Pene 5
Te fanauraahia o Iesu—Ihea e anafea?
UA TUU o Kaisara Auguso, te emepera no te Hau emepera Roma, i te hoê faaueraa e na ô ra e e tia i te taata tataitahi ia hoˈi atu i to ˈna oire fanauraa no te tapao i to ˈna iˈoa. No reira o Iosepha e haere atu ai i to ˈna vahi fanauraa, oia hoi te oire no Betelehema.
E rave rahi mau taata o tei haere e tapao i to ratou iˈoa i Betelehema, e hoê anaˈe vahi ta Iosepha raua o Maria i ite mai ei faaearaa no raua, oia hoi te hoê vahi faaearaa animala. I ǒ nei, i reira e tuuhia ˈi te mau asini e te tahi atu mau animala, o Iesu e fanauhia ˈi. Ua vehî aˈera o Maria ia ˈna i te ahu e ua tuu ihora ia ˈna i roto i te vahi amuraa maa a te mau animala.
Mea papu e na te Atua i turai ia Kaisara Auguso ia faaue i taua ture no te tapaoraa iˈoa ra. Maoti hoi i taua faaotiraa nei i nehenehe ai o Iesu e fanauhia i Betelehema, te oire ta te mau Papai i tohu atea mai e e riro oia ei vahi fanauraa no te faatere i tǎpǔhia maira.
E po faufaa mau teie! I rapaeau, i roto i te mau faaapu, ua haaati maira te hoê maramarama anaana i te hoê pǔpǔ tiai mamoe. O te hanahana ïa o Iehova! Ua faaite maira te melahi a Iehova ia ratou e: “Eiaha e mǎtaˈu inaha hoi e parau maitai ta ˈu e hopoi mai ia outou nei, o te riro ïa ei oaoaraa no te taata atoa. I nauanei hoi i fanau ai te Ora no outou i te oire o Davida, oia hoi te Mesia ra o te Fatu. Teie hoi te tapao e ite ai outou ia ˈna: e ite outou i taua tamaiti ra i te vai-noa-raa i roto i ta te puaa vairaa maa, ua vehîhia i te ahu.” I reira, ua fa maira e rave rahi mau melahi i te himeneraa e: “Ia haamaitaihia te Atua i nia i te raˈi teitei, ei hau to teie nei ao, e ia ite auhia mai te taata nei.”
I te revaraa te mau melahi ra, ua parau ihora te mau tiai mamoe ratou ratou iho e: “Mai haere tatou i Bete-lehema e hiˈo i taua mea ra ta [Iehova] i faaite mai ia tatou nei.” Ua haere oioi atura ratou e ua ite atura ia Iesu i te vahi ta te melahi i faaite mai. I to te mau tiai mamoe faaiteraa i te parau a te melahi, ua maere roa ˈˈera te feia atoa i faaroo i te reira. Ua tapea maite noa ˈtura o Maria i teie mau parau atoa i roto i to ˈna mafatu.
I teie mahana, e rave rahi teie e manaˈo nei e ua fanauhia o Iesu i te 25 no titema. Teie râ, e tau ûa e te toetoe atoa te avaˈe titema i Betelehema. Eita ïa te mau tiai mamoe e faaea i rapae e ta ratou mau nǎnǎ i taua tau o te matahiti ra. Hau atu, eita te Kaisara no Roma e titau i te nunaa o tei ineine noa hoi i te orure i te hau ia rave i te hoê tere tapaoraa iˈoa i te tau toetoe rahi. Eita e ore e ua fanauhia o Iesu i roto i te area o te omuaraa o te tau auhune. Luka 2:1-20; Mika 5:2.
▪ No te aha o Iosepha e o Maria i haere ai i Betelehema?
▪ Eaha te ohipa maere tei tupu i te po a fanauhia ˈi o Iesu?
▪ Nafea tatou e ite ai e aita o Iesu i fanauhia i te 25 no titema?