Iesu, to ˈna oraraa e ta ˈna taviniraa

Mai te mau roimata e tae atu i te oaoa

I TO ˈNA iteraa e ua ora te vahine i roohia i te tapahi, ua tiaturi hohonu aˈera o Iaeiro i roto i te mana semeio o Iesu. Oia mau, na mua noa ˈˈe, ua ani oia ia Iesu ia rave i te tahi ohipa na ta ˈna tamahine herehia hoê ahuru ma piti to ˈna matahiti, tei fatata roa i te pohe. Ua haere ihora ïa ratou i to ˈna ra fare tei haamauhia i roto i te oire no Kaperenaumi aore ra i to ˈna ra mau hiti; e i taua taime ra, ua faaorahia te hoê vahine ma te tiaia-noa-raa i te hiti ahu o Iesu.

Tera râ, i roto i taua area taime ra, ua tupu te ohipa i taiahia. A paraparau noa ˈi Iesu i taua vahine nei, ua haere maira te mau taata a Iaeiro e ua faaite maira ia ˈna ma te parau mǎrû e: “Ua pohe roa to tamahine, eaha oe i haapeapea ˈtu ai â i te orometua?”

Auê hoi parau apî riaria e! A feruri na i taua taata nei, tei faatura-rahi-hia i roto i to ˈna oire, i teie nei ua paruparu roa i te faarooraa e ua pohe ta ˈna tamahine. Ua faaroo aˈera râ o Iesu i te paraparauraa; fariu ihora oia ia Iaeiro ra e ua na ô atura ma te faaitoito e: “Eiaha e mǎtaˈu; e faaroo noa mai.”

I muri iho, ua apee ihora i te taata i peapea roa i to ˈna ra fare. I to ratou taeraa ˈtu, ua ite aˈera ratou i te utuafare o tei peapea roa; te auê anaˈe ra e te oto anaˈe ra ratou pauroa. Te oto noa ra te feia i putuputu mai i reira. I to ˈna tomoraa ˈtu, ua ani aˈera o Iesu e: “Eaha outou i auê noa ˈi e i oto ai hoi? aore taua potii nei i pohe, ua taoto râ.”

I taua mau parau ra, ua tâhito maira ratou ia ˈna; ua ite hoi ratou e ua pohe taua potii nei. Tera râ, ua haapapu ihora Iesu e te taoto ra oia, no te faaite e na roto i te mau mana ta te Atua i horoa mai na ˈna, e nehenehe ta ˈna e faatia faahou i te feia mai roto mai i te pohe, mai ta ˈna e faaara ia ratou mai roto mai i te hoê taoto hohonu.

I muri aˈe i to ˈna tuuraa ˈtu i te mau taata atoa i rapae, o Petero anaˈe tei faaea mai e o Ioane, o Iakobo, o Iaeiro e ta ˈna vahine, ua tapiri maira Iesu i pihai iho i te tamahine ra, apeehia e na taata e pae. Ma te rave atu i te rima o taua potii ra, ua na ô atura e: “Talita kumi; i te faaauraa ra, E teie nei potii, a tia i nia, te faaue atu nei au ia oe.” Ua tia maira taua potii ra i nia i reira ra, hahaere ihora. I mua i taua semeio ra, ua maere roa ˈtura te mau metua, e ua î roa raua i te hoê oaoaraa rahi.

I muri aˈe i te faaueraa e ia hopoihia te maa na taua tamarii ra, ua aˈo aˈera o Iesu ia Iaeiro e i ta ˈna vahine eiaha roa e faaite i te taata i taua mea ra. Noa ˈtu râ te mau aˈoraa a Iesu, ua parare te parau apî i roto i te mataeinaa atoa. Teie te piti o te faatia-faahou-raa ta ˈna i faatupu. Mataio 9:18-26; Mareko 5:35-43; Luka 8:41-56.

◆ Eaha te parau apî tei faataehia ia Iaeiro ra, e mea nafea to Iesu faaitoitoraa ˈtu ia ˈna?

◆ I roto i tei hea huru to Iesu raua o Iaeiro iteraa i te utuafare o Iaeiro?

◆ No te aha Iesu i parau ai e te taoto ra te tamahine e ua pohe roa hoi o ˈna?

◆ O vai o na ite e pae tei ite i taua faatia-faahou-raa ra?