“O te mahana teie o te mau mahana atoa”
“Ia riro vau i te [v]arua i te mahana o te Fatu ra.” — APOKALUPO 1:10.
1. Eaha te “mahana” ta tatou e ora nei i teie mahana, e no te aha e riro ai ei mea oaoa mau?
“TEIE te mahana o te mau mahana atoa. Inaha, te faatere nei te Arii!” I teie nei â mahana, e taˈiraa puai mau to taua mau parau nei, i faahitihia i te matahiti 1922 ra e te piti o te peretiteni o te Taiete Watch Tower, i nia ia tatou nei. Te faahaamanaˈo noa maira hoi te reira e te ora nei tatou i te anotau faahiahia roa ˈˈe o te Aamu, oia hoi o te aamu ta te Bibilia e parau ra e te “mahana o te Fatu ra”. (Apokalupo 1:10.) Oia mau te ora nei tatou i “te mahana o te mau mahana atoa”, te mahana i reira o Iehova, na roto i te ravea o te Basileia o te Mesia, e faatupu ai i ta ˈna mau opuaraa hanahana mau e e haamoˈa ai i to ˈna iˈoa moˈa i mua i te mau mea atoa ta ˈna i poiete.
2, 3. a) Eaha te maororaa o te mahana o te Fatu? b) I hea roa tatou e nehenehe ai e ite i te mau haapapuraa no nia i taua mahana ra?
2 Ua haamata taua mahana ra i te matahiti 1914 ra a haamauhia ˈi o Iesu ei Arii no te Basileia o te Atua, e e vai mai taua basileia ra e hope noa ˈtu te Faatereraa hoê tausani matahiti, i te taime te Mesia “e pûpû atu ai (...) i te basileia i te Atua” ra. (Korinetia 1, 15:24.) Te tiai noa ra te mau kerisetiano haapao maitai i te mahana o te Fatu a hia ˈtura senekele i teie nei. E inaha, teie mai nei! Eaha râ hoi te auraa teie “mahana o te mau mahana atoa” no te nunaa o te Atua e no te ao nei?
3 I roto i te mau buka atoa o te Bibilia, o te buka Apokalupo teie e paraparau rahi nei no nia i te mahana o te Fatu. Fatata te taatoaraa o ta ˈna mau parau tohu teie e tupu nei i teie mahana. Tera râ, o te buka Apokalupo te buka hopea no te tahi mau buka e faaite mai i te mau ohipa e tupu a muri aˈe, e faahiti ra i te parau no taua mahana ra, mai te mau buka a Isaia, a Ieremia, a Ezekiela e a Daniela. E pinepine taua mau buka nei i te tauturu ia tatou ia ite i te auraa o te mau parau tohu a te Apokalupo. E hiˈo anaˈe nafea te buka a Ezekiela i te haamaramaramaraa mai e mea nafea te Apokalupo ia tupu i te mahana o te Fatu ra.
Na taata e maha e horo ra i nia i na puaahorofenua
4. Ia au i te Apokalupo pene 6, eaha te ohipa i tupu i te omuaraa o te mahana o te Fatu ra?
4 Ei hiˈoraa, i roto i te pene ono o te Apokalupo, te faatia ra te aposetolo Ioane i te parau no te hoê orama faahiahia mau, i te na ôraa e: “Ua hiˈo atura vau, e inaha e puaahorofenua teatea e e fana ta tei parahi i nia ihora, e e korona tei horoahia mai no ˈna: haere atura oia ma te haapau atu, e ia pau atu â.” (Apokalupo 6:2). O vai hoi taua taata e parahi ra i nia iho i te puaahorofenua teatea tei noaa ia ˈna te re? O Iesu Mesia ïa, tei haamauhia ei Arii no te Basileia o te Atua e o te horo ra na nia i te puaahorofenua no te haapau i to ˈna mau enemi (Salamo 45:3-6; 110:2). Ua haamata ta ˈna hororaa no te haapau i te matahiti 1914 ra, i te omuaraa iho o te mahana o te Fatu ra (Salamo 2:6). Ua noaa ia ˈna i ta ˈna re matamua ia ˈna i huri mai ia Satani e ta ˈna mau demoni i nia i te fenua nei. Eaha ihora ïa te faahopearaa no te huitaata nei? “E ati râ hoi to te fenua e to te tai.” — Apokalupo 12:7-12.
5. Eaha te mau puaahorofenua riaria mau e apee ra i Tei parahi i nia i te puaahorofenua teatea ra, e eaha te mana e vai ra ia ratou tataitahi ra?
5 I roto i te orama, e toru puaahorofenua riaria mau ia hiˈo te apee ra i te puaahorofenua matamua: te hoê puaahorofenua uteute, e faataipe ra i te tamaˈi, te hoê puaahorofenua ereere, e faataipe ra i te oˈe, e te hoê puaahorofenua maheahea, o “te Pohe” hoi te iˈoa o tei parahi i nia ihora. No nia i taua puaahorofenua ra, te maha, teie ta tatou e taio: “Hiˈo atura vau, e inaha e puaahorofenua maheahea: e to ˈna iˈoa to tei parahi i nia ihora, o Pohe ïa, e o Hade tei pee i muri aˈe ia ˈna. E e mana tei horoahia mai no raua ia taparahi oia i te maha o te tufaa o to te ao nei i te ˈoˈe, e te maˈi, e te oˈe, e te puaa taehae o te fenua nei.” — Apokalupo 6:3-8; Mataio 24:3, 7, 8; Luka 21:10, 11.
6. Eaha te faahopearaa ta te hororaa o taua na puaahorofenua riaria tootoru e faatupu i nia i te fenua nei?
6 Mai te matahiti 1914, ia au i taua parau tohu ra, to te huitaata nei mauiui-rahi-raa i te tamaˈi, i te oˈe e te maˈi. Teie râ, te taparahi atoa ra tei parahi i nia i te maha o te puaahorofenua na roto i te ravea o te mau “puaa taehae o te fenua nei”. Ua papu-maitai-hia anei te reira mai te matahiti 1914 mai ra? E tauturu mai te tuatapaparaa i te hoê parau tohu mai te reira te huru i papaihia e Ezekiela ia tatou, ia taa i te auraa o teie tuhaa o te parau tohu.
7. a) Eaha te parau tohu ta Ezekiela i faahiti i nia ia Ierusalema? b) Mea nafea taua parau tohu ra i te tupuraa?
7 E riro paha e pae matahiti na mua ˈˈe i te haamouraahia o Ierusalema i te matahiti 607 hou to tatou nei tau to Ezekiela tohuraa no nia i te hoê faautuaraa riaria mau e roohia i nia i te mau ati Iuda no to ratou faaroo ore. Ua papai aˈera oia ma te faauruahia mai e te Atua e: “E teie nei, te na ô maira te Fatu ra o Iehova: A tae atu ai i na pohe atoa na ˈu e maha atoa ra ia hopoi atu i nia ia Ierusalema, i te ˈoˈe, e te poia, e te mau taehae, e te maˈi, e ia pau roa te taata e te puaa atoa hoi?” (Ezekiela 14:21; 5:17). Ua tupu anei taua mau parau nei i to tatou nei tau? Ma te feaa ore ua farerei o Ierusalema i te oˈe e te tamaˈi a fatata ˈi oia i te haamouhia. Inaha mai tei matauhia, o te maˈi hoi ta te oˈe e faatupu mai (Paraleipomeno 2, 36:1-3, 6, 13, 17-21; Ieremia 52:4-7; Oto a Ieremia 4:9, 10). E te mau puaa taehae? Ua haapohe atoa anei ratou i te taata i taua tau ra? Ma te papu maitai, eita e ore e ua taparahi pohe roa te mau animala i te taata i taua anotau ra, inaha ua tohu mai hoi o Ieremia e e tupu mau â te reira. — Levitiko 26:22-33; Ieremia 15:2, 3.
8. Eaha te tufaa a te mau animala taehae i faatupu e tae roa mai i teie mahana, i te mahana o te Fatu ra?
8 E i to tatou nei tau? I roto i te mau fenua ona, e ere hoê â atâataraa te mau puaa taehae mai to te anotau tahito. I roto râ i te tahi atu mau fenua, te tamau nei â ratou i te haapohe i te taata, ia tuuhia iho â râ te mau ophi e te mau moo pape i roto i “te mau animala taehae o te fenua nei”. E varavara roa te mau vea i te faahiti i te parau no taua mau huru ati ra, tera râ mea pinepine roa te reira i te tupu. Ia au i te buka ra Te palaneta Fenua — te mau vai pue (beretane), i te fenua Inidia e i te fenua Pakistan e rave rahi mau taata “tei pohe ma te mauiui rahi i muri aˈe i to ratou hohoniraahia e te mau ophi taero” a horo ê ai ratou i te mau vai pue. Te papai ra te vea ra India Today e i Bengale tooa o te râ, ua pohe te mau tane o e ono ahuru rahiraa vahine, ma te taparahihia e te mau mimi taehae. E nehenehe taua mau ati nei e pinepine roa ˈtu â i te itehia i te mau tau i mua nei, no te huenane e itehia ra i roto i te totaiete taata nei e tae noa ˈtu hoi te oˈe rahi e farereihia ra.
9. Eaha ˈtu â te huru “animala” tei riro ei tumu no te mau taparahiraa taata e no te mau ati i roto i te mau taata i teie senekele 20?
9 Te faahiti ra râ o Ezekiela i te tahi atu huru “animala” ia parau oia e: “Te vai ra te amuiraa to te mau peropheta i roto ia ˈna ra; mai te liona uuru ra ratou ia hahae i te maa ra; ua pau ia ratou te [ora] taata. (...) To ˈna ra hui arii i roto ia ˈna ra, e au ïa i te luko ia hahae i te maa ra.” (Ezekiela 22:25, 27). Te itehia nei hoi te taata ia riro atoa mai te animala ra te huru, e auê hoi mauiui ta taua mau animala amu iˈo ra i faatupu i nia i te huitaata nei i teie senekele e XX! E rave rahi tei pohe i roto i te rima o te mau taata taparahi taata o te mau taata faahuehue taehae mau. No reira, na roto i te mau ravea e rave rau, e tufaa teimaha mau ta te pohe i faatupu na roto i te arai o te mau “[animala] taehae o te fenua nei”.
10. Te tauturu maira te orama a Ioane ia tatou ia taa i te aha, ia faahiti oia i te parau no te tamaˈi, no te oˈe, no te maˈi e no te mau animala taehae?
10 E tauturu mai te tamaˈi, te oˈe, te maˈi e te mau animala taehae e faahitihia ra i roto i te orama a Ioane ia tatou ia taa e, e rave rahi mau faahohoˈaraa to te mau ati i farereihia e Ierusalema i te matahiti 607 hou to tatou nei tau, te ite-atoa-hia i to tatou nei tau. Ua tapao-ê-na-hia ˈtura ïa te mahana o te Fatu e te mau ati no te ao nei, i te paeau rahi no te mea ua patoi te mau raatira o te huitaata nei e auraro i Tei parahi i nia i te puaahorofenua matamua ra, oia hoi te Arii i haamauhia ra o Iesu Mesia (Salamo 2:1-3). Eaha râ hoi te auraa o te mahana o te Fatu no te feia e tavini ra i te Atua?
Te faito ra o Ioane i te hiero
11. Eaha te faaueraa i horoahia mai ia Ioane ra ia au i te Apokalupo 11:1, e te faahitihia ra te parau no tei hea hiero i roto i taua irava nei?
11 I roto i te Apokalupo 11:1, teie ta te aposetolo Ioane i papai: “E e aeho tei ho-mai-hia mai ia ˈu, mai te raau faito ra te huru: tia maira te melahi, e ua parau maira, A tia, a faito i te hiero o te Atua, e te fata, e e taio hoi i te feia e haamori i roto ra.” E auraa faufaa roa to taua faito ra no nia i te hiero o te orama, no te nunaa o te Atua. Eaha hoi te hiero ta Ioane i faito? E ere te hiero ati iuda i reira to ˈna haamoriraa hou oia e riro mai ai ei kerisetiano. Ua faarue hoi Iehova i taua hiero ra, e ua haamouhia i te matahiti 70 o to tatou nei tau (Mataio 23:37 e tae atu i te 24:2). E ere, o te hiero rahi varua râ o Iehova. I roto i te aumoa i nia i te fenua nei o taua hiero taipe ra te mau kerisetiano faatavaihia e tavini ai ei tahuˈa. — Hebera 9:11, 12, 24; 10:19-22; Apokalupo 5:10.
12. Afea taua hiero ra i te haamataraa, e eaha te mau ohipa no nia ia ˈna tei tupu i te senekele 1?
12 Ua haamata taua hiero ra i te matahiti 29 o to tatou nei tau a faatavaihia ˈi o Iesu ei tahuˈa rahi (Hebera 3:1; 10:5). Hoê hanere e maha ahuru ma maha tausani tahuˈa te tavini i reira. I te senekele 1, e rave rahi o ratou tei maitihia e tei tapaohia i te tapao taati ra, e tei pohe ma te ore e taiva (Apokalupo 7:4; 14:1). Ia pohe râ ratou, aita taua mau kerisetiano matamua ra i faatia-oioi-hia mai no te ora i nia i te raˈi, ua taoto râ hoi ratou i roto i te apoo (Tesalonia 1, 4:15). I te tahi aˈe pae, ua tupu te hoê taivaraa rahi i muri aˈe i te senekele 1, e ua poˈi aˈera hoi te pǔpǔ autahuˈa i te “zizania”, oia hoi i te mau apotata (Mataio 13:24-30). I roto i te mau senekele i muri aˈe, ua nehenehehia iho â ïa e aniani e: ‘E tapao-pauroa-hia anei na 144 000 tahuˈa i te tapao taati ia tae i te hoê mahana?’ ‘E faatiahia mai anei te feia i pohe ma te ore e taiva no te tavini i roto i te hiero i nia i te raˈi?’ Te faaite maira te faito o te hiero o te orama e oia mau. Eaha hoi te tumu?
13. I te mea e ua faito o Ioane i te hiero, eaha ïa ta te reira e haapapu maira, e eaha te ohipa i tupu i te omuaraa o te mahana o te Fatu ra?
13 I roto i te mau parau tohu bibilia, ia oti te hoê mea i te faitohia, e tapao ïa te reira e e tupu mau â te opuaraa a Iehova no nia i taua mea ra (Mau arii 2, 21:13; Ieremia 31:39; Oto a Ieremia 2:8). No reira, i te mea hoi e ua faito o Ioane i te hiero o te orama, e tapao haapapuraa ïa te reira e tupu paatoa te mau opuaraa a Iehova no nia i taua hiero ra i te mahana o te Fatu ra. Ia au i taua manaˈo nei, e ma te papu maitai hoi, mai te matahiti 1918 maira to te mau kerisetiano faatavaihia tei pohe ê na ma te ore e taiva i te haamataraahia i te faatiahia mai no te parahi atu i nia i te parahiraa i haapaohia no ratou i roto i te hiero i nia te raˈi ra (Tesalonia 1, 4:16; Apokalupo 6:9-11). Eaha ˈtura no te toea o na 144 000 taata?
14. Eaha te ohipa i roohia i nia i te mau kerisetiano faatavaihia na mua ˈtu e i te tau o te Tamaˈi rahi Matamua?
14 Na mua ˈˈe i te omuaraa o te mahana o te Fatu, ua haamata te mau kerisetiano faatavaihia tei haere ê mai i rapae i te amuiraa faaroo kerisetiano apotata, i te haaputuputuhia i roto i te hoê faanahonahoraa tei faaataa ê ia ˈna. E roo maitai tei noaa mai ia ratou i te pae no te oreraa e taiva, ia ratou i haere e faaite i te faufaaraa o te matahiti 1914, teie râ, i taua matahiti faufaa mau ra râ hoi to ratou haamataraahia i te hamani ino, ‘i te taataahihia’, a uˈana noa ˈi te Tamaˈi rahi Matamua. Ua uˈana roa ˈtu â te mau fifi i roohia i nia ia ratou i te matahiti 1918 ra a tapeahia ˈi te mau faatere o te Taiete Watch Tower i roto i te fare auri e a fatata roa ˈi ta ratou ohipa pororaa i faanahohia i te ore roa. I taua tau ra, mai te huru ra ïa e ua ‘haapohehia’ ratou. (Apokalupo 11:2-7.) Eaha hoi te auraa no taua mau kerisetiano ra i te faitoraahia te hiero?
15. I te mau mahana o Ezekiela, eaha te auraa no te nunaa o te Atua, te raveraahia te mau faito o te hiero o te orama?
15 I te matahiti 593 hou to tatou nei tau, 14 matahiti i muri aˈe i te haamouraahia te hiero o Iehova i Ierusalema, ua ite aˈera o Ezekiela i te hoê orama no nia i te fare o Iehova. Ua mataitai maite atura oia i taua hiero e ua hiˈo maite atura, a faito noa ˈi oia ma te haapao maitai (Ezekiela pene 40 e tae atu i te 42). Eaha hoi te auraa o te reira? Te faataa ra o Iehova iho e: E tuati maitai te faito o te hiero e te tamataraahia te mau melo o te nunaa o Ezekiela. Ia faahaehaa ratou ia ratou, ia tatarahapa i ta ratou mau hape i rave e ia faaau ia ratou i te mau ture a Iehova, e riro ïa te mau faito o te hiero i te faaitehia ˈtu ia ratou. Mai te huru ra ïa e e faaitoito te reira ia ratou ia tiaturi e, ia tae i te hoê mahana, e faaorahia ratou i te zugo o Babulonia e e haamori â ratou ia Iehova i roto i to ˈna hiero. — Ezekiela 43:10, 11.
16. a) I te mea e ua faito o Ioane i te hiero o te orama, eaha te haapapuraa ta te reira i horoa mai no te mau tavini a te Atua i te matahiti 1918 ra? b) Mea nafea taua haapapuraa ra i te tupuraa?
16 Na reira hoi, i te matahiti 1918, ia faahaehaa te mau kerisetiano tei haaparuparu e ia tatarahapa ratou i ta ratou mau hapa atoa, e riro ïa ratou i te faaorahia, i te haamaitaihia e Iehova, e e tiaraa faufaa roa to ratou i roto i te mau faanahoraa i faahohoˈahia e to ˈna hiero. E o te reira mau tei tupu. Ia au i te Apokalupo 11:11, ua “tia hua maira raua i nia”, aore ra ua faatiahia mai mai te pohe mai, ei auraa parau. Ua faahohoˈa atoa mai te hoê orama mai te reira te huru i faahitihia i roto i te buka a Ezekiela i te faahoˈi-faahou-raahia mai te mau ati Iuda i nia i to ratou fenua (Ezekiela 37:1-14). I to tatou nei tau, te faahohoˈa ra taua ‘faatia-faahou-raa’ ra i te faahoˈi-faahou-raahia te mau tavini a te Atua, oia hoi mai to ratou huru paruparu e te ohipa ore, tei ora faahou mai, tei itoito faahou mai: ua nehenehe aˈera hoi ratou e horoa rahi faahou ia ratou i roto i te taviniraa a Iehova. Ua tupu taua ‘tia-faahou-raa’ ra i te matahiti 1919 ra.
Te buka [otaro] iti ra
17. a) A faataa mai na i te orama ta Ioane i faaite mai i roto i te Apokalupo 10:1. b) O vai taua melahi ra, e eaha te mahana taua orama nei e tupu ai?
17 I roto i te Apokalupo 10:1, te faatia ra o Ioane e ua ite o ˈna i te hoê “melahi puai i te pouraa mai, mai nia mai i te raˈi, ua vehîa te ata: e anuanua tei nia i tana upoo, e to ˈna mata mai te mahana ra ïa, e mai te pou auahi ra o ˈna avae”. Te faahaamanaˈo maira taua hohoˈa ra i te mau orama a Iehova ta Ezekiela raua o Ioane i ite (Ezekiela 8:2; Apokalupo 4:3). I ǒ nei râ hoi, te ite ra o Ioane i te hoê melahi, eiaha râ ia Iehova. Eita e ore o te Tamaiti melahi hanahana a Iehova teie, o Iesu Mesia, “te huru mau (...) o te Atua hiˈo-ore-hia ra”. (Kolosa 1:15.) I te tahi aˈe pae, te faataa maira te Apokalupo 10:2 ia Iesu ma te mana rahi, e “ua titoo ihora i to ˈna avae atau i nia iho i te miti, e to ˈna avae aui i nia iho i te fenua nei”. Te faahohoˈa ra ïa te melahi ia Iesu i te mahana o te Fatu ra. — Hiˈo Salamo 8:4-8; Hebera 2:5-9.
18. a) Ua faauehia ˈtu o Ioane ia amu i te aha? b) I roto i te hoê orama mai te reira te huru, ua faauehia ˈtu o Ezekiela ia amu i te aha, e eaha ihora hoi te faahopearaa?
18 I roto i taua orama hanahana ra, te tapea ra Iesu i roto i to ˈna rima i te hoê buka iti tei titauhia ˈtu ia Ioane e rave e e amu (Apokalupo 10:8, 9). E na reira atoa o Ioane mai ia Ezekiela, tei ite atoa i te hoê orama e tei faauehia mai e amu i te hoê otaro. No Ezekiela, na Iehova iho e toro maira i te otaro. Ua ite aˈera taua peropheta nei e “ua papaihia i roto e rapae: o te mihi, e te oto, e te auê, tei papaihia i roto ra”. (Ezekiela 2:8-10.) Te parau ra oia e: “Ua amu ihora vau; e mai te meli te huru i to ˈu nei vaha i te momona.” (Ezekiela 3:3). Eaha hoi te auraa no te amuraahia taua otaro, no Ezekiela?
19. a) Te amuraa o Ezekiela i te otaro, te faahohoˈa ra ïa te reira i te aha? b) No vai te mau poroi maramara te tia ia Ezekiela ia haere e poro?
19 Mea maramarama maitai e e mau parau tohu faauruahia e te Atua to roto i taua otaro ra. Ia amu oia i te reira, ua farii aˈera o Ezekiela i te ohipa i horoahia mai ia ˈna ra oia hoi te haereraa e poro i taua mau parau tohu ra, e i te mea hoi e ua na reira mau oia, riro roa maira te reira ei hoê tuhaa no ˈna iho (hiˈo Ieremia 15:16). Eita roa ˈtu te mea i papaihia i roto i te otaro i te mea mǎrû no vetahi pae. Ua î hoi te otaro i te mau ‘himene mihi, te oto, e te auê’. No vai hoi taua poroi au ore ra? Ua parau-na-mua-hia ˈtu ia Ezekiela e: “E te tamaiti a te taata na, a haere i te utuafare o Iseraela, a parau atu ai i ta ˈu nei parau ia ratou.” (Ezekiela 3:4). I muri iho, ua purara ê atura te poroi a Ezekiela i roto i te mau nunaa etene e haaati ra ia ˈna. — Ezekiela pene 25 e tae atu i te 32.
20. Eaha te ohipa i tupu ia Ioane i amu i te buka [otaro] iti, e eaha hoi te faahopearaa?
20 No Ioane, te reira atoa te mau faahopearaa i to ˈna amuraa i te otaro. Teie ta ˈna e faatia ra: “Ua rave atura vau i taua buka [otaro] iti i roto i te rima o te melahi ra, amu ihora vau e pau aˈera; e mai te meli â te momona i roto i tau vaha; ia pau ra i te amuhia e au ra, maramara ˈtura tau opu.” (Apokalupo 10:10). Mai te huru ra ïa e mea mǎrû atoa no Ioane, ia ˈna i amu i te otaro. Ua putapû roa oia i te manaˈoraa e e riro mai te parau a Iehova ei hoê tuhaa no ˈna iho. Mea maramara atu â hoi te poroi. No vai? Te horoahia maira te pahonoraa i roto i teie mau parau i horoahia ˈtu ia Ioane ra e na ô ra e: “E tohu faahou â oe i mua i te aro o te mau nunaa e rave rahi, e te mau fenua e te mau reo ěê, e te mau arii atoa hoi.” — Apokalupo 10:11.
21. a) Eaha te ohipa e tuati i te amuraa o Ioane i te otaro iti ta te mau kerisetiano faatavaihia i rave i te matahiti 1919 ra, e eaha ihora hoi te faahopearaa? b) Eaha ta taua ohipa ra i faatupu i nia i te amuiraa faaroo kerisetiano e i nia i te ao nei?
21 Nafea hoi taua mau hohoˈa no te mau ohipa e tupu a muri aˈe ia tupu i te mahana o te Fatu ra? Mai ta te mau ohipa i tupu e haapapu maira, i te mea hoi e i te matahiti 1919, ua rave papu mai te mau kerisetiano haapao maitai i te haamaitairaa e tavini ia Iehova, i riro mai ai taua ohipa ra ei tufaa no ratou iho, e inaha, riro maira hoi ei mea mǎrû no ratou. Teie râ, ua maramara roa taua haamaitairaa na ratou no te tahi pae, no te mau upoo faatere haapaoraa iho â râ. Eaha hoi te tumu? No te mea ua faaitoito taua mau kerisetiano faatavaihia haapao maitai ra i te poro i te taatoaraa o te parau a Iehova no nia i te huitaata. Aita noa ratou i poro i te “evanelia o te basileia”, ua faaite atoa râ ratou i te huru pohe i te pae varua o te amuiraa faaroo kerisetiano e o te ao taatoa nei. — Mataio 24:14; Apokalupo 8:1 e tae atu i te 9:21; 16:1-21.
22. a) E tae roa mai i teie nei, i te tau o te mahana o te Fatu ra, mea nafea to Iehova faaohiparaa i te mau kerisetiano faatavaihia ma te faahiahia mau? b) Eaha tei itehia i te mahana o te Fatu ra no te ao o Satani, e i te tahi aˈe pae no te mau tavini a Iehova?
22 Ua faaohipa o Iehova i taua mau kerisetiano haapao maitai ra no te haaputuputu i te mau melo hopea o na 144 000 taata, no te tapao ia ratou i te tapao taati ra, e o ratou hoi te feia matamua i haaputuputu i te feia rahi roa e tiaturi ra e ora e a muri noa ˈtu i nia i te fenua nei (Apokalupo 7:1-4, 9, 10). E tiaraa faufaa roa to taua feia rahi roa ra i roto i te tupuraa te mau opuaraa a Iehova i nia i te fenua nei, e e oaoa rahi tei itehia, i nia i te raˈi mai nia atoa i te fenua a fa mai ai ratou (Apokalupo 7:11-17; Ezekiela 9:1-7). No reira, e mau mauiui tei ite-ê-na-hia no te ao a Satani i “te mahana o te mau mahana atoa”, e e mau haamaitairaa atoa râ no te mau tavini o Iehova. E hiˈopoa anaˈe na i teie nei nafea râ ia tupu noâ mai te reira te huru i muri aˈe i te mahana o te Fatu ra.
E nehenehe anei ta outou e faataa mai?
◻ Eaha mau na te mahana o te Fatu?
◻ Eaha te rahiraa taata ta “te mau puaa o te fenua nei” e haapohe nei i te mahana o te Fatu ra?
◻ Eaha ta te faitoraa o Ioane i te hiero i faatupu mai?
◻ Te amuraa Ioane i te otaro iti, eaha ïa ta te reira e faahohoˈa ra no te toea faatavaihia?
◻ E tae roa mai i teie nei, eaha te auraa te mahana o te Fatu no te nunaa o te Atua e no te ao nei?
[Hohoˈa i te api 23]
I te faitoraa o Ioane i te hiero i te mahana o te Fatu ra, te horoa maira ïa te reira i te tahi mau ravea paari maitai no te mau kerisetiano faatavaihia.