Pene 7

Iesu e te feia hiˈo fetia

TE HAERE maira te tahi mau taata mai te pae Hitia o te râ mai. E feia hiˈo fetia ratou—e feia e parau nei e e nehenehe ta ratou e tatara i te auraa o te mau fetia. I ǒ ratou, i te pae Hitia o te râ, ua ite ratou i te hoê fetia apî, o ta ratou i apee i nia i tau hanere kilometera e tae roa ˈtu i Ierusalema.

I to te feia hiˈo fetia taeraa ˈtu i Ierusalema, ua ani aˈera ratou: “Teihea te Arii fanau apî o te ati Iuda nei? ite aˈenei hoi matou i to ˈna fetia i te hitia o te râ, i haere mai hoi matou e tahopu ia ˈna.”

I to te arii ra o Heroda i Ierusalema, faarooraa i teie parau, ua peapea roa ˈˈera oia. Ua titau aˈera oia i te mau tahuˈa rahi e ua ani atura e ihea râ te Mesia e fanauhia ˈi. Ia au i ta te mau Papai e faaite ra, ua pahono maira ratou e: “Ei Bete-lehema.” I reira, ua titau ihora o Heroda i te feia hiˈo fetia e ua parau atura ia ratou: “A haere a maimi maite i taua tamaiti iti ra; e ia itea ˈtu ia outou, e hoˈi mai e faaite ia ˈu, ia haere atoa vau e tahopu ia ˈna.” I te parau mau râ, te hinaaro ra o Heroda ia itea mai te tamaiti no te taparahi ia ˈna!

I to ratou revaraa, ua tupu ihora te hoê ohipa maere mau. Ua na mua noa ˈtu te fetia ta ratou i ite i te pae Hitia o te râ ia ratou. E fetia taa ê mau teie, tei faataahia no te aratai ia ratou. Ua apee noa ihora te feia hiˈo fetia ia ˈna e tae noa ˈtu i te taime a mau ai oia i nia i te fare tei reira o Iosepha e o Maria.

I to te feia hiˈo fetia tomoraa ˈtu i roto i te fare, ua ite ihora ratou ia Maria e o Iesu, ta ˈna aiû iti. Ua piˈo aˈera ratou paatoa i mua ia ˈna. E ua rave maira ratou i roto i ta ratou mau pute i te mau taoˈa horoa oia hoi te auro, te libano e te mura. I muri iho, a faaineine ai ratou i te hoˈi no te faaite ia Heroda e teihea te aiû, ua faaara maira te Atua ia ratou na roto i te hoê moemoeâ e eiaha e na reira. Ua hoˈi aˈera ïa ratou i to ratou fenua na nia i te tahi atu eˈa.

I to outou manaˈoraa, na vai i horoa mai i te fetia e tere ra na roto i te raˈi no te aratai i te feia hiˈo fetia? A haamanaˈo na, aita te fetia i aratai tia ˈtu ia ratou ia Iesu ra i Betehelema. Ua arataihia râ ratou na mua i Ierusalema i reira to ratou farereiraa i te arii ra o Heroda, o te hinaaro ra e haapohe ia Iesu. O ta ˈna iho paha e rave ahiri e aita te Atua i rave i te tahi ohipa no te faaara i te feia hiˈo fetia ia ore e haere atu e faaite ia Heroda e teihea roa Iesu. Na te Diabolo ra o Satani, te enemi o te Atua, i hinaaro e taparahi ia Iesu, e ua faaohipa oia i teie fetia no te faatupu i ta ˈna opuaraa. Mataio 2:1-12; Mika 5:2.

▪ Na te aha e faaite ra e e fetia taa ê mau ta te feia hiˈo fetia i ite atu?

▪ Teihea o Iesu a itehia mai ai oia e te feia hiˈo fetia?

▪ Nafea tatou e ite ai e na Satani i horoa mai i te fetia no te aratai i te feia hiˈo fetia?