Mai teihea Iehova?

No oe, eaha te mea e puta mai i roto i to oe feruriraa no nia ia Iehova? E Atua teitei oia, mea faufaa ore ïa tatou? Aore ra e Atua puai oia e eita ïa e nehenehe e faafatata ia ˈna? Mai teihea mau â Iehova? I roto i te Bibilia e ite ai oe i to ˈna mau huru maitatai e mea tâuˈa na ˈna ia oe.

1. No te aha eita ta tatou e nehenehe e ite i te Atua?

“E Varua te Atua.” (Ioane 4:24) Aita to te Atua e tino mai to tatou. E varua oia, e te ora ra oia i te raˈi i te hoê vahi eita ta tatou e nehenehe e ite ia ˈna.

2. Eaha te tahi o te mau huru maitatai o Iehova?

Eita ta tatou e nehenehe e ite ia Iehova. Ia haapii râ oe o vai o ˈna, e here atu â oe ia ˈna e to ˈna mau huru maitatai atoa. Te parau ra te Bibilia: “Mea au na Iehova i te parau-tia, e eita oia e faarue i tei ore i taiva ia ˈna.” (Salamo 37:28) “E Atua here rahi Iehova e te aroha hamani maitai” i te feia iho â ra e mauiui ra. (Iakobo 5:11) “Tei pihai iho Iehova i te feia o te mauiui ra, te faaora nei oia i te feia aau oto.” (Salamo 34:18, nota i raro i te api) Ua ite anei oe e nehenehe to tatou haerea e faaoto e e faainoino ia ˈna? (Salamo 78:40, 41) Area râ te taata e rave i te mea maitai e faaoaoa ïa ia ˈna.—A taio i te Maseli 27:11.

3. Eaha te haapapuraa e te here ra Iehova ia tatou?

Eaha te huru maitai faahiahia o Iehova? Te parau ra te Bibilia: “E here te Atua.” (Ioane 1, 4:8) E itehia to ˈna here ia taio tatou i te Bibilia, aore ra na roto i te mau mea ta ˈna i poiete. (A taio i te Ohipa 14:17.) Ei hiˈoraa, i to ˈna poieteraa ia tatou, ua nehenehe tatou e mataitai i te mau û haviti, faaroo i te mau pehe navenave e e tamata i te mau maa au mau. Te hinaaro ra Iehova ia oaoa tatou.

A FAAHOHONU ATU Â

4. Te varua moˈa, te puai ohipa o te Atua

Mai ia tatou e faaohipa ra i to tatou rima no te ohipa, e faaohipa atoa Iehova i to ˈna varua moˈa. Te varua moˈa o ta te Bibilia e parau ra, o te puai ohipa ïa o te Atua, e ere râ o te Atua. A taio i te Luka 11:13 e te Ohipa 2:17, e a aparau i teie mau uiraa:

• E “ninii” te Atua i to ˈna varua moˈa i nia i te feia o tei ani i te reira. No oe, o te Atua anei te varua moˈa, aore ra to ˈna puai ohipa? No te aha oe e parau ai mai tera?

Ua faaohipa Iehova i to ˈna varua moˈa no te faatupu i te mau mea faahiahia. A taio i te Salamo 33:6 e te Petero 2, 1:20, 21, e a aparau i teie uiraa:

• Mea nafea Iehova i te faaohiparaa i to ˈna varua moˈa?

5. To Iehova mau huru maitatai faahiahia

Ei tavini a te Atua, ua hinaaro Mose e ite maitai no nia i to ˈna Atua poiete. No reira Mose i parau ai: “A faaite mai na i to oe mau eˈa, ia ite au ia oe.” (Exodo 33:13) Ua faaite ïa Iehova ia Mose te tahi o to ˈna mau huru maitatai. A taio i te Exodo 34:4-6, e a aparau i teie mau uiraa:

• Eaha te tahi o te mau huru maitatai ta Iehova i faaite ia Mose?

• Eaha te mau huru maitatai o Iehova ta oe e au roa ˈˈe?

6. Te haapeapea ra Iehova no te taata

Ua faatîtîhia te nunaa o te Atua, te mau Hebera, i Aiphiti. E eaha to Iehova huru a mauiui ai to ˈna nunaa? A pata i te HARUHARURAA e a apee i te taioraa, aore ra a taio i te Exodo 3:1-10. E a aparau i te mau uiraa i muri nei.

HARUHARURAA: Te haapeapea ra Iehova no te mau Hebera e mauiui ra (2:45)

• Eaha ta teie aamu e faaite ra no to Iehova huru i nia i te taata e mauiui ra?—A hiˈo i te mau irava 7 e 8.

• I to oe manaˈo, e hinaaro mau anei Iehova e tauturu i te taata, e e nehenehe anei ta ˈna e na reira? No te aha oia, aore ra no te aha aita?

7. E nehenehe tatou e haapii mai i te mau huru maitatai o Iehova na roto i te mau mea ta ˈna i poiete

Te faaite ra Iehova i to ˈna mau huru maitatai na roto i te mau mea ta ˈna i poiete. A pata i te VIDEO. E a taio i te Roma 1:20 e a aparau i te uiraa i muri nei:

VIDEO: Te faaite ra te mau mea i poietehia i te here o Iehova: Te tino taata (1:57)

• Eaha te mau huru maitatai o Iehova ta oe e ite ra i roto i te mea ta ˈna i poiete?

HAAPOTORAA

E Varua ite-ore-hia Iehova. E rave rahi huru maitatai to ˈna, mai te here.

Haamanaˈoraa

• No te aha eita tatou e nehenehe e ite ia Iehova?

• Eaha te varua moˈa?

• Eaha te tahi o te mau huru maitatai o Iehova?

HIˈOPOA

A faahohonu atu â i to oe ite no nia ia Iehova e a haapii e maha o to ˈna mau huru maitatai faahiahia.

“Mai te aha te Atua?” (Te Pare Tiairaa N^o 1 2019)

A hiˈo i te mau haapapuraa e aita Iehova i roto i te mau mea atoa.

“Tei te mau vahi atoa anei te Atua?” (Tumu parau natirara)

A hiˈo no te aha te Bibilia i faaau ai i te varua moˈa o te Atua mai te rima o te Atua.

“Eaha te varua moˈa?” (Tumu parau natirara)

Mea fifi no te hoê taata matapo i te tiaturi e te here ra te Atua ia ˈna. A hiˈo no te aha to ˈna manaˈo i taui ai.

“E nehenehe ta ˈu e tauturu i te taata i teie nei” (Te Pare Tiairaa Novema 2015)