“E nehenehe outou e itoitohia”

1. Eaha ta tatou e haapii mai i roto i te Bibilia no nia i te itoito?

I ROTO i teie buka, ua ite mai tatou e rave rahi hiˈoraa o te feia tei faatupu i te itoito e ta tatou e nehenehe e rave no te pee i to ratou hiˈoraa. Mea rahi râ te haapii mai i roto i te Bibilia no nia i te itoito. Ei hiˈoraa, te faahiti ra te Bibilia e rave rahi atu â feia o tei faatupu i te itoito aita i faahitihia i roto i teie buka. Te vai atoa ra te tahi ohipa ta tatou e hinaaro no te faatupu i te itoito, o ta tatou e hiˈopoa mai i roto i teie pene.

2. O vai te tahi atu mau tavini taiva ore a te Atua o tei faatupu i te itoito?

² E nehenehe anei outou, e feruri i te feia o tei faatupu i te itoito i roto i te Bibilia, aita i itehia i roto i teie buka? Peneiaˈe te manaˈo ra outou i te tahi o te mau peropheta itoito o te mau Papai Hebera, mai ia Isaia, Ieremia, Ezekiela, Iona aore ra Malaki. Oia mau, no ratou te mau parau arataihia e te varua moˈa ta te aposetolo Paulo i papai. Ua papai oia ‘e tamataraa ta te tahi atu i faaruru, te faaoooraa e te huiraa, e hau atu â, te fifi auri e te tapearaa.’ No te tahi atu, ua papai o ˈna ‘ua vai ratou i roto i te veve e te ati e ua rave-ino-hia ratou.’ E vetahi atu ua haapohe-atoa-hia. (Heb. 11:36, 37) Ma te itoito râ, ua tia ratou no te Atua ra Iehova.

3-4. Mea nafea na vahine e piti aita i faaitehia te iˈoa i te tautururaa i te arii Davida i te taime ua fifihia o ˈna?

³ Aita te Bibilia e faahiti ra i te iˈoa o te tahi mau taata tei faatupu i te itoito. E hiˈo mai tatou, no nia e piti vahine o te tau o te arii Davida. Ua tauturu raua ia Davida i to Abasaloma tamataraa i te haapohe ia ˈna. Ua hinaaro Abasaloma tei teoteo e tei ino, e riro ei arii noa ˈtu o Davida te arii. Ua horo ê ïa Davida ia Ierusalema, e ua ani oia ia Zadoka ia hoˈi i Ierusalema no te ite i ta Abasaloma opuaraa. Ua titauhia i teie tahuˈa itoito ia hapono i te tahi poroi ia Davida. I to ˈna iteraa i ta Abasaloma opuaraa, ua tono ïa oia i “te hoê tavini vahine” ia Davida. Aita i itehia i to ˈna iˈoa ua faatupu râ oia i te itoito. Noa ˈtu ua nehenehe o ˈna e pohe, ua haere oia e parau i na hoa e piti o Davida, i ta Zadoka i parau ia ˈna. I muri iho, ua haere raua e hopoi i te poroi ia Davida, ua itehia râ raua na te tahi taata. Ua faaite ïa teie taata ia Abasaloma no raua. Mea maramarama râ raua e ua tapuni i roto i te apoo pape. Ua hohora oioi râ te tahi atu vahine na ˈna te apoo pape e aita i faaitehia i te iˈoa, i te tahi ahu tapoˈi i nia i te auvaha o te apoo pape e ua tapoˈi i te reira i te huero maa. I to te taata a Abasaloma haereraa e imi ia raua, ua aratai ê teie vahine ia ratou. Ua paruru na vahine itoito e piti i te arii ta Iehova i maiti!—Sam. 2, 15:23-37; 17:​8-22.

⁴ Te faaite mai ra te Bibilia no nia e rave rahi tane e vahine o tei faatupu i te itoito. E mau tane e vahine ua itehia te iˈoa e te tahi atu aita, mea moni e mea veve, e tiaraa to te tahi atu aore ra aita. Ua faatupu râ ratou i te itoito e ua faaite i te faaroo ia Iehova. E tauturu to ratou aamu ia tatou i teie mahana.

Te faufaa o te pure

5-7. Mea nafea Paulo i te fanaˈoraa i te itoito no te faaruru i te patoiraa uˈana?

⁵ E nafea tatou ia pee i te itoito o te mau tane e vahine o te Bibilia? Ia haamanaˈo tatou e ere i te mea ohie no teie mau tane e vahine ia faatupu i te itoito. No to ratou iho anei puai i manuïa ˈi ratou i te taviniraa ia Iehova? Aita, te vai ra te tahi atu tumu. Eaha ïa?

⁶ A haamanaˈo na i te aposetolo Paulo. I Philipi, ua riri te hoê pǔpǔ taata ia ˈna e ia Sila, ua hutihia to raua ahu, ua tairi-noa-hia raua i te raau e ua hurihia raua i roto i te piha i roto roa e ua tuuhia to raua avae i roto i te raau. (Ohi. 16:12, 19-24) I muri aˈe i to raua matararaa mai, ua mǎtaˈu anei Paulo i te poro? E taata noa o Paulo, e ere i te mea maere e ua mǎtaˈu oia. Ua ite râ Paulo e te hinaaro ra Iehova ia poro noa o ˈna. Ua haere ïa o ˈna e poro i Tesalonia. Eaha te tauturu ia ˈna ia fanaˈo i te puai e te itoito no te haere i ǒ?

⁷ Ua papai o ˈna i muri iho: “Na mua ua haamauiuihia mâua e ua hamani-ino-hia i Philipi, mai ta outou . . . i ite. Noa ˈtu râ, ua horoa mai to tatou Atua i te mǎtaˈu ore no te faaite ia outou i te parau apî oaoa a te Atua a faaruru noa ˈi i te patoiraa uˈana.” (Tes. 1, 2:2) Ua ite Paulo e titauhia te itoito no te rave i ta te Atua i ani. Nohea mai to ˈna itoito? No ˈna iho anei teie itoito? Aita, “ua horoa mai to tatou Atua” na Paulo i te itoito. Ma te haehaa, ua pure o ˈna ia Iehova ia fanaˈo oia i te itoito. E ua pahono Iehova.

8. Mai ia Paulo, eaha ta tatou e nehenehe e rave ia fanaˈo i te itoito?

⁸ E nehenehe outou e rave mai ia Paulo. Eiaha e haapeapea e eita outou i te mea itoito no te mea aita to outou e puai taa ê. E nehenehe râ outou e pure ia Iehova ia fanaˈo outou i te itoito. Mea papu, e tauturu oia ia outou ia itoito i roto e rave rau tupuraa.—Ohi. 4:29.

9. No te aha e titauhia ia tatou ia pure ia Iehova no te fanaˈo hau atu â faaroo?

⁹ E nehenehe atoa outou e pure ia Iehova ia horoa hau atu â faaroo. Maoti to ˈna varua moˈa, e nehenehe Iehova e tauturu atu ia puai to outou faaroo. (Gal. 5:22, 23) E tauturu to outou faaroo ia aro ia Satani e ia vai taiva ore ia Iehova. (Eph. 6:16) Mea puai te faaroo e te parau ra te Bibilia e nehenehe tatou e upootia i nia i teie nei ao no te mea e faaroo to tatou. (Ioa. 1, 5:4) E itoitohia outou ia faatupu outou i te faaroo ia Iehova. Ia papu ia outou e tauturu mai Iehova ia faaruru tatou i te fifi, e itoitohia tatou i roto i te mau tupuraa atoa. E tumu ïa no te tahi Kerisetiano ia pure mai te mau aposetolo a Iesu: “A faarahi mai i to matou faaroo.”—Luka 17:5.

‘A faaitoito!’

10-11. No te aha Paulo i parau ai i te mau Kerisetiano i Ierusalema e to pihai iho mai e titauhia te itoito?

¹⁰ I to Paulo papairaa i te mau Kerisetiano Hebera i Ierusalema e to pihai iho mai, ua taa ia ˈna e faaruru ratou i te tau fifi mau. Ua tohu Iesu e haamouhia te oire, e fatata te reira i te tupu. (Luka 19:​41-44; 21:20-24) Mea nafea Paulo i te haamanaˈoraa ˈtu i te faufaa o te itoito? Taio faahou anaˈe i te parau fafau î i te here o Iehova, ta Paulo i faahiti i te omuaraa: “E ore roa vau e vaiiho ia oe, e e ore roa vau e faarue ia oe.” Mea nafea teie parau fafau i te tautururaa ia ratou? Ua papai faahou Paulo: “Ia itoito roa hoi tatou e ia parau: ‘O Iehova to ˈu tauturu. E ore au e mǎtaˈu. Eaha hoi ta te taata e nehenehe e rave i nia ia ˈu?’”—Heb. 13:5, 6.

¹¹ Aita te Bibilia e faataa papu ra i tei tupu i to Roma haamouraa ia Ierusalema i 70. Ua papu râ ia tatou e ua auraro maite te mau Kerisetiano taiva ore i ta Paulo aratairaa. Ua faatupu ratou i te itoito e ua auraro ia Iesu. Ua haamata ratou ‘i te horo i te mau mouˈa’ i te taime tano.—Luka 21:20, 21.

12. (1) Eaha te parau fafau te tauturu ia outou ia itoito ia fifihia outou? (2) Mea nafea vetahi i te faatupuraa i te itoito faahiahia i teie mau mahana hopea, e eaha ta outou i faaoti i te rave? (A hiˈo i te tumu parau tarenihia “A pee i to ratou itoito.”)

¹² E nehenehe atoa Iehova e horoa mai i te itoito i te mau taime e hinaaro ai outou i te reira, i teie nei e a muri aˈe. (Ezk. 38:1, 2, 10-12; Mat. 24:21) A haamanaˈo noa, ua fafau Iehova i te paruru ia tatou i te feia e turu ra ia Satani e ia Satani atoa. (Ezk. 38:19-23; Tes. 2, 3:3) E ore roa ˈtu o ˈna e faarue i tei here ia ˈna, e tei faatupu i te faaroo ia ˈna. No outou atoa te parau ta Iehova i faahiti no Iosua: “Ia itoito e ia puai oe.” (Ios. 1:7, 9, 18) A haamanaˈo atoa i ta Iesu i parau i ta ˈna mau pǐpǐ: ‘A faaitoito!’ Ua fafau Iesu e horoa mai i te varua moˈa o to ˈna Metua, e nehenehe outou e tiaturi e tapea o ˈna i ta ˈna i fafau. E horoa mai te varua moˈa i te itoito no te vai taiva ore ia Iehova. (Ioa. 14:26; 15:26, 27; 16:33) E nehenehe mau â outou e “faatupu i te itoito”!

13. Eaha te tauturu ia outou ia faatupu i te itoito i teie mahana?

¹³ A feruri na i te tau e hau i nia i te fenua taatoa, e farerei faahou tatou i te feia aita i moˈehia ia Iehova tei faahoˈihia mai i te ora. A feruri na, i te mau tane e vahine itoito tei faahitihia i roto i teie buka, e mea rahi atu â ta tatou e farerei! I roto i te ao a Satani, mea rahi tei mauiui e tei pohe atoa no to ratou taiva ore i te Atua. Ia faatia-faahou-hia râ ratou i roto i te ao apî, i to outou manaˈo e tatarahapa anei ratou e ua maiti ratou i te tavini ia Iehova? Mea papu, aita roa ˈtu! E no outou? Ia ohipa anaˈe outou e o ratou no te faariro i te fenua ei paradaiso, e tatarahapa anei outou i te faaiteraa i te itoito e te here no Iehova i tera mau mahana hopea? Mea papu, aita roa ˈtu! A faaoti papu ïa i te tavini noa ia Iehova ma te itoito tae roa i te hopea! E oaoa outou i te na reiraraa e a muri noa ˈtu!