Ua tamahanahanahia i te taime i hinaaro roa ˈi i te reira

UA FANAUHIA vau i te oire Szerencs e ua paari i te oire iti Tiszaladány i te pae apatoerau hitia o te râ o Honegeria. I te avaˈe Tiunu 1991, ua haere au e vetahi hoa i te tahi vahi matau-ore-hia o te anavai Tisza. Ma te manaˈo e mea hohonu tera vahi, ua ouˈa vau i roto i te pape. Auê te hape e! Ua fati e toru ivi o to ˈu aˈî e ua ino to ˈu mootuaio. Ua ite te tahi hoa aita faahou vau e hauti ra e ua rave mǎrû ia ˈu no te huti mai i rapae hou vau a paremo roa ˈi.

Aita to ˈu hiroa i moe noa ˈˈe e ua taa ia ˈu e fifi rahi tei tupu. Ua niuniuhia te fare utuuturaa maˈi ru e ua tae mai hoê manureva tautau no te afai ia ˈu i te fare maˈi. Ua tâpûhia vau ia ore to ˈu mootuaio ia ino roa ˈtu â. I muri aˈe, ua afaihia vau i Budapest i roto i te tahi pu e haapao i te feia i tâpûhia. E toru avaˈe to ˈu tarava-noa-raa. Noa ˈtu e nehenehe ta ˈu e hauti i to ˈu upoo, ua ino roa to ˈu mau uaua iˈo mai te tapono e tae roa ˈtu te toea o te tino. E 20 matahiti to ˈu, e titauhia râ te tauturu a te tahi atu taata no te mau mea atoa. Ua tâhiti roa vau e ua hinaaro ïa e pohe.

I te taime a nehenehe ai au e hoˈi i te fare, ua haapiihia to ˈu na metua e nafea ia rave ia ˈu. E ere râ te ohipa nainai, ua rohirohi e ua hepohepo hoi raua. Hoê matahiti i muri aˈe, o vau tei topa i roto i te hepoheporaa. Ua tauturuhia vau e te tahi taata, to ˈna toroa te faaitoitoraa ia ˈu ia taui i to ˈu huru feruriraa noa ˈtu to ˈu tupuraa.

Ua haamata atoa vau i te feruri mau i te oraraa. No te aha tatou i hamanihia ˈi? No te aha vau i roohia ˈi i tera ati? Ua taio vau i te mau vea e buka no te imi i te pahonoraa. Ua tamata atoa i te taio i te Bibilia, mea paari roa râ no ˈu ia taa e ua taora ˈtura i te tauera. Ua aparau vau e te tahi perepitero, aita râ i mauruuru i ta ˈna i parau mai.

I 1994, e piti Ite no Iehova tei haere mai e farerei i to ˈu metua tane e ua ani atu oia ia aparau raua ia ˈu. Ua faaroo vau a faataa ˈi raua i te opuaraa a te Atua ia faariro i te fenua ei paradaiso e ia faaore i te maˈi e te mauiui. Mea maitai te reira, ua feaa râ vau i te tiaturi i tera mau parau. Noa ˈtu râ, ua farii au e piti papai no te taa i te Bibilia. Otiraa te reira i te taiohia e au, ua pûpû mai te mau Ite ia haapii i te Bibilia e ua farii au. Ua faaitoito atoa mai ratou ia pure.

I roto i ta matou mau aparauraa, ua pahonohia e rave rahi o ta ˈu mau uiraa maoti te Bibilia. Ua papu atoa e te tâuˈa mau ra te Atua ia ˈu. Ua tamau â vau i te haapii i te Bibilia e piti matahiti e i te 13 no Tetepa 1997, ua bapetizohia vau i te fare i roto i te fare hopuraa pape. Tera te tahi mahana oaoa roa ˈˈe o to ˈu oraraa.

I 2007, ua afaihia vau i Budapest no te faaea i te tahi fare no te mau huma mero. Ua nehenehe au e faaite ia vetahi ê i te mau ohipa faahiahia ta ˈu i haapii. Mea maitai anaˈe te mahana, e nehenehe au e haere i rapae no te aparau i te taata. E faaohipa vau i te tahi parahiraa faaterehia e te matini, na to ˈu râ taa e aratai i te reira.

No te maitai o te tahi utuafare o ta ˈu amuiraa, ua noaa ia ˈu te moni no te hoo mai i te matini roro uira afaifai o te haa ia hauti au i to ˈu upoo. Ma tera ravea, e nehenehe au e niuniu na roto i te Internet e e papai i te feia aita i to ratou fare a poro atu ai ta ˈu amuiraa. Ma te tauturu ia vetahi ê mai tera, ua aravihi atu â vau no te faaite i te taata i to ˈu manaˈo e ia ore ia haapao noa ia ˈu.

E nehenehe atoa vau e haere i te mau putuputuraa Kerisetiano. Ia tae atu vau, e amo to ˈu mau taeae Kerisetiano ia ˈu i nia i to ˈu parahiraa e tae roa i te tahua matamua o te tahi fare i reira e vai ai te Piha a te Basileia. I te putuputuraa, ia anihia te taatoaraa ia pahono, e amo te taeae i pihai iho ia ˈu i to ˈna rima no ˈu. E tapea oia i ta ˈu Bibilia aore ra ta ˈu buka a horoa ˈi au i ta ˈu pahonoraa.

E mauiui noa to ˈu tino, e hinaaro tamau vau i ta vetahi ê tauturu e te tahi mau taime, e hepohepo atoa. Auê râ tamahanahanaraa ia fanaˈo i te auhoaraa e te Atua ra o Iehova! Ua ite hoi au te faaroo ra oia ia haamahora ˈtu vau i to ˈu aau. E faaitoito atoa mai te taio-tamau-raa i te Bibilia e te mau taeae e tuahine Kerisetiano. Maoti to ratou auhoaraa, ta ratou tauturu e pure no ˈu, ua tia ia ˈu ia faaite noa i te manaˈo tano e te huru maitai.

Ua horoa mai Iehova i te tamahanahanaraa i te taime i hinaaro roa ˈi au i te reira. Maoti oia, te tiaturi atoa ra vau e fanaˈo i te ea maitai i roto i te ao apî. No reira, te tiai ru nei au i te taime e nehenehe ai au e ‘hahaere, e ouˈa e e haamaitai’ ia ˈna no to ˈna here e maitai faito ore.—Ohipa 3:6-9.