HAAPIIRAA 56
Ia vai noa te auhoê i roto i te amuiraa
Ia amui anaˈe tatou e to tatou mau taeae, e pee tatou i ta te arii Davida i parau: “Mea maitai e mea au ia parahi amui te mau taeae ei hoê!” (Salamo 133:1) Eita e tupu oioi noa te auhoêraa. E tuhaa ta tatou tataitahi ia vai hoê noa.
1. Eaha te mea faahiahia i rotopu i te nunaa o te Atua?
Mai te peu e apiti oe i te putuputuraa a te tahi amuiraa i te tahi fenua, eita paha oe e taa i te reo, tera râ ua ite oe tei te fare oe. No te aha? No te mea, te haapii ra tatou i te Bibilia ma te faaohipa i te hoê â papai i te mau vahi atoa. E tutava tatou no te faaite i te here te tahi i te tahi. Noa ˈtu te vahi e ora ˈi tatou e “arue [tatou] paatoa i te iˈoa o Iehova, e ia tavini [tatou] ia ˈna ma te tahoê.”—Zephania 3:9.
2. Eaha ta oe e nehenehe e rave ia vai hoê noa?
“A here rahi . . . te tahi i te tahi ma to outou aau atoa.” (Petero 1, 1:22) Nafea oe e faaohipa ˈi i teie aˈoraa? Eiaha e hiˈo noa i te tiaraa tia ore o vetahi ê, a hiˈo râ i to ratou huru maitatai. Eiaha oe e amui noa e te feia hoê â huru ohipa e o oe, a tamata râ i te haamatau i te tahi atu mau taeae e tuahine tei taa ê e o oe. E haa rahi atoa tatou no te faaore i te mau huru aau tano ore e vai ra ia tatou.—A taio i te Petero 1, 2:17.a
3. Eaha ta oe e rave ia tupu te tahi fifi e te tahi Kerisetiano?
Mea hoê tatou, tera râ, e mea tia ore atoa tatou. Te tahi taime e inoino aore ra e haamauiui mai te tahi ia tatou. No reira, te faaite mai ra te Parau a te Atua ia tatou “a faaore noa . . . i ta ˈna hapa,” a na ô atoa ˈi: “Mai ia Iehova i faaore noa mai i ta outou ra, ia na reira atoa ˈtu outou.” (A taio i te Kolosa 3:13.) E haamauiui tatou ia Iehova i te tahi mau taime, tera râ e faaore mai o ˈna i ta tatou mau hapa. No reira, te hinaaro ra oia ia faaore tatou i te hapa a to tatou mau taeae. Mai te peu, ua ite oe e ua haamauiui oe i te tahi atu, a haavitiviti i te faatitiaifaro.—A taio i te Mataio 5:23, 24.b
A FAAHOHONU ATU Â
A hiˈo eaha ta oe e nehenehe e rave no te faatupu i te auhoê e te hau i roto i te amuiraa.
Eaha ta oe e rave no te faatupu i te hau?
4. A haapauma i te mau manaˈo oti noa
E hinaaro tatou e here i to tatou mau taeae atoa. Tera râ, mea fifi paha no tatou ia farii i te tahi e ere hoê â huru e o tatou. Eaha te tauturu mai? A taio i te Ohipa 10:34, 35, e a aparau i teie mau uiraa:
Te farii ra Iehova i to ˈna mau Ite no roto mai e rave rahi nunaa. E nafea oe e pee ai i te hiˈoraa o Iehova no nia i te feia e ere hoê â huru e o tatou?
Eaha paha te mau manaˈo oti noa e vai ra i to oe vahi, ta oe e hinaaro e patoi?
A taio i te Korinetia 2, 6:11-13, e a aparau i teie uiraa:
E nafea oe e vai piri noa ˈi i te mau taeae e tuahine mea taa ê to ratou huru oraraa?
5. A faaore i te hapa e a faatupu i te hau
Ua ineine noa Iehova i te faaore i ta tatou hapa noa ˈtu eita tatou e nehenehe e na reira no ˈna. A taio i te Salamo 86:5, e a aparau i teie mau uiraa:
Eaha te rahi o to Iehova faaoreraa i te hapa?
No te aha e mauruuru ai oe i ta ˈna faaoreraa i te hapa?
Eaha te mau tupuraa mea fifi no tatou ia faatupu i te hau e o vetahi?
Nafea tatou e pee ai i te hiˈoraa o Iehova e ia faatupu i te auhoê e to tatou mau taeae e tuahine? A taio i te Maseli 19:11, e a aparau i teie uiraa:
Ia inoino mai aore ra ia faariri mai te hoê taata ia oe, eaha ta oe e nehenehe e rave no te haamaitai i teie tupuraa?
Te tahi mau taime e faariri tatou ia vetahi ê. Ia tupu anaˈe te reira, eaha ta tatou e rave? A pata i te VIDEO, e a aparau i te uiraa i muri nei.
I roto i te video, eaha ta te tuahine i rave no te faatupu i te hau?
6. A hiˈo i te mea maitai i to oe mau taeae e tuahine
Ia piri noa tatou i to tatou mau taeae e tuahine, e ite tatou i to ratou mau huru maitatai e to ratou mau paruparu. E nafea tatou e haapao noa ˈi i to ratou mau huru maitatai? A pata i te VIDEO, e a aparau i te uiraa i muri nei.
Eaha te tauturu ia tatou ia ite noa i te huru maitatai o to tatou mau taeae e tuahine?
Te haapao atoa mai ra Iehova i to tatou mau huru maitatai. A taio i te Paraleipomeno 2, 16:9a, e a aparau i teie uiraa:
Eaha to oe huru ia ite oe e te tâuˈa mai ra Iehova i to oe mau huru maitatai?
Noa ˈtu te vai ra te hoê hape i roto i te hoê taiamani nehenehe, mea faufaa râ te reira. Hoê â huru no to tatou mau taeae e tuahine mea tia ore ratou, mea faufaa râ ratou no Iehova
TE MANAˈO O VETAHI: “Hou vau a faaore ai i ta te tahi hapa, ia faaite mai o ˈna e te hinaaro mau ra o ˈna i te reira.”
No te aha ia ru tatou i te faaore i ta vetahi ê hapa?
HAAPOTORAA
E nehenehe oe e tauturu ia vai noa te auhoêraa i roto i te amuiraa, ma te faaore i te hapa e ma te faaite i te here i te taatoaraa o to tatou mau taeae e tuahine.
Haamanaˈoraa
Nafea oe e haapauma ˈi i te manaˈo oti noa?
Eaha ta oe e rave ia fifi oe e te tahi Kerisetiano?
No te aha e hinaaro ai oe e pee i te hiˈoraa o Iehova no te faaore i ta vetahi ê hapa?
HIˈOPOA
A haapii e nafea hoê o te mau faahohoˈaraa a Iesu e tauturu ai ia tatou ia patoi i te haavaraa ia vetahi ê.
E titauhia anei ia tatou ia imi i te hau noa ˈtu ua ite tatou aita tatou i rave i te tahi ohipa ino.
“Te tatarahaparaa—te hoê taviri e tupu ai te hau” (Te Pare Tiairaa 1 no Novema 2002)
A hiˈo mea nafea te tahi i te maitiiti-ore-raa i te tahi atu.
A haapii nafea oe e faatitiaifaro ai i te hoê fifi e te hoê taata hou te reira e faatupu ai i te amahamaha i roto i te amuiraa.
“A faaafaro i te mau peapea na roto i te here” (Te Pare Tiairaa Me 2016)
a Te haaferuri ra te faataaraa hau 6 e nafea te here e turai ai i te mau Kerisetiano ia patoi i te haaparareraa i te mau maˈi pee.
b Te parau ra te faataaraa hau 7 e nafea ia faatitiaifaro i te ohipa imiraa moni e te ohipa i te pae o te ture.