Iesu, to ˈna oraraa e ta ˈna taviniraa

Aita roa i tia mai te hoê pǐpǐ no a muri aˈe

Auê hoi te ohipa mehameha e tiai maira ia Iesu i to ˈna pouraa ˈtu i rapae mai i te pahi! Te haere maira e piti taata taehae ino roa i rapae i te menema tapiri mai e te horo maira ia ˈna ra: ua uruhia raua e te demoni. Ua tâuˈa-noa-hia râ te hoê o raua, peneiaˈe mea rahi aˈe to ˈna puai i te ino i te tahi iho e mea maoro aˈe to ˈna vairaa i raro aˈe i te haavîraa a te demoni.

E rave rahi matahiti to taua taata aita hoi e oaoa ra, i te ora-noa-raa i roto i te mau menema ma te ore e ahu. Ma te tuutuu ore, mai te ao e tae atu i te rui, e auê noa hoi oia ma te otioti ia ˈna iho i te faoa. No to ˈna riri rahi, aore roa e taata e tae na taua eˈa ra. E rave rahi hoi to ˈna tapearaahia i te auri e te fifi, ua motu râ te fifi e ua fatifati te auri ia ˈna i raro aˈe i to ˈna nau avae. Aore roa e taata e rata ˈi oia.

A haafatata ˈtu ai taua taata ra ia Iesu e te tahopuraa ˈtu ia ˈna, ua turai te mau demoni e haavî ra ia ˈna ia pii hua e: “Eaha ta oe ia ˈu nei, e Iesu e, te Tamaiti a te Atua teitei ra? Te parau atu nei au ia oe i te iˈoa o te Atua e eiaha oe e haamauiui mai ia ˈu.”

“A haere oe i rapae au, e tena na varua faufau, vaiiho atu i tena na taata”, ta Iesu ïa i parau onoono atu. Ua ui aturâ oia i muri iho e: “O vai to oe iˈoa?”

“O Legeona to ˈu iˈoa, e rave rahi hoi matou.” Mea au roa na te mau demoni e hiˈo i te mau mauiui o te feia i haavîhia e ratou e, ma te ino, mea au na ratou e tahoê e e rave rahi ratou no te aro atu i te hoê taata. Tera râ, i mua ia Iesu, ua taparu maira ratou ia ˈna eiaha oia e faaue ia ratou ia haere i te vahi hohonu. Te haapapu faahou maira te reira e e mana rahi to Iesu, ua nehenehe hoi oia e upootia mai i nia atoa i te mau demoni iino. Te faaite atoa maira te reira e ua ite te mau demoni i te faautuaraa hopea ta te Atua e faataa mai no ratou, oia hoi te huriraa ia ratou i roto i te abuso ra e to ratou arii, o te Diabolo ra o Satani.

I pihai ê atu, i nia i te aivi o te mouˈa, te amu haere ra te hoê nǎnǎ rahi puaa i te maa, fatata e piti tausani ratou. Ua taparu maira te mau demoni ia ˈna, ua na ô maira e:“E tuu oe ia matou i tera ra mau puaa ia tomo atu matou i roto.” Mea papu maitai e mea au roa na te mau demoni i te ohipa taehae e te haamauiui, no te tomo atu i roto i te tino oraora. A faatia ai o Iesu ia ratou ia tomo i roto i na puaa e piti tausani, horo purara noa ˈtura ratou na nia i te mato e ua paremo aˈera i roto i te moana.

I mua i taua ohipa ra, horo atura te feia tiai, faaite haere atura i te ohipa i tupu i roto i te oire e te oire rii. I muri aˈe, ua haere maira to reira i rapae au e hiˈo i taua mea ra. Eaha ta ratou e ite ra i to ratou taeraa mai? Te taata no roto ia ˈna te mau demoni ra, ua tuuhia i te ahu e ma to ˈna feruriraa mau, i te parahiraa i te pae avae o Iesu!

Ua faaite atu te feia i ite i taua ohipa ra ia vetahi i te huru o to ˈna faaoraraahia. Ua faatia atoa ratou i te hopea huru ê o te mau puaa. Te faarooraa ratou i te reira, ua roohia hoi ratou paatoa i te mǎtaˈu rahi e ua taparu maira ratou ia Iesu ia haere ê atu oia i to ratou ra fenua. Ua faatia Iesu i ta ratou aniraa e haere atura i nia i te pahi. Ua parau hua mai râ te taata i uruhia e te demoni e e pihai atoa iho oia ia ˈna. Ua na ô atura râ Iesu ia ˈna e: “A haere i te utuafare i to oe ra fetii, a faaite atu ai ia ratou i taua mea rahi a te Fatu i rave iho nei i te aroha ia oe.”

Mea pinepine roa e faaue o Iesu i te feia ta ˈna i faaora eiaha roa e faaite i te taata, no te mea eita oia e hinaaro ia huti mai te taata i te mau faahopearaa i niuhia i nia i te mau aamu faahiahia. Tera râ, mea tano maitai taua faaueraa ra, no te mea e haere te taata i faaorahia i te mau demoni e faaite i te mau taata peneiaˈe eita ta Iesu e nehenehe faahou e paraparau ia ratou. Taa ê noa ˈtu i te reira, na to ˈna noa iho haerea e haapapu e e mana to Iesu no te haamaitai e e faaore oia i te mau faatiaraa hape o te mau ohipa i tupu e nehenehe e parauhia no nia i te poheraa o te mau puaa.

Ia au i te faaueraa a Iesu, haere atura te taata i uruhia e te demoni. Parau haere atura i Dekapoli atoa ra i te hamani maitai rahi o Iesu ia ˈna, e ua maere anaˈe ihora te taata atoa. Mataio 8:28-34; Mareko 5:1-20; Luka 8:26-39; Apokalupo 20:1-3.

◆ Ia au i te tupuraa mau, no te aha i haapao-noa-hia ˈi hoê anaˈe taata i uruhia e te demoni, e piti hoi taata e parahi ra i reira?

◆ Na te aha e faaite mai e ua ite te mau demoni i te haavaraa e tiai maira ia ratou i roto i te hoê abuso?

◆ Ma te papu maitai, no te aha mea au na te mau demoni ia tomo atu i roto i te tino o te mau taata e te mau animala?

◆ No te aha Iesu i taui ai ma te parau atu i te taata i faaorahia i te mau demoni ia haere e faaite ia vetahi ê ta ˈna ohipa i rave na ˈna?