HAAPIIRAA 48
A maiti i to oe mau hoa ma te paari
E oaoa atu â tatou i te mau taime maitai e to tatou mau hoa piri, e faaitoito mai ratou ia tatou i te mau taime fifi. Te faaara mai ra te Bibilia ia tatou e ere pauroa te riro mai ei hoa maitai. E nafea ïa oe e maiti ai i te mau hoa maitai? A feruri i te mau uiraa i muri nei.
1. E nafea te mau hoa ta oe e maiti e ohipa ˈi i nia ia oe?
E pee tatou i te huru o te mau taata ta tatou e amuimui nei. E nehenehe te reira e riro ei mea maitai aore ra ei mea ino, e itehia te reira ia amuimui tatou e o ratou aore ra i nia i te reni faahoaraa. Mai ta te Bibilia e faahiti ra: “Te taata e haere ra e te feia paari, e paari ïa, te taata râ e amuimui e te maamaa [te feia aita e here ra ia Iehova], e fifi ïa.” (Maseli 13:20) E tauturu te mau hoa tei here e tei haamori ra ia Iehova ia oe ia vai piri noa ia ˈna e ia rave i te mau faaotiraa maitai. Te mau hoa râ aita e here ra ia Iehova, e faaatea ê ratou ia tatou ia Iehova. No reira te Bibilia e faaitoito mai ai ia maiti i to tatou mau hoa ma te paari! Mai te peu to tatou mau hoa e taata o te here ra ia Iehova, e ere o tatou anaˈe tei faufaahia, o ratou atoa ra. E nehenehe ïa tatou e “tamau i te faaitoito e i te tauturu te tahi i te tahi.”—Tesalonia 1, 5:11.
2. E nafea te mau hoa ta oe e maiti e ohipa ˈi i nia ia Iehova?
E maiti maitai Iehova i to ˈna mau hoa. “E hoa rahi . . . o ˈna no te taata afaro.” (Maseli 3:32) Eaha to Iehova huru ia maiti tatou i te mau hoa aita e here ra ia ˈna? E oto roa oia! (A taio i te Iakobo 4:4.) I te tahi atu pae, e oaoa Iehova e e faariro o ˈna ia tatou ei hoa no ˈna ia patoi tatou i te mau amuimuiraa iino e e piri atu â tatou ia ˈna e i te feia te here ra ia ˈna.—Salamo 15:1-4.
A FAAHOHONU ATU Â
A feruri no te aha te maitiraa i to tatou mau hoa e mea faufaa roa, e a hiˈo e nafea oe e nehenehe ai e faatupu i te auhoaraa o te haamaitai mau i to oe oraraa.
3. A ara i te amuimuiraa iino
E amuimuiraa iino te mau taata aita e here ra i te Atua e i ta ˈna mau ture aveia. A pata i te VIDEO, e a aparau i te uiraa i muri nei.
E nafea tatou e haamata ˈi i te amuimui e te feia aita e here ra ia Iehova?
A taio i te Korinetia 1, 15:33, e a aparau i teie mau uiraa:
Teihea huru taata e nehenehe e riro ei amuimuiraa iino no oe? No te aha?
A taio i te Salamo 119:63, e a aparau i teie uiraa:
Na te aha e faaite mai ia oe e hoa maitai te tahi taata?
E nehenehe te hoê apara pê e haapê i te taatoaraa. E nafea te hoê amuimuiraa iino e ohipa ˈi i nia ia oe?
4. E nehenehe te mau taata e ere mai ia tatou e riro mai ei hoa maitai no tatou
Te faahiti ra te Bibilia e piti taata no Iseraela i tahito ra, o Davida raua Ionatana. O Ionatana te mea paari aˈe ia Davida, e e tamaiti oia na te arii. E auhoaraa faahiahia to raua. A taio i te Samuela 1, 18:1, e a aparau i teie uiraa:
No te aha eiaha tatou e maiti noa i to tatou mau hoa hoê â faito matahiti e o tatou aore ra hoê â tiaraa e o tatou?
A taio i te Roma 1:11, 12, e a aparau i teie uiraa:
E nafea te mau hoa o te here ra ia Iehova e faaitoito ai te tahi i te tahi?
I roto i teie video, a hiˈo nafea te hoê taeae apî i te iteraa mai i te mau hoa i te mau vahi manaˈo-ore-hia. A pata i te VIDEO, e a aparau i te mau uiraa i muri nei.
I roto i te video, no te aha te metua o Akil i haapeapea ˈi no nia i to ˈna mau hoa i te fare haapiiraa?
I te haamataraa, no te aha o ˈna i hinaaro ai i teie huru auhoaraa?
Mea nafea oia i te faarururaa i te moˈemoˈe?
5. E nafea ia faatupu i te auhoaraa maitai?
A haapii e nafea ia ite i te mau hoa maitai, e e nafea oe e riro mai ai ei hoa maitai. A pata i te VIDEO.
A taio i te Maseli 18:24 e te 27:17, e a aparau i teie mau uiraa:
E nafea te mau hoa maitai e tauturu ai te tahi i te tahi?
Mai tera atoa anei to oe mau auhoaraa? Mai te peu aita, nafea oe e faatupu ai i te reira?
A taio i te Philipi 2:4, e a aparau i teie uiraa:
No te fanaˈo i te mau hoa maitai, ia riro atoa ïa oe ei hoa maitai. E nafea oe e na reira ˈi?
No te fanaˈo i te mau hoa maitai, ia riro atoa ïa oe ei hoa maitai
TE MANAˈO O VETAHI: “Mea maitai aˈe ia rahi te mau hoa i te faaea noa aita e hoa.”
Eaha ta oe e pahono?
HAAPOTORAA
Ia maiti tatou i to tatou mau hoa ma te paari, e faaoaoa tatou ia Iehova e e maitai-atoa-hia tatou.
Haamanaˈoraa
No te aha mea faufaa no Iehova ia maiti anaˈe tatou i te mau hoa?
Eaha te huru auhoaraa mea tia ia tatou ia ape?
E nafea oe e patu ai i te auhoaraa puai e te mau taata maitai?
HIˈOPOA
A hiˈo nafea te mau hoa maitai e nehenehe ai e tauturu ia tatou i te mau taime fifi.
A feruri i te mau taahiraa ta oe e nehenehe e rave no te maiti i te mau hoa maitai.
“Mea nafea vau ia maiti i to ˈu mau hoa?” (Pahonoraa i ta te feia apî e uiui nei [Buka 1], pene 8)
Eaha te tia ia oe ia ite no nia i te mau faahoaraa i nia i te reni natirara?
I roto i te aamu “Ua hinaaro vau i te hoê metua tane,” a hiˈo eaha te tumu te hoê tane i hiˈo faahou ai i ta ˈna huru maitiraa i to ˈna mau hoa.
“Ua taui te Bibilia i to ˈu oraraa” (Tumu parau o Te Pare Tiairaa)