Haamauruururaa hoê noa taata ua ora to ˈna lepera ia Iesu

Mai Ierusalema ˈtu, reva ihora Iesu i Epheraima, i te pae apatoerau hitia o te râ, a ore atu ai te opuaraa a te Sunederi e tupu. Ua atea roa ïa oia i to ˈna mau enemi. Faaea ihora oia i reira e ta ˈna mau pǐpǐ. (Ioane 11:54) No te mea râ te piri mai ra te Pasa 33, reva ˈtura oia i te pae apatoerau na Samaria ˈtu e tae atu ai i Galilea, to ˈna ïa tere hopea i reira hou a pohe ai.

I te haamataraa Iesu i te tere na tera e tera oire iti, farerei ihora oia hoê ahuru taata lepera. E nehenehe teie maˈi e ai riirii noa e rave rau mero o te tino, mai te manimani rima, te manimani avae aore ra te tariˈa. (Numera 12:10-12) Mea titauhia e te ture a te Atua ia Mose ia pii te hoê taata lepera “ua viivii, ua viivii,” e ia faaea i rapaeau mai i te puhapa.—Levitiko 13:45, 46.

Na te atea ïa to na ahuru taata lepera tuôraa mai ia Iesu: “E Iesu e, Orometua, aroha mai ia matou!” I to ˈna iteraa ˈtu ia ratou, faaue atura oia: “Haere a faaite ia outou i te mau tahuˈa.” (Luka 17:13, 14) Te faatura ra ïa oia i te ture a te Atua ia Mose, e faatia ra i te mau tahuˈa ia haapapu e ua ora te lepera o te feia tei roohia i taua maˈi ra, a nehenehe atu ai e faaea i rotopu i te feia oraora maitai.—Levitiko 13:9-17.

Te tiaturi ra na ahuru taata lepera i te mana o Iesu e faatupu i te semeio. Haere ihora ratou e hiˈo i te mau tahuˈa, aita â to ratou maˈi i ora ˈtura. A haere noa ˈi ratou, ua haamaitaihia to ratou faaroo ia Iesu. Ite aˈera ratou e ua ora to ratou lepera!

O na ahuru taata ua ora to ratou lepera, hoê anaˈe tei hoˈi mai e imi ia Iesu, e taata Samaria. No te aha? Ua mauruuru roa oia ia Iesu. “Faahanahana” aˈera teie taata ua ora to ˈna lepera “i te Atua ma te reo puai,” ua taa hoi ia ˈna e na te Atua i faaora i to ˈna maˈi. (Luka 17:15) I te iteraahia mai Iesu, tipapa ihora oia i mua ia ˈna e haamauruuru maira.

Na ô atura Iesu i te feia ati aˈe ia ˈna: “E ere anei hoê ahuru tei ora to ratou maˈi? Teihea roa ïa na iva? Aita ˈtu anei taata i hoˈi mai no te faahanahana i te Atua, o teie anaˈe râ taata nunaa ê?” Na ô atura oia i te taata Samaria: “A tia e a haere, no to oe faaroo i ora ˈi oe.”—Luka 17:17-19.

Ma te faaora i te lepera o na ahuru taata, ua faaite Iesu e te turu ra te Atua ra o Iehova ia ˈna. I tera taime, e au ra e hoê anaˈe o ratou tei nia i te eˈa e tae atu ai i te ora. I teie tau ta tatou e ora nei, aita te Atua e faaohipa ra ia Iesu no te faaora i te maˈi. No to tatou râ faaroo ia Iesu, e nehenehe tatou e na nia i te eˈa e tae atu ai i te ora, oia hoi te ora mure ore. Te faaite ra anei tatou i to tatou mauruuru, mai te taata Samaria?