“Aita e mâuˈa te taime ia taio-anaˈe-hia te mau buka a te mau Ite o Iehova”
Te reira te upoo parau o te hoê tumu parau i neneihia i roto i te Creston News Advertiser no te 23 no titema 1988 i Iowa (Etats-Unis) e tei tarimahia e Randy Porter. Te horoa nei te taata papai i teie faahiˈoraa: “Mea anaanatae roa na ˈu i te haapiiraa philosopho e te haapaoraa, i roto râ i taua mau vea ra, te vai atoa ra te tahi mau tuhaa e ere no nia i te haapaoraa, no nia râ i te mau tumu parau e rave rahi faahiahia mau no roto i te ao taatoa nei. (...)
“Hau atu, e maere roa paha vetahi mau taata ia ite e te faahiti pinepine ra taua mau vea ra i te tahi mau papai tumu faatiahia, taa ê atu i te Bibilia. (...)
“A hiˈo na, te vai ra atoa i roto i te neneiraa no tenuare [22 no tenuare 1989] te hoê tumu parau poto noa tei apeehia e te hoê hohoˈa no nia i te ofai taipe no Iowa, te ofai parauhia géode. Te parau nei taua tumu parau ra e te faahohoˈahia ra te mau taata i te mau géodes. E ere hoi to ratou huru rapae i te mea faahiahia roa, ia tatara-anaˈe-hia râ ratou, e faaite ra te mau géodes i te hoê nehenehe mau i roto e te maere atoa. Oia atoa, te vai ra te tahi mau taata e ere to ratou hohoˈa i te mea faahiahia, peneiaˈe te tuu nei ratou ia ratou i te hiti e mea mamahu roa ratou, ia rave anaˈe tatou i ‘te taime no te haamatau ia ratou, e matara mai ïa to ratou manaˈo e e faaite mai ratou i to ratou huru nehenehe no roto roa mai’. (...)
“Te vai ra i roto i taua numera ra no tenuare e rave rahi mau tumu parau e ore roa paha e tapae mai i roto i to ˈu mau rima. Ei hiˈoraa, e rave rahi mau taata o tei faaroo i te parau o te mau manu patia no Afirika o te horoa nei i te pohe. Teie râ, i roto noâ i taua numera ra, te haapii nei te hoê tumu parau ia tatou e e tuu te mau taata e rapaau ra i te mau manumanu i te tahi mau ‘utu iti’ i nia i te mau manu patia. Maoti i te hoê taoˈa iti uira i hamanihia e te tahi mau taata toroa teitei no te pae o te hamaniraa i te mau matini no te fenua marite, e mea haihai roa hoi te reira, e nehenehe e tamauhia i nia i te tua o te mau manu patia, e nehenehe atura ïa te feia aivanaa e apee i te mau haereraa o te manumanu i te hoê atearaa hoê aore ra e piti kilometera.”
Te vai ra ta A ara mai na! e rave rahi feia maimi i roto tau ahuru mau fenua, e te vai ra ia ratou te mau pu e rave rahi o te mau haamaramaramaraa o te ore e noaa ia vetahi ê. E ua papu atura ïa matou e e roaa to outou ite e e au roa outou i te mau tumu parau faahiahia mau a te A ara mai na! E neneihia taua vea nei ei faito au noa e 11 250 000 vea no te hoê noa neneiraa, e e itehia i roto e 54 reo.
A tamatahiti na ia ˈu nei i te A ara mai na! Teie te tino moni ra e 120 tara.