a Iehova i te mea puai aˈe i
1. Philipi
2. e 3. Ateno
4. e 6. Ephesia
5. Roma
[Faaiteraa i te tumu]
Hohoˈa n° 4: Studios Manley