Tuhaa 4

Te faaara maira te Atua ia tatou no nia i ta ˈna mau opuaraa

1, 2. Nafea tatou e ite ai e te horoa maira te Atua i te mau pahonoraa i te feia o te uiui haere ra ma te aau rotahi?

E FAAITE mai iho â te hoê Atua here i ta ˈna mau opuaraa i te feia aau rotahi o te imi ra ia ˈna. Te faataa ra oia i te mau taata e uiui haere ra i te pahonoraa i te mau uiraa mai teie te huru, no te aha oia i faatia noa ˈi i te mauiui.

² Te na ô ra te Bibilia e: “Ia imi oe ia [Iehova] ra, e itea ˈtu oia e oe.” “E Atua tei te raˈi o tei faaite mai ïa i te parau moe.” “Aita a te Fatu ra a Iehova e peu i rave, maori râ ia faaite i ta ˈna parau i moe i tana ra mau tavini i te mau peropheta.”—Paraleipomeno 1, 28:9; Daniela 2:28; Amosa 3:7.

Teihea roa te mau pahonoraa?

3. I hea tatou e ite ai i te tumu te Atua e faatia noa ˈi i te mauiui?

³ E itehia mai te mau pahonoraa i te mau uiraa mai teie te huru, no te aha te Atua i faatia noa ˈi i te mauiui e eaha ta ˈna e rave no te arai i te reira, i roto i te papai o ta ˈna i faaurua no to tatou maitai. Taua papai ra, o ta ˈna ïa Parau, oia hoi te Bibilia Moˈa. “Te mau parau moˈa atoa i papaihia ra e mea faaurua mai ïa e te Atua, e e mea maitai ei haapiiraa, ei aˈoraa, ei faaiteraa hapa, ei faaite mai i te parau-tia ra; ia au roa te taata no te Atua i te mau ohipa maitatai atoa ra.”—Timoteo 2, 3:16, 17.

4, 5. No te aha te Bibilia e riro ai ei buka otahi roa?

⁴ Ua riro mau â te Bibilia ei buka otahi roa. Te vai ra i roto te mau papai papu roa ˈˈe no nia i te aamu o te taata e te faatia ra oia i te ohipa i tupu na mua roa ˈˈe i te poieteraahia te taata. Ua tano atoa oia no teie nei tau, inaha ua taaihia ta ˈna mau parau tohu e te mau ohipa e tupu ra i teie nei taime e e tupu atu a muri aˈe.

⁵ Aita ˈtu buka ê o tei turuhia no to ˈna papuraa i te pae no te aamu. Ei hiˈoraa, mea iti roa te mau papai a te feia tahito o te vai noa ra. Te vai nei râ e rave rahi mau papai tahito a te Bibilia, vetahi e mau vaehaa ïa e vetahi o te tuhaa taatoa: fatata e 6 000 o te mau Papai Hebera (na buka e 39 o te “Faufaa Tahito”) e tau 13 000 o te mau Papai Heleni Kerisetiano (na buka e 27 o te “Faufaa Apî”).

6. Nafea tatou e papu ai e te Bibilia no teie nei tau, hoê â ïa e to te tau i reira te Atua i faaurua mai ai ia ˈna?

⁶ Ua haapao te Atua Mana hope, o tei faaurua mai i te Bibilia, e ia faahereherehia te papuraa o te parau i roto i teie mau papai. No reira, e nehenehe e parau e hoê â huru te mau Bibilia o to tatou nei tau e te mau papai matamua i faauruahia mai. Te tahi atu tuhaa o te tauturu ia tatou ia taa i te reira, oia hoi no ǒ roa mai vetahi tuhaa o te mau Papai Heleni Kerisetiano i te area e hoê hanere matahiti i muri aˈe i te papairaa matamua. Mea varavara te mau papai iti e toe nei a te feia papai buka tahito o te ao nei i te naeahia i te area o tau senekele noa i muri aˈe i to ratou papairaahia.

Te hoê ô no ǒ mai i te Atua

7. Eaha te rahi o te parareraa o te Bibilia?

⁷ O te Bibilia te buka tei opere-rahi-roa ˈˈe-hia i roto i te aamu. Tau toru miria buka o tei neneihia. Aita ˈtu buka o tei tapiri atu i teie numera. E ua hurihia te Bibilia aore ra te tahi o to ˈna mau tuhaa na roto tau 2 000 reo. Te manaˈohia ra e e 98 % o te huiraatira o to tatou palaneta o te nehenehe e taio i te Bibilia.

8-10. Eaha vetahi mau tumu no reira e tia mau ai ia tatou ia tuatapapa i te Bibilia?

⁸ Mea papu maitai e e tia mau â ia tatou ia tuatapapa i te hoê buka o te parau ra e no ǒ mai oia i te Atua e te vai ra te mau tapao taa ê atu ia ˈna e i roto iho ia ˈna o te haapapu ra i to ˈna parau mau.a Te tatara ra oia i te tumu o te ora, te auraa o te mau tupuraa o te ao nei, e eaha te tupu a muri aˈe. Aita ˈtu buka o te faataa ra i te reira.

⁹ Oia mau, ua riro te Bibilia ei poroi a te Atua i te fetii taata nei. Na ˈna i aratai i to ˈna papairaa na roto i to ˈna puai ohipa, oia hoi to ˈna varua, maoti tau 40 taata o tei papai i teie buka. Te paraparau maira ïa te Atua ia tatou na roto i ta ˈna Parau, te Bibilia Moˈa. Ua papai te aposetolo Paulo e: “A farii mai ai outou i te parau a te Atua i ta outou i ite ia matou nei, aore outou i farii ei parau na te taata, ei parau râ na te Atua.”—Tesalonia 1, 2:13.

¹⁰ Ua parau o Abraham Lincoln, te 16raa o te peretiteni o te mau Hau amui no Marite, i te Bibilia, “te ô faahiahia roa ˈˈe ta te Atua i horoa mai na te taata . . . Ahiri e aita te Bibilia, eita ïa tatou e taa i te maitai e te ino.” I teie nei râ, eaha ta teie ô faahiahia roa ˈˈe e faaite maira no nia i te haamataraa mai te mauiui, te tumu te Atua i faatia ˈi noa ˈi i te reira, e eaha ta ˈna e rave no te arai i te mauiui?

[Nota i raro i te api]

[Hohoˈa i te api 10]

Te Bibilia, tei faauruahia mai e te Atua, o ta ˈna ïa poroi i te fetii taata nei