1. O te Atua anei te tumu o to tatou mau mauiui?

No te aha mea faufaa ia ite?

Mea rahi te taata o te ore e hinaaro i te Atua no te mea te manaˈo ra ratou o ˈna te tumu o te mauiui.

Ua feruri anei oe?

Na roto anei i ta ratou ohipa aore ra parau, e rave rahi tia haapaoraa tei haapii o te Atua te tumu o to tatou mau mauiui. Ei hiˈoraa, e parau vetahi:

• Ia tupu te hoê vero, e faautuaraa ïa na te Atua.

• Ua rave te Atua i te ora o ta oe tamarii ia riro oia ei melahi na ˈna i te raˈi.

• Te turu ra te Atua i te mau nuu i roto i te tamaˈi, no reira i rahi ai te mauiui.

Aita anei râ te mau tia haapaoraa e hape ra i roto i ta ratou e haapii ra no nia i te Atua? Parau mau anei, o te Atua te tumu o to tatou mauiui?

Ta te Bibilia e parau ra

E ere te Atua te tumu o to tatou mau mauiui.

Ahani hoi tera iho â, eita ïa e tuati i to ˈna mau huru maitatai faaitehia i roto i te Bibilia. Ei hiˈoraa:

“E eˈa parau-tia anaˈe hoi to [te Atua]. . . . Mea parau-tia e mea afaro oia.”—DEUTERONOMI 32:4.

“E ore roa e tia i te Atua mau ia haa ma te ino, i te Manahope ia rave i te ino!”—IOBA 34:10.

“Eita te Manahope e faahuru ê i te parau-tia.”—IOBA 34:12.

Eita te Atua e farii i te haapaoraa o te ore e faaite i te parau mau no nia ia ˈna.

Mai te mau haapaoraa o te haapii ra o te Atua te tumu o to tatou mau mauiui, na reira atoa te mau pǔpǔ faaroo o te turu ra i te mau tamaˈi e te mau hamani-ino-raa.

“Te tohu nei te mau peropheta i te haavare i to ˈu [oia hoi to te Atua] iˈoa. Aita vau i tono ia ratou, i faaue ia ratou aore ra i paraparau ia ratou. E orama haavare, . . . e te haavare o to ratou aau ta ratou e tohu nei ia outou.”—IEREMIA 14:14.

Ua faahapa Iesu i te mau tia haapaoraa haavarevare.

“E ere o te feia atoa e parau mai: ‘E te Fatu, e te Fatu,’ te ô i roto i te Faatereraa arii o te raˈi, o te taata anaˈe râ o te rave i te hinaaro o to ˈu Metua i te raˈi. E rave rahi te parau mai ia ˈu ia tae i tera mahana: ‘E te Fatu, e te Fatu, aita anei matou i tohu ma to oe iˈoa, i tiavaru i te demoni ma to oe iˈoa e i faatupu i te mau ohipa mana ma to oe iˈoa?’ Teie ïa ta ˈu e parau atu ia ratou: ‘Aita roa vau i ite ia outou! Haere ê atu, outou e ofati nei i te ture!’”—MATAIO 7:21-23.