Ua papai ratou i to Iesu aamu

Te ite ra anei oe i te mau taata i nia i te hohoˈa?— Te vai ra o Mataio, Mareko, Luka, Ioane, Petero, Iakobo, Iuda e Paulo. I ora na teie mau taata i te tau o Iesu e ua papai ratou i to ˈna aamu. E hiˈo anaˈe eaha te parau no nia ia ratou.

E toru o ratou tei riro ei aposetolo e tei poro na muri ia Iesu. Ua ite anei oe o vai?— O Mataio, Ioane e Petero. Ua matau maitai na aposetolo Mataio e Ioane ia Iesu e ua papai raua taitahi i te hoê buka no nia i te oraraa o Iesu. Na te aposetolo Ioane atoa i papai i te buka Apokalupo e e toru rata tei parauhia Ioane 1, Ioane 2 e Ioane 3. E piti atoa rata ta te aposetolo Petero i roto i te Bibilia tei parauhia Petero 1 e Petero 2. I roto i te piti o ta ˈna rata, ua papai Petero i tei tupu a parau ai Iehova mai te raˈi mai ia Iesu: ‘O tau Tamaiti teie. Ua here e ua mauruuru roa vau ia ˈna.’

Te vai ra ˈtu â te tahi taata papai i nia i te hohoˈa tei faaite atoa i te tahi mau parau no nia ia Iesu i roto i ta ratou mau buka. O Mareko te tahi. Ua ite o ˈna i te ohipa atoa i tupu a tapeahia ˈi Iesu no te mea e au ra e tei reira oia i tera taime. O Luka te tahi atu. E taote oia e ua riro mai ei Kerisetiano i muri aˈe paha i te poheraa o Iesu.

E piti taeae o Iesu te itehia ra i nia i te hohoˈa tei papai atoa i te tahi buka o te Bibilia. Ua ite anei oe i to raua iˈoa?— O Iakobo e Iuda. Aita raua i tiaturi oioi ia Iesu. I manaˈo na hoi raua e e ua maamaahia o ˈna. I muri aˈe râ, ua tiaturi e ua riro ei Kerisetiano.

Te taata papai hopea i nia i te hohoˈa, o Paulo. Hou a riro ai ei Kerisetiano, o Saulo to ˈna iˈoa. Mea riri roa na ˈna i te mau Kerisetiano e i hamani ino atoa na oia ia ratou. Mea nafea Paulo i hinaaro ai e riro ei Kerisetiano?— I te tahi mahana, tei nia Paulo i te purumu no te haere i Damaseko, faaroo atura o ˈna i te hoê reo mai te raˈi mai. No Iesu tera reo! Ua ani o ˈna ia Paulo: ‘No te aha e mea ino roa ˈi oe i nia i te feia e tiaturi ia ˈu?’ I muri aˈe, ua taui Paulo e ua riro ei Kerisetiano. Na ˈna i papai 14 buka o te Bibilia, mai te rata i to Roma e tae atu i te rata i to Hebera.

Te taio ra tatou i te Bibilia i te mau mahana atoa, e ere anei?— Mea na reira hoi tatou e ite roa ˈi o vai Iesu. E hinaaro anei oe e haapii atu â no nia ia Iesu?—