Ua faatiahia mai Lazaro

I muri iho i to Iesu farereiraa ia Mareta na mua e ia Maria i muri iho i pihai iho i Betania, haere atura ratou i to Lazaro menema, te hoê ana tei opanihia i te hoê ofai. Faaue atura Iesu: “A turai i te ofai.” Faahiti maira Mareta i to ˈna haapeapea, ma te taa ore i ta Iesu i opua e rave: “E te Fatu, ua hauˈa oia i teie nei, a maha ˈtura hoi mahana.” Na ô atura râ Iesu: “Aita anei au i parau ia oe e ia tiaturi oe, e ite ïa oe i te hanahana o te Atua?”—Ioane 11:39, 40.

Turaihia ˈtura te ofai. Hiˈo aˈera Iesu i nia e pure aˈera: “To ˈu Metua, te haamauruuru nei au ia oe no to oe faarooraa i ta ˈu pure. Ua ite au e e faaroo noa mai oe ia ˈu. No teie râ rahiraa taata e haaati nei ia ˈu i pure atu ai au, ia tiaturi hoi ratou e na oe i tono mai ia ˈu.” Ua pure Iesu i mua i teie mau taata ia ite ratou e maoti te mana no ǒ mai i te Atua e tupu ai ta ˈna e fatata i te rave. Tuô atura oia: “Lazaro, haere mai i rapae!” Haere maira Lazaro i rapae, ua vehîhia to ˈna na avae e na rima e ua puohuhia to ˈna upoo i te hoê ahu. Na ô atura Iesu: “A tatara i te ahu i vehîhia ˈi oia e a tuu ia ˈna ia haere.”—Ioane 11:41-44.

Mea rahi te ati Iuda o tei haere mai e tamahanahana ia Maria raua Mareta, tei ite i teie semeio e tei tiaturi ia Iesu, ua haere râ vetahi e faatia i te mau Pharisea. Haaputuputu maira te mau Pharisea e tahuˈa tiaau i te Sunederi, te tiripuna teitei ati Iuda, to roto atoa te tahuˈa rahi o Kaiapha. Autâ aˈera vetahi o ratou: “E nafea ïa tatou? Mea rahi hoi te semeio ta tera taata e rave nei. Ia vaiiho tatou ia ˈna ia na reira noa, e tiaturi ïa te taata atoa ia ˈna, e e haere mai to Roma e rave i ta tatou vahi haamoriraa e to tatou nunaa.” (Ioane 11:47, 48) Noa ˈtu te haapapuraa a te tahi mau ite e “mea rahi hoi te semeio ta [Iesu] e rave nei,” aita teie mau taata i oaoa no ta te Atua e rave ra na roto ia ˈna. Ta ratou haapeapearaa rahi, to ratou ïa tiaraa e mana.

Te faatiaraahia mai Lazaro mai te pohe mai, e faahaparaa rahi ïa i te mau Sadukea aita e tiaturi ra i te tia-faahou-raa. Parau maira Kaiapha, te hoê Sadukea: “Aita outou e taa ra? Aita outou e ite ra e mea maitai aˈe no outou ia pohe hoê noa taata no te nunaa eiaha râ ia mou te nunaa taatoa?”—Ioane 11:49, 50; Ohipa 5:17; 23:8.

Na te Atua i rave ia paraparau Kaiapha mai tera, o ˈna hoi te tahuˈa rahi, e ere “no ˈna iho teie manaˈo.” Te hinaaro ra Kaiapha e parau e ia haapohehia Iesu ia ore oia e haafifi atu â i te mana e te ohiparaa a te mau aratai haapaoraa ati Iuda. Te faaite ra râ ta Kaiapha i tohu e na roto i to Iesu pohe e aufauhia ˈi te hoê hoo, eiaha noa no te mau ati Iuda, oia atoa râ no te taatoaraa o “te mau tamarii a te Atua tei purara ê.”—Ioane 11:51, 52.

Opua aˈera te Sunederi e haapohe ia Iesu, ta Kaiapha iho â i hinaaro. Ua faaarahia anei Iesu e Nikodemo, mero o te Sunederi mea hamani maitai ia Iesu? Ta tatou noa i ite, ua faarue Iesu i Ierusalema, a ore atu ai e pohe hou te taime faataahia e te Atua.