Rata a te Tino aratai
E te hoa Kerisetiano here e:
Mai ta oe i ite, te rahiraa tuhaa o te Bibilia, no nia ïa i te taata. E rave rahi tane e vahine taiva ore o tei faaruru i te mau fifi, “mai ia tatou te huru.” (Iakobo 5:17) Te vai ra vetahi o tei faateimahahia e te oto e te hepohepo. E no te tahi atu, ua mauiui roa ratou i te haerea o te mau melo o te utuafare aore ra i te mau hoa Kerisetiano. E rave rahi e faahapahapa ra ia ratou iho no te mau ohipa hape ta ratou i rave.
Ua faarue roa anei teie mau taata ia Iehova? Aita. Mai te fatu salamo, e rave rahi o te pure: “Ua haere ê au mai te mamoe i moe ra; e imi oe e faahoˈi i to tavini; aore hoi i moe ia ˈu ta oe parau.” (Salamo 119:176) Tera atoa anei to oe manaˈo?
Eita roa ˈtu Iehova e haamoe i to ˈna feia haamori o tei faaatea ê i te aua. Te tauturu nei râ oia ia ratou, maoti to ratou mau hoa Kerisetiano. E hiˈo mai tatou mea nafea Iehova i te tautururaa i ta ˈna tavini ra o Ioba, o tei faaruru e rave rahi ati, mai te fifi i te pae moni, mai te feia ta ˈna i here o tei pohe e te hoê maˈi ino mau. Ua faaruru atoa o Ioba i te mau parau haamauiui no ô mai i te feia tei manaˈohia e e haere mai ratou e turu ia ˈna. Aita râ oia i faarue ia Iehova, noa ˈtu e ua hape to ˈna manaˈo i te hoê taime. (Ioba 1:22; 2:10) Mea nafea Iehova i te tautururaa ia Ioba ia maitai faahou mai to ˈna feruriraa?
Ua tauturu Iehova ia Ioba maoti te hoê hoa Kerisetiano, o Elihu te iˈoa. I to Ioba faaiteraa i to ˈna hepohepo, ua faaroo o Elihu e ua turai te reira ia ˈna ia paraparau. Eaha ïa ta ˈna i parau? E faaino anei oia ia Ioba aore ra e tamata anei oia i te faahapa aore ra i te faahaama ˈtu? Ua hau aˈe anei Elihu ia Ioba? Aita roa ˈtu! Turaihia e te varua o te Atua, ua parau Elihu: “Inaha na te Atua i hamani iaˈu nei, mai ia oe atoa na te huru, e ua hamani atoa hia vau na roto i te araea.” Ua haapapu atu oia ia Ioba: “Eiaha oe e mataû i taˈu nei parau maere, e eiaha taˈu parau maitai e teiaha i nia ia oe.” (Ioba 33:6, 7, Te Bibilia Moˈa V.C.J.S., 1976) Aita Elihu i faateimaha ia Ioba, ua horoa râ oia i te aˈoraa î i te here e te faaitoitoraa ta Ioba e hinaaro mau ra.
Ua ite oe, ua faaineine matou i teie buka rairai ma te hoê â huru feruriraa. Ua faaroo na mua matou, ua hiˈopoa maite i te mau tupuraa e te mau manaˈo o vetahi o tei faaatea ê. (Maseli 18:13) Ua rave matou i te mau maimiraa i roto i te mau Papai, ua hiˈopoa matou i te mau aamu na roto i te pure no te ite mea nafea Iehova i te tautururaa i ta ˈna mau tavini i tahito ra o tei faaruru i te hoê â mau tupuraa. Ia oti, e amui matou i te mau faatiaraa Bibilia e i te mau tupuraa no teie mahana no te nenei i teie buka rairai. Te faaitoito atu nei matou ia oe ia hiˈopoa i teie buka rairai. Te haapapu atu nei matou i to matou here mau ia oe.
Tino aratai a te mau Ite no Iehova