No teihea tumu tatou e hoo mai ai?

TE ITE nei tatou e rave rahi faatianianiraa. No te aha? No te faariro i te hinaaro ei mea faufaa roa. Ua taa i te mau taata faatianiani e na te vai ra i roto i te aau e turai ia hoo mai. No reira te mau poroi faatianiani e faatupu ai i te hinaaro e hoo mai i te taoˈa.

Ia au i te hoê buka (Why People Buy Things They Don’t Need): “Hou a hoo mai ai i te taoˈa, e pinepine te taata i te manaˈonaˈo ia ˈna e hoo maira i te reira.” No vetahi taata hiˈopoa, e ahoaho tera taata a hoo mai ai i ta ˈna i hinaaro. Te na ô ra Jim Pooler, taata faatianiani: “Ua anaanatae anaˈe te taata i te tahi mea, e faatianiani atu â te hoo taoˈa ia hoo mai i te reira ma te feruri ore.”

E nafea ia ore e hema i te feia faatianiani aravihi? Eiaha e haapao noa i to mau hinaaro. A feruri râ i te poroi faatianiani e te tupuraa mau.

TE POROI: “E maitai atu â to oe oraraa”

E hinaaro iho â tatou ia maitai atu â te oraraa. E rave rahi poroi faatianiani e turai mai ia manaˈo e a hoo mai ai i te taoˈa e tano e haamâhahia ïa to tatou mau hinaaro atoa mai te ea maitai aˈe, te oraraa peapea ore e te ahoaho ore e te taairaa maitai e vetahi ê.

TE PARAU MAU:

Ia rahi ta tatou taoˈa, e nehenehe te oraraa e fifihia. E titauhia ˈtu â hoi te taime e te moni no te atuaturaa ˈtu. No te tarahu, e ahoaho atu â atoa te taata a iti atu ai te taime no te utuafare e hoa.

Faaueraa: “Rahi noa iho hoi ta te taata nei taoˈa, e ere hoi tei taua taoˈa na ˈna ra to ˈna ora.”—Luka 12:15.

TE POROI: “E monihia ˈtu â oe”

Mea iti te faˈi e ua hoo mai ratou i te tahi taoˈa ia hiˈo mai vera ma. Te na ô ra râ Jim Pooler: “E hoo mai te taata no te tataˈu e te mau hoa, taata tapiri, hoa rave ohipa e fetii.” No reira e faaitehia ˈi te feia tuiroo e moni i roto i te mau hohoˈa faatianiani. Teie te poroi: “E nehenehe atoa oe e monihia!”

TE PARAU MAU:

E ore e itehia te mauruuru mau ia faaau noa tatou ia vetahi ê. Ua haamâha-anaˈe-hia te tahi hinaaro, oioi noa te tahi atu i te tupu mai.

Faaueraa: “O tei nounou i te ario ra, e ore ïa e mauruuru i te ario.”—Koheleta 5:10.

TE POROI: “A faaite o vai oe ma ta oe mau taoˈa”

Te faataa ra te hoê buka (Shiny Objects): “Te tahi ravea e faaite ai o vai tatou (aore ra te huru taata ta tatou e hinaaro ra), o ta tatou ïa mau taoˈa aore ra faaohiparaa i te reira.” No te turai ia hoo mai, e haapuroro te feia faatianiani i te tahi hohoˈa e faaite ra i te taata moni e tera taoˈa.

Eaha to oe manaˈo ia oe iho? Ia hiˈo mai vetahi ê, eaha ta oe e hinaaro ia parau ratou? E taata haviti oe? E tino nehenehe to oe? Ia au i te mau poroi faatianiani, ia hoo noa mai oe i te tahi taoˈa taa ê e riro ai oe mai ta oe i hinaaro.

TE PARAU MAU:

E ere na te tahi noa ˈˈe mea e taui aore ra e faatupu i te mau huru maitatai mai te haerea tia e te hapa ore.

Faaueraa: “To outou unauna . . . te tatuaraa i te auro ra, e te ahuraa i te ahu ra; o te taata moe râ o te aau.”—Petero 1, 3:3, 4.