Eaha te maitai o te mau ture a te Atua?

1. No te aha e hinaarohia ˈi te aratairaa?

E Atua paari oia tei poiete ia tatou. E Metua î i te here atoa e haapeapea ra no tatou. Aita oia i opua e na tatou e faatere ia tatou. (Ieremia 10:23) Mai te hoê tamarii rii e hinaaro i te aratairaa a to ˈna na metua, e hinaaro atoa tatou paatoa i te aratairaa a te Atua. (Isaia 48:17, 18) No reira oia i ho mai ai i te mau ture i roto i te Bibilia.—A taio i te Timoteo 2, 3:16.

Te haapii maira te mau ture a Iehova eaha te huru oraraa maitai roa ˈˈe i teie nei â e eaha te rave e maitai ai tatou e a muri noa ˈtu. Na te Atua i poiete ia tatou, mea tano iho â ïa ia pee ma te mauruuru i ta ˈna aratairaa.—A taio i te Salamo 19:7, 11; Apokalupo 4:11.

2. E nafea te Bibilia e aratai ai ia tatou?

E faaite mai te pue parau mau Bibilia tumu e nafea i roto e rave rahi tupuraa ia au i te hinaaro o te Atua. Area te mau ture, no te tahi ïa mau tupuraa papu maitai. (Deuteronomi 22:8) E feruri anaˈe no te ite eaha te rave ia au i te hoê parau mau Bibilia. (Maseli 2:10-12) Ei hiˈoraa, te haapii mai ra te Bibilia e e ô te ora no ǒ mai i te Atua. E aratairaa teie parau mau tumu.—A taio i te Ohipa 17:28.

3. Eaha na faaueraa faufaa roa?

Ua faahiti Iesu e piti faaueraa faufaa roa. Te faaite ra te faaueraa matamua e ua poietehia te taata ia ite, ia here e ia tavini ratou i te Atua ma te taiva ore. E haapao anaˈe ïa i teie faaueraa ia rave tatou i te mau faaotiraa. (Maseli 3:6) E fanaˈo te feia e na reira i te auhoaraa e te Atua, te oaoa mau e te ora mure ore.—A taio i te Mataio 22:36-38.

E aratairaa te piti o te faaueraa ia parahi hau noa e vetahi ê. (Korinetia 1, 13:4-7) No te faaohipa i teie faaueraa, e pee anaˈe i to te Atua huru i nia i te taata.—A taio i te Mataio 7:12; 22:39, 40.

4. Eaha te maitai o te mau ture a te Atua?

E haapii te mau ture a te Atua i te mau utuafare e nafea ia tahoê ma te here. (Kolosa 3:12-14) E paruru atoa te Bibilia ia ratou ma te haapii e e taairaa tamau te faaipoiporaa. E parau mau tumu teie.—A taio i te Genese 2:24.

E paruru te auraroraa i te mau ture Bibilia ia tatou i te pae materia e te aau. E pinepine, mea au aˈe na te mau paoti i te mau rave ohipa afaro e te itoito o te ora ra ia au i te mau ture Bibilia. (Maseli 10:4, 26; Hebera 13:18) E haapii atoa mai te Bibilia ia mauruuru i te mau mea hinaaro-mau-hia e ia haafaufaa i te auhoaraa e te Atua eiaha râ te mau mea materia.—A taio i te Mataio 6:24, 25, 33; Timoteo 1, 6:8-10.

E paruru te oraraa ia au i te mau ture Bibilia ia tatou i te pae tino. (Maseli 14:30; 22:24, 25) Ei hiˈoraa, ma te auraro i te ture a te Atua eiaha e inu hua i te ava e paruruhia ˈi tatou i te maˈi pohe e te ati purumu. (Maseli 23:20) E faatia Iehova ia inu i te ava ma te faatano râ. (Salamo 104:15; Korinetia 1, 6:10) Mea maitai te mau ture a te Atua o te haapii mai ra ia haapao maitai i ta tatou ohipa e to tatou atoa manaˈo. (Salamo 119:97-100) Aita râ te mau Kerisetiano mau e auraro ra i te mau ture a te Atua no te maitai noa e noaa mai, no te faahanahana atoa râ ia Iehova.—A taio i te Mataio 5:14-16.