Pene 8

Ua ora ratou i te arii ino ra

UA FAAARA o Iosepha ia Maria no te faaite atu i te tahi parau apî ru. No fa noa maira te melahi a Iehova ia ˈna, e ua na ô maira: “A tia a rave i te tamaiti iti e tana metua vahine, a maue i Aiphiti, ei reira parahi ai e ia parau atu vau ia oe ra: e imi hoi Heroda i te tamaiti iti na e taparahi.”

Ma te ore e haamaoro, ua reva ˈtura ratou e toru ra. Auaa hoi, no te mea ua ite o Heroda e ua haavare te feia hiˈo fetia ia ˈna e ua hoˈi atu ratou i roto i to ratou fenua. A haamanaˈo na, ua faaue atu hoi oia ia ratou ia hoˈi mai e faaite ia ˈna ia ite-noa-hia ˈtu Iesu ia ratou. Ua riri roa o Heroda. No reira, no te haapohe ia Iesu, ua faaue atura oia ia taparahi-pauroa-hia te mau tamarii tamaroa tei taeahia e piti matahiti aore ra i raro mai i Betelehema e to ˈna mau mataeinaa. Ua faaoti oia i teie area matahiti ia au i te mau parau ta te feia hiˈo fetia no te pae Hitia o te râ mai, i faaite ia ˈna.

E ohipa riaria mau te taparahiraa o teie mau tamarii tamaroa iti! Ua tomo te mau faehau a Heroda i roto i tera e tera fare. E ia itea mai ia ratou i te hoê tamaroa iti, e haru mai ratou ia ˈna mai roto mai i te rima o to ˈna metua vahine. Aita tatou i ite e ehia rahiraa tamarii ta ratou i taparahi, tera râ, ua faatupu te mau auê e te oto rahi a teie mau metua vahine i te parau tohu bibilia a te peropheta a te Atua ra o Ieremia.

I roto i taua area taime ra, ua tapae atu o Iosepha e to ˈna utuafare ma te peapea ore i Aiphiti i reira ratou i ora ˈi. I te hoê râ po, ua fa faahou maira te melahi a Iehova ia Iosepha na roto i te hoê moemoeâ. Ua parau maira te melahi e: “A tia, a rave i te tamaiti iti e te metua vahine, a hoˈi i te fenua o Iseraela; ua pohe hoi tei titau mai ei taparahi i te tamaiti na.” Ua tupu ïa te tahi atu parau tohu a te Bibilia e na ô ra e e piihia te Tamaiti a te Atua i rapaeau ia Aiphiti, inaha, ua hoˈi atu te utuafare i to ˈna fenua.

Mai te mea ra e te hinaaro ra o Iosepha e hoˈi e faaea i Iudea, te vahi i reira to ratou oraraa na mua ˈˈe i to ratou hororaa i Aiphiti. Teie râ, ua ite ihora oia e ua riro mai o Arehelau, te tamaiti ino a Heroda, ei arii no Iudea e, na roto i te tahi atu moemoeâ, ua faaara ˈtura o Iehova ia ˈna i te ati. Ua haere aˈera ïa o Iosepha e to ˈna utuafare i te pae apatoerau e ua faaea ihora i te oire ra o Nazareta i Galilea. I reira, i roto i teie vahi tei atea ê i te pu o te haapaoraa ati Iuda, to Iesu paariraa. Mataio 2:13-23; Ieremia 31:15; Hosea 11:1.

▪ I te mea e aita te feia hiˈo fetia i hoˈi mai ia ˈna ra, eaha te ohipa riaria ta Heroda i rave, mea nafea râ to Iesu parururaahia?

▪ I to ˈna hoˈiraa mai mai Aiphiti mai, no te aha aita o Iosepha i faaea faahou i Betelehema?

▪ Eaha te mau parau tohu a te Bibilia tei tupu i roto i taua area taime ra?