HAAPIIRAA 49
E nafea to oe utuafare e oaoa ˈi? (Tuhaa 1)
Te tiaturi ra na hoa faaipoipo apî, e vai noa te oaoa ta raua i fanaˈo i to raua mahana faaipoiporaa e a muri noa ˈtu. E nehenehe te reira e manuïa. Ua ite te mau Kerisetiano mea maoro to ratou faaipoiporaahia e tei tutava i te faaohipa i te aˈoraa Bibilia, e nehenehe e manuïa.
1. Eaha te aˈoraa ta te Bibilia e horoa ra i te mau tane?
Ua faaoti Iehova o te tane te upoo o te utuafare. (A taio i te Ephesia 5:23.) Te hinaaro ra Iehova ia rave oia i te mau faaotiraa no te maitai o te utuafare. Te parau ra te Bibilia i te mau tane: “A here noa i ta outou iho vahine.” (Ephesia 5:25) Eaha te auraa? E faaite te tane î i te here i te hamani maitai i ta ˈna vahine, o raua anaˈe i te fare e i te vahi taata. E paruru e e aupuru oia i ta ˈna vahine i te pae tino e e haapao atoa oia i te tahi atu mau hinaaro to ˈna. (Timoteo 1, 5:8) Hau atu i te reira, e tauturu oia ia ˈna ia faatupu i te hoê auhoaraa piri e o Iehova. (Mataio 4:4) Ei hiˈoraa, e pure e e taio oia i te Bibilia e ta ˈna vahine. Ia na reira te hoê tane î i te here no ta ˈna vahine, e haamaitai oia i to ˈna auhoaraa e o Iehova.—A taio i te Petero 1, 3:7.
2. Eaha te aˈoraa ta te Bibilia e horoa ra i te mau vahine?
Te na ô ra te Parau a te Atua i te hoê vahine “ia faatura maite . . . i ta ˈna tane e tia ˈi.” (Ephesia 5:33) E nafea oia e na reira ˈi? E nehenehe oia e feruri no nia i te mau huru maitatai o ta ˈna tane e te mau tutavaraa ta ˈna e rave ra no te aupuru ia ˈna e ta raua mau tamarii. E faaite atoa oia i te faatura ma te turu i te mau faaotiraa ta ˈna e rave e ma te paraparau ma te hamani maitai ia ˈna e no nia ia ˈna noa ˈtu aita o ˈna e tavini nei ia Iehova.
3. E nafea na hoa faaipoipo e haapuai ai i to raua faaipoiporaa?
Te parau ra te Bibilia no na hoa faaipoipo: “E riro raua ei hoê.” (Mataio 19:5) Te auraa, e haa amui raua no te aro i te mau tupuraa o te nehenehe e haaparuparu i to raua here. E rave pinepine raua i te taime no raua no te faaite i to raua manaˈo e huru aau ma te here te tahi i te tahi. Eita raua e vaiiho i te tahi noa ˈˈe ohipa aore ra taata, taa ê atu ia Iehova, ia riro ei mea faufaa aˈe ia raua. E haapao atoa raua eiaha e faaite i te hoê haerea tano ore i nia i te tahi atu taata.
A FAAHOHONU ATU Â
A hiˈo eaha te mau faaueraa tumu Bibilia e nehenehe e haapuai i to oe faaipoiporaa.
4. Te mau tane: A here e a haapao maitai i ta outou vahine
Te parau ra te Bibilia i te mau tane ia “here i ta ratou iho vahine mai to ratou iho tino e tia ˈi.” (Ephesia 5:28, 29) Eaha te auraa? A pata i te VIDEO, e a aparau i te uiraa i muri nei.
Eaha te tahi mau tupuraa e faaite ai te hoê tane te here ra e te tâuˈa ra oia i ta ˈna vahine?
A taio i te Kolosa 3:12, e a aparau i teie uiraa:
E nafea te hoê tane e faaite ai i teie mau huru maitatai i roto i to ˈna faaipoiporaa?
5. Te mau vahine: A here e a faatura i ta outou tane
Te faaitoito ra te Bibilia i te hoê vahine ia faatura i ta ˈna tane noa ˈtu te tavini ra oia ia Iehova aore ra aita. A taio i te Petero 1, 3:1, 2, e a aparau i teie mau uiraa:
Mai te peu aita ta oe tane e tavini ra ia Iehova, mea papu e hinaaro oe ia tavini oia ia Iehova. I to oe manaˈo eaha te mea maitai aˈe: Ia poro tamau oe ia ˈna aore ra ia faaite i te hoê haerea tano e ia faatura oe ia ˈna? No te aha?
E nehenehe te mau tane e te mau vahine e rave amui i te mau faaotiraa maitai. I te tahi râ mau taime, eita te hoê vahine e farii i te faaotiraa a ta ˈna tane. E faaite paha oia i to ˈna mau manaˈo ma te mǎrû e te faatura, e haamanaˈo râ oia na Iehova i horoa i te hopoia i ta ˈna tane no te faaoti eaha te mea maitai aˈe no te utuafare. E turu ïa oia i te faaotiraa a ta ˈna tane. Ia na reira oia, e tauturu oia i te utuafare atoa ia oaoa. A taio i te Petero 1, 3:3-5, e a aparau i teie uiraa:
Eaha to Iehova huru ia faaite te hoê vahine i te faatura i ta ˈna tane?
6. E nehenehe oe e faaruru i te mau fifi i roto i to oe faaipoiporaa
Aita e faaipoiporaa tia roa. Mea tia ïa ia haa amui na hoa faaipoipo no te faaruru i te mau fifi. A pata i te VIDEO, e a aparau i te mau uiraa i muri nei.
I roto i te video, eaha te tahi mau tapao o te faaite ra ua atea ê na hoa faaipoipo te tahi ite tahi?
Eaha ta raua i rave no te haapuai i to raua faaipoiporaa?
A taio i te Korinetia 1, 10:24 e te Kolosa 3:13. Ia oti te mau irava i te taiohia, a aparau i teie uiraa:
E nafea te faaohiparaa i teie aˈoraa e haapuai ai i te hoê faaipoiporaa?
Te parau ra te Bibilia ia faatura tatou te tahi i te tahi. Te auraa, ia faaite i te hoê haerea mǎrû e te faatura. A taio i te Roma 12:10, e a aparau i teie mau uiraa:
Mea tia anei ia tiai te mau tane aore ra te mau vahine ia faaite na mua roa to ratou apiti i te faatura? No te aha oia aore ra no te aha aita?
TE MANAˈO O VETAHI: “Aita faahou to ˈu apiti e o vau i te mea piri roa mai na mua ˈˈe.”
E nafea oe ia faataa ˈtu e e nehenehe te Bibilia e tauturu ia raua?
HAAPOTORAA
E oaoa te hoê tane e te hoê vahine ia here raua te tahi i te tahi, ia faatura te tahi i te tahi e ia faaohipa i te mau faaueraa tumu Bibilia.
Haamanaˈoraa
E nafea te hoê tane e tauturu ai ia oaoa te faaipoiporaa?
E nafea te hoê vahine e tauturu ai ia oaoa te faaipoiporaa?
Mai te peu ua faaipoipohia oe, eaha te faaueraa tumu Bibilia e nehenehe e haapuai i to oe faaipoiporaa?
HIˈOPOA
A haapii i te mau ravea tano no te tauturu ia oe ia oaoa te oraraa ei utuafare.
A mataitai i te video o te haafaufaa ra i te mau haamaitairaa o te faaohiparaa i te aˈoraa a te Atua i roto i to oe faaipoiporaa.
A hiˈopoa eaha te auraa ia faatura i te upoo o te utuafare.
“E te mau vahine, no te aha e auraro ai i ta outou iho tane?” (Te Pare Tiairaa 1 no Me 2010)
Mea nafea te tahi hoa faaipoipo faarururaa i te fifi mai to raua faataaraa?
Ua haamaitai faahou mâuai to mâua faaipoiporaa maoti ta te Atua tauturu (5:14)