3. No te aha te taata maitai e mauiui ai?
No te aha mea faufaa ia ite?
E ere i te mea tano ia mauiui te taata maitai. No reira, e manaˈo vetahi aita e apî ia rave i te mea maitai.
Ua feruri anei oe?
Te tiaturi ra vetahi, ê na te faataaraahia te mau fifi ta ratou e faaruru i roto i te oraraa. Area no te tahi atu, te manaˈo ra ïa te faaohipa ra te Atua i tera mau mauiui no te faautua i te taata ino aore ra no te tamata i te faaroo o te taata maitai. Te parau atoa ra vetahi eita e nehenehe e taa papu no te aha te taata maitai e mauiui ai. E hiti mai ïa te tahi mau uiraa:
Mai te peu ua faaoti-ê-na-hia to tatou oraraa, eaha ïa te apî ia atuatu i to tatou ea e ia rave i te faaotiraa maitai?
Mai te peu mea here na te Atua i te taata, no te aha ïa o ˈna e faaohipa ˈi i te mauiui no te tamata ia ratou?
NO TE ITE ATU Â
A mataitai i te video No te aha te Atua e vaiiho noa ˈi te mauiui? i nia i te jw.org.
Ta te Bibilia e parau ra
Eita te Atua e faaohipa i te mauiui no te faautua.
Pinepine, no te tupuraa manaˈo-ore-hia e tupu ai te mauiui.
“Eita te taata vitiviti e upootia noa i te hororaa, te taata puai i te aroraa, aita atoa ta te feia paari e maa noa, ta te feia maramarama e taoˈa noa, eita atoa te feia e ite to ratou e manuïa noa, no te mea e roohia ratou pauroa i te taime e te tupuraa manaˈo-ore-hia.”—KOHELETA 9:11.
E tupu atoa te mauiui no te mea e taata hara tatou e te vai ra ïa teie huru tia ore i roto ia tatou.
Pinepine te taata i te faahiti i te parau “hara” ia rave-anaˈe-hia te tahi ohipa ino. Tera râ i roto i te Bibilia, e tano atoa tera parau no te faataa i te huru tia ore e vai ra i roto i te taata atoa, te taata maitai e te taata ino.
“E taata hara vau mai te taime mai â i hapû ai to ˈu metua vahine ia ˈu.”—SALAMO 51:5.
Ua tuino te hara i te taata.
Ua tuino te hara i to tatou auhoaraa e te Atua poiete, oia atoa râ te mau mea atoa i poietehia. No reira i rahi ai te mauiui, te mauiui no te taata tataitahi e te mauiui no te huitaata atoa.
“Ia hinaaro vau e rave i te mea maitai, te ite ra vau i roto ia ˈu te hinaaro e rave i te mea ino.”—ROMA 7:21.
“Te autâ amui nei te mau mea atoa i poietehia e te mauiui ra ratou paatoa e tae roa mai i teie nei.”—ROMA 8:22.