Ua fanauhia anei Iesu i Titema?

AITA te Bibilia e faaite maira inafea to Iesu fanauraahia. Te horoa maira râ te reira i te tumu papu e faaoti ai tatou e aita oia i fanauhia i Titema.

E hiˈo mai tatou eaha te huru o te mahana i tera taime o te matahiti i Betelehema, i reira Iesu i te fanauraahia. E tau toetoe e te ûa te avaˈe ati Iuda Kisilu (e tano i Novema/Titema). O Tebeta (Titema/Tenuare) te avaˈe i muri iho. To taua avaˈe ra te anuvera raro roa ˈˈe o te matahiti, e te hiona i te tahi taime i nia i te mau vahi mouˈa. E hiˈo mai tatou eaha ta te Bibilia e faaite maira no nia i te ahuaraˈi o taua tuhaa fenua ra.

Te faaite ra te taata papai Bibilia o Ezera e e avaˈe matauhia iho â o Kisilu no te toetoe e te ûa. I muri aˈe i to ˈna parauraa e e nahoa taata tei putuputu na i Ierusalema i “te iva . . . o te marama,” Kisilu, i “te taau hoê o te mahana,” te parau ra Ezera e “te rurutaina ra” te taata no “te ûa rahi.” No nia i te huru o te mahana i taua taime o te matahiti ra, ua parau te feia iho i putuputu e: “E anotau ûa hoi teie, e ore matou e tia ia parahi noa i rapae.” (Ezera 10:9, 13; Ieremia 36:22) No reira iho â ïa te mau tiai mamoe o te faaea ra i taua mau tuhaa fenua ra e ore faahou ai e haere i rapaeau, ratou e ta ratou mau nǎnǎ, i te po i Titema!

Te parau ra râ te Bibilia e to rapaeau te mau tiai mamoe e tiai ra i ta ratou mau nǎnǎ i te po o to Iesu fanauraa. Oia mau, te faaite ra te taata papai Bibilia ra o Luka e i taua taime ra, te “tia” ra te mau tiai mamoe “i roto i te mau aua, i te tiairaa i ta ratou mau nǎnǎ” i pihai iho ia Betelehema. (Luka 2:8-12) A tapao na e te tia mau ra te mau tiai mamoe i roto i te mau aua, aita ratou e ori haere noa ra na rapaeau i te ao. To roto ta ratou mau nǎnǎ i te mau aua i te po. Te tuati ra anei te parau e te tia ra ratou i roto i te mau aua e te mahana toetoe e te ûa i Betelehema i Titema? Aita ïa. No reira, te faaite ra te mau tupuraa e haaati ra i te fanauraa o Iesu e aita oia i fanauhia i Titema.a

Te faaite maira te Parau a te Atua inafea mau â to Iesu poheraa, e maa parau rii noa râ ta te reira e horoa ra no nia i te taime o to ˈna fanauraa. Te haamanaˈo maira te reira i ta te arii Solomona i parau: “E maitai rahi to te iˈoa maitai i to te monoˈi hauˈa maitai ra; e te mahana e pohe ai ra i te mahana fanauraa.” (Koheleta 7:1) No reira, e ere i te mea maere ia horoa te Bibilia e rave rahi parau rii no nia i ta Iesu taviniraa e to ˈna poheraa, e maa parau rii noa râ no nia i te taime o to ˈna fanauraa.